Ttuknaxtë ja Jordán mëj nëë

¡OK IX! ¡Ja israelitëty tam ttuknaxtë ja Jordán mëj nëë! Per, ¿mä net ja nëë të nyëjxtäˈäy? Mä tadë tiempë nëgoo nety të yˈoktuunë. Ets ko ja israelitëty jam jyäjttë koombë nety ja nëë. ¡Per ix të ja nëë tyëtstäˈäy! ¡Ixë israelitëty windëˈëtstuujy jam nyaxtë dëˈën extëm ko ttuknäjxtë ja jikymyejnyë Tsaptspë! ¿Mä tëgekyë ja nëë të nyëjxtäˈäy? Min nˈokˈijxëm.

Ko ttukjäjty ja tiempë ets ja israelitëty ttuknaxtët ja Jordán mëj nëë, ta Joswee tˈanmääjy ja käjpn extëmë netyë Jyobaa të yˈanëˈëmxëty, ko ja saserdotëty yëˈë kyëˈëytyëp ja kääxë kajxyˈatypyë ets jawyiin yoˈoytyët. Ets ko nyëguwäˈäktët ta ja nëë tyëˈëtsäˈäny.

Ja saserdotëty ta tkëëytsyoˈondë ja kääxë kajxyˈatypyë ets jawyiin yoˈoytyë. Ko jyäjttë mä ja Jordán mëjnëë, ta nyëëdëjkëdë. Ja nëë extëm tyim woˈonë ets tyim këkˈäjnë. ¡Per netyë ja nëë jyënäjkˈadijky ko ja saserdotëty nyëguwäˈktë! ¡Yëˈë tuˈugë mëjˈäjtënë diˈibë Jyobaa tyuun ko ja nëë dyajtuˈudujky! ¡Ta ja nëë tyëtsy!

Ta ja saserdotëty diˈib myënëjxtëp ja kääxë kajxyˈatypyë ojts wyëˈëmdë itkujky extëm yam xyˈixy mä dibujë, jam tyënääytyë axtë ko ja israelitëty nyäjxtääytyë windëˈëtstuujy.

Ko niˈamukë nyäjxtääytyë, ta Jyobaa tˈanmääyë Joswee ets twinˈixët nimäjmajtskë yetyëjkë mëkatypyë ets nëjx jam tkëyëˈëktë mäjmajtskë tsää mä nety jam tyanëdë saserdotëty, ets tpëjtäˈäktët mä nety ja tsuˈum dyajnaxäˈändë. Net ko ja tiempë nyaxët ets ja mutsk ënäˈk dyajtëwët tiko jamë tadë tsää yˈity, ta yaˈanëëmët ko yëˈë ets yajjamyatsët wiˈix ja nëë tyëtsy ko ja saserdotëty tmëdëjkëdë ja Diosë kyääxë nëjoty. Ja tsää yëˈë tukjamyatsëdëp wiˈixë Jyobaa ttuunyë mëjˈäjtënë. Joswee ta nandëˈën tpëjtaky mäjmajtskë tsää mä nety jam të tyanëdë ja saserdotëty.

Taanëmë netë Joswee tˈanmääjy ja saserdotëty diˈib kyëëytyëp ja kääxë kajxyˈatypyë ets pyëtsëmdët. Ko pyëtsëëmdë, ta ja nëë jatëgok tyëjkë pëyëˈkpë.