Jyobaa yëˈë wyinˈijxë Josué

Moisés kanäk jëmëjt nety të twoowˈyoˈoy ja israelitëty, per të nety yaˈˈanëëmë ko jawaanë yˈakjukyˈatäˈäny. Jyobaa yˈanmääyë: “Kyaj mijts xyyajnaxäˈänyë israelitëty mä ja Nax diˈib Yajtukwandaktë. Per ndukˈixaampy”. Ta Moisés tˈanmääyë Jyobaa parë twinˈixët tuˈugë jembyë wintsën diˈib kyuentˈatëp ja nax käjpn. Jyobaa ta yˈatsooy: “Anëëmë Josué ko yëˈëts diˈib të nwinˈixy”.

Moisés ta ttukmëtmaytyaky ja nax käjpn ko yëˈë tsojk yˈooganë ets ko Jyobaa yëˈë të twinˈixyë Josué parë wyoowdëkëdët mä ja Nax diˈib Yajtukwandaktë. Ta netë Moisés tˈanmääyë Josué: “Këdii mtsëˈëgë. Jyobaa yëˈë mbudëkëyanëp”. Ok, ta Moisés pyatëjkë mä ja kopk diˈib xyëwˈäjtypy Nebo. Desde jamë Jyobaa tyukˈijxë ja nax diˈibë nety të yajtukwandaˈagyë Abrahán, Isaac etsë Jacob. Ko Moisés yˈoˈky ja netyë jyëmëjt 120.

Jyobaa ta tˈanmääyë Josué: “Tuknaxë Jordán mëjnëë ets tëkë Canaán. Ëjts mijts nbudëkëyaampy extëmëts të nbudëkë Moisés. Jamyats ets bom bom xykyäjpxët ja Ley. Këdii mtsëˈëgë, it amëk jotmëk. Nëjkx ets tun tukëˈëyë diˈib të ndukˈaneˈemy”.

Josué ta tkejxy nimajtskë käjpn niˈˈijxpë Jericó. Mä jatuˈukpë maytyaˈaky jap niˈigyë nnijawëyäˈänëm tijaty tuun jäjtë. Ko ja käjpn niˈˈijxpë jyëmbijttë, ta jyënandë ko mbäädë net tyëkëdë Canaán. Ta jakumbomë Josué tˈanmääy ja nax käjpn parë dyajpëdëˈëktët ja wyitëjk. Tim jawyiin, yëˈë kyajx ja saserdotëty diˈibë nety myënëjkxtëp ja Kääxë Kajpxyˈatypyë parë ttuknaxtëdë Jordán mëjnëë. Të nety ja mëjnëë kyoombety, per jantsy jeˈeyë nyëguwäˈktë ja saserdotëty, ta ja nëë pyëyëˈkˈadujky ets tyëtsy. Ta ja saserdotëty ttuknäjxtë, ko jyäjttë itkujky, ta ojts wyäˈkwëˈëmëdë axtë ko ja israelitëty ttuknäjxtääytyë. Ko duˈun tˈijxtë tyäˈädë miläägrë, ¿waˈandaa yëˈë tyukjamyajtsëdë wiˈixë Jyobaa ojts dyajnaywyaˈkxyëty ja mejnyë Tsaptspë?

Kanäk jëmëjt nyajxy, taanëmë israelitëty jyäjttë mä ja Nax diˈib Yajtukwandaktë. Mbäädë nety tkojtë jyëën tyëjk ets tmëdattë nyax kyäjpn. Nanduˈun nyiˈip kyojtët, dyaˈittëdë jyeˈxy pyeky ets tmëdattëdë yˈuubës kam. Yëˈë nety tuˈugë nax mä tijaty yˈity wyindëy, pääty ojts yajtijy ja nax mä jyamˈatyë letsyë etsë seerë päˈäk.