Ja nimäjmajtskpë käjpn niˈˈijxpë

Ko ja israelitëty tsyoˈondë mä Sinaí gopk, ta ttuknäjxtë ja it lugäärë äänëˈëk tëtsëˈëkpë diˈib Parán axtë jyäjttë mä tuˈugë lugäär diˈib xyëwˈäjtypy Cadés. Jamë Jyobaa tˈanmääyë Moisés: “Kax nimäjmajtskë yetyëjk diˈib nëjkx kyäjpn niˈˈixtë Canaán, ja lugäär diˈibëts nmoˈoyaambyë israelitëty, tuˈugaty xykyaxët mä tuˈukpë tëëm ääts”. Ta ja Moisés twinˈijxy nimäjmajtskë yetyëjk ets tˈanmääy: “Nëjkxtë Canaán ets ix tundë pën oyë nax parë tijaty nip ngojëm. Ixtë nanduˈun pën mëkatyë jäˈäy ets pën yëˈë tyuktsënääytyëbë wittëjk o pën täˈtspëkyë jëën tëjk”. Ta ja yetyëjkëty tsyoˈondë parë ojts nyëjkxtë Canaán. Nan ojts nyijkxyë Josué mëdë Caleb.

Kyum 40 xyëëw, ta jyëmbijttë ja käjpn niˈˈijxpë. Tmëjäjttë iigë, granaadë etsë uubës, ets duˈun jyënandë: “Jantsy oyë nax, per mëkatyë jäˈäy ets jantsy këjxmaty nyabotsyëty ja nax käjpn”. Perë Caleb, ta jyënany: “¡Mbäät nmëmadakëm! Joˈom nˈokˈijxëm”. ¿Tidaa ko Caleb duˈun jyënany? Yëˈko mëdë Josué tyukˈijxpajttë Jyobaa. Per ja nimäjkpë, jyënandë: “Kyaj nëjkxëm, yëˈko jantsy yenyaty jamë jäˈäy. Kyaj dyuˈunëty extëm ëtsäjtëm, duˈun xyˈixäˈänëm extëmë muˈu o pujtpë”.

Ta ja israelitëty tsyëˈkëdë ets tyëjkëdë abajt kutujkpë, ta jyënandë: “Nˈokwinˈijxëm tuˈugë jäˈäy diˈib xywyoowˈyoˈoyëm ets njëmbijtëm Egipto. ¿Ti ninëjkxäˈänëm Canaán? ¿Parë jamë jäˈäy xyyaˈoˈkëm?”. Josué mëdë Caleb ta jyënandë: “Nˈokmëmëdoˈowëmë Jyobaa. Yëˈë xykyuentˈatäˈänëm, këdii mtsëˈëgëdë”. Per ja israelitëty kyaj tmëjpëjtaktë. Niˈigyë dyaˈoogandë Josué mëdë Caleb.

¿Ets ti tyuunë Jyobaa? Ta tˈanmääyë Moisés: “Kajaats tijaty të ndukmëdunyë israelitëty, per duˈunyëmëts kyaj xymyëmëdowdë. Päätyëts nyajwëˈëmäˈändë 40 jëmëjt mä tyäˈädë lugäärë äänëˈëk tëtsëˈëkpë, axtë ko yˈoˈktäˈäytyët. Yëˈëyë yˈuˈunk yˈënäˈkëty etsë Josué mëdë Caleb, jukyˈatandëp mä ja nax diˈibëts të ndukwandaˈagyë israelitëty”.