Nimäjmajtskë käjpn niˈijxpë

OK IXË tyäˈädë ääytsyäˈäm ujtstsäˈäm diˈibë tyäˈädë yetyëjk kyëëytyëp. Ok ixë tadë uubës tuk mëj jënony, pes nimajtskë yetyëjk jam tkëˈëytyë. Ets ok ixë tadë iigë mëdë tsäjpˈyoo. ¿Mä tmëtsoondë tyäˈädë ääytsyäˈäm ujtstsäˈäm? Jam Kanán. Jamyats ko Kanán jam tsyënääyë Abra̱a̱n, Isa̱a̱ mëdë Jakoob. Per ko ja yuu jyamˈäjty, ta Jakoob mëdë fyamilyë ojts nyëjxnëdë tsënaabyë Ejiptʉ. Ko nyajxy ja tiempë 216 jëmëjt, ta Moisés jatëgok tmëjëmbity ja israelitëty jam Kanán. Ets tyam jam yajpäättë Kades, mä ja lugäärë äänëˈëk tëtsëˈëkpë.

Jam Kanán axëkjäˈäyëtyë jäˈäy. Päätyë Moisés tkejxy nimäjmajtskë käjpn niˈijxpë ets tˈanmääjy: Nëjx ok ixtë pën mayë jäˈäy jam tsyëënëdë, ets pën mëkatyëty. Ok ixtë nandëˈën pën oyë nax ets nip ngojëm. Ets mëjäˈttëbë ääytsyäˈäm ujtstsäˈäm diˈib jam ijtp.

Ta ko jyëmbijttë ja käjpn niˈijxpë ta tˈanmääytyë Moisés: Extëm jamë nax tyim oyˈäjnë. Ta ttukˈijxtë ja ääytsyäˈäm ujtstsäˈäm. Per nimäjk ta jyënandë: Tadë jäˈäy diˈib jam tsënääytyëp extëm tyim päjkˈyenyatyˈäjnëdë ets tyim mëkatyˈäjnëdë. Xyaˈoˈkëmëˈë ko nbëjkëyäˈänëmë nyax.

Ko dëˈën ja israelitëty tmëdoodë ta tsyëˈkëdë ets jyënandë: Nek oyxyëp të ndimˈoˈkëm jap Ejiptʉ o ndimˈoˈkëm yä. Oˈktäˈäyëmë net jam tsipoty ets yajmënëjxtäˈäytyëbë netë nëdoˈoxyˈäjtëm etsë nˈuˈunkˈäjt nˈënäˈkˈäjtëm. ¡Nek min nˈokˈijxëmë wiinkpë wintsën en lugäärë Moisés diˈib xymyëjëmbijtëm Ejiptʉ!

Per majtsk ja käjpn niˈijxpë diˈib xyëˈäjttë Joswee mëdë Kalep myëbëjktë Jyobaa. Ojts tnaxkäjxtë ja israelitëty ets tˈanmääytyë: Katë mtsëˈëgëdë. Jyobaa kyaj xymyastutëm. Pojënë njaˈabëjkëmë tadë nax. Per ja israelitëty kyaj tmëdoogujkëdë, axtë jyayaˈoogandë Joswee mëdë Kalep.

Ta Jyobaa jyantsy jotˈambejky, ta tˈanmääyë Moisés: Ni tuˈuk diˈib 20 jyëmëjt myëdäjtypy axtë mëjäˈäybyäätpë kyatëkët jam Kanán. Kyaj tmëdattë mëbëjkënë, oy të tjaˈixtë mëjˈäjtënë diˈibëts të nduny Ejiptʉ, ets diˈibëts të nduny yä. Pääty 40 jëmëjtë net yä tsyënääyëdittët axtë ko yˈoˈktäˈäytyët. Yëˈëyë Joswee mëdë Kalep tëkëdëp Kanán.