Joswee tyëkë wintsën

MOISÉS jatëkëyan Kanán mëdë israelitëty. Päätyë Jyobaa tˈanmääjy: Jyobaa, tunë mayˈäjtënë minëts nˈoktuknaxyë tyäˈädë Jordán mëj nëë, etsëts nˈixëdë tadë naxë oybyë. Per ta Jyobaa yˈanmääyë: ¡Kyaj! ¡Katë dëˈën mnekyjënaˈany! ¿Mnijäˈäp tiko dëˈënë Jyobaa yˈanmääyë?

Yëˈko yëˈë mëdë Arón kyaj ojts tmëjkugäjxëdë Jyobaa ko ja kaats ojts twopy, kyaj tˈanmääytyë ja israelitëty ko Jyobaa yëˈë nety ja nëë yajpëtsëmaampy. Päätyë Jyobaa yˈanmääyëdë ko kyaj yajtëkëyäˈänëdë Kanán.

Të nety kanäk poˈo nyäjxnë mä ja Arón yˈooky, ko Jyobaa tˈanmääyë Moisés: Mënëjxë Joswee mä Elyaza̱a̱r, ta netë käjpn xyˈanëëmëdët ko Joswee yëˈë diˈibë net tunäämp wintsën. Moisés ta ttuuny dëˈën extëmë Jyobaa yˈanmääyë, extëm yam xyˈixy mä dibujë.

Ta netë Jyobaa tˈanmääyë Joswee: Jotmëk mˈitët, ets katë mtsëˈëgë. Mijts diˈib mwoyoˈoyaambyë israelitëty ets xyajtëkët jam Kanán mä tadë nax diˈibëts të ndukwandaˈaky, ets kyaj nmastuˈudäˈäny.

Ta netë Jyobaa tˈanmääyë Moisés ets pyatëkët mä ja kopk diˈib xyëˈäjtypy Nebo diˈib ijtp mä nyaxë Moˈap. Ets jam kopk këjxm tkuyˈixët ja nyaxë Jordán mëj nëë ets ja oybyë nax diˈib Kanán. Jyobaa ta jam yˈanmääyë: Tyäˈädë dëˈënë nax diˈibëts ndukwandakë yˈuˈunk yˈënäˈkë Abra̱a̱n, Isa̱a̱ mëdë Jakoob. Tyamëts mijts të ndukˈixy, per kyaj nyajtëkëyaˈany mä tadë nax.

Mä tadë kopk Nebo, jam yˈoˈkyë Moisés. Ja netyë jyëmëjt tmëdaty 120. Mëknëmë nety ets kyajnëmë netyë yˈijxënë myaˈaty. Ja israelitëty mëk ojts tjantsy nyimay tjantsy nyidäjtë, ets tjantsy nyijëëjy tjantsy nyiyaxtë Moisés. Per diˈib jotkujk mooyëdë yëˈko tamë nety ja wiinkpë wintsën, Joswee.