Moisés twopy ja kaats

NYAJXY kanäk jëmëjt... ¡10 jëmëjt, 20 jëmëjt, 30 jëmëjt 39 jëmëjt! Ets ja israelitëty kyajnëm pyëtsëëmnëdë mä ja lugäärë äänëˈëk tëtsëˈëkpë. Perë Jyobaa yëˈë diˈib ijxˈijt kuentˈäjtëdë nëˈën jam dyajnäjxtë ja xëë jëmëjt. Manaa ojts tyukjëˈxëdë. Xëëny ojts yajtuˈuyoˈoyëdë mëdë nimäˈä, ets koots ojts kyudëˈxëdë mët tuk yaˈpeˈegyë jëën. Ja wyit nyijam kyaj kyëˈtsy ets ni ja tyeky kyatsayujteˈky.

Ja kujk nyaxy 40 jëmëjt mä ja israelitëty pyëtsëëmdë Ejiptʉ. Ets tyam jam yajpäättë Kades mä ojts yˈokˈijtpëdë ko pyëtsëëmdë Ejiptʉ, netpë ja Moisés tkejxy ja nimäjmajtskpë käjpn niˈijxpë jam Kanán. Yam Kades yˈoˈkyë Miiriam ja myëgaˈaxë Moisés. Ets yam mä jatëgokë israelitë tpäättë amay jotmay.

Ko kyaj mä nëë tpäättë. Ta tyëjkëdë abajt kutujkpë ets tˈanmääytyë Moisés: Nek oyxyëbëts të ndimˈooktë. ¿Tikots xymyëbëtsëëmdë Ejiptʉ ets të xymyëmindëts yä mä ni ti kyaˈityë jeˈxy peky? Ni iigë, ni uubës ni tsäjpˈyoo ets ni jeˈeyë nëë diˈibëts nˈuuktëp.

Ta ja Moisés mëdë Arón ojts tmënuˈkxtäˈäktë Jyobaa mä ja tabernakulo, ta Jyobaa tˈanmääyë Moisés: Yajtuˈukmukë tadë käjpn jam kaats winduujy. Ets mä nety jam të xyajtuˈukmuky ta xymyëgäjxëdë tadë kaats. Ets ta pyëtsëmäˈänyë kom nëë ets nyëˈuuktëdë jäˈäy etsë jëyujk animal.

Ta ja Moisés dyajtuˈukmujktääyë israelitë, ets tˈanmääjy: ¡Mëdowdë miitsëty pënaty kyaj tmëbëktë Dios! ¿Yäätsë net ëjts mëdë Arón nyajpëtsëmëdë nëë mä tyäˈädë kaats ets mnëˈuuktët? Ta ja Moisés twojpy ja kaats majtsk ok, ta kom nëë jyantsy pyëtseemy mä ja kaats. Ta nyëˈuktë niˈamukë jäˈäy ets tëgekyë jëyujk animal.

Perë Jyobaa ta ttukjotˈambejkyë Moisés mëdë Arón. ¿Mnijäˈäp tiko? Yëˈko Moisés mëdë Arón jyënandë ko yëˈëjëty yajpëtsëmandëp ja nëë mä ja kaats. Ets kyaj nety yëˈë dyajpëtsëmäˈändë, yëˈë netyë Jyobaa diˈib ja nëë yajpëtsëmaampy. Päätyë Jyobaa yˈanmääyëdë: Miitsëty kyajtsë ngäjpn xymyëdëkëdët Kanán.

Ta ja israelitëty ojts tsyoˈonëdë Kades ets ta jyäjttë mä ja kopk diˈib xyëˈäjtypy Or. Jam kopkëjxy, jamë Arón yˈoˈky. Ja netyë jyëmëjt tmëdaty 123. Ja israelitëty mëk ojts tnimay tnidäjtë ja Arón ets 30 xëë tnijëëjy tniyaxtë. Ta yëˈë netë Elyaza̱a̱r ja myäängë Arón diˈib nyiwintsënˈäjtë saserdotëty.