Kyaj tkuytyuundë ti wyandaktë

Jyobaa duˈun tˈanmääyë Moisés: “Patëkë kopkëjxy mäts nyajpääty. Jam nmoˈoyaˈanyë nˈanaˈamënëts diˈibëts ngëxjäˈäyaampy mä tsäätsetyën”. Ta Moisés pyatëjkë ets ja jam yˈijty 40 xyëëw ets 40 tsyuˈum. Ko nety jam yajpääty, ta Jyobaa tkëxjääy ja Mäjkpë Mandamientë mä majtsk pedasë tsäätsetsy ets ta yajmooyë Moisés.

Ko waanë yˈijty, ta ja israelitëty wyinmääytyë ko të ja Moisés jyaˈaytyëgooyëndë. Pääty tˈanmääytyë Aarón: “¡Ntsojktëbëts pën diˈibëts xytyuˈumoˈoytyëp. Yaˈoyë tuˈugë dios!”. Aarón ta yˈatsooy: “Yajmindë oorë diˈib mmëdäjttëp”. Ta dyajtukˈëˈtsë ja oorë parë ojts dyajkojy tuˈugë awinax diˈib këxëˈkp extëmë tsäjpkääˈuˈunk. Ta ja israelitëty jyënandë: “¡Tyäˈädë tsäjpkääˈuˈunk, yëˈë duˈun ndiosˈäjtëm diˈib të xyyajpëtsëˈëmëm Egipto!”. Ta tnixëëwduundë ets tˈawdäjttë ja tsäjpkääˈuˈunk diˈib oorë. ¿Axëëgëdaa ko duˈun yˈadëtstë? Axëëk, yëˈko të nety twandäˈäktë ko yëˈëyë Jyobaa yˈawdatandëp. Per kyaj tkuytyuundë ja wyandakën.

Jyobaa yˈijx ti nety tuun jäjtëp, pääty tˈanmääyë Moisés: “Jëjptäˈäk mä ja israelitëty, yëˈë ko kyajts jap xymyëmëdowdë. Yëˈë jap yˈawdäjttëp tuˈugë dios diˈib kyaj tyëyˈäjtënëty”. Ta Moisés tmëjënajky ja majtskpë tsäätsetsy.

Ko netyë Moisés jyäˈtanë mä ja israelitëty të nyaynyikojëdë, ta tmëdooyë jäˈäy jyantsy ëw jyantsy yäˈäxtë. Ko jyajty, tapë nety twinˈats twinbuttë ja tsäjpkääˈuˈunk ets tˈawdattë. Moisés ta jyantsy jyotˈambëjky ets tnaxkugäˈtsë ja majtskpë tsäätsetsy ets ta pyuˈuwäˈkxtääy. Ta netyë dyajkutëgooy ja awinax ets ta dyajtëëyë Aarón: “¿Wiˈixënë israelitëty të mdimtunyëty parë të xyyaˈoyë tyäˈädë axëkˈäjtën?”. Aarón ta yˈatsooy: “Këdii mdimjotˈambëjkojy, mijts mnijäˈäwëp wiˈix jyaˈayˈattë. Yëˈë nety tsyojktëp tuˈugë dios, päätyëtsë oorë të nyajtukˈëëtsë ets ta të pyëtsëmyë tyäˈädë tsäjpkääˈuˈunk”. Aarón kyajxyëp duˈun yˈadëtsy. Ta Moisés jatëgok pyatëjkë kopkëjxy ets tˈamdooy tpëjktsooyë Jyobaa parë tpokymyaˈkxët ja nax käjpn.

Jyobaa pyokymyaˈkx ja israelitëty diˈib jënandë ko myëmëdowäˈänëdë. ¿Këdii jëjpˈamë nety ets tmëmëdowdëdë Jyobaa etsë nanduˈunë Moisés?