Jyobaa dyakyë yˈanaˈamënë

NAA myajtsk poˈojëbë netyë israelitë pyëtsëmdë Ejiptʉ, ko jyäjttë mä tuˈugë kopk diˈib xyëˈäjtypy Sinaˈii o diˈib nandëˈën yajtijp Oreb. Yä mä Moisés ojts tˈixy ja ujts yeeny ko ja Dios ojts myëgajxyëty. Ta yä ja israelitëty ojts nyaynyikojëdë ets jam tuk tiempë yˈijttë.

Moisés ta pyatëjkë kopkëjxy ets ta ja israelitëty ojts wyëˈëmdë. Jamë Moisés yˈanmääyë Jyobaa ko yëˈë tsyojkypy etsë israelitëty myëmëdowëdët ets tkäjpnˈatët aduˈuk. Ta ko ja Moisés jyënajky ta tˈanmääjy ja israelitëty wiˈixë netyë Jyobaa të jyënaˈany. Ta ja israelitëty jyënandë ko myëmëdowandëbë Jyobaa ets ko oy yëˈë kyäjpnˈatëdët.

¿Mnijäˈäp ti netë Jyobaa tyuun? Yëˈë yajpëtsëëmë jok jam kopk kutum ets tjantsy yajnojktakyë anaa jëtsuk. Ta net tˈanmääjy ja kyäjpn: Ëjtsë dëˈën Jyobaa diˈib mDiosˈäjttëp ets të mjuudëdë jap Ejiptʉ. Ta net tmooyë tyäˈädë anaˈamënë: Ëjtsë dëˈën jeˈeyë xyˈawdattëp kyaj xyˈawdatëdë wiink dios.

Ta tˈakmoojy ja taxtujkë anaˈamënë o mandamientë. Ja israelitëty mëk jyantsy tsyëˈkëdë ta tˈanmääytyë ja Moisés: Nek tim maytyäˈäk mijts mëdë Dios, yëˈko tsëˈkëdëpts nˈooktët kotsë Dios xymyëgäjxtët.

Ok ta Jyobaa tˈanmääyë Moisés: Pat ja yam kopkëjxy. Yëˈë nmoˈoyaampy majtsk pedasë tsää mäts të ngëxjäˈäy diˈibëts ntsojkypy etsë israelitë ttundët. Ta ja Moisés pyejty jatëgok jam kopkëjxy. Ta jam yˈijty 40 xyëë 40 ux.

Moisés may ojts tjantsy axäjë Diosë yˈanaˈamënë diˈib myoˈoytyëp ja israelitëty. Ta tkujäˈäyëtyaajy. Ta nandëˈënë Dios tmoojy majtsk pedasë tsää mä nety të tkëxjäˈäy ja mäjkpë anaˈamënë, diˈibë nety të tˈokmëdoobë ja israelitëty. Tyäˈädë anaˈamënë ja txëˈaty Mäjkë Mandamientë.

Tyäˈädë Mäjkpë Mandamientë jëjpˈam ets ja israelitëty tmëmëdowdët, per nandëˈën ja wiingatypyë anaˈamën diˈib ja Dios mooyëdë. Extëm tuˈuk jyënaˈany: Mtsokëbë mDios Jyobaa mët tëgekyë mjot mgorasoon, mët tëgekyë mjot mwinmäˈäny ets mët tëgekyë mjot mëjää. Ets ja tuˈuk jyënaˈany: Mtsokëbë mëguˈuk extëm mijts mnaytsyokyëty. Jesukristʉ Diosë yˈUˈunk, jyënany ko tyäˈädë majtskpë anaˈamënë diˈibë Dios myoojy ja kyäjpn, yëˈë diˈib mas jëjpˈam. Ok tijaty njantsy nyijawëyäˈänëm mä Jesukristʉ ets mä wiˈix tyukniˈijxë.