Ëxpëjkën 14
¿Wiˈixë Jyobaajë tyestiigëty yˈityë tyuunk tukniwääbë?
¿Näˈä tsyondakyë tyuungë Jyobaajë tyestiigëty diˈib tyam jaˈäjttëp? (1)
¿Ti tyuundëp ko tyuˈukmuktë Jyobaajë tyestiigëty? (2)
¿Mä tpëktë meeny sentääbë diˈib yajtuundëp? (3)
¿Pën myënejxypyë jëjpˈamˈäjtënë mä tuˈuk tuˈugë naymyujkën? (4)
¿Diˈibë tuˈukmujkënë mëjatypyë nandëˈën tyuundëp jëmëjt jëmëjt? (5)
¿Tijaty yajtuump mä kyopkë Testiigëty ets nandëˈën mäjaty yajpäätyë dëˈëmbë lugäär abëtsemy Nyaxwinyëdë? (6)
1. Tadë tuunk diˈib tyam tyuundëbë Jyobaajë tyestiigëty ja tsyondaky naa 1870. Tim jawyiin ja nety yajtijtë Biiblyë Ëxpëjkpë, per mä tadë jëmëjt 1931 yajxëëmooytyë Jyobaajë tyestiigëty, extëm yajpääty mä Biiblyë (Isaías 43:10). Yˈëxpëjktsondaky niwaanë Jyobaajë tyestiigëty, ta dëˈënyë dëˈënyë nyimayëndë axtë të jyäjnë miyonkˈam diˈibë net tyam ëwäˈx käjxwäˈxtëp 230 paˈis naxy.
2. Nimaybyë Jyobaajë tyestiigëty nyaymyukëdë tëgëk okë tuˈukpë sëmään. Myajwoop ets mnëjxët mä tyuˈukmuktë (Ebreeʉsʉty 10:24, 25). Tadë ëxpëjkënë diˈib jap näjxp yajpääty mä Biiblyë, tsyondaˈaky ets kyugëxë mëdë nuˈkxtakën, ets nandëˈën mëdë «ëy diˈibë mëët ja Dios yajmëjawë» mët tëgekyë jot korasoon (Éfesʉ 5:18, 19). Mbäät tyëkë oy pyënëty, kyaj jap pën yaˈamdoyë meeny (Matewʉ 10:8).
3. Nimaybyë Jyobaajë tyestiigëty nyaymyukëdë mä tuˈugë Tëjk mä yˈËxpëktë. Tyäˈädë Tëjk mä yˈËxpëktë adëyë kyojyëty, ets yëˈë Testiigëty të tkojtë namayˈäjtën. Jap kyaj xyˈixäˈänyë kruus o oy tyim diˈibëtyë awinax. Tadë meeny sentääbë diˈib yajtuundëp, jap tjuuttë mä tadë meeny diˈib yajnayäjkp. Jap tap yˈity tuˈugë käjë mä nyipetyë meeny diˈib yajnayäjkp ets pënatyë tsojkënë myëdäjtypy tnayakäˈändë meeny mbäät jap tpëjtäˈäktë (2 Korintʉ 9:7).
4. Mä jyaˈaty tuˈuk tuˈugë naymyujkën japˈäjtpë mëjäˈäytyëjk diˈib ijxˈijt kuentˈäjtp. Yëˈëjëty myënëjxtëbë jëjpˈamˈäjtënë mä yaˈëxpëktë (1 Timotee 3:1-7; 5:17). Myëdäjttëbë tuumbë diˈib pudëjkëdëp mä ja naymyujkën (1 Timotee 3:8-10, 12, 13). Per ni yëˈë mëjäˈäytyëjk ets ni tuumbë diˈib pudëjkëdëp kyaˈity mëj mä ja jäˈäy nyaymyukëdë (2 Korintʉ 1:24). Kyaj yajxëëmoˈoytyë tëgatsy (Matewʉ 23:8-10). Kyaj wyit nyijam tpëjtäˈäktë tëgatsy, nan kyaj tˈaxäjëdë myëjuˈuny ko tyundë. Yëˈë mëjäˈäytyëjk xondaˈaky yˈää xondaˈaky jot dyaktë ja Diosë yˈëwij kyäjxwijënë mä ja jäˈäy nyaymyukëdë. Tnëˈëmoˈoy ttuˈumoˈoytyë jäˈäy ets tjotkujk moˈoytyë jäˈäy ko tpäättë amay jotmay (Santya̱ˈa̱gʉ 5:14-16; 1 Peedrʉ 5:2, 3).
5. Jyobaajë tyestiigëty jëmëjt jëmëjt nandëˈën tyuˈukmuktë jantsy nimay. Jyäjtmujktäˈäytyë ninëˈën nyamyukëdë mäjatyë käjpn, parë tmëdooˈitäˈändë ëwij käjxwijënë jëjpˈambë diˈib miimp mä Biiblyë. Kogoo dëˈën tyuˈukmuktë ta nyëbattë pënaty myëdunandëbë Dios (Matewʉ 3:13-17; 28:19, 20).
6. Nueva York jap yˈityë kyopkë Jyobaajë tyestiigëty. Jap yajpäätyë mëjäˈäytyëjk diˈib myëdäjttëp kajaajë Diosë yˈëxpëjkën ets yëˈë yˈijxtaapy wiˈix tyundë Jyobaajë tyestiigëty abëtsemy Nyaxwinyëdë, yajtijtë Grupë diˈib Wooyoˈopy. Abeky jyaˈaty 100 naxyë lugäär, mä jäˈäy tyundë namayˈäjtën, dyajpëtsëmdë tëgekyë ëxpëjkpajtën diˈib mä Biiblyë ta net tˈagajxwäˈxtë, ets nandëˈën ttukniwits ttuknimayëdë wiˈix yaˈëwäˈx yajkäjxwäˈxëdë Diosë yˈää yˈayuk. ¿Tiko xykyatuknibëjtäägë ets nëjx xykyuˈixyë tyäˈädë lugäär mä tyundë Testiigëty?