MYËDAXTUJK PËKY
Awdatë Jyobaa mëdë mfamilyë
“Awdattë diˈibë yajkoj ja tsäjp [etsë] naxwinyëdë.” (Diˈibʉ Jatanʉp [Apocalipsis] 14:7)
Extëm të xyˈixy mä tyäˈädë foyetë, Biiblyë myëmiimpy mayë käjpxwijën diˈib mbäät mbudëkëty mëdë mfamilyë. Jyobaa tsyejpy parë mˈitët jotkujk. Nan wyandakypy ko pën mbëjtakypy jëjpˈam, mˈaxäjëp nanduˈun tukëˈëyë ti myajtëgoyˈajtypy (Matewʉ 6:33). Dios tsyejpy ets oy mëët mˈitët. Pääty, juudë tiempë parë xyajkëktëkëdë mnaymyayë mët yëˈë, pes nitii duˈun kyatsobääty extëm ko oy mˈitët mëdë Dios (Matewʉ 22:37, 38).
1 YAJKËKTËKË MNAYMYAYË MËDË JYOBAA
BIIBLYË JYËNAˈANY: “Ëjts miits xytyeetyˈattëp, es miitsëty nˈuˈunkˈat nˈënäˈkˈattëp. Dëˈën jyënaˈany ja Dios” (2 Korintʉ 6:18). Jyobaa itäämp oy mët mijts, ets mbäät xymyëwingony ko xymyënuˈkxtäˈägët. Yëˈë xyˈanmäˈäyëm: “Nuˈkxtäˈäktë janääm jatsojk” (1 Tesalonicenses 5:17, Traducción del Nuevo Mundo). Oy nyayjawëty ko xytyukmëtmaytyäˈägëdë mˈamay mjotmay ets tijaty mwinmaapy (Filipʉs 4:6). Ko mnuˈkxtäˈägët mëdë mfamilyë, ta tpëkäˈändë kuentë ko parë mijts jantsy tamë Dios.
Per nan tsojkëp xymyëdooˈitët wiˈixë Dios jyënaˈany. ¿Wiˈix? Ko xyˈëxpëkëdë Biiblyë etsë ëxpëjkpajn (Salmo 1:1, 2). Pawinmay diˈib mjäjtypy (Salmo 77:11, 12). Nan jëjpˈam mnëjkxët mä tyuˈukmuktë Dios mëduumbëty parë xymyëdooˈitët wiˈixë Dios jyënaˈany (Salmo 122:1-4).
Nan mbäät kyëktëkë mnaymyayë mëdë Jyobaa ko xynyimaytyäˈägët. Ets mas niˈigyë xymyëwingonäˈäny ko duˈun xytyunët (Matewʉ 28:19, 20).
DIˈIB MBÄÄT XYTYUNY:
Juudë tiempë parë mnuˈkxtäˈägët ets xykyäjpxëdë Biiblyë jabom jabom
Pudëkë mfamilyë parë jawyiin tpëjtäˈäktëdë Diosë jyaˈa, ets ok, tijaty tyukxondäˈägandëp
2 TUKˈIT TUKXON MÄ MDIOSˈAWDATY MËDË MFAMILYË
BIIBLYË JYËNAˈANY: “Mëwingondë Dios, es yëˈë nandëˈën mmëwingonëdëp miitsëty” (Santya̱ˈa̱gʉ 4:8). Yaˈoyë tuˈugë programë diˈib xëmë mbanëjkxëp parë mDiosˈawdatët mëdë mfamilyë (Génesis 18:19). Per nan tsojkëp ets jabom jabomë Dios xykyuentëpëjtäˈägët, ets nanduˈun xypyudëkëdë mfamilyë parë oy mëët yˈitët. Biiblyë jyënaˈany: “Ets [xytyukmëtmaytyäˈägëdë Jyobaa] ko mˈuˈuny mtsëënët mjënoty mdëgoty ets ko mduˈuyoˈoyët nëˈääy tuˈääy ets ko mnaygyoˈogëdët ets ko mbëdëˈëgët” (Deuteronomio 6:6, 7). Pëjtäˈäk duˈunë mwinmäˈäny extëmë Josué diˈib jënan: “Ëjts mëdëtsë njëën ndëjk, yëˈëjëts nmëdunandëbë Jyobaa” (Josué 24:15).
DIˈIB MBÄÄT XYTYUNY:
Yaˈoyë tuˈugë programë tijaty mˈëxpëkandëp, yëˈë mˈixëp ti naybyudëkë tsyejpy niduˈuk niduˈuk ja mfamilyë