Ko mDiosˈawdatët mëdë mFamilyë: ¿Mbäät niˈigyë xytyukxondaˈaky?

Tuˈugë uˈunkteety diˈib Brasil, jyënaˈany: “Kyajts njawëdë wiˈix jantsy pojënë oorë nyaxy kojëts njantsy kyäjpx njantsy myaytyäˈäktë mäjëts nDiosˈawdattë mëdëtsë nfamilyë”. Jatuˈugë uˈunkteety diˈib Japón, jyënaˈany ko ja yˈuˈunk diˈib mäjkë jyëmëjt kyaj tpëkyë kuentë wiˈix pojënë tiempë nyaxy ko yˈëxpëktë ets niˈigyë yˈakˈëxpëkäˈäny. ¿Tiko? Uˈunkteety tˈaknimaytyaˈaky: “Yëˈko jantsy jotkujk nyayjawëty ets tyukxondakypy”.

Per kyaj niˈamukë duˈun ttukxondäˈäktë. Ta näägë ënäˈkuˈunk diˈib kyaj ttukxondäˈäktë ko Diosˈawdattë mëdë fyamilyë. ¿Tiko? Yëˈko tsyipkaˈaxtë. Tuˈugë uˈunkteety diˈib Togo, jyënaˈany: “Kyajxyëp mbäät ntsipkaˈxëm ko Jyobaa nˈawdäjtëm”. Per pën tsipkaˈxpë familyë, mbäät nyajtëgäjtsëm wiˈix nyaˈëxpëjkëm. Ko mayë duˈun ttundë jyantsy tyukxondaktëp, extëm ja israelitëty ttukxondaktë sääbëdë xëë (Is. 58:13, 14).

Tääk teety jyaygyujkëdëp ko net ja fyamilyë ttukxondäˈäktëdë ëxpëjkën ko ak xeemy ja jyot wyinmäˈäny tmëdattë. Ralf, diˈib nidëgëëgë nyëëx ets tuˈugë myäänk, jyënaˈany ko Diosˈawdattë mëdë fyamilyë duˈun ttundë extëmxyëp jeˈeyë kyäjpx myaytyäˈäktë, niˈamukë tnimaytyäˈäktë. Per mbäät tsyiptaˈaky parë niˈamukë tˈoymyëdowdët etsë jyot wyinmäˈäny tpëjtäˈäktët mä tijaty yajmaytyakp. Tuˈugë uˈunktääk jyënaˈany: “Kyajts xëmë nmëdatyë jot mëjää parëts nˈëxpëktët mëdëtsë nfamilyë extëmëts mbäät ndukxondäˈäktë, duˈun extëmëts njatsojkënyëˈaty”. ¿Ti mbäät ttundë ja tääk teety parë yˈuˈunk yˈënäˈk ttukxondäˈäktët mä Diosˈawdattë mëdë fyamilyë?

NˈOKˈYAJTËGÄJTSËM EXTËM NˈËXPËJKËM ETS WIˈIXËM NDUˈUNËM

Tuˈugë uˈunkteety diˈib Alemania diˈib majtskë yˈuˈunk, jyënaˈany: “Tsojkëp nyajtëgäjtsëm extëm nˈëxpëjkëm”. Natalia diˈib majtskë nyëëx, jyënaˈany: “Diˈib mas jëjpˈam parë nfamilyëˈäjtëm, yëˈë ko kyaj natimduˈunyëm nˈëxpëjkëm, tsojkëp nyajtëgäjtsëm”. Mayë familyë yajnaywyäˈkxëdëp kanäk pëky tijaty yˈëxpëkandëp. Cleiton, tuˈugë uˈunkteety diˈib Brasil, majtskë yˈënäˈk diˈib kyajnëm yaˈkˈabattë, jyënaˈany: “Ko duˈun yajtuny, niˈigyë yajtukxondaˈaky ets niˈamukë tnigäjpx tnimaytyäˈäktë”. Ko jyamëtyë uˈunk ënäˈkë mëjatypyë etsë mutskatypyë, oy ko ja tääk teety twijtswäˈkxëdë tiempë parë tˈixtët tijaty naybyudëkë yajtëgoyˈäjttëp. Mbäät twinmaytyë tuˈuk tuˈugë yˈuˈunk yˈënäˈk parë tˈixët tijaty yˈëxpëkandëp ets wiˈix tˈëxpëkäˈändë.

¿Ti näägë familyë tyuundëp parë dyajtëgatstë tijaty yˈëxpëjktëp? Nääk dyajtsondäˈäktë ko tkuyˈëwdë Jyobaa. Juan diˈib tsënaapy mä tyäˈädë paˈis Nëwinm, jyënaˈany: “Oy xyajnayjäˈäwëm ets yëˈë xypyudëjkëm parë nbëjtakëmë winmäˈäny mä diˈib nˈëxpëkäˈänëm”. Fyamilyë Juan, wyinˈijxtëbë ëy diˈib mëët nyaymyënëjkxyëty mä diˈib yˈëxpëkandëbë tadë ux.

Etsë wiinkpë familyë tuˈugyë tkäjpxtë Biiblyë. Ets parë dyajtëgatstë extëm tkäjpxtë, ta nyaytyukniwitsëdë niduˈuk niduˈuk ets tkäjpxtë extëm ja jäˈäy kyäjpx myaytyaktë. Tuˈugë uˈunkteety diˈib Japón, jyënaˈany ko kyaj oy nyayjäˈäwë ko duˈun tkäjpxtsondaky. Per ja nimajtskpë yˈuˈunk jyantsy yˈoymyëdoodë ko duˈun mëdë tyääk tyeety tkäjpxtë Biiblyë. Ta näägë familyë diˈib yˈaduunäjxtëp diˈib nyimaytyakypyë Biiblyë. Roger, tuˈugë uˈunkteety diˈib Sudáfrica diˈib nimajtskë myäänk, jyënaˈany: “Tap diˈibë tääk teety kyaj tˈixtë diˈib myaytyakypyë Biiblyë diˈibë uˈunk ënäˈk yˈijxtëp”.

Ja tuk pëky wiˈix mbäät yˈëxpëktë, yëˈë ko tuˈugyë tijaty dyajkojtët, extëm tniˈˈijxtuˈuttët ja Noé yˈarkë, mbäät naa mutsk dyajkojtë o ja templë diˈibë Salomón kyoj. Mä tpayoˈoytyë wiˈix dyajkojäˈändë mbäät ttukxondäˈäktë. Extëm ttuundë tuˈugë familyë diˈib Asia. Ja tääk teety mëdë nyëëx diˈib mëgoxkë jyëmëjt ets ja nyanwelë, yëˈë yaˈoˈoyëdë diˈib mbäät ttukˈëyëˈëk ttukuyattë. Mä tukpedasë karton, tkëxjääytyë mäjatyë apostëlë Pablo nyajxy ko tyuuny misioneerë etsë net ttukuyäjttë extëmxyëp jyawë jam tyuˈuyoˈoytyë. Ta familyë diˈib nanaduˈun tyuundëp, per yëˈë jyaaytyëp mäjatyë israelitë nyäjxtë mä ja lugäärë äänëˈëk tëtsëˈëkpë extëm tnigajpxyë Biiblyë mä Éxodo. Donald, diˈib 19 jyëmëjt diˈib Togo, jyënaˈany: “Kojëts nyajtëgatstë extëmëts nˈëxpëktë tuk familyë, niˈamukëts ndukxondäˈäktë”. ¿Waˈan ti myiny mä mwinmäˈäny diˈib mbäät xytyundë parë niˈigyë xytyukxondäˈäktët mä mDiosˈawdattë mëdë mfamilyë?

JËJPˈAM ETS KONTIEMPË XYNYIˈËXPËKËT

Mbäät nyajtëgäjtsëm extëm nˈëxpëjkëm ets mbäät wiˈixëm nduˈunëm, per parë niˈigyë xypyudëjkëm tsojkëp niˈamukë kontiempë nˈëxpëjkëm. Näˈätyë ënäˈktëjk tsipkaˈxtëp, pääty tsojkëbë uˈunkteety twinmayët ti diˈib yˈëxpëkandëp ets tjuudëdë tiempë parë yˈëxpëkët. Tuˈugë uˈunkteety jyënaˈany: “Kojëts kontiempë nˈëxpëky, niˈamukëts njantsy tyukxondäˈäktë”. Jatuˈugë uˈunkteety diˈib Alemania kontiempë fyamilyë ttukˈawanë tijaty yˈëxpëkandëp mä tuˈukpë poˈo. Jap Benín, tuˈugë uˈunkteety diˈib tëdujkë yˈuˈunk, näˈäganäˈäty tˈixtë bideo mä Diosˈawdattë mëdë fyamilyë. Ets parë twinmaytyët wiˈix tˈatsoojëmbitäˈändë, ta ja uˈunkteety kontiempë dyakyë listë ti diˈib yajtëwaampy. Duˈunë duˈun, nigëxëˈkp ko pën yˈëxpëky kontiempë.

Pën niˈamukë nyijäˈäwëdëp kontiempë ti yˈëxpëkandëp, mbäädë net tjantsy jëjpˈixtë ets tnimaytyäˈäktët tuk sëmään ti diˈib yˈëxpëkandëp. Ets pën niduˈuk niduˈuk jam ti të yajtuknipëktë diˈib nyimaytyäˈäktëp, mbäädë net nyayjawëdë ko yëˈë diˈib yajnäjxtëp mä yˈëxpëktë mëdë fyamilyë.

JËJPˈAM ETS SËMÄÄN SËMÄÄN NˈËXPËJKËM

Mayë familyë tsiptakxëdëp yˈëxpëktët sëmään sëmään.

Ta mayë uˈunkteety diˈib xëëˈam tuundëp parë fyamilyë dyajkay dyaˈuuktë. Extëm tuˈugë uˈunkteety diˈib mä tyäˈädë paˈis Nëwinm, ja tsyoony mä tyëjk jopyëp a las 6 ets jaanëm jyëmbity koots a las 8. Ets nääk wyijtstëgäjtstëbë xëë parë Diosˈawdattë mëdë Fyamilyë mët ko sirkuitë kyuˈixëdë o asamblee tyunyëty.

Per oy duˈun tsyiptaˈaky, tsojkëp nbëjtakëmë jot winmäˈäny parë xëmë nDiosˈawdäjtëm mëdë familyë. Jap Togo, Loïs, tuˈugë kixyuˈunk diˈib mäjktuˈugë jyëmëjt, jyënaˈany: “Xëmëts nˈëxpëktë mëdëtsë nfamilyë, oyëts näˈäty ok nyajtsondäˈäktë mët ko jam ti të xyajtuˈuwëˈëmëdëts”. Parë kyaj ninäjxëm, oy ko nˈëxpëjkëm mä sëmään tsyondaˈaky, pes pën jam ti tyuny jyatyëty diˈib kyaj njëjpˈijxëm, mbäät nˈëxpëjkëm wiink xëë.

¿Tiko yajtijy nDiosˈawdäjtëm mëdë familyë? Yëˈko yëˈë Jyobaa nˈawdäjtëm. Nˈoktuˈunëmë mëjää parë tuk familyë nmëjkumäˈäyëmë Jyobaa sëmään sëmään, duˈunxyëp extëm nmoˈoyëmë Jyobaa “ja toorë ënäˈkatypyë” (Os. 14:2). Ets mbäät niduˈuk niduˈuk ndukxondakëm ko nDiosˈawdäjtëm mëdë familyë, “yëˈko Jyobaa xyondakën yëˈë diˈib xykyuwäˈänëm” (Neh. 8:9, 10).

[Rekuäädrë diˈib mä pajina 31]

TIJATY TSOJKËP PARË OY NDIOSˈAWDÄJTËM MËDË FAMILYË

Xeemy ja jot winmäˈäny

Nyajtëgäjtsëm extëm nˈëxpëjkëm

Wiˈixëm yajtunët

Yajxon nˈëxpëjkëm

Xëmë yajtunët

[Dibujë diˈib mä pajina 31]

Estados Unidos

[Dibujë diˈib mä pajina 31]

Sri Lanka

[Dibujë diˈib mä pajina 31]

Sudáfrica