Nijawë Diosë yˈAyuk
¿Wiˈix tyunäˈäny ja gobiernë diˈibë Dios yajtunaampy abëtsemy nyaxwinyëdë?
Tyäˈädë artikulo yëˈë mbudëkëyanëp ets mä mBiiblyë xypyäädët wiˈix yaˈˈatsoojëmbity tijaty mnayajtëëwëp. Ets pën mtsojkënyëˈajtypy mbäät mëdë Jyobaa tyestiigë xyˈëxpëktë.
1. ¿Tiko tsyekyëty tuˈugë gobiernë diˈib anaˈamëp abëtsemy nyaxwinyëdë?
Tyam, abëtsemy nyaxwinyëdë jäˈäy tmëdattë jotmay. Mä näägë paˈis yaˈˈaxëktuundëbë jäˈäy ets jantsy ayoodëp, ets mä wiinkpë paˈis, axtë niˈigyë tijaty tmëdattë. Koxyëp jyaˈˈaty tuˈuk jeˈeyë gobiernë diˈib anaˈamp abëtsemy nyaxwinyëdë, mbäätxyëp tuknax dyajwaˈkxy tijatyë Naxwinyëdë yajkypy. (Käjpxë Eclesiastés 4:1 etsë 8:9.)
2. ¿Pën mbäät yˈokˈaneˈemy abëtsemy nyaxwinyëdë?
Niwaanë jäˈäy diˈib tsyojktëp ets tuˈugë gobiernë yˈanaˈamët abëtsemy nyaxwinyëdë, mët ko wyinmaytyë ko nipën mbäät duˈun kyatuny. Pes tsip niˈamukë jäˈäy kyupëkëdët, ets nan yajnijäˈäwëp ko jäˈäy tˈaxäjë kutujkën yajjëmbijtëp axëkjäˈäy. Ets axtë xyˈatsëˈk xyˈajäˈäwëm ko jeˈeyë nwinmäˈäyëm yˈanaˈamët tuˈugë axëkjäˈäy abëtsemy nyaxwinyëdë. (Käjpxë Proverbios 29:2 etsë Jeremías 10:23.)
Jyobaa Dios të twinˈixyë yˈUˈunk, Jesus, parë tˈanaˈamëdë naxwinyëdë jäˈäy winë xëë (Lukʉs 1:32, 33). Jesus nyijäˈäwëp wiˈixë jukyˈäjtënë yˈixëty yä Naxwiiny. Ko yä jyukyˈajty, yaˈˈagëdakë päˈäm jäˈäy, yaˈëxpëjk ja jäˈäy diˈib oyë kyorasoon ets jyuˈtë tiempë parë ënäˈkuˈunk (Markʉs 1:40-42; 6:34; 10:13-16). Päätyë Jesus yëˈë diˈibë mbäät oy yˈaneˈemy. (Käjpxë Fwank 1:14.)
3. ¿Mbäädëdaa tuˈugë gobiernë yˈaneˈemy abëtsemy nyaxwinyëdë?
Dios të ttuknibëjtäägë parë yˈUˈunk desde jam tsäjpotm tˈanaˈamëdë naxwinyëdë jäˈäy (Daniel 7:13, 14). Duˈun extëm tuˈugë presidentë diˈib anaˈamp mä tuˈugë paˈis kyaj tyim yajpääty mä tuˈuk tuˈugë siudad parë yˈanaˈamët, nanduˈunë Jesus, kyaj tyim yajpäädäˈäny yä Naxwiiny parë yˈanaˈamët. (Käjpxë Matewʉ 8:5-9, 13.)
Tyäˈädë anaˈambë diˈibë Jyobaa të twinˈixy, oyjyaˈay ets tëyˈäjtën myëët yˈanaˈamäˈäny. Per ¿kyupëkëbëdaa niˈamukë jäˈäy etsë Jesus yˈanaˈamët? Yëˈëyë kyupëkandëp diˈib tsyojktëbë oybyë ets pënaty kyaj tkupëktë ta nëjkx kyutëgoytyë. (Käjpxë Salmo 37:9-11.)
4. ¿Ti tyunaambyë Jesus ko yˈanaˈamët abëtsemy nyaxwinyëdë?
Duˈun extëm tuˈugë borreegë kuentˈäjtpë dyajtuˈukmukyë byorreegë, nanduˈunë Jesus tyam abëtsemy nyaxwinyëdë dyajtuˈukmukyë jäˈäy diˈib yujy tudaˈaky ets ttukniˈˈixë nyaytsyokëdët extëmë Dios dyaˈixyëtyë tsojkën (Fwank 10:16; 13:34). Tyäˈädë jäˈäyëty xondaˈakyˈää xondaˈakyjyot tkupëktë Jesus etsë yˈanaˈamën (Salmo 72:8; Matewʉ 4:19, 20). Ets kom yëˈë pyuwäˈkëdëp, ta abëtsemy nyaxwinyëdë tkäjpxwäˈkxtë ko Jesus të tyëkë Rey. (Käjpxë Matewʉ 24:14.)
Tim tsojkë Jesus dyaˈˈawäˈätspëtsëmäˈänyë naxwinyëdë jäˈäy mä gobiernëtëjk diˈib kyaj tijaty ttundë tëyˈäjtën mëët. Ets nan të twinˈixy näägë jäˈäy parë mëët yˈanaˈamët jam tsäjpotm (Daniel 2:44; 7:27). Tyäˈädë Anaˈamënë yëˈë yajtuktukaambyë Naxwinyëdë “mëdë Jyobaa yˈëxpëjkën” ets jyëmbitët jantsy tsuj extëm ja lugäär diˈib yajtëgooy ja tim jawyiimbë naxwinyëdë jäˈäy. (Käjpxë Isaías 11:3, 9 etsë Matewʉ 19:28.)
[Dibujë diˈib mä pajina 11]
Pën mˈaknijawëyaampy, ix mä kapitulo 8 mä tyäˈädë liibrë ¿Ti tëyˈäjtën jantsy tukniˈijxëbë Biiblyë?, diˈib yajpëtsëëmdëbë Jyobaa tyestiigëty.