YAJTËˈËWËN DIˈIB YAˈˈATSOOJËMBIJTP MÄ BIIBLYË

¿Wiˈixë Dios yˈixëty?

Dios kyaj yaˈixy. Yëˈë yajkojë tsäjp, Naxwinyëdë ets tukëˈëyë tijaty jukyˈäjtp. Yëˈë nipën ojts kyayajkojˈyëty; kyaj tmëdatyë tsyonëˈk tsyondakën (Salmo 90:2). Dios tsyejpy etsë jäˈäy yˈëxtäˈäyëdët parë tnijawëdët pënën yëˈë. (Käjpxë Apostʉlʉty 17:24-27.)

Dios tamë xyëë, ets mbäät nnijäˈäwëm tuk pëky majtsk pëky wiˈix jyaˈayˈaty ko nˈijx nduˈunëm tukëˈëyë tijaty të dyajkojy (Romanʉs 1:20). Parë yajxon nˈixyˈäjtëm, tsojkëp nˈëxpëjkëmë Biiblyë. Ets duˈun nnijäˈäwëm wiˈix jantsy oyë jäˈäyˈäjtën tmëdaty. (Käjpxë Salmo 103:7-10.)

¿Wiˈixë Dios nyayjawëty ko kyaj yajtunyë tëyˈäjtën?

Jyobaa yˈaxëkˈijxypy ko kyaj yajtunyë tëyˈäjtën ets pääty nanduˈun nˈaxëkˈijxëm, yëˈë ko duˈun të xyajkojëm extëm yëˈë (Deuteronomio 25:16). Pääty, mayë jäˈäy yˈaxëkˈijxtëp ko kyayajtunyë tëyˈäjtën diˈib jaˈäjtp oymyääjëty. Per kyaj Dios tpokyëty tijaty tuun jäjtëp. Yëˈë, të naxwinyëdë jäˈäy tmoˈoyë madakën parë këˈëm twinˈixtët ti tyunandëp, ets jotmaymyëët njënäˈänëm ko nimay kyaj yajxon dyajtundë, ak yëˈë tyuundëp diˈib kyaj yˈoyëty. Mëkë Jyobaa tjawë ko duˈun tyuny jyatyëty. (Käjpxë Génesis 6:5, 6 etsë Deuteronomio 32:4, 5.)

Jyobaa tsyejpy ets tijaty tëyˈäjtën myëët yajtunët, pääty kyaj jeky tnasˈixëyaˈany parë xëmë jyaˈˈatëdë axëkˈäjtën (Salmo 37:28, 29). Biiblyë wyandakypy ko Dios tim tsojk dyajjëjptëgoyaˈanyë axëkˈäjtën ets yajtunäˈänyë tëyˈäjtën. (Käjpxë 2 Peedrʉ 3:7-9, 13.)

Pën mˈaknijawëyaampy, ixë kapitulo 1 mä tyäˈädë liibrë ¿Ti tëyˈäjtën jantsy tukniˈijxëbë Biiblyë?, diˈib yajpëtsëëmdëbë Jyobaa tyestiigëty

Nan tap mä www.jw.org/mco

[Dibujë diˈib mä pajina 32]

Biiblyë wyandakypy ko Dios dyajjëjptëgoyaˈanyë axëkˈäjtën ets yajtunäˈänyë tëyˈäjtën abëtsemy nyaxwinyëdë