¿Wiˈix ndukˈoyˈäjtëm nuˈun kujkë Jesus yˈaneˈemy 100 jëmëjt?

“Jantsy mëjwiin kajaa diˈib të xytyuny, Jyobaa [...], Rey diˈib winë xëë winë tiempë.” (REV. 15:3, Traducción del Nuevo Mundo [TNM])

¿WIˈIX MˈATSOOJËMBITÄˈÄNY?

¿Wiˈixë Jyobaa jyajty Rey mä jëmëjt 1914, ets tijaty diˈib tim jawyiin tyuun mä ja Anaˈamën?

¿Wiˈixë Jesus të dyajtunyë tyäˈädë Anaˈamën parë dyajwäˈätsy ja jyaˈayëty, ttukniˈˈixë ets ttukniwitsë wiˈix tyundët yä Naxwiiny?

¿Näˈä tukëˈëyë yaˈˈatsoojëmbitäˈänyë tyäˈädë nuˈkxtakën “Yajminë mˈanaˈamën”, ets ti yˈandijpy?

1, 2. 1) ¿Ti tyunaambyë Diosë yˈAnaˈamën? 2) ¿Tiko mbäät nˈijtëm seguurë ko minäämp?

MÄ JËMËJT 31, xëgopk poˈo nety etsë Jesus jamë nety yajpääty mëdë yˈëxpëjkpëty mä tuˈugë kopk diˈib naa wingon wëˈëmp Capernaum jam ttukniˈˈijxë ets duˈun nyuˈkxtäˈäktët: “Yajminë mˈanaˈamën” (Mat. 6:10, TNM). Tyam, mayë jäˈäy kyaj tmëbëktë pën minäämbë tyäˈädë Anaˈamën. Per ëtsäjtëm, seguurë nˈijtëm ko yaˈˈatsoojëmbitäämbë tyäˈädë nuˈkxtakën.

² Jyobaa, yëˈë yajtunaambyë tyäˈädë Anaˈamën parë dyajtuˈugyëyaˈanyë fyamilyë duˈun jam tsäjpotm ets duˈun yä Naxwiiny. Ets seguurë ko duˈun ttunäˈäny (Is. 55:10, 11). Ko nˈijxëm tijaty tuun jäjtëp nuˈun kujk 100 jëmëjt nyaxyë tiempë, ta nyigëxëˈëky ko Jyobaa të jyaˈty Rey. Ets mëjwiin kajaa tijaty ttukmëduny pënaty mëduunëp (Zac. 14:9; Rev. 15:3, TNM). Per ko Jyobaa jyaˈty Rey, kyaj yëˈë tmaytyäˈägäˈäny ja yˈAnaˈamën diˈibë Jesus nyigäjpx. ¿Tiko kyaj yëˈëjëty, ets tiko yˈoyëty nnijäˈäwëm?

JA REY DIˈIBË JYOBAA TË TWINˈIXY TTUNY TIJATY

3. 1) ¿Näˈä ets mä Jesus yˈanaˈamtsondaky extëmë Rey? 2) ¿Wiˈix xynyimaytyäˈägët ko 1914 nyaxkëdakyë Diosë yˈAnaˈam Kyutujkën? (Ixë notë.)

³ Mä nety kyajëjpkëxynyëmë siiglë 19, ja mä niˈigyë yajjaygyujkë diˈibë Daniel ojts tnaskäjpxë naa 2,500 jëmëjtëp, jyënany: “Mä ja tiempë mä yˈanaˈamdë reyëty yëˈë Dios diˈib tsäjpotm dyajnaxkëdäˈägäˈäny tuˈugë anaˈamën diˈib ninäˈä kyakutëgoyaˈany” (Dan. 2:44). Ja diˈib yˈËxpëjktëbë Biiblyë kanäk jëmëjt ojts tnimaytyäˈäktë ko 1914 yëˈë nety tuˈugë jëmëjt diˈib jëjpˈam naxäämp. Mayë jäˈäy yˈawijx jyëjpˈijxtë oyˈäjtënë mä tadë tiempë. Tuˈugë jäˈäy diˈib jyaabyë liibrë, jyënaˈany: “Mëjwiin kajaa netyë jäˈäy tijaty tˈawix tjëjpˈixtë mä jëmëjt 1914”. Per mä tadë jëmëjt, ja mä tsyondakyë Primera Guerra Mundial ets jaa yˈadëëy tijatyë netyë Biiblyë të tnaskäjpxë. Myiinyë mëk yuu, päˈäm, mëk ujx, diˈib yajnigëxëˈk ko 1914 të netyë Jesukristë tyëkë Rey jam tsäjpotm mä ja Diosë yˈAnaˈam Kyutujkën.a Ko Jyobaa dyajtëjkë yˈUˈunk Rey mä ja yˈAnaˈam Kyutujkën, ta dyajnigëxëˈky ko të nety jatëgok jyaˈty Rey.

4. 1) ¿Ti diˈib tim jawyiin tyuunë Jesus ko tyëjkë Rey? 2) ¿Ets ti net ok tyuun?

⁴ Diˈib tim jawyiin tyuunë tyäˈädë Rey jam tsäjpotm, yëˈë ko tsyiptuuny mëdë Satanás, diˈibë Tyeety mëtsipˈäjtëp. Jesus mëdë yˈanklësëty tˈëxkajxtë Satanás jam tsäjpotm mëdë kyaˈoybyëtëjk. Ko duˈun ttuuny, ta jyamˈäjtyë xondakën jam tsäjpotm, per yä Naxwiiny, ta tsyondakyë ayoˈon jotmay extëmë nety ninäˈänëm duˈun kyajaˈˈaty (käjpxë Diˈibʉ Jatanʉp 12:7-9, 12). Ta net ja Jesus diˈib tuump Rey tyuuntsondaky yä Naxwiiny mä ja jyaˈayëty. ¿Ti tyuun? Ojts dyajwäˈätsy, ttukniˈˈijxë ets ttukniwijtsë wiˈix yajtunëdë Diosë tyuunk. Min nˈokˈijxëm wiˈix tyam xypyudëjkëm ko ojts tmëmëdowdë Jesus extëm ojts yajnëˈëmoˈoy yajtuˈumoˈoytyë.

JESUSË YˈANAˈAMËN DYAJWÄˈÄTSY JA JYAˈAYËTY

5. ¿Ti yajtuun mä jëmëjt 1914 axtë mä tsyondaˈagyë 1919?

⁵ Ko Jesus dyajwatsy ja tsäjp ets tˈëxkejxyë Satanás mëdë kyaˈoybyëtëjk, ta Jyobaa tyuknipëjkë parë tˈixët ets dyajwäˈätsët ja jyaˈayëty yä Naxwiiny. Ja kugajpxy Malaquías ojts tnigajpxy wiˈix wyäˈätsäˈändë Dios windum (Mal. 3:1-3). Ets ja wyatstë mä jëmëjt 1914 axtë mä tsyondakyë 1919.b Parë Jyobaa xyfyamilyëˈäjtëm, tsojkëp nnayaˈijtëm wäˈäts (1 Peed. 1:15, 16). Kyaj nduˈunëm diˈib tyuundëbë relijyonk diˈib kyaj tyëyˈäjtënëty ets diˈib tyuundëbë politikëtëjk yä Naxwiiny.

6. 1) ¿Pën diˈib xymyoˈoyëmë käˈäy ukën? 2) ¿Tiko jyëjpˈamëtyë tyäˈädë käˈäy ukën parë ëtsäjtëm?

⁶ Ta Jesus dyajtuuny ja kutujkën diˈib myëdäjtypy parë twinˈijxy ja “tuumbë diˈib kuwijy ets tyuumpy ti wyintsën tsyejpy”. Tyäˈädë tuumbë, yëˈë diˈibë nety xëmë myoˈoyaambyë käˈäy ukën niˈamukë ja borreegë diˈib ijttëp “tuk kajpëˈëk” diˈibë Jesus kyuentˈäjtypy (Mat. 24:45-47; Fwank 10:16). Desde 1919, tuk grupë nmëguˈukˈäjtëm diˈib nëjkxtëp tsäjpotm, ttundë tyäˈädë tuunk diˈib të yajtuknipëktë: dyajkay dyaˈuuktët ja “poˈoduumbëty”. Tyäˈädë käˈäy ukën diˈib nˈaxäjëm, yëˈë niˈigyë yajkëktëjkëbë mëbëjkën ets yëˈë xypyudëjkëm parë nnayaˈijtëm wäˈäts Dios windum, nmëdäjtëm wäˈätsë jot winmäˈäny, niniˈkx këbäjk etsë jukyˈäjtën. Nanduˈun xytyukniˈˈijxëm ets xymyoˈoyëm tijaty nyajtëgoyˈäjtëm parë nduˈunëmë tyäˈädë tuungë mas jëjpˈambë mä nˈëwäˈkx ngäjpxwäˈkxëm. ¿Nyajtuˈunëm yajxonë tyäˈädë käˈäy ukën diˈib yajmoˈoyëm?

JA REY TTUKNIˈˈIXË JYAˈAYËTY PARË KYÄJPXWÄˈKXTËT ABËTSEMY NYAXWINYËDË

7. 1) ¿Ti tuungë jëjpˈambë yajtsondakë Jesus ko jyukyˈajty yä Naxwiiny? 2) ¿Axtë näˈä ttunäˈänyë tyäˈädë tuunk?

⁷ Ko Jesus tyuundëjkë yä Naxwiiny, ta jyënany: “Tsojkëp nandëˈën ëj nnëjxët mä wiinkpë käjpn es nˈawanëdëts ja oybyë ayuk diˈibë nyigajxypy ja Diosë kyutujkën, jaˈa ko päätyëts ja Dios të xykyexy” (Luk. 4:43). Tëgëk jëmëjt ja kujkm ojts yˈëwäˈkx kyäjpxwaˈkxy ets yëˈë diˈib mas jëjpˈam pyëjtak. Nanduˈun tˈanmääy ja yˈëxpëjkpëty: “Nëjx käjxwäˈxtë ko ja tsäjpotmëdë kutujkën të wyingony” (Mat. 10:7). Ok, ko netyë Jesus të jyukypyeky, ta ojts tnaskäjpxë ko pënaty panëjkxëdëp, tkäjpxwäˈkxäˈändë ja oybyë ayuk mä “tëgekyë naxwinyëdë” (Apos. 1:8). Ets ttukwandaky ko xëmë tpudëkëyaˈany mä ttundë tyäˈädë tuungë jëjpˈambë axtë ko myinëdë kutëgoˈoyën (Mat. 28:19, 20).

8. ¿Wiˈixë Jesus tmëjämooy ja jyaˈayëty ets kyäjpxwäˈkxtët yä Naxwiiny?

⁸ Mä jëmëjt 1919, ja “oybyë ayuk diˈibë nyimaytyakypy ja tsäjpotmëdë kutujkën”, tmëdäjty jatuˈugë nyiwij nyikajën (Mat. 24:14). Jesus, diˈib Rey jam tsäjpotm të nety yˈanaˈamtsondaˈaky ets të nety dyajtuˈukmuky tuk grupë jyaˈay diˈibë nety të dyajwäˈätsy. Tyäˈädë jäˈäyëty, myëmëdoodë xondaˈakyˈää xondaˈakyjyot diˈib yajtukˈanaˈamdë: tkäjpxwäˈkxtët abëtsemy nyaxwinyëdë ja oybyë ayuk ko të nyaxkëdaˈagyë Diosë yˈAnaˈam Kyutujkën jam tsäjpotm (Apos. 10:42). Ets diˈib yajnigëxëˈk ko ta nety tyundë, yëˈë ko septiembrë mä jëmëjt 1922, tyuˈukmujktë naa 20 milë jäˈäy mä tyuunë tuˈugë asamblee jap Cedar Point (Ohio, Estados Unidos). Nˈokpawinmäˈäyëm wiˈix nyayjäˈäwëdë ja nmëguˈukˈäjtëm ko Rutherford mä tuˈugë dyiskursë diˈib xyëˈäjt “Anaˈam Kutujkën”, jyënany: “¡Okˈixtë, yëˈë Rey anaˈamp! Ets miitsëtyë duˈun diˈib mjäˈäyˈäjtëdëp parë xynyimaytyäˈäktët. Pääty, nimaytyäˈäktë, nimaytyäˈäktë, nimaytyäˈäktë ja Rey etsë yˈanaˈamën”. ¿Ti tyuundë ja nmëguˈukˈäjtëm? Ta jakumbom nimajtsk mil ojts nyëjkxtë käjpxwäˈkxpë, tam diˈib ojts tyuˈuyoˈoytyë naa 70 kilometrë ko tsyoˈondë mä nety tyunyëtyë asamblee. Tuˈugë nmëguˈukˈäjtëm jyënany: “¡Ninäˈäts ngajäˈäytyëgoyët wiˈix të nyaˈˈanmäˈäyëm ets nimaytyakëmë tyäˈädë Anaˈam Kutujkën ets wiˈix niˈamukë të ndukxondakëm!”. Ets nimay duˈun nyayjäˈäwëdë.

9, 10. 1) ¿Tijaty ëxpëjkën të nyaxkëdaˈaky parë niˈigyë yajtukniˈˈixëdët pënaty kyäjpxwäˈkxtëbë Diosë Kyutujkën? 2) ¿Wiˈix mijts xytyukˈoyˈatyë tyäˈädë ëxpëjkën?

⁹ Mä jëmëjt 1922, ja nety yajpäättë 17 mil naxy diˈib kyäjpxwäˈkxtëbë Diosë yˈAnaˈam Kyutujkën mä 58 paˈis. Per tsojkëbë nety yˈakˈëxpëktët. Mä primer siiglë, Jesus, diˈibë nety tunäämp Rey, ojts yajxon ttukniˈˈixë ja yˈëxpëjkpëty ti kyäjpxwäˈkxtëp, mä ets wiˈix ttundët (Mat. 10:5-7; Luk. 9:1-6; 10:1-11). Tyam, nan yëˈë Jesus diˈib yˈijxypy parë niˈamukë nmëguˈukˈäjtëm yajtukniˈˈixëdët ets yajmoˈoytyët tijaty yajtëgoyˈäjttëp parë ttundët yajxonë tyäˈädë tuunk (2 Tim. 3:17). Mët yëˈëgyëjxmë naymyujkën xytyukniˈˈijxëm wiˈix ngäjpxwäˈkxëm. Tuk pëky, yëˈë mä Yajniˈëxpëkë Diosë Tyuunk ets yëˈë pudëjkëdëbë nmëguˈukˈäjtëm diˈib yajpattëp mä 111 mil naxyë naymyujkën abëtsemy nyaxwinyëdë. Mët yëˈëgyëjxmë tyäˈädë ëxpëjkën, ja jëxtujk miyonk naxy diˈib yajtukniˈˈijxëdëp wiˈix kyäjpxwäˈkxtët ets wiˈix dyaˈëxpëktët “oytyim diˈibë jäˈäyëty” (käjpxë 1 Korintʉ 9:20-23).

¹⁰ Nan të nyaxkëdaˈaky mä tˈëxpëktë Biiblyë ja mëjjäˈäytyëjk, prekursoorëty, yetyëjk diˈib naytyuˈukˈäjtp, kasäädë jäˈäy, Komitee diˈib mä Sukursal etsë nyëdoˈoxy, sirkuitë, distritë mëdë nyëdoˈoxy etsë misioneerë.c Tuk grupë nmëguˈukˈäjtëm diˈib ojtstë mä tˈËxpëktë Biiblyë Kasäädë jäˈäy diˈib Dios mëduundëp, jyënandë: “Jantsy oyë tyäˈädë ëxpëjkënë diˈibëts të nˈaxäjëdë, tëjëts xypyudëkëdë parëts niˈigyë ntsoktëdë Jyobaa ets nan tëjëts xytyukniˈˈixëdë parëts mas oyë jäˈäy nbudëkëdët”.

11. Oyë Satanás tjanibëdëˈëky pënaty kyäjpxwäˈkxtëbë oybyë ayuk, ¿tiko kyaj yajmëmadäˈäktë?

¹¹ Satanás yˈijxypy ko nduˈunëmë mëjää parë ngäjpxwäˈkxëm ets parë jäˈäy ndukniˈˈijxëmë oybyë ayuk. Yëˈë yˈëxtaabyë winmäˈäny parë dyajtuˈudukäˈänyë tyäˈädë tuunk ets tnibëdëˈëky pënaty käjpxwäˈkxtëp. Per kyaj ttukˈoybyëtsëmy. Pesë “Dios pyëjtak ja Jesus es tniWintsënˈatët tëgekyë yëˈë mëkˈäjtën, kutujkën esë madakën” (Éfes. 1:20-22). Jesus yëˈë yajtuumbyë kyutujkën parë ttuˈumoˈoy ja yˈëxpëjkpëty, duˈuntsoo tˈixy parë yajtunëdë Tyeetyë tsyojkën.d Duˈunyëm yajkäjpxwaˈkxy ja oybyë ayuk ets miyonkˈamë jäˈäy diˈib oyë jyot kyorasoon tˈixyˈattë Jyobaa. ¡Jantsy oyë tyäˈädë tuunk diˈib të nyajtuknipëjkëm!

JA REY TTUKNIWITSË WIˈIX NIˈIGYË JA JYAˈAYËTY TYUNDËT

12. Desde 1914, ¿wiˈix tijaty të yajtukniwitsë mä Diosë kyäjpn?

¹² Desde 1914 ko nyaxkëdaky ja Anaˈamën, Jesus diˈib tuump Rey, niˈigyë tijaty ttukniwitsë parë jyaˈayëty ttundëdë Diosë tsyojkën (käjpxë Isaías 60:17).e Mä jëmëjt 1919, ta yajwinˈijxy pën mbäät tnigëbäjkˈaty mä tuˈuk tuˈugë naymyujkën diˈib tyukniwitsëp wiˈix ngäjpxwäˈkxäˈänëm. Ets ko waanë tiempë nyajxy, mä jëmëjt 1927, ta yajtukniwijtsë parë domingë domingë ja nmëguˈukˈäjtëm kyäjpxwäˈkxtët tëjk mdëjk. Ets mä jëmëjt 1931, ja mä yajxëëmooytyë Jyobaa tyestiigëty, tyäˈädë yëˈë diˈib pudëjkëdë parë niˈigyë yˈëwäˈkx kyäjpxwäˈkxtët (Is. 43:10-12). Ets mä jëmëjt 1938, ja mä kyaj nyekyyajbotaräjttë pënaty myënëjkxtëbë jëjpˈamˈäjtën mä naymyujkën. Desde jaa, tsojkëp tkuytyundët extëmë Biiblyë tniˈanaˈamë parë yajwinˈixtët. Mä jëmëjt 1972, ja mä yajtukëdëjkëdë mëjjäˈäytyëjk parë tnikëjxmˈattët ja naymyujkën, pes ko nety kyajäˈtynyëmë tadë jëmëjt, jeˈeyë nety tuˈuk diˈib nyikëjxmˈäjtypy. Ets niˈamukë pënatyë nety kyuytyuundëp extëmë Biiblyë jyënaˈany parë tyundët mëjjäˈäy ets pyudëjkëbë mëjjäˈäy, ojts yaˈˈanëëmëdë parë nyayˈawanëdët ets tkuentˈattët ja jäˈäyëty diˈibë Dios të tyukëdëkëdë (1 Peed. 5:2). Mä jëmëjt 1976, Diˈib wyooyoˈoytyëbë Jyobaa tyestiigëty ojts ttukniwitsëdë parë jyaˈˈatët tëdujkë Komitee diˈib yˈijxtëp wiˈix tyuˈuyoˈoyë Diosë tyuunk abëtsemy nyaxwinyëdë. Extëm nˈijxëm, ja Rey diˈibë Jyobaa të twinˈixy duˈunyëm ttukniwitsë parë jyaˈayëty ttundë tijaty extëmë Dios nyëˈëmoˈoy tyuˈumoˈoyëdë.

13. ¿Wiˈix xytyukˈoyˈaty tijaty tyuumbyë Diosë yˈAnaˈam Kyutujkën nuˈun kujk nyaxy 100 jëmëjt?

¹³ Okpawinmay tijaty kujk ttunyë Jesus extëmë Rey, nuˈun kujk yˈaneˈemy 100 jëmëjt. Të dyajwäˈätsy tuk grupë jäˈäy parë tmënëjkxtët ja Diosë xyëë. Të ttuˈumoˈoy pënaty kyäjpxwäˈkxtëbë oybyë ayuk mä 239 paˈis, ets të tpudëkë miyonkˈamë jäˈäy parë tˈixyˈattëdë Jyobaa. Nan të dyajtuˈukmuky jëxtujk miyonk naxyë jyaˈay diˈib xondaˈakyˈää xondaˈakyjyot nayˈawäˈänëdëp parë ttundë Diosë tyuunk (Sal. 110:3). ¿Këdii mëjwiin kajaa kujkë Jyobaa tijaty ttuny mët yëˈëgyëjxmë yˈAnaˈam Kyutujkën? Per taanëm tijaty diˈib aktunan akjatanëp mä tiempë myiny kyëdaˈaky.

KUNUˈKXËN DIˈIB YAJMINAAMBYË DIOSË YˈANAˈAMËN

14. 1) ¿Ti diˈib nˈamdoˈojëmë Dios ko nuˈkxtakëm: “Yajminë mˈanaˈamën”? 2) ¿Diˈibë tekstë tunäämp mä tyäˈädë jëmëjt 2014, ets tiko yˈoyëty parë yëˈë tyunët?

¹⁴ Mä jëmëjt 1914, ja mä Jyobaa dyajtëjkë yˈUˈunk Rey mä ja yˈAnaˈam Kyutujkën, per kyaj jaa yaˈˈatsoojëmbijtääyë tyäˈädë nuˈkxtakën “Yajminë mˈanaˈamën” (Mat. 6:10, TNM). Pes mä Biiblyë ojts yajnaskäjpxë ko Jesus “yˈanaˈamäˈäny myëtsip itkujky” (Sal. 110:2). Tyamë gobiernëtëjk diˈib anaˈamëdëbë Satanás, duˈunyëm tmëtsipˈattë ja Diosë yˈAnaˈam Kyutujkën. Pääty, ko nˈamdoˈojëmë tyäˈädë Kutujkën, yëˈë duˈun nˈamdoˈojëm ets myinëdë Jesus mët ja 144,000 diˈib mëët yˈanaˈamäˈändë parë dyajjëjptëgoytyët tukëˈëyë gobiernë ets pënaty yä Naxwiiny myëtsipˈäjttëbë Diosë yˈAnaˈam Kyutujkën. Taanëmë net yˈadëwäˈänyë tyäˈädë ää ayuk diˈib yajpatp mä Daniel 2:44: “Dyajjëmbitäˈäny puˈxm ets dyajjëjpkëxäˈäny tukëˈëyë anaˈamën”. Duˈunë duˈun, yajkutëgoyaampy niˈamukë myëtsip (Diˈibʉ Jat. 6:1, 2; 13:1-18; 19:11-21). Jawaanë tiempë yˈakwëˈëmy parë duˈun tyun jyatëdët. Mä tyäˈädë jëmëjt 2014, ja yˈabety 100 jëmëjt desde ko nyaxkëdakyë Diosë yˈAnaˈam Kyutujkën jam tsäjpotm. Pääty, jantsy oy ko mä tyäˈädë jëmëjt tyunëdë tyäˈädë tekstë diˈib jënäämp: “Yajminë mˈanaˈamën” (Mat. 6:10, TNM).

15, 16. 1) ¿Tijaty tunan jatanëp mä Kristë yˈanaˈamäˈäny Tuk Mil Jëmëjt? 2) ¿Ti diˈibë Jesus timˈok yˈaktunaampy mä yˈaneˈemy? 3) ¿Wiˈix yˈadëwäˈäny tijatyë Jyobaa të ttuknibëjtäägë parë tukëˈëyë kyojy pyëjtaˈaky?

¹⁵ Ko netyë Kristë të dyajkutëgoy pënatyë Diosë mëtsipˈäjtëp yä Naxwiiny, ta net tkujëduwëyaˈanyë Satanás mëdë kyaˈoybyëtëjk mä ja këkjut parë jap yˈittët tuk mil jëmëjt (Diˈibʉ Jat. 20:1-3). Kom kyaj nety tnekyyajtunyë myëjää, ta netyë ja Diosë yˈAnaˈam Kyutujkën tpudëkëyaˈanyë naxwinyëdë jäˈäy parë tpäättëdë oyˈäjtën mët yëˈëgyëjxm ko Jesus të xyjuuybyëtsëˈëmëm ets dyajjëjptëgoyaˈany tukëˈëyë tijaty jaˈäjtp mët ko Adán pyokytyuuny. Jesus miyonkˈamë jäˈäy dyajjukypyëkäˈäny diˈib të yˈooktë ets dyajnaxkëdäˈägäˈänyë ëxpëjkën parë jäˈäy tˈixyˈattëdë Jyobaa (Diˈibʉ Jat. 20:12, 13). Ta netë Naxwinyëdë jyëmbitäˈäny extëm tuˈugë it lugäärë tsujpë, duˈun extëm nety jam Edén. Taanëmë net ja naxwinyëdë jäˈäy jyëmbitäˈändë wäˈäts jäˈäy.

¹⁶ Ko nety të yˈabety Tuk Mil Jëmëjt mä Kristë yˈAneˈemy, të nety yˈadëëdäˈäy diˈibë Jyobaa të ttuknibëjtäägë parë tyäˈädë Naxwinyëdë. Ta netë Jesus ttukëdëkëyaˈanyë Tyeety ja Anaˈam Kutujkën (käjpxë 1 Korintʉ 15:24-28). Kyaj nyekyjaˈˈatäˈäny pën xykyudënäˈäyëm mä Jyobaa. Niˈamukë Diosë yˈuˈunk yˈënäˈk duˈun jam tsäjpotm ets yä Naxwiiny, tuˈugyë yajpäädäˈändë mëdë Jyobaa, extëmxyëp tuk familyë.

17. ¿Ti diˈibë net ndunäˈänëm?

¹⁷ Tukëˈëyë tijaty tuun jäjtëp nuˈun kujkë Kristë yˈaneˈemy 100 jëmëjt, yëˈë xytyukˈijxëm ko Jyobaa yëˈëyëm Anaˈamp ets ko adëwäämp tijaty të tuknibëjtäägë yä Naxwiiny. Pääty, nˈokmëduunˈadëtsëmë Jyobaa ets nˈoknimaytyakˈadëtsëm ja Rey etsë yˈAnaˈamën. Seguurë nˈijtëm ko Jyobaa tim tsojk tˈatsoojëmbitäˈänyë tyäˈädë nuˈkxtakën ko nˈanmäˈäyëm: “Yajminë mˈanaˈamën”.

[Notë]

[Mä tmaytyaˈaky diˈib jëjpˈam pajina 12]

Tekstë diˈib tuump mä tyäˈädë jëmëjt 2014: “Yajminë mˈanaˈamën.” (Mateo 6:10)

[Tääblë diˈib mä pajina 14 ets 15]

WYÄˈÄTSTË DIOS WINDUM MÄ JËMËJT 1914 AXTË 1919

Jesus tˈixy ets dyajwäˈätsy ja jyaˈayëty yä Naxwiiny. Mä jëmëjt 1919 twinˈixy ja “tuumbë diˈib kuwijy ets tyuumpy ti wyintsën tsyejpy”

1919 Yajwinˈijxy pën mbäät tnigëbäjkˈaty mä tuˈuk tuˈugë naymyujkën diˈib tyukniwitsëp wiˈix ngäjpxwäˈkxäˈänëm

1927 Yajtukniwijtsë parë domingë domingë kyäjpxwäˈkxtët tëjk mdëjk

1938 Kyaj nyekyyajbotaräjttë pënaty myënëjkxtëbë jëjpˈamˈäjtën mä naymyujkën

1972 Yajtukëdëjkëdë mëjjäˈäytyëjk parë tnikëjxmˈattët ja naymyujkën

1943 Tˈëxpëktë Biiblyë diˈib Galaad ets Yajniˈëxpëkë Diosë Tyuunk

Käjpxwäˈkxpëty abëtsemy nyaxwinyëdë:

6,000

17,000

328,572

851,378

1910

1914

1920

1930

1940

1950

1960

1976 Diˈib wyooyoˈoytyëbë Jyobaa tyestiigëty ojts ttukniwitsëdë parë jyaˈˈatët tëdujkë Komitee

1977 Yˈëxpëktë Prekursoor

1987 Tˈëxpëktë Biiblyë Yetyëjk diˈib Naytyuˈukˈäjttëp

2000 Yˈëxpëktë Sirkuitë etsë Distritë

2011 Tˈëxpëktë Biiblyë Kasäädë jäˈäy diˈib Dios mëduundëp

1,384,782

2,175,403

6,035,564

7,224,930

1970

1980

1990

2000

2010

2014

Organisasion

Yˈëxpëktë