DIˈIB MIIMP MÄ NYIˈAK

¿Tiko mbäät mnuˈkxtaˈaky?

Jesus jyënany ko Dios nyijäˈäwëtyaapy tijaty nyajtëgoyˈäjtëm mä kyajnëm nˈamdoˈojëm (Matewʉ 6:8). David, diˈib reyˈäjt Israel, nanduˈun tkujäˈäyë: “Kyaj ti ayuk mäjëtsë nˈyaˈan, ¡per okˈix! Mijts Jyobaa, të yajxon xynyanijäˈäwënë” (Salmo 139:4). Pääty, mbäät pën nyayajtëyëty: “¿Tikotsë Dios nmënuˈktäˈägët pën nyijäˈäwëtyaapy tukëˈëyë axtë tijatyëts nwinmaapy ets nyajtëgoyˈajtypy?”. Parë nˈatsoojëmbijtëmë tyäˈädë yajtëˈëwën, min nˈokˈijxëm wiˈixë Biiblyë tmaytyaˈagyë nuˈkxtakën.a

KO NUˈKXTAKËM TA NMËWINGOˈONËMË DIOS

Biiblyë nyigajpxypy ko Jyobaab nyijäˈäwëtyaapy tukëˈëyë, per nan xytyuknijäˈäwëm ko yajxon tˈixyˈaty pënaty mëduunëp (Salmo 139:6; Romanʉs 11:33). Jyobaa wyinmäˈäny kyaj tmëdatyë kyugëjxën kyaj dyuˈunëty extëmë komputadoorë diˈib jeˈeyë waanë myëdäjtypyë madakën parë tijaty tpëjkëˈëky. Yëˈë jyantsy nyijäˈäwëp wiˈix nyajpatëm axtë tijaty nwinmäˈäyëm këkpäät, ets xymyëtnaymyaayëbëˈatäˈänëm (Salmo 139:23, 24; Santya̱ˈa̱gʉ 4:8). Päätyë Jesus xyˈanmäˈäyëm ets nuˈkxtakëm, oyë Jyobaa yajxon tjanijawë tijaty nyajtëgoyˈäjtëm (Mateo 6:6-8). Pën xëmë ndukmëtmaytyakëm tijaty nwinmäˈäyëm, ta niˈigyë kyëktëkët ja naymyayë.

Waˈan näˈäty kyaj yajxon nnijäˈäwëm ti nˈamdoˈojëmë Dios. O waˈan kyaj mbäät ngakäjpxpëtsëˈëmëm ti njäˈäwëm. Per yëˈë mbäät tˈixy ets dyajtunyë wyijyˈäjtënë parë xypyudëjkëm mä ja jotmay diˈib nwinguwäˈkëm ets xymyoˈoyëm ti nyajtëgoyˈäjtëm (Romanʉs 8:26, 27; Éfesʉ 3:20). Ets ko nˈijxëm wiˈixë Dios të xypyudëjkëm oy näˈäty kyaj nbëjkëmë kuentë, ta niˈigyë nmëwingoˈonëm.

¿YˈATSOOJËMBIJTYPYË DIOS TUKËˈËYË NUˈKXTAKËN?

Biiblyë jyënaˈany ko Dios diˈib tukëˈëyë mëkˈäjtënë myëdäjtypy yˈatsoojëmbijtypyë nyuˈkxtakën pënaty mëduunëp, per nan nyigajpxypy tiko kyaj tukëˈëyë nuˈkxtakën tmëdooˈity. Extëm nˈokpëjtakëm, ko jam Israel myëjwindëjkë axëkˈäjtën, ta Dios tˈanmääy ja kugajpxy Isaías ets tˈanëëmët ja israelitëty: “Oy kanäkˈok mjanuˈkxtäˈäktët, kyajts nmëdoy; të mˈää mgëˈë pyatäˈäyëdë nëë neˈpyny” (Isaías 1:15). Extëm nˈijxëm, pënaty kyaj tmëjpëjtäˈäktë Diosë yˈanaˈamën o kyaj yˈoyëty diˈib yˈamdoodëp, kyaj mbäädë Dios tmëdooˈity (Proverbios 28:9; Santya̱ˈa̱gʉ 4:3).

Biiblyë duˈun ja tuk pëky tnigajpxy: “Nnijäˈäjëm ko ti nˈamdoˈojëm diˈibë ijtp tiˈigyë diˈibë yëˈë tsyejpy, yëˈë xymyëdoˈom” (1 Fwank 5:14). ¿Yëˈë tyäˈädë yˈandijpy ko Dios netyë tˈatsoojëmbijtäˈäyë nyuˈkxtakën pënaty mëduunëp? Kyaj. Extëmë apostëlë Pablo, yëˈë kanäkˈokë Dios tˈamdooy parë yaˈˈagëdäˈägëdët mä nety tmëdaty “tuˈugë pëjkënë mëkpë” diˈib yaˈˈayoojëp (2 Korintʉ 12:7, 8). Waˈanë nety yëˈë tmëdaty tuˈugë mëk päˈäm wyiinoty diˈib kyaj nyekyˈagëdaˈaky. Seguurë ko jantsy axëëk nyayjäˈäwë mët ko yaˈˈagëdakypyë netyë jäˈäy ets axtë yajjukypyëjk tuˈugë oˈkpë, per yëˈë kyaj nety mbäät nyayaˈˈagëdaˈagyëty (Apostʉlʉty 19:11, 12; 20:9, 10). Per oy kyayaˈˈatsoojëmbijtyë nyuˈkxtakën extëm tjatsejky, myëjjäˈäwë extëmë Dios yˈatsoojëmbijtë (2 Korintʉ 12:9, 10).

Tëëyëp, näägë jäˈäy jantsy yaˈˈatsoojëmbijtë nyuˈkxtakën mëjˈäjtëngyëjxm (2 Reyes 20:1-7). Per tim näˈäty duˈun tyuun jyäjtë. Ja Dios mëduumbëty, duˈun näˈäty tjäˈäwëdë ko Dios kyaj tˈatsoojëmbityë nuˈkxtakën, ets yëˈë diˈib myëmääy myëdäjtë. Extëmë rey David, dyajtëëy: “¿Nuˈun diempë, mijts Jyobaa xyjyaˈaytyëgoyaˈanyëts? ¿Winë xëë winë tiempë?” (Salmo 13:1). Per ko David tpëjkyë kuentë näkˈokë netyë Jyobaa të pyudëkëty, ta niˈigyë kyëktëjkë myëbëjkën. Pääty ta yˈakjënany mä ja nyuˈkxtakën: “Njantsy myëbëjkypyëts ko xymyëdaty mëjwiin kajaa tsojkën” (Salmo 13:5). Duˈun extëmë David, nanduˈun tyamë Dios mëduumbëty, waˈan nyuˈkxtäˈäktë janääm jatsojk mä kyajnëm tpëktë kuentë ko të yaˈˈatsoojëmbityë nyuˈkxtakën (Romanʉs 12:12).

¿WIˈIXË DIOS TˈATSOOJËMBITYË NUˈKXTAKËN?

Xymyoˈoyëm diˈib njantsy yajtëgoyˈäjtëm.

Ko tuˈugë uˈunkteety ttsekyë yˈuˈunk, kyaj yëˈë tˈandijy ko xëmë tmoˈoy tijaty tsyejpy ets näˈä ttimtseky. Nanduˈunë Dios, kyaj xëmë tˈatsoojëmbitäˈänyë nuˈkxtakën extëm njawinmäˈäyëm ttunët o näˈä njatsojkëm. Per mbäät nˈijtëm seguurë ko Dios duˈun extëm tuˈugë Uˈunkteety diˈib tsojkp, diˈib myoobyë yˈuˈunk yˈënäˈk tijaty yajtëgoyˈäjttëp, näˈä yëˈë ttseky ets extëm mbäät ndukˈoyˈäjtëm (Lukʉs 11:11-13).

Mbäät tˈatsoojëmbity ets kyaj nbëjkëmë kuentë.

¿Ets pën ntsojkëm parë dyaˈoyët tuˈugë jotmay? ¿Mbäät nwinmäˈäyëm ko Jyobaa kyaj tˈatsoojëmbityë nuˈkxtakën mët ko kyaj ti miläägrë nˈijxëm? Kyaj, pes mbäät të tˈatsoojëmbity ets kyaj të nbëjkëmë kuentë. Extëm nˈokpëjtakëm, waˈan tuˈugë mëtnaymyaayëbë të xypyudëjkëm mä meerë nyajtëgoyˈäjtëm (Proverbios 17:17). ¿Waˈandaa yëˈë Jyobaa të wyinmäˈänymyoˈoyëty parë xypyudëjkëm? Nan mbäät yaˈˈatsoojëmbityë nuˈkxtakën mët yëˈëgyëjxmë Biiblyë. Waˈan jap të nbatëmë wijyˈäjtën parë nwinguwäˈkëm tuˈugë jotmay (2 Timotee 3:16, 17).

Dios kyaj dyaˈoyë tukëˈëyë yˈamay jyotmay pënaty mëduunëp, per myëjämoopy parë twinguwäˈägët (2 Korintʉ 4:7). Tëgok, ojtsë Jesus tmënuˈkxtaˈagyë Tyeety parë yaˈˈawäˈätspëtsëmëdët mä tuˈugë jotmay mët ko jyëjptsëˈkëbë nety ko tkayajmëjpëtsëmët. Ta Tyeety yˈatsoojëmbijtë ko tkejxy tuˈugë anklës parë jyotmëkmooyë (Lukʉs 22:42, 43). Nanduˈun tyam, Jyobaa mbäät dyajtuny tuˈugë mëtnaymyaayëbë parë xymyëjämoˈoyëm mä meerë nyajtëgoyˈäjtëm (Proverbios 12:25). Kyaj kyëxëˈëky ko tˈatsoojëmbityë nuˈkxtakën, pääty oy ko listë nˈijtëm parë nbëjkëmë kuentë.

Näˈäty tsojkëp nˈawijxëm axtë ko Dios tˈixët näˈä xyˈatsoojëmbitäˈänëm.

Biiblyë jyënaˈany ko Dios diˈib tukëˈëyë mëkˈäjtënë myëdäjtypy, yˈatsoojëmbijtëbë nyuˈkxtakënë ja diˈib yujy tudaˈaky ko tiempë tpääty (1 Peedrʉ 5:6). Pääty, pën nˈijxëm ko nëgoo yˈokjajknë parë tˈatsoojëmbitëdë nuˈkxtakën, kyaj mbäät nwinmäˈäyëm ko kyaj tmëmay tmëdäjy. Jyobaa niˈigyë tijaty tnijawë, pääty tˈatsoojëmbityë nuˈkxtakën extëm mbäät ndukˈoyˈäjtëm.

Okpawinmay ko tuˈugë mˈuˈungë mutskpë mˈamdoyëty tuˈugë bisikletë. ¿Netyë xyjuuyët? Mbäät kyaj netyë xyjuy, pën mˈijxypy ko kyajnëm mbäät dyajˈyoˈoy ets mˈakˈawixët axtë koonëm mˈitët seguurë ko kyaj kyujotmayëty. Nanduˈun jyaty mëdë Dios, pën xëmë nˈamdoˈojëm ti ja jot korasoon tsyejpy ets oy diˈib nˈamdoˈojëm, mbäädë Dios xymyoˈoyëm näˈä yëˈë tˈixy nyajtëgoyˈäjtëm (Salmo 37:4).

MMËBËK KO JYOBAA MYËDOOˈIJTYPYË MNUˈKXTAKËN

Biiblyë pyudëjkëbë Dios mëduumbë parë tmëbëktët ko pudëjkëbë nuˈkxtakën. Per mbäät pën jyënaˈany, “kyaj tsyiptaˈaky duˈun njënäˈänëm, per tsip nmëbëjkëm”. Mbäät xytsyiptakxëm nˈawijxëm parë Dios tˈatsoojëmbitëdë nuˈkxtakën, pën jeky kujk ja amay jotmay nyajnäjxëm o pën kyaj tijaty yajtuny tëyˈäjtën myëët. Pën duˈun njäjtëm, nˈoknuˈkxtakëm xëmë extëmë Jesus jyënany.

Jesus pyëjtak tuˈugë ijxpajtën mä tuˈugë kuˈookytyoxytyëjk diˈib ayoop, diˈib janääm jatsojk myënuˈkxtak tuˈugë fes parë yajtunëdë tyëyˈäjtën (Lukʉs 18:1-3). Tyäˈädë fes kyaj tjatunanyë tëyˈäjtën, per ok, ta jyënany: “Tyamëtsë tyëyˈäjtën nduunët es këdiibë nyakymyinët es xynyakynyaˈamëdëts” (Lukʉs 18:4, 5). Pën tuˈugë fes diˈib axëkjäˈäy, pyudëjkë ja kuˈookytyoxytyëjk diˈib ayoop parë këdiibë axëëgë jäˈäy nyimaytyäˈägëdët, pes mas niˈigyë Dios diˈib tsojkp tpudëkëyaˈany pënaty mënuˈkxtakëp “xëëny koots”. Jesus jyënany ko Dios tsojkˈamë tëyˈäjtën ttunäˈäny (Lukʉs 18:6-8).

Näˈäty, kyaj nekyˈamdowäˈänëmë Diosë nyaybyudëkë, per kyaj yˈoyëty ntsipkaˈxëm. Pën xëmë Dios nmënuˈkxtakëm, yëˈë nety ndukˈijxëm ko ntsojkëm xyˈatsoˈojëmbijtëm. Nan nëjkxëp njäjtëm wiˈix mbäät nnijäˈäwëm ko Dios yˈatsoojëmbijtypyë nuˈkxtakën, ets duˈuntsoo niˈigyë nmëwingoˈonëm. Duˈunë duˈun, pën nmënuˈkxtakëmë Jyobaa extëm yëˈë ttseky ets pën nmëbëjkën, mbäät nˈijtëm seguurë ko nëjkxëp tˈatsoojëmbityë nuˈkxtakën (Lukʉs 11:9).

[Notë]

[Mä tmaytyaˈaky diʼib jëjpˈam pajina 4]

“Mëwingondë Dios, es yëˈë nandëˈën mmëwingonëdëp miitsëty.” (Santya̱ˈa̱gʉ 4:8)

[Mä tmaytyaˈaky diʼib jëjpˈam pajina 5]

“Kyaj ntsëˈk njäˈäjëm ko nˈamdoˈojëm tii ja Dios, mët ko nnijäˈäjëm ko ti nˈamdoˈojëm diˈibë ijtp tiˈigyë diˈibë yëˈë tsyejpy, yëˈë xymyëdoˈom.” (1 Fwank 5:14)

[Mä tmaytyaˈaky diʼib jëjpˈam pajina 6]

“Pääty yuunk naxypyëdë Dios wyindum, es dëˈën jäˈtëp ja tiempë mä Dios myaˈitäˈänëdë mëj.” (1 Peedrʉ 5:6)

[Mä tmaytyaˈaky diʼib jëjpˈam pajina 6]

“Amdowdë Dios, es mmoˈoyëdët.” (Lukʉs 11:9)

[Dibujë diˈib mä pajina 6]

Dios mbäät tˈatsoojëmbityë nuˈkxtakën mët yëˈëgyëjxmë Biiblyë

[Dibujë diˈib mä pajina 6]

Dios mbäät dyajtunyë mëtnaymyaayëbë parë xymyëjämoˈoyëm mä meerë nyajtëgoyˈäjtëm