Tuundëkëdë jatëgok ets mëjämoˈoytyë mëguˈuktëjk

PEDRO kuwopy kukäˈätsypyëm jyëëy yaxy mët ko jyënany ko kyaj tˈixyˈatyë Jesus ets tsojkëbë nety jatëgok ttunëdë mëjää parë oy yˈitët mëdë Dios. Per oy duˈun jyajty, Jesus yajtunaambyë netyë Pedro parë tpudëkët ja wiinkpë myëguˈuktëjk. Pääty tˈanmääy: “Ko mij mjodëmbitët, xypyudëkët ja mmëguˈugëty” (Luk. 22:32, 54-62). Ok, ta Pedro tnigopkˈäjty ja naymyujkën mä primer siiglë (Gal. 2:9). Nanduˈun tyam, pënaty të yˈoktuumbëdë mëjjäˈäy mä naymyujkën, mbäät jatëgok duˈun tyundë ets agujk jotkujk nyayjawëdët ko tmëjämoˈoytyëdë myëguˈuktëjk.

Näägë nmëguˈukˈäjtëm të yajpëjkëdë tyuunk mët ko kyaj tnekykyuytyundë diˈib nyikëjxmˈäjttëp ets mbäädë net wyinmaytyë ko kyaj oy tijaty ttundë. Julioa diˈib Sudamérica, ja 20 jëmëjt naxy tyuuny mëjjäˈäy, yëˈë jyënany: “Jamëts ijtyë nxëë ndiempë nyajnaxy mäjëts nyaˈoyë diskursë, nguˈix ngugäjpxë nmëguˈukˈäjtëm ets kojëts nbudëkëdë. Per ajotkumonëts nyajtëgooytyaay ets awäˈäts tukwäˈätspëmts nnayjäˈäwë. Mëkëts njantsy jäˈäwë kojëts duˈun njäjty”. Tyam, të jatëgokë Julio tyuundëkë mëjjäˈäy.

“NNAYJAWËDË JOTKUJK”

Santiago tkujäˈäyë: “Mëguˈugitëty, nnayjawëdë jotkujk ko myinët oytyim diˈibë ayoˈonëty” (Sant. 1:2). Santiago yëˈë myaytyak ko nguˈayoˈojëm mët ko nbokyjyaˈayˈäjtëm ets mët ko jäˈäy xyˈaxëkˈijxëm ko nmëduˈunëmë Dios. Yëˈë nyimaytyak extëm ko këˈëm nnaymyëmäˈäy nnaymyëdäjëm ets ko winˈixy wingexyë jäˈäy ntsojkëm (Sant. 1:14; 2:1; 4:1, 2, 11). Ko Jyobaa xyëjwijtsëmbijtëm mbäät mëk njäˈäwëm, per kyaj mbäät xypyëjkxëmë xondakën (Eb. 12:11).

Pën të myajpëjkëdë mduunk mä naymyujkën, mbäät xëmë xyˈixtë nuˈun ja mëbëjkën xymyëdattë ets xytyukˈixtëdë Jyobaa ko mtsojktëp. Nan mbäät mnayajtëwëdë tiko nety duˈun mduny. ¿Yëˈë parë këˈëm xytyukˈoyˈatäˈäny? ¿O yëˈë ko nety xytsyekyë Jyobaa ets mˈity seguurë ko yëˈë jyaˈäjtypyë naymyujkën ets ko tsojkëp tsuj yajxon yajkuentˈatët? (Apos. 20:28-30.) Pënaty të tyundë mëjjäˈäy ets duˈunyëm tyam tmëdundë Dios, tyukˈijxtëp niˈamukë axtë Satanás ko duˈunyëm ttsoktë Jyobaa.

Ko rey David yajjëjwijtsëmbijty mët ko mëjwiin kajaa pyokytyuuny, kyupëjk ets ojts yajpokymyeˈkxy. Ok, duˈun ojts yˈëy: “Jotkujk yajpääty ja diˈib yajmaˈkxpë tyëgoˈoyën, diˈibë pyoky të yajmeˈkxy. Jotkujkë jäˈäy diˈibë Jyobaa kyaj tyuknikëjxmˈatyëtyë tëgoˈoyën; diˈib mä jyukyˈäjtën kyaj jyaˈˈatyë naywyinˈëënë” (Sal. 32:1, 2). Ko David yajjëjwijtsëmbijty, yëˈë diˈib niˈigyë yaˈoˈoyë ets yëˈë diˈib pudëjkë parë mas oy tkuentˈäjtyë Diosë kyäjpn.

Nimayë nmëguˈukˈäjtëm diˈib jatëgok tuundëjkëdëp mëjjäˈäy, mas niˈigyë oy tyundë. Niduˈuk jyënany: “Tyam mbäädëts mas oy nbudëkë pënaty tuundëgooytyëp”. Ets jatuˈuk jyënany: “Tyam mas niˈigyëts nyajtsobääty kojëts nbudëkë nmëguˈukˈäjtëm”.

¿MBÄÄT JATËGOK DUˈUN MDUNY?

Diˈib jyaayë Salmo jyënany: “Kyaj xëmë [Jyobaa] tnigäjpxäˈäny mäjaty ndëgoˈoyëm” (Sal. 103:9). Pääty, oy ko kyaj nwinmäˈäyëm ko Dios ninäˈä tkanekytyukjotkujkˈatäˈäny tuˈugë jäˈäy diˈib mëjwiin kajaa të pyokytyuny. Ricardo, diˈibë nety kanäk jëmëjt të tyuny mëjjäˈäy, jyënaˈany: “Mëk axëëgëts nnayjäˈäwë kojëts ndëgooy. Jekyëts nnayjäˈäwë ko kyajëts oy tijaty nduny ets yëˈëts diˈib xyajtuˈudujk parëts jatëgok ndunët mëjjäˈäy. Njëjptsëˈkëts kojëtsë nmëguˈuktëjk xykyanekytyukjotkujkˈatët. Per kom duˈunyëmëtsë jäˈäy nbudëkëyaˈany, kanäägëts nyaˈëxpëjky, nmëjämooyëtsë nmëguˈukˈäjtëm mä ja Tëjk mä nˈëxpëjkëm ets nëjkxtëts mëët käjpxwäˈkxpë. Tyäˈädë, yëˈëjëts xypyudëjkë, ets tyam ndunyëts jatëgok mëjjäˈäy”.

Pën tuˈugë nmëguˈukˈäjtëm pyëjkëˈkypyë akë, tsip jatëgok tyuundëkët mëjjäˈäy. Mas oy ko tpanëjkxëdë yˈijxpajtënë David. Yëˈë kyugakë rey Saúl diˈib tijaty nyaywyinaxëjäˈäwë, ets oy kanäkˈok mëët jyanaybyatë, yëˈë kyaj nyaynyitsiptuunë (1 Sam. 24:4-7; 26:8-12). Ko Saúl yˈoˈky mä nety tsyiptuny, ta tnijëëy tniyaxy ets jyënany ko Saúl mëdë Jonatán mëkë nety ttsoktë (2 Sam. 1:21-23). David kyaj tpëjkëˈkyë akë.

Pën ja pën axëëk të myajnayjawëty o kyaj tijaty të ttuny tëyˈäjtën myëët, këdii akë mnaytyukmëmadaˈagyëty. William, diˈib tuun mëjjäˈäy naa 30 jëmëjt jap Gran Bretaña, tyukjotˈambëjk näägë mëjjäˈäytyëjk ko ojts yajpëjkë tyuunk. ¿Ti diˈib pudëjkë parë jatëgok nyayaˈoˈoyë? Yëˈë jyënany: “Diˈibëts mëjwiin kajaa xypyudëjkë, yëˈë kojëts ojts ngajpxyë Biiblyë mä yajnimaytyaˈagyë Job. Pënë Jyobaa pyudëjkë Job parë ojts nyayajtuˈugyëdë mët ja nidëgëëkpë myëguˈuktëjk, ¿ti këdiijëtsë Jyobaa xypyudëkët parëts jatëgok nayajtuˈugyëdët mëdë mëjjäˈäytyëjk?” (Job 42:7-9).

DIOS KYUNUˈKXYPY PËNATY JATËGOK TUUNDËJKËP MËJJÄˈÄY

Pën këˈëm ojts xytyukniwinmayë ko kyaj mnekytyunany mëjjäˈäy, oy ko mnayajtëwëdët tiko duˈun xytyuuny. ¿Yëˈë ojts xymyëˈanuˈkxë mˈamay mjotmay? ¿Jam ti diˈib mas jëjpˈam mbëjtak mä mjukyˈäjtën? ¿Yëˈë myaˈëxtëwäˈkë ko wiinkpë nmëguˈukˈäjtëm tyëgoytyë? Oy wyiˈixˈatët, jamyats ko nety mduny mëjjäˈäy wiˈixëmë mëguˈuktëjk xypyudëjkë. Mët ja oybyë mˈijxpajtën, mët ja diskursë diˈib myajnäjx ets ko xykyuˈix xykyugäjpxë, yëˈë diˈib pudëjkëdë parë tmëmadaktë amay jotmay. Ets jotkujk ijty mnayjawëty ko mduny mëjjäˈäy ets nanduˈunë Jyobaa xyajjotkujkˈaty (Prov. 27:11).

Jyobaa të tpudëkë mayë nmëguˈukˈäjtëm parë jatëgok jotkujk nyayjawëdët ets tyuktëkëdët ja tsojkën parë jatëgok tyunët mëjjäˈäy mä naymyujkën. Oy këˈëm xytyukniwinmäˈäyë ko kyaj mnekytyunany mëjjäˈäy o jam tiko ojts myajpëjkë mduunk, ¿tiko xykyatunyë mëjää parë jatëgok ndunët “mëbëjkpëtëjk kuentˈäjtpë”? (1 Tim. 3:1.) Pablo xëmë tninuˈkxtakë ja Dios mëduumbëty diˈib Colosa parë yajxon tjaygyukëdët diˈibë duˈunë Dios tsyejpy. ¿Tiko? Yëˈë parë jyukyˈattët “wintsëˈkën myëët extëmë Jyobaa ttukjotkëdaˈaky” (Col. 1:9, 10, Traducción del Nuevo Mundo). Pën mduundëjkëp jatëgok mëjjäˈäy mä naymyujkën, mënuˈkxtäˈägë Jyobaa parë mëjämoˈoyëdët, mmoˈoyëdët ja maˈkxtujkën etsë agujkˈäjt jotkujkˈäjtën. Mä tyamë tiempë jyëjpkëxanë, Diosë kyäjpn yajtëgoyˈäjttëbë mëjjäˈäytyëjk diˈib tsuj yajxon kyuentˈattëbë naymyujkën. ¿Mbäät xyjotmëkmoˈoyë mëguˈuktëjk? ¿Mdunäämp duˈun?

[Notë]

[Dibujë diˈib mä pajina 29]

Jyobaa të may tpudëkë nmëguˈukˈäjtëm parë jatëgok jotkujk nyayjawëdët ets tyuktëkëdët ja tsojkën parë jatëgok tyunët mëjjäˈäy

[Dibujë diˈib mä pajina 30]

Yajnigëxëˈëk ko mtsejpyë Jyobaa ko xymyëdunët agujk jotkujk