Nˈokpudëjkëmë nmëguˈukˈäjtëm diˈib mëët ndëjkˈayoˈoyëm
1. ¿Tiko yˈoyëty nëjxëm ëwäˈx käjxwäˈxpë nimajtskaty?
1 Tëgokë Jesus ja tkejxy 70 yˈëxpëjkpë parë nëjx kyäjxwäˈxtë, “es tkejxy nimajtskaty” (Luk. 10:1). Seguurë ko ojts nyaybyudëkëdë nixim niyam ets nyaymyëjämooyëdë mä naty jam kyäjxwäˈxtë. Ko nanduˈun nyajkajxëm mëdë nmëguˈukˈäjtëm, ¿wiˈix mbäät nbudëjkëm?
2. Ko ja nmëguˈukˈäjtëm tmëtmaytyäˈägëdë jäˈäy, ¿wiˈix mbäät nmëdooˈijtëm ets tiko?
2 Nˈokmëdoˈogujkëm. Mmëdoogukë yajxon wiˈix ja mmëguˈuk tmëtmaytyaˈagyë jäˈäy (Sant. 1:19). Pën jam tkajxyë Biiblyë, paˈix nanduˈun mä mBiiblyë ets winˈijxpat ko kyäjxët duˈun ja mmëguˈuk ets duˈun ja jäˈäy. Pën mmëdoogujkëp yajxon wiˈix jam myaytyäˈäktë, mbäät ja jäˈäy pyudëkëty parë nanduˈun tmëdoogukët.
3. ¿Näˈä mbäät nbudëjkëm ja nmëguˈukˈäjtëm mä ja jäˈäy tmëtmaytyaˈaky?
3 Nˈokpëjkëmë kuentë näˈä mbäät ngäjxëm. Ko ja nmëguˈukˈäjtëm tmëtmaytyäˈägëdë jäˈäy, nwintsëˈkëmë naty ko naˈijxëm ets yëˈë dyajnëjxët ja maytyaˈaky (Rom. 12:10). Kyaj yˈoyëty ngajxypyojtëm, per pën jam tjäˈäytyëgoy wiˈixë naty jyënäˈänäˈäny, o jam ja jäˈäy tjëjpkugäjxë ja maytyaˈaky o jam ti dyajtëy ets ja nmëguˈukˈäjtëm ttseky ja naybyudëkë, ta nbudëjkëm ets nyajnëjxëm ja maytyaˈaky diˈibë naty të tˈëjxë, kyaj nyajtsondakëmë wiinkpë (Pro. 16:23; Ecle. 3:1, 7). Pën käjxëm, oy ko nyajtuˈunëmë ää ayuk diˈib mbäät ja jäˈäy pyudëkëty parë tnijawëdë Diosë yˈayuk (1 Kor. 14:8).
4. ¿Ti mbäät nduˈunëm parë nëjx jantsy jotkujk nayjäˈäjëm ets oy ja Diosë tyuunk nduˈunëm?
4 Ko ja 70 Jesusë yˈëxpëjkpë jyëmbijttë mä naty ojts të kyäjxwäˈxtë, ta “jyantsy xyondaktë” (Luk. 10:17). Ëtsäjtëm nan nëjxëp jotkujk njantsy nyayjäˈäjëm ets nëjxëp oy ja Diosë tyuunk nduˈunëm, pën nmëdoˈogujkëm ko ja nmëguˈukˈäjtëm tmëtmaytyäˈägëdë jäˈäy ets pën nbëjkëmë kuentë näˈä mbäät ngäjxëm parë nbudëjkëm.