Kyaj jeˈeyë nnayjamyëdäjtëm
1. ¿Wiˈix mbäät nbanëjkxëmë yˈijxpajtënë apostëlë Pablo ko nëjkxëm tëjkˈayeˈebyë mëdë nmëguˈukˈäjtëm?
1 Tëgok tëgokë apostëlë Pablo yajpaty mëdë myëguˈuktëjk diˈib mëët kyäjpxwäˈkxtë, naymyëjämooyëdë nixim niyam (Rom. 1:12). Ets ëtsäjtëm, ¿nnaybyudëjkëm ets nnaymyëjämoˈoyëm mëdë nmëguˈukˈäjtëm ko mëët nëjkxëm tëjkˈayeˈebyë? En lugäär jeˈeyë nnayjamyëdäjtëm, ¿tiko nganimaytyakëm tijaty të xypyudëjkëm parë mas oy ngäjpxwäˈkxëm?
2. ¿Wiˈix mbäät nbudëjkëmë nmëguˈukˈäjtëm ets kyaj tsyëˈëgët, ets tiko jyëjpˈamëty?
2 Nˈokpudëjkëm parë kyaj tsyëˈëgët. Näägë nmëguˈukˈäjtëm yajnigëxëˈktëp mä wyiin jyëjp ets mä yˈää yoˈkn ko tsëˈkëdëp. Ko nmëjkumäˈäyëm, mbäät pyudëkëdë parë kyaj tsyëˈëgët. ¿Wiˈix mbäät nˈakpudëjkëm? Tuˈugë sirkuitë tyukmëtmaytyakypyë myëguˈuktëjk diˈib mëët kyäjpxwaˈkxy ko yëˈë nan tsëˈkëp ets ko koonëmë Jyobaa tmënuˈkxtaˈaky parë kyaj nyekytsyëˈëgët. Jatuˈugë nmëguˈukˈäjtëm tnimaytyaˈaky ti diˈib pudëjkëp parë kyaj tsyëˈëgët, jyënaˈany: “Oy ko nmëtxikëmë jäˈäy, per näˈäty, pën kyajts nnuˈkxtaˈaky, mëkëtsë tsëˈëgë xyjantsy tyuktëkë ets kyajts mbäät nekyxyiˈiky”. ¿Tijaty të xypyudëjkëm parë kyaj ntsëˈkëm? ¿Tiko ngatukmëtmaytyakëm ja nmëguˈukˈäjtëm diˈib mëët nëjkxëm tëjkˈayeˈebyë?
3. ¿Wiˈix mbäät naywyinmäˈänymyoˈoyëm ko nëjkxëm tëjkˈayeˈebyë mëdë nmëguˈukˈäjtëm?
3 Nˈoknaywyinmäˈänymyoˈoyëm. ¿Ti jäˈäy mdukmëtmaytyakypy o ti myajtëëpy parë xyajtsondaˈagyë maytyaˈaky? ¿Oy të wyimbëtsëmy ko të xyˈaknipiy xyˈaknikony extëm nyaˈˈanmäˈäyëm mä ëxpëjkpajn nmëtmaytyakëmë jäˈäy? Tukmëtmaytyäˈäk ja mëguˈuk wiˈix të xytyuny (Prov. 27:17). Ko xynyijëmbitëdë jäˈäy diˈib yˈoymyëdoobyë Diosë yˈayuk, tukmëtmaytyäˈäk ja mëguˈuk ti mnimaytyäˈägaampy ets wiˈix xytyunäˈäny. Ets ko xyaˈëxpëjktäˈäyët tuˈugë jäˈäy, tukmëtmaytyäˈäk tiko mas niˈigyë të xynyimaytyaˈaky tuˈugë bersikulo o diˈib mët ja jäˈäy të xyˈëxpëky, o tiko duˈun të xyaˈëxpëky.
4. ¿Tiko nbudëkëyäˈänëmë nmëguˈukˈäjtëm diˈib mëët nëjkxëm tëjkˈayeˈebyë?
4 Ja Dios mëduumbëty diˈib jukyˈäjttë mä primer siiglë, kyaj yëˈëyë tpudëkëyandë pënaty tyukmëtmaytyaktë Diosë yˈayuk, nanduˈun nyaybyudëjkëdë nixim niyam (Apos. 11:23; 15:32). Päätyë apostëlë Pablo ojts ttukniˈˈixë Timoteo ets ojts tˈanëëmë parë nanduˈun ttukniˈˈixët ja myëguˈuktëjk ti nety të tjaty (2 Tim. 2:2). Pën ndukniˈˈijxëm nanduˈunë nmëguˈukˈäjtëm diˈib të njäjtëm, ta mas niˈigyë nëjkx ttukxondäˈäktë Diosë tyuunk ets mas oy nëjkx ttundë. Per diˈib mas oy, yëˈë ko nëjkxëp nyajxondakëmë nDeetyˈäjtëmë tsäjpotmëdë (Eb. 13:15, 16).