Nˈokpëjtakëm jëjpˈamë Diosë tyuunk
1. ¿Wiˈixë Jesus dyajnigëxeˈky ko jëjpˈam tpëjtakyë Diosë tyuunk?
1 Jesus yëˈë mas jëjpˈam pyëjtakë Diosë tyuunk. Naygyëyäjkë mä tyäˈädë tuunk ets tyukˈyoˈoytyaay ja it lugäär diˈib Palestina parë tmëtmaytyakyë jäˈäy nääk ttimpaty. Nan adëyë jyukyˈajty parë mas ja xyëë tiempë dyajtuuny mä Diosë tyuunk (Mat. 8:20). Ets ko tëgok ja may jyaˈay jyayajwëˈëmanë parë dyaˈˈagëdäˈägëdë päˈäm jäˈäy, Jesus jyënany: “Tsojkëp nandëˈën ëj nnëjxët mä wiinkpë käjpn es nˈawanëdëts ja oybyë ayuk diˈibë nyigajxypy ja Diosë kyutujkën, jaˈa ko päätyëts ja Dios të xykyexy” (Luk. 4:43).
2. ¿Tiko Jesus tpëjtaky mas jëjpˈamë Diosë tyuunk?
2 ¿Tiko Jesus tpëjtaky mas jëjpˈamë Diosë tyuunk? Myëduˈuk, yëˈko yajwäˈätsaambyë naty ja Diosë xyëë (Mat. 6:9). Myëmajtsk, yëˈko tsyejpyë naty mëk ja Tyeety, pääty kyuytyunaambyë naty ja tsyojkën ets tijaty tukˈanaˈamëp (Fwank 14:31). Ets myëdëgëëk, yëˈko pyaˈˈayoojë jäˈäy ets pyudëkëyan (Mat. 9:36, 37).
3. ¿Wiˈix mbäät nyajnigëxëˈkëm ko jëjpˈam nbëjtakëmë Diosë tyuunk?
3 ¿Wiˈix mbäät nbanëjxëmë yˈijxpajtën? Mbäät kajaa tsyiptaˈaky nbëjtakëm jëjpˈamë Diosë tyuunk extëmë Jesus, mët ko kajaa xypyëjkxëmë tiempë tijaty jaˈäjtp yä naxwiiny (Mat. 24:37-39; Luk. 21:34). Pääty, nˈokˈijxëm ko diˈib mas jëjpˈam yajtunäämp, yëˈë ets njuˈtëmë tiempë parë jawyiin nˈëxpëjkëm ti nëjxë jäˈäy ndukmëtmaytyäˈägäˈänëm ets xëmë nëjxëm tëjkˈayeˈebyë (Fili. 1:10). Nan oy ko adëyë njukyˈäjtëm ets jäˈäwën mëët nyajtuˈunëm tijaty jaˈäjtp yä naxwiiny (1 Kor. 7:31).
4. ¿Tiko tyam mbäät nbëjtakëm jëjpˈamë Diosë tyuunk?
4 Tuˈugë jäˈäyë kuwijypyë, yëˈë tyuumpy diˈib mas jëjpˈam pën waanë tiempë tˈakmëdaty. Extëm nˈokpëjtakëm, ko tnijawët myinäˈäny tuˈugë mëk poj tuu, jam ja tiempë dyajtunët etsë jyot myëjää mä wiˈix mbäädë fyamilyë tkuwäˈäny ets nanduˈun tˈawanët ja myëdëjkpäˈäjëty. Tukëˈëyë ja tyuunk yˈayoˈon mbäät yˈokˈawixy. Pes nanduˈun tyam, ja waanë tiempë yˈakweˈemy parë jyäˈtëdë Armajedon (Sof. 1:14-16; 1 Kor. 7:29). Pääty, pën nnitsoˈogäˈänëm ets ntsojkëm parë nanduˈun ja nmëguˈukˈäjtëm nyitsoˈoktët, jëjpˈam ets këˈëm nˈijxëm wiˈix nyajpatëm ets wiˈix ndukniˈˈijxëm duˈun mä naymyujkën ets mä ngäjxwäˈxëm (1 Tim. 4:16). Duˈunë duˈun, pën jëjpˈam nbëjtakëmë Diosë tyuunk ta nëjx nnitsokëm.