¿Mnijäˈäp tijaty mgupëkaampy?

Abëtsemy nyaxwinyëdë niˈigyë myayë hospital mä doktoortëjk tsyuktë ets kyaj dyajtundë neˈpyny. Ets mijts, ¿mnijäˈäp yajxon tijatyë doktoor yajtuundëp parë kyaj dyajtëkëdë neˈpyny? Ko xynyijawët wiˈix ja doktoor myajtsoybyatäˈänyëty o mtsukäˈänyëty yëˈë mbudëkëdëp parë net yajxon xywyinmayët ti mgupëkaampy. Oy ko jawyiin xyˈixëdë tadë bideo La negativa a la sangre. La medicina acepta el reto. Ta net xyˈatsoojëmbitëdë tadë yajtëˈëwën diˈib miimp. Ok, ta net xymyënuˈkxtäˈägëdë Jyobaa parë yajxon xynyijawët tijaty mbäät xykyupeky. Mä tyäˈädë bideo tap nyaxy mä jäˈäy yajtsuky, pääty yëˈë uˈunktääk uˈunkteety nyijawëp pën tyukˈijxtëbë yˈuˈunk yˈënäˈkë mutskatypyë o kyaj.

1) ¿Tiko Jyobaa tyestiigëty kyaj tkupëktë etsë neˈpyny tyëkët nyiniˈxoty? 2) ¿Jantsy tsoybyatandëbë Jyobaa tyestiigëty? 3) ¿Ti madakën myëdäjtypy ja päˈäm jäˈäy? 4) Ko tuˈugë jäˈäy tkupeky tijatyë doktoor yajtuumpy mä jäˈäy yajtsuky, ¿tiko mbäät njënäˈänëm ko winmaapy yajxon ets ko jukyˈatäämp? 5) Ko tuˈugë jäˈäy kom tyaxy, ¿ti majtsk peky tyuundëbë doktoor? 6) Nigäjpx taxk peky tijatyë doktoor tyuundëp parë kyaj dyajtëkëdë neˈpyny. 7) ¿Tijaty tyuundëbë doktoor 1) parë jäˈäy kyaj nëgoo tyaxët, 2) parë kyaj tyëgoyëdë glóbulos rojos, 3) parë jäˈäyë nyeˈpyny kyomët ets 4) parë jäˈäyë nyeˈpyny myujktäˈäy ko yajtsuky? 8) Oknimaytyäˈäk wiˈix tyunyë hemodilución etsë recuperación de sangre. 9) ¿Tijaty mbäät xynyijawë ko doktoor mˈanëˈëmxëdët ti yajtunaampy parë kyaj dyajtëkëdë neˈpyny? 10) ¿Mbäädë jäˈäy mëjwiin kajaa yajtsuky ets kyaj doktoor dyajtëkëdë neˈpyny? Oknimaytyäˈäk. 11) ¿Wiˈix tyam mayë doktoortëjk wyinmaytyë?

Niduˈuk niduˈugë Dios mëduumbë mbäät dyajˈyoˈoyë jyot wyinmäˈäny extëm të tnijawë mä Biiblyë, pën yˈaxäjëyaampy diˈibë doktoor yajtuundëp o pën kyaj extëm yaˈixy mä bideo. ¿Mnijäˈäbë net yajxon mëdë mˈuˈunk mˈënäˈk tijaty mgupëkaampy diˈibë doktoor yˈawäˈänëp? ¿Të xykyujayë tijaty mˈaxäjëyaampy mä tarjetë DPA (directriz médica)? Käjpxë “Preguntas de los lectores” diˈib miimp mä La Atalaya 15 de junio de 2004 etsë 15 de octubre de 2000 yëˈë niˈigyë mbudëkëdëp parë xynyijawët diˈibë mgupëkëp ets diˈibë kyaj. Käjpx nanduˈun mä Nuestro Ministerio del Reino de noviembre de 2006 mä jyënaˈany: “¿Qué opino de las fracciones sanguíneas y de los procedimientos médicos que impliquen el uso de mi sangre?”. Ko naty yajxon të xywyinmay, ta net xyjaaynyaxët yajxon mä tarjetë DPA. Pënaty mniwäˈkpëtsëmanëp etsë mjiiky mëguˈuk diˈib kyaj Tyestiigëty jëjpˈam tnijawëdët tijaty mgupëkaampy.