Nˈoknaygyuentˈäjtëm mä ngäjpxwäˈkxëm
1. ¿Tiko mbäät nˈijtëm wijy kejy mä nˈëwäˈkx ngäjpxwäˈkxëm?
1 Tyamë Dios mëduumbëty yˈëwäˈkx kyäjpxwäˈkxtë mä jyukyˈattë “axëk jäˈäyëty esë kujuundëjkëty”, duˈun yajpäättë “extëm ja borreegë waxkäˈuk agijky” (Mat. 10:16; Fili. 2:15). Oytyim määjëtyë jäˈäy tnibëdëˈëktë gobiernë, nyaynyibëdëˈëgëdë nixim niyam ets jyaˈˈaty diˈib myäjtstëbë jäˈäy parë ttëytyundë, tyäˈädë yëˈë xytyukˈijxëm ko “waanë niˈigyë oˈktëy” tyamë jäˈäy yˈadëtsnëdë (2 Tim. 3:13). ¿Diˈibatyë tekstë mbäät xypyudëjkëm parë nˈijtëm wijy kejy mä nˈëwäˈkx ngäjpxwäˈkxëm? (Mat. 10:16.)
2. ¿Näˈä mbäät ntsoˈonëm mä nety jam ngäjpxwäˈkxëm ets nëjkxëm wiink lugäär?
2 Nˈoktuˈunëm tijaty mëdë wijyˈäjtën. Mä Proverbios 22:3 jap tnigajpxy ko wijˈyë jäˈäy diˈib të tˈixyë ayoˈon etsë net nyayuˈutsyëty. Pääty, nˈokˈijtëm wijy. Xëmë nyajpatëm seguurë mä nax käjpn, per mbäät pojënë tyëgatsy. Mbäät ajotkumonë myindë mayë polisiyë o tyuˈukmuktë mayjyaˈay nëˈääy tuˈääy. O näˈäty, mbäädë jäˈäy xyˈanmäˈäyëm mä nety jam ngäjpxwäˈkxëm ets ndimnëjkxëm mët ko kutsëˈëgë ja lugäär. Oyxyëp ko netyë ntsoˈonëm ets wiinktsoo nëjkxëm käjpxwäˈkxpë, kyaj jamyë nwëˈëmëm parë nnijawëyäˈänëm ti tuun jäjtëp (Pro. 17:14; Fwank 8:59; 1 Tes. 4:11).
3. ¿Wiˈix mbäät nguytyuˈunëmë Eclesiastés 4:9 mä ngäjpxwäˈkxëm?
3 Kyaj nëjkxëm naytyuˈuk. Eclesiastés 4:9 Jyënaˈany: “Niˈigyë yˈoyëty nimajtsk ets kyaj dyuˈunëty naytyuˈuk”. Waˈan të nˈijxwëˈëmëm naytyuˈuk ngäjpxwäˈkxëm ets kyaj nˈijxëm kyutsëˈëgëty ja territooryë, per ¿waˈandaa duˈunyëm yajpääty seguurë? Waˈan näägë lugäär duˈunyëm yajpääty, per ta nääk mä kyutsëˈëgëty nyëjkxët naytyuˈugë toxytyëjk o tuˈugë mixy ëwäˈkx käjpxwäˈkxpë tëjkmdëjkm ets mas pën të kyootsënë. Të yaˈixy ko oy ko nëjkxëm mët tuˈugë jamyëët diˈib listë yajpäädëp (Ecl. 4:10, 12). Niˈamukë mbäät nˈijx nduˈunëm ja nmëguˈukˈäjtëm diˈib mëët ngäjpxwäˈkxëm ets oy ko ngostumbrëpëjkëm niduˈuk ndukˈawäˈänëm ko nety nëjkxënë.
4. ¿Ti mbäät niˈamukë nduˈunëm parë nnaygyuentˈäjtëm mä ngäjpxwäˈkxëm?
4 Mëjjäˈäytyëjk diˈib tuundëp mä naymyujkën, yëˈë xykyuentˈäjtëm niˈamukë, yëˈë nyikëjxmˈäjttëp ets xyˈanmäˈäyëm wiˈix yajpääty ja lugäär mä ngäjpxwäˈkxäˈänëm (Ebre. 13:17). Pën ijtëm yujy tudaˈaky ets nduˈunëm extëm nyaˈˈanmäˈäyëm, nëjkxëbë Jyobaa xykyunuˈkxëm (Miq. 6:8; 1 Kor. 10:12). Nˈoktuˈunëm niˈamukë ets nyaˈˈabëtsëˈëmëm ja territooryë, per xëmë mbäät nnaygyuentˈäjtëm.