Nˈokpudëjkëmë jäˈäy ets tmëdowdët ko Dios myëgäjpxëdë
1. Ko ojts tyunyëtyë Tuˈukmujkënë tëgëk xëëbë, ¿diˈibë foyetë pëtsëëm, ets tiko yˈoyëty nyajtuˈunëm?
1 Ko ojts tyunyëtyë Tuˈukmujkënë tëgëk xëëbë “Yajmin ja mˈanaˈamën”, ja ojts pyëtsëmy majtskë foyetë: Mëdow ko Dios mmëgajpxyëty ets mjukyˈatët winë xëë ets jatuˈuk diˈib wingëjxy maytyakp, Mëdow ko Dios mmëgajpxyëty. Kom waanë letrë tmëminy, kyaj tsyiptaˈaky yajkäjpxnaxët. Ets ko pyëtsëëmyë tyäˈädë foyetë Mëdow ko Dios mmëgajpxyëty ets mjukyˈatët winë xëë, të nety yajkupëky parë yajkäjpxnaxët 431 ayuk.
2. ¿Pënaty pudëkëyanëdëbë tyäˈädë foyetë?
2 ¿Pënaty mbäät pyudëkëdë? Min nˈokˈijxëm wiˈixë jäˈäy yajpäättë abëtsemy nyaxwinyëdë:
• Diˈib kyaj tjaty lyetrëkäjpxët o diˈib tsiptakxëp, ets mbäädë nmëguˈukˈäjtëm tpëktë kuentë mä tim jawyiin tkuˈixëdë o mä jatëgok tnijëmbittë.
• Diˈib wiink ayuk käjpxp ets kyaj ti ëxpëjkpajn mä yˈayuk o jeˈeyë jyaˈˈaty tuˈuk majtsk. Nan mbäät yajmoˈoyë jäˈäy diˈib kyaj tjattë tkäjpxtëdë yˈayuk.
• Diˈibë jäˈäy uum ets mbäät ja nmëguˈukˈäjtëm mä kyäjpxwaˈkxy tmëgajpxyë duˈumbë jäˈäy extëm yëˈë kyäjpx myaytyäˈäktë.
• Uˈunkteety diˈib tyukniˈˈixëyaambyë tëyˈäjtënë yˈuˈunk diˈib kyajnëm tjaty lyetrëkäjpxët.
3. ¿Tijaty myëmiimbyë tyäˈädë foyetë Mëdow ko Dios mmëgajpxyëty?
3 Tijaty myëmiimbyë tyäˈädë foyetë. Tyäˈädë foyetë Mëdow ko Dios mmëgajpxyëty waanë letrë tmëminy. Mä tuˈuk tuˈugë pajina kyexy, tmëminy tuk waatsë letrë diˈib wingëjxy maytyakp ets tuˈugë tekstë mä tnimaytyaˈaky diˈib të yaˈëxpëky. ¿Tiko duˈun tmëminy? Nˈokpawinmäˈäyëm ko pën xyˈawäˈänëm tuˈugë foyetë diˈib wiink ayuk ets tmëminy mayë letrë diˈib kyaj nˈixyˈäjtëm. ¿Mbäädëdaa xypyudëjkëm oy tjamëminëdë dibujë tsujatypyë? Kyaj. Nanduˈun jyaty ko tuˈugë jäˈäy yajmoˈoyët tuˈugë ëxpëjkpajn diˈib myëmiimpy mayë letrë, kyaj mbäät pyudëkëty pën kyaj tjaty lyetrëkäjpxët. Pääty diˈib may myëmiimbyë tyäˈädë foyetë yëˈë dibujë diˈib yajxon të yajwinˈixy. Ets parë njaygyujkëm ja dibujë diˈibaty mëët nyaymyënëjkxyëty, myëmiimbyë fletyë diˈib mbäät xytyukˈijxëm diˈibë dibujë yaˈixäämp.
4. Nimaytyäˈäk tijaty myëmiimbyë tyäˈädë foyetë Mëdow ko Dios mmëgajpxyëty ets mjukyˈatët winë xëë.
4 Tyäˈädë foyetë Mëdow ko Dios mmëgajpxyëty ets mjukyˈatët winë xëë, nan myëmiimbyë dibujë extëmë foyetë Mëdow ko Dios mmëgajpxyëty. Të yajtuknibëjtäägë parë jäˈäy diˈib kyaj oy lyetrëkäjpxtë o diˈib apenënëm jyäjttëp. Pën nyaˈëxpëjkëm tuˈugë jäˈäy mëdë foyetë Mëdow ko Dios mmëgajpxyëty, mbäät ëtsäjtëm nyajtuˈunëmë foyetë Mëdow ko Dios mmëgajpxyëty ets mjukyˈatët winë xëë parë jäˈäy yajxon ndukmëtmaytyakëm. Tuˈuk tuˈugë ëxpëjkën tmëminy majtskˈääy ets tuˈugë yajtëˈëwën tim anikëjxy diˈibë net yaˈˈatsoojëmbijtp. Nan yajnimaytyakpë dibujë ets nan myëmiimbyë tekstë. Ets mä näägë pajina, abatkëˈëy mä eskinë, tmëminy tuˈugë rekuäädrë mä niˈigyë tˈaknimaytyaˈaky ets tmëminyë tekstë diˈib mbäät ngäjpxëm mëdë jäˈäy diˈib nyaˈëxpëjkëm.
5. ¿Näˈä ets wiˈix mbäät nˈawäˈänëmë foyetë?
5 Wiˈix mbäät nyajtuˈunëm. Ko nëjkxëm käjpxwäˈkxpë tëjkmdëjkm, mbäät nˈawäˈänëmë tyäˈädë majtskpë foyetë, oyë nety yëˈë kyayajkëyaky mä tadë poˈo (ixë rekuäädrë mä jyënaˈany: “Wiˈix mbäät nˈawäˈänëm”). Ko jatëgokë jäˈäy nnijëmbijtëm, mbäät nˈanmäˈäyëm ko yëˈë nmoˈoyäˈänëm tuˈugë foyetë.
6. ¿Wiˈix mbäädë jäˈäy nyaˈëxpëjkëm mëdë tyäˈädë foyetë?
6 Tyäˈädë foyetë Mëdow ko Dios mmëgajpxyëty kyaj tmëminyë yajtëˈëwën diˈibë jäˈäy yˈatsoojëmbitët extëmë liibrë ¿Ti tukniˈˈijxëbë Biiblyë? Pääty tukmëtmaytyäˈäk jeˈeyë jäˈäy, pes oy mä tsyoondët myëdooˈitandëp ko ti yajtukmëtmaytyäˈäktë. Ets yajtunë dibujë parë xytyukmëtmaytyäˈägët diˈib yajpatp mä Diosë yˈAyuk ets nimaytyäˈäk tijaty yˈandijpyë dibujë. Tukˈit tukxon, yajtëwë jäˈäy wiˈix wyinmay. Käjpxë tekstë diˈib miimp mä pajina jyëjpkëxy ets nimaytyäˈäktë. Yajtëw tijaty parë tˈatsoojëmbitët ets ix pën jyaygyujkëp. Pën yëˈë mëët xyˈëxpëkyë foyetë Mëdow ko Dios mmëgajpxyëty ets mjukyˈatët winë xëë, käjpx mëët mä tnimaytyaˈaky ets ja tekstë diˈib mëët nyaymyënëjkxyëtyë dibujë.
7. ¿Wiˈix mbäät nbudëjkëmë jäˈäy diˈib nyaˈëxpëjkëm parë wyimbatët mä Diosë tyuunk?
7 Nˈokpudëjkëmë jäˈäy diˈib nyaˈëxpëjkëm parë wyimbatët. Ko tuˈugë jäˈäy yˈëxpëky, mbäät tyuktëkëtyë tsojkën parë tjatët lyetrëkäjpxët ets niˈigyë tˈixyˈatëdë Jyobaa (Mat. 5:3; Fwank 17:3). Pääty, pën yëˈë yˈëxpëjkypyë foyetë Mëdow ko Dios mmëgajpxyëty, mbäät xyˈanëëmë parë tjatët lyetrëkäjpxët etsë net tˈëxpëkëdë foyetë Mëdow ko Dios mmëgajpxyëty ets mjukyˈatët winë xëë. Per oy diˈibë tˈëxpëkët, kyaj mbäät nyanëbety ko nety të dyajkexy, pes tsojkëp tˈëxpëkëdë liibrë ¿Ti tukniˈˈijxëbë Biiblyë?, o wiinkpë ëxpëjkpajn diˈib mbäät pyudëkëty ets yajxon tjaygyukëdë Biiblyë.
8. ¿Tiko mbäät nmëjjäˈäwëm ko të nyajmoˈoyëmë tyäˈädë jembyë foyetë?
8 Pën tuˈugë jäˈäy jukyˈatäämp winë xëë, tsojkëp tmëdooˈitët ko Dios myëgajpxyëty (Isa. 55:3). Jyobaa “tsyejpy es nidëgekyë” jäˈäy tmëdooˈitët ko yëˈë myëgäjpxëdë axtë diˈib kyaj tjattë lyetrëkäjpxtët (1 Tim. 2:3, 4). ¡Mëjwiin kajaa nmëjjäˈäwëm ko të nyajmoˈoyëmë tyäˈädë jembyë ëxpëjkpajn parë jäˈäy ndukniˈˈijxëm ets tmëdooˈittët ko Dios myëgäjpxëdë!
[Letrë diˈib miimp mä pajina 3]
Wiˈix mbäät nˈawäˈänëm
Tukˈixë jäˈäy mä pajina 2 etsë 3, ta net xyajtëwët: “¿Mtsojkënyëˈajtypy mjukyˈatäˈäny mä duˈumbë it lugäär? [Waˈan tˈatsoojëmbity.] Biiblyë [o Diosë yˈAyuk] twandaˈaky ko Dios tim tsojk dyajjëmbitäˈänyë Naxwinyëdë extëm tuˈugë it lugäärë tsujpë mä jyaˈˈatäˈänyë jotkujkˈäjtën, kyaj yˈokjaˈˈatanë päˈäm etsë ayoobë jäˈäy. Okˈix ti mbäät nduˈunëm parë nbatëmë tyäˈädë jukyˈäjtën. [Käjpx mä parrafo 3 diˈib miimp anikëjxy mä tnimaytyaˈagyë Isaías 55:3.] Yä jyënaˈany ko tsojkëp nmëdooˈijtëm ko Dios xymyëgäjpxëm. Per ¿wiˈix mbäät nmëdooˈijtëm?”. Ëxtäˈäyë pajina 4 etsë 5 ets tukmëtmaytyäˈäk wiˈix yaˈˈatsoojëmbity. Pën ja jäˈäy kyaj tmëdatyë tiempë, mmoˈoy ja foyetë ets anëëmë ko jatëgok mjëmbitäˈäny parë mëët xynyimaytyäˈägët.