Nˈokˈyajtuˈunëmë jembyë foyetë Oybyë ayuk diˈib tsoˈomp mä Dios
Të kyojy parë nyajtuˈunëm ko jatëgokë jäˈäy nnijëmbijtëm o parë nyaˈëxpëjktsondakëm
1. Mä asamblee tëgëk xëëbë, ¿diˈibë ëxpëjkpajn të pyëtsëmy parë nyajtuˈunëm ko jatëgokë jäˈäy nnijëmbijtëm o parë nyaˈëxpëjktsondakëm?
1 Mä asamblee tëgëk xëëbë “Nˈokkuentˈäjtëmë korasoon”, ja të nˈaxäjëmë jembyë ëxpëjkpajn diˈib mbäät nyajtuˈunëm ko jatëgokë jäˈäy nnijëmbijtëm o parë nyaˈëxpëjktsondakëm. Tyäˈädë foyetë Oybyë ayuk diˈib tsoˈomp mä Dios, yëˈë wyingudëgatsˈäjtypyë foyetë ¿Ti Dios tsyojkypy ets nduˈunëm?, konaty myiny ets nan mbäät nyajtuˈunëm parë jäˈäy nyaˈëxpëjktsondakëm tyëjkˈagëˈëy. Yëˈë foyetë ¿Ti Dios tsyojkypy ets nduˈunëm?, yëˈë myaytyakypy wiˈix mbäät tuˈugë Dios mëduumbë jyukyˈaty, diˈib tsip jyaygyukëbë jäˈäy diˈib apenënëm nyaˈëxpëjkëm. Perë tyäˈädë jembyë foyetë, yëˈë myaytyakypyë oybyë ayuk diˈib miimp mä Biiblyë (Apos. 15:35).
2. ¿Tiko të kyojˈyë tyäˈädë foyetë Oybyë ayuk diˈib tsoˈomp mä Dios?
2 ¿Tiko të kyojˈyë tyäˈädë foyetë? Yëˈko abëtsemy nyaxwinyëdë netyë nmëguˈukˈäjtëm dyajtëgoyˈattë tuˈugë ëxpëjkpajn diˈib wingëjxy maytyäˈägëp parë jäˈäy tˈoymyëdowëdë tëyˈäjtën, ets ok tˈëxpëktëdë liibrë ¿Ti tukniˈijxëbë Biiblyë?, diˈib jëjpˈam nyajtuˈunëm mä nyaˈëxpëjkëm. Mayë jäˈäy kyaj tˈëxpëkäˈändë tuˈugë liibrë, per yˈëxpëkandëp tuˈugë ëxpëjkpajn diˈib kyaj kajaa myiny. Ets tuˈugë foyetë nan mbäät yajkäjpxnaxy kanäk ayuk.
3. ¿Wiˈix tyëgatsyëtyë tyäˈädë foyetë mëdë wiinkpë ëxpëjkpajn?
3 ¿Wiˈix myiny? Mayë ëxpëjkpajn myiny extëm mbäädë jäˈäy këˈëm tkajpxy ets tjaygyukë ja tëyˈäjtën diˈib yajpatp mä Biiblyë. Perë tyäˈädë foyetë tëgatsy waanë: tsojkëbë jäˈäy ndukniˈˈijxëm wiˈix yaˈëxpëky. Pääty ko ngëyäjkëm, oy ko nimaytyakëm tuk parrafo o majtsk parrafo. Ets kom kyaj nëgoo yeny myiny, mbäät yaˈëxpëky mëdë jäˈäy tyëjkˈagëˈëy o mä tyuny. Mbäät nimaytyaktsoˈonëm mä ëxpëjkën 1 o mbäät oytyim diˈibëty.
4. ¿Wiˈixë tyäˈädë foyetë xypyudëjkëm parë nidëyë jäˈäy ndukˈijxëm wiˈixë Biiblyë jyënaˈany?
4 Mä kanäägë ëxpëjkpajn diˈib nyajtuˈunëm jap yaˈˈatsoojëmbityë yajtëˈëwën mä ja parrafo. Per mä tyäˈädë foyetë yaˈˈatsoojëmbity mä Biiblyë, pes niˈigyë jäˈäy tnijawëyäˈändë wiˈixë Biiblyë jyënaˈany ets kyaj wiˈix ja ëxpëjkpajn jyënaˈany. Pääty kyaj nëgoo myiny këxjäˈäy wiˈixë Biiblyë jyënaˈany, parë nidëyë tekstë yajkäjpxët mä Biiblyë. Duˈun ja jäˈäy tnijawët ko diˈib yajtukniˈˈijxëp jam tsyoony mä Dios (Fwank 6:45).
5. ¿Tiko jyëjpˈamëty nikäjpxëm tëgok tëgok ninëjkxäˈänëmë jäˈäy?
5 Tyäˈädë foyetë nan kyaj tnimaytyaˈaky tukëˈëyë tekstë. Pes të kyojy parë mbäädë jäˈäy tijaty dyajtëy ets ja diˈib yaˈëxpëjkëp tyukmëtmaytyäˈägëdët. Pääty, jëjpˈam ets kontiempë nikäjpxëm tëgok tëgok ninëjkxäˈänëm ja jäˈäy. Per oy ko nyaˈijtëm winmäˈänyoty ets kyaj nëgoo jeky nnimaytyakëm. Ëtsäjtëm njantsy nyimaytyäˈägäˈänëmë tekstë, per mas oy ko ja diˈib nyaˈëxpëjkëm tnigäjpxët wiˈix të tjaygyukë. Pääty, oy ko yajxon nwinmäˈäyëm tijaty nyajtëwäˈänëm parë nbudëjkëm ets këˈëm tjaygyukët wiˈix yaˈˈatsoojëmbity (Apos. 17:2).
6. ¿Wiˈix mbäät nyajtuˈunëmë tyäˈädë foyetë 1) ko nmëtmaytyakëmë jäˈäy diˈib kyaj tmëbëkyë Dios etsë Biiblyë? 2) ko ngäjpxwäˈkxëm tëjkmdëjkm? 3) ko jäˈäy nidëyë nˈanmäˈäyëm pën ëxpëkäämp? 4) ko jatëgokë jäˈäy nnijëmbijtëm?
6 Duˈun extëmë wiinkpë ëxpëjkpajn diˈib mëdë jäˈäy nˈëxpëjkëm, tyäˈädë foyetë mbäät yajkëyaky oytyim näˈäjëty, oyë nety kyayaˈˈawanë mä tadë poˈo. Mayë nmëguˈukˈäjtëm yajtunandëbë tyäˈädë foyetë parë dyaˈëxpëjktsondäˈäktëdë jäˈäy tyëjkˈagëˈëy. Ets extëm ojts yajnigajpxy mä asamblee tëgëk xëëbë, tyäˈädë foyetë yëˈë xypyudëkëyäˈänëm parë ndukxondakëm ets jatëgokë jäˈäy nnijëmbijtëm diˈib yˈoymyëdoobyë Diosë yˈayuk (Ixë rekuäädrë pajina 7 axtë 9).
7. ¿Wiˈix mbäät nyaˈëxpëjkëmë jäˈäy mëdë tyäˈädë foyetë?
7 ¿Wiˈix mbäät nyajtuˈunëm ko nyaˈëxpëjkëmë jäˈäy? Mbäät jawyiin nduˈunëmë yajtëˈëwën diˈib miimp yëkaty ets ta net ngäjpxëmë parrafo. Ta net ngäjpxëmë tekstë diˈib miimp kursiibë ets mët yëˈëgyëjxmë yajtëˈëwënë mbäät nbudëjkëmë jäˈäy parë yajxon tjaygyukët. Ets mä nganäjxëm mä jatuˈukpë yajtëˈëwën, oy ko nduˈunëm jatëgok ja yajtëˈëwën diˈib miimp yëkaty, parë nˈijxëm pën të yajxon tjaygyukë. Mä tim jawyiin ninëjkxëmë jäˈäy, oy ko jeˈeyë nˈatsoˈojëmbijtëm tuˈuk o majtskë yajtëˈëwën. Ets tëgok tëgok ninëjkxëm mbäät wanaty wanaty nyajˈyoˈonëm ja ëxpëjkën axtë ko nˈëxpëjktäˈäyëm tuˈuk.
8. ¿Ti mbäät nmëdäjtëm winmäˈänyoty ko ngäjpxäˈänëm tuˈugë tekstë, ets tiko?
8 Yëˈë tekstë diˈib miimp mä jyënaˈany käjpxë, yëˈë nidëyë yˈatsoojëmbijtypyë yajtëˈëwënë yëkatypyë. Ko ngäjpxëm tuˈugë tekstë, oy ko kyaj nyajtuˈunëmë duˈumbë ayuk, “okˈix wiˈix tkujäˈäyë apostëlë Pablo” o “okˈix wiˈix jyënaˈany diˈib nyaskäjpxë Jeremías”, pes mbäät ja jäˈäy wyinmay ko yëˈë jam ndukmëtmaytyakëmë naxwinyëdë jäˈäyë yˈayuk. Mas oy ko nˈanmäˈäyëm, “okˈix wiˈix jyënaˈanyë Diosë yˈAyuk” o “okˈix wiˈix mä Biiblyë ojts yajnaskäjpxë”.
9. ¿Jëjpˈam ets ngäjpxëm tukëˈëyë tekstë diˈib miimp mä parrafo?
9 ¿Jëjpˈam ets ngäjpxëm tukëˈëyë tekstë, o yëˈëyë mä jyënaˈany “käjpxë”? Këˈëm mbäät nˈijxëm wiˈix ja jäˈäy yaˈixy yajpääty. Yëˈë tekstë kyaj jeˈeyë tnikäjpxpety extëm jyënaˈanyë parrafo, nan jëjpˈam diˈib myaytyakypy. Per pën ja jäˈäy kyaj nëgoo tiempë dyaky, ets pën kyaj nëgoo ttsojkënyëˈaty diˈib jam nimaytyakëm o kyaj nëgoo tjaty lyetrëkäjpxët, mas oy ko yëˈëyë ngäjpxëmë tekstë diˈib miimp mä jyënaˈany “käjpxë”.
10. ¿Näˈä mëdë jäˈäy nˈëxpëjktsondakëmë liibrë ¿Ti tukniˈijxëbë Biiblyë?
10 ¿Näˈä mëdë jäˈäy nˈëxpëjktsondakëmë liibrë ¿Ti tukniˈijxëbë Biiblyë? Ko nety ja jäˈäy jëjwitsë yˈëxpëjknë, mbäät mëët nˈëxpëjktsondakëmë tyäˈädë liibrë o mbäät ko nety mëët nˈëxpëjktäˈäyëmë tyäˈädë foyetë, këˈëm mbäät nˈijxëm näˈä. ¿Yëˈë nˈëxpëjktsondakëm ja tim jawyiimbë kapitulo? Kyaj yajnigajpxy, pes wiˈixëmë jäˈäy diˈib nyaˈëxpëjkëm. Per mbäät mas niˈigyë tjaygyukë diˈib të tnijawë ko jatëgok tˈëxpëkët mä liibrë ¿Ti tukniˈijxëbë Biiblyë?
11. ¿Tiko yaˈˈawixy ets nyajtuˈunëmë tyäˈädë foyetë?
11 Mä tyäˈädë tiempë, yëˈëyë yajmëdoyˈäjtpë axëkˈäjtën, pääty mëjwiin kajaa nmëjjäˈäwëm ko mbäädë jäˈäy ndukˈawäˈänëmë tyäˈädë oybyë ayuk: ko tyam tam yajkutuky ja Diosë yˈAnaˈamën ets ko tim tsojk dyajminäˈänyë jembyë jukyˈäjtën (Mat. 24:14; 2 Peed. 3:13). Pënaty myëdooˈijttëbë tyäˈädë ää ayuk mbäät jyënäˈändë ko tëyˈäjtën extëm jyënaˈanyë Isaías 52:7: “¡Jantsy oy jantsy tsuj kyëxëˈëgyë tyeky mä tun kopk diˈib myëmiimbyë oybyë ayuk, diˈib yˈawäˈänëbë jotkujkˈäjtën, diˈib myëmiimbyë oybyë ayuk diˈib mas oy, diˈib yˈawäˈänëbë nitsokën, diˈib yˈanmaabyë Sión: ¡Yëˈë mDios të jyaˈty rey!”. Pääty, nˈokˈyajtuˈunëmë tyäˈädë jembyë foyetë parë jäˈäy nduknijäˈäwëmë oybyë ayuk diˈib tsoˈomp mä Dios.
[Rekuäädrë diˈib mä pajina 7]
Ko nmëtmaytyakëmë jäˈäy diˈib kyaj tmëbëkyë Dios etsë Biiblyë
● Mä näägë lugäär, kyaj jäˈäy xymyëtmaytyäˈägäˈänëm ko tmëdowdë nyajtuˈunëmë tyäˈädë ayuk Dios o Biiblyë. Pääty mas oy ko yëˈë nmaytyaktëjkëm diˈibë jäˈäy myëmääy myëdäjtëp, extëm mä nbatëmë käjpxwijënë parë familyë, pën mbäät yˈoyë tyäˈädë jukyˈäjtënë, o ko ntsojkëm tuˈugë oybyë gobiernë. Ko nety kanäkˈok mëët të nmaytyakëm ets të ndukjaygyujkëm ko jantsy tamë Dios ets ko Biiblyë tëyˈäjtën myaytyaˈaky, mbäädë net nmoˈoyëmë foyetë Oybyë ayuk diˈib tsoˈomp mä Dios.
[Rekuäädrë diˈib mä pajina 8]
Nˈokˈyajtuˈunëm ko ngäjpxwäˈkxëm tëjkmdëjkm
● “Mayë jäˈäy nyayajtëwëdë tidaa Dios tyukniwinmäˈäyëp parë naxwinyëdë jäˈäy, njatukˈixaampy wiˈix mbäät xynyijawë. Extëm nˈokpëjtakëm, ¿waˈandaa Dios dyajjëjpkëxäˈänyë ayoˈon? [Waˈan tˈatsoojëmbity.] Tyäˈädë foyetë yëˈë mbudëkëyanëp parë xynyijawët wiˈix mä mBiiblyë yaˈˈatsoojëmbity. [Mmoˈoy ja foyetë, ta xykyäjpxët ja tim jawyiimbë parrafo diˈib miimp mä ëxpëjkën 1 ets käjpxë Jeremías 29:11.] Extëm yä jyënaˈany, ¿këdii tsyejpyë Dios ets jotkujk njukyˈäjtëm mä tiempë myiny kyëdaˈaky? [Waˈan tˈatsoojëmbity.] Yajwëˈëmë tyäˈädë foyetë ets kojëts jatëgok nminët, ta ngäjpxëmë myëmajtskpë parrafo parë nnijäˈäwëm wiˈixë Dios dyajjëjptëgoyaˈany tijaty yajjaˈäjtypyë ayoˈon.” Pën ja jäˈäy myëdäjtypyë tiempë, mbäät mëët xykyajpxy ets xynyimaytyaˈaky ja myëmajtskpë parrafo ets ja tëgëëkpë tekstë. Anëëmë ko jatëgok xynyijëmbitäˈäny parë yˈatsoojëmbitët jatuˈukpë yajtëˈëwën.
● “Mayë jäˈäy myënuˈkxtaktëbë Dios, ets mas ko tpäättë amay jotmay. ¿Të mijts näˈä xymyënuˈkxtaˈaky? [Waˈan tˈatsoojëmbity.] ¿Waˈandaa Dios tmëdoy extëm niˈamukë jäˈäy myënuˈkxtaˈagyëty o jadaa nääk diˈib kyaj tmëdoy? [Waˈan tˈatsoojëmbity.] Tyääjëts nyajminy tuˈugë foyetë diˈib nyigajpxypy wiˈix yaˈˈatsoojëmbity mä Biiblyë tyäˈädë yajtëˈëwën. [Mmoˈoy ja foyetë ets nimaytyäˈäk mëët ja tim jawyiimbë parrafo diˈib miimp mä ëxpëjkën 12, ets käjpxë tekstë diˈib miimp mä jyënaˈany “käjpxë”.] Jantsy jotkujk nnayjäˈäwëm ko Dios xyˈanmäˈäyëm ets nmëwingoˈonëm mët ko nmënuˈkxtakëm, per tsojkëp yajxon nˈixyˈäjtëm parë tmëdowët ko nmënuˈkxtakëm. [Ix mä ëxpëjkën 2 ets tukˈix wiˈix jyënaˈany kanäägë subtitulo.] Pën mtsojkënyëˈajtypy, yajwëˈëmë tyäˈädë foyetë, ets jaajëts jatëgok nminët parë nˈijxëm wiˈixë Biiblyë tˈatsoojëmbityë tyäˈädë yajtëˈëwën.”
● “Yëˈëts tyam nguˈijxëdëbë jäˈäy mët ko niˈamukë nmëjotmaybyatëm wiˈix kyugëxëyaˈanyë tyäˈädë jukyˈäjtën. Wiˈix mˈokwinmay, ¿waˈandaa yˈoyët tyäˈädë jukyˈäjtën? [Waˈan tˈatsoojëmbity.] ¿Mnijäˈäwëp ko Biiblyë nyigajpxypy tijaty oyˈäjtënë mbäät nˈawijx njëjpˈijxëm? Okˈix tijatyë Biiblyë myaytyakypy.” Mmoˈoy ja foyetë ets tukˈix ëxkëˈëy diˈibë yajtëˈëwën nyijawëyaampy. Ta net mnëjkxët mä yajpääty ja ëxpëjkën ets tukˈix wiˈix yaˈëxpëky. Anëëmë ko jatëgok mjëmbitäˈäny parë xynyimaytyäˈäktët jatuˈukpë yajtëˈëwën.
[Rekuäädrë diˈib mä pajina 9]
Ko jäˈäy nidëyë nˈanmäˈäyëm pën ëxpëkäämp
● “Tyam, yëˈëts nguˈijx ngugäjpxëdëbë jäˈäy parëts ndukniˈˈixëdë wiˈix mbäädë Biiblyë yaˈëxpëky. Tyääjëts nmëminy tuˈugë foyetë diˈib myëmiimpy 15 ëxpëjkën diˈib yaˈˈatsoojëmbity mëdë Biiblyë kanäk pëkyë tyäˈädë yajtëˈëwën. [Tukˈix ja foyetë duˈun winduuy ets duˈun ëxkëˈp.] ¿Të näˈä Biiblyë xykyajpxy ets xyjajaygyukëyaˈany? [Waˈan tˈatsoojëmbity.] Kyaj nëgoo tsyiptaˈaky nˈëxpëjkëmë tyäˈädë foyetë. [Ëxtäˈäyë ëxpëjkën 3 ets nimaytyäˈägë tim jawyiimbë parrafo diˈib miimp mä myëdëgëëkpë yajtëˈëwën. Ta net xykyäjpxëdë Diˈibʉ Jatanʉp 21:4, 5. Ix pën mbäät xyˈakkajpxy jatuˈugë parrafo mëdë nyidekstë.] Mbäät xyajwëˈëmyë tyäˈädë foyetë ets xykyäjpxët tuˈugatyë ëxpëjkën. Pën mtsojkënyëˈajtypy mbäädëts nminy ets nˈëxpëjkëm. Kojëts jatëgok nminët, mbäät nˈëxpëjkëmë tim jawyiimbë diˈib jeˈeyë miimp tukˈääy.”
[Rekuäädrë diˈib mä pajina ]
Nˈokˈyajtuˈunëm ko jatëgokë jäˈäy nnijëmbijtëm
● “Oy ko jatëgok nayˈijx nnaybyatëm. Tëjëts nmëminy tuˈugë foyetë diˈib yˈatsoojëmbijtypy mä Biiblyë kanäk pëkyë yajtëˈëwën. [Mmoˈoy ja foyetë ets anëëmë parë tˈixët ëxkëˈëy.] ¿Diˈibë mas mnijawëyaampy? [Waˈan tˈatsoojëmbity ets ta net xyˈëxtäˈäyët ja ëxpëjkën diˈib të twinˈixy.] Min nˈoktukniˈˈixë wiˈixë tyäˈädë foyetë yaˈëxpëky parë nnijäˈäwëm wiˈix mä Biiblyë yaˈˈatsoojëmbityë tyäˈädë yajtëˈëwën.” Ta xytyukˈixët wiˈix yaˈëxpëkyë tyäˈädë foyetë ko xykyäjpxët tuˈuk o majtskë parrafo ets ja tekstë diˈib yajkäjpxp. Extëm nˈijxëm, kyaj tsyipëty nyaˈëxpëjktsondakëmë jäˈäy. Ko ja foyetë dyajwëˈëmët, ta xyˈanëëmët ko mnijëmbitaampy jatëgok. Ets ko xyajjëjpkëxët tuˈugë ëxpëjkën, mbäät jatëgok xytyukwinˈixy diˈibë nyijawëyaampy o mbäät xyˈëxpëktë mä tyimtsondaˈaky.