Nˈokˈyajtuˈunëmë foyetë ¿Pënaty tyam tyuundëp ti Jyobaa tsyejpy?
Tyäˈädë jembyë foyetë të kyojy parë jäˈäy diˈib nyaˈëxpëjkëm ndukniwoˈowëmë Diosë kyäjpn
1. Nigäjpx tiko të kyojˈyë tyäˈädë foyetë.
1 ¿Të ogäˈän xyajtunyë tyäˈädë jembyë foyetë? ¿Tiko të kyojy? 1) yëˈë parë xyˈixyˈäjtëm pënaty nyaˈëxpëjkëm, 2) parë tnijawëdët wiˈixën ja tuunk yˈixëty diˈib nduˈunëm ets 3) parë tnijawëdët wiˈix tyamë Diosë kyäjpn tyuny. Tyäˈädë foyetë ¿Pënaty tyam tyuundëp ti Jyobaa tsyejpy? mbäät xykyäjpxtäˈäy tuˈugë ëxpëjkënë mëgoxk minutë o mäjk minutë ko mëdë jäˈäy mˈëxpëjktäˈäyët.
2. Nimaytyäˈäk wiˈix myinyë tyäˈädë foyetë.
2 ¿Wiˈix myinyë tyäˈädë foyetë? Tyäˈädë foyetë tëgëk pëky nyaywyaˈkxyëty, ets yëˈë nyimaytyakypy tëgëk pëky diˈib të yajnigajpxy mä parrafo 1. Ja tmëminy 28 ëxpëjkën etsë titulo duˈun myiny extëmë yajtëˈëwën, etsë subtitulo diˈib yëkaty yëˈë yˈatsoojëmbijtypyë tyäˈädë yajtëˈëwën. Mä tukëˈëyë foyetë myëmiimbyë retratë 50 paˈis naxy ets nyigajpxypy ti lugäär të yajjuuty, parë ndukˈijxëm ja jäˈäy diˈib nyaˈëxpëjkëm ko abëtsemy nyaxwinyëdë tyäˈädë tuunk yajtuny. Nan myëmiimbyë rekuäädrë mä jyënaˈany: “Parë niˈigyë xynyijawët”, mä tnigajpxy tijaty mbäät ttuny ja diˈib myaˈëxpëjkypy.
3. ¿Wiˈix mbäät nˈëxpëjkëmë tyäˈädë foyetë mëdë jäˈäy diˈib nyaˈëxpëjkëm?
3 ¿Wiˈix mbäät xyajtuny? Tukˈix jawyiinë yajtëˈëwën diˈib miimp mä ja ëxpëjkën. Ets mientrës mëët xykyajpxy ja parrafo, nikäjpxëmbit ja subtitulo diˈib miimp yëkaty. Ok, ta net xyajtëwët diˈib miimp nekyˈëxˈääy. Mbäät xykyäjpxtäˈäy tuˈuk ja ëxpëjkën o mbäät tuk pëkyaty xykyajpxy ets xynyimaytyäˈägët. Nan oy ko xywyinˈixët diˈibë tekstë mgäjpxaampy. Ets nimaytyäˈäk ja dibujë diˈib myëmiimpy etsë rekuäädrë “Parë niˈigyë xynyijawët”. Oy ko nˈëxpëjkëmë tyäˈädë foyetë mëdë jäˈäy desde mä tsyondaˈaky axtë mä kyexy. Per näˈäty, mbäät kanääk ninäjxëm mët ko yëˈë ndukmëtmaytyäˈägäˈänëm diˈib tsojkëp tnijawët. Extëm nˈokpëjtakëm, pën yëˈë wingoomp tuˈugë asamblee mbäät nidëyë nëjkxëm mä ëxpëjkën 11.
4. ¿Tiko jantsy jotkujk nnayjäˈäwëm ko të pyëtsëmyë tyäˈädë foyetë?
4 Ko mëdë jäˈäy nˈëxpëjkëmë Biiblyë, ta nbudëjkëm parë tˈixyˈatëdë Tyeetyë tsäjpotmëdë. Per nan tsojkëp nbudëjkëm parë ndukˈixyˈäjtëmë Jyobaa kyäjpn (Prov. 6:20). ¡Jantsy jotkujk nnayjäˈäwëm ko tyäˈädë foyetë të yajtuknibëjtäägë parë duˈun nbudëjkëmë jäˈäy!