¿Mbäät nduˈunëm?
Mä yajjamyetsyë Jesusë yˈoˈkën xëë ja mbäät nyaˈijxëm ko nmëjjäˈäwëm
1. ¿Ti mbäät nyaˈijxëm mä yajjamyatsäˈänyë Jesusë yˈoˈkën xëë?
1 Mä yajjamyatsäˈänyë Jesusë yˈoˈkën xëë 14 äämbë abril, ja mbäät mas niˈigyë nyaˈijxëm ko nmëjjäˈäwëm ko Jyobaa yˈoyjyaˈayëty. Mä Lukʉs 17:11-18 jap xytyukˈijxëm wiˈixë Jyobaa mëdë Jesus tˈixtë ko tuˈugë jäˈäy tmëjjawë tijaty. ¡Jotmay myëët njënäˈänëm ko mä ja nimäjkpë jäˈäy diˈibë netyë leprë päˈäm myëdäjttëp, jeˈeyë niduˈuk dyajkyë dyoskujuyëm ko yˈagëdaky! Mä tiempë myiny kyëdaˈaky, jyëjptëgoyaˈanyë pëjk adoˈonën ets nbäädäˈänëmë jukyˈäjtënë winë xëëbë mët ko Dios të xyjuuybyëtsëˈëmëm. Ko nety duˈun nyajkunuˈkxëm, tuˈuk tuˈugë xëë nmoˈoyäˈänëmë dyoskujuyëmë Jyobaa. Per mä sëmään diˈib miimp këdakp, ¿wiˈix mbäät nyaˈijxëm ko nmëjjäˈäwëm?
2. ¿Wiˈix mbäät mas niˈigyë nmëjjäˈäwëm ko të nyajjuˈuybyëtsëˈëmëm?
2 Nˈokmëjjäˈäwëm mas niˈigyë. Ko ti nmëjjäˈäwëm jap tsyoony mä jot korasoon. Pääty parë mas niˈigyë nmëjjäˈäwëm ko të nyajjuˈuybyëtsëˈëmëm, të yˈoyë tuˈugë programë parë ngäjpxëmë tekstë diˈib yajkäjpxp ko tpäätyë Jesusë yˈoˈkën xëë, ets mbäät nbatëm mä kalendaaryë ets mä foyetë Examinando las Escrituras diariamente. Oyxyëp ko ngäjpxëm mëdë familyë. Ko duˈun nduˈunëm, yëˈë xypyudëkëyäˈänëm parë niˈigyë nmëjjäˈäwëm ko të nyajjuˈuybyëtsëˈëmëm ets parë nyajnigëxëˈkëmë oybyë jäˈäyˈäjtën (2 Kor. 5:14, 15; 1 Fwank 4:11).
3. ¿Tijaty mbäät nduˈunëm ko tpäätyë Jesusë yˈoˈkën xëë ets duˈun nyaˈijxëm ko nmëjjäˈäwëm?
3 Nˈokˈyaˈijxëm ko nmëjjäˈäwëm. Ko ti nmëjjäˈäwëm, ja nyajnigëxëˈkëm mä tijaty nduˈunëm (Kol. 3:15). Ja jäˈäy diˈibë netyë leprë päˈäm myëdäjtypy, yˈëxtääyë Jesus parë tmooyë dyoskujuyëm. Ets mbäät nˈijtëm seguurë ko jyantsy tyukmëtmaytyakë jäˈäy wiˈixë nety mëjˈäjtëngyëjxm të yˈagëdaˈaky (Luk. 6:45). Ets ëtsäjtëm, ¿ndukˈitäˈän ndukxonäˈänëm mä yajwowäˈänyë jäˈäy ko nety yajjamyetsyë Jesusë yˈoˈkën xëë ets duˈun nyaˈijxëm ko nmëjjäˈäwëm? Ja tuk pëky wiˈix mbäät nyaˈijxëm ko nmëjjäˈäwëm, yëˈë ko nduˈunëm prekursoor ausilyaar o nyajtuˈunëm mas niˈigyë tiempë mä ngäjpxwäˈkxëm. Nan nmëjjäˈäwëmë nety ko oy nˈagëˈë nˈaxäjëm pënaty miindëp mä yajjamyetsyë Jesusë yˈoˈkën xëë ets ko nˈatsoˈojëmbijtëm tijaty yajtëëwdëp.
4. ¿Ti mbäät nduˈunëm mä yajjamyatsäˈänyë Jesusë yˈoˈkën xëë parë kyaj ok nnaybyokyˈijxëm?
4 ¿Waˈandaa tyam jeˈeyë nˈakjamyatsäˈänëmë Jesusë yˈoˈkën xëë? (1 Kor. 11:26.) Kyaj yajnijawë. Per diˈib mbäät nyaˈijtëm winmäˈänyoty, yëˈë ko pën tyam jeˈeyë nˈakjamyajtsëm, tyamën jeˈeyë mä mbäät nyaˈijxëm ko nmëjjäˈäwëm. Pääty ¿tunäˈänëm? Waˈanë Jyobaa, diˈib të xyjuuybyëtsëˈëmëm, ttukjotkëdaˈaky ja ää ayuk ets tijaty pëtsëëmp mä jot korasoon (Sal. 19:14).