“Yajtuˈukmuktsë ngäjpn”
1. Extëm ja israelitëty tyuˈukmujktë mä ja Sinaí gopk, ¿wiˈix mëët kyijpxyë asamblee tëgëk xëëbë etsë asamblee mä jyäˈttë diˈib tsoˈondëp kanäk paˈis?
1 Näämnëmë nety ja israelitëty të pyëtsëmdë Egipto, ko Jyobaa ojts ttukˈaneˈemyë Moisés parë ja käjpn dyajtuˈukmukët mä ja Sinaí gopk. ¿Tiko? Parë tmëdooˈittëdë Jyobaa yˈayuk, ets duˈun tnijawëdët wiˈix tmëmëdowdët ets ja yˈuˈunk yˈënäˈk ttukniˈˈixëdët ja Jyobaa nyëˈë tyuˈu (Deut. 4:10-13). Seguurë ko ja israelitëty ninäˈä tkajäˈäytyëgooytyë tyäˈädë xëë diˈib ja myëbëjkënë yajkëktëjkëdë. Mä xëë poˈo kyëdaˈaky, nanduˈunë Jyobaa kyäjpn dyajtuˈukmukäˈäny parë ttukniˈˈixëyaˈany mä asamblee tëgëk xëëbë etsë asamblee mä jyäˈttë diˈib tsoˈondëp kanäk paˈis. ¿Ti mbäät nduˈunëm parë mëjwiin kajaa xypyudëjkëm?
2. ¿Ti mbäät nduˈunëm parë listë nyajpatëm ko nety tpääty ja asamblee tëgëk xëëbë?
2 Nˈoknayjëjpˈijxëm. Jyobaa ojts ttukˈaneˈemy ja israelitëty parë nyayjëjpˈixëdët ko nety tyuˈukmukäˈändë mä ja Sinaí gopk (Éx. 19:10, 11). Nanduˈun tyam, niˈamukë pënaty nëjkxandëp mä asamblee tëgëk xëëbë, tsojkëp nyayjëjpˈixëdët, kyaj yëˈëyëty ja diˈib jam naxandëp. Extëm mayë nmëguˈukˈäjtëm diˈib mëduundëp, tsojkëbë permisë tˈamdowdët. Waˈan mijts myajpääty extëm ja Nehemías. Yëˈë jamë nety myëduny mä ja rey Artajerjes ets janëjkxäämbë nety Jerusalén parë tˈagojëyaˈany ja käjpnë nyabots, per kyaj nety yˈity seguurë pën ja rey kaxëdëp. ¿Ti tyuun? Myënuˈkxtakë Jyobaa, yajxon twinmääy wiˈix tˈanëëmëyaˈany ja rey, ets ta amëk jotmëk tˈamdooy ja permisë. Ta ja rey kyajxë, ets axtë mooyë naybyudëkë parë dyajtunët mä ja potsy tyuˈuyoˈoy (Neh. 2:1-9). Per taa ja tuk pëky diˈib mbäät xywyinmay, ¿të xytyukniwitsë wiˈix mnëjkxäˈäny ets mä mjäjtäˈägäˈäny? Yëˈë mëjjäˈäytyëjk pyudëkëyandëp xondaˈakyˈää xondaˈakyjyot pënaty yajtëgoyˈäjttëbë naybyudëkë. Tukniwitsë parë tsojk mjäˈtët koogoo tsyondäˈägëdë programë ets myajpäädët listë parë niˈigyë xymyëdooˈitët diˈib jam naxäämp (Eb. 2:1).
3. ¿Ti mbäät nduˈunëm parë nyaˈˈawatsëmë korasoon ko nety ja asamblee tpääty?
3 Parë nyajpatëm listë ko nety ja asamblee tpääty, tsojkëp nanduˈun nyaˈˈawatsëm ja korasoon parë nmëdooˈijtëm ets njäjtëm tijaty naxäämp (Esd. 7:10). Mä Internet jw.org jap kontiempë yajpëjtäˈägäˈänyë programë, myëminaampy tijaty txëˈatäˈäny ja diskursë ets tuˈuk majtskë tekstë diˈib jëjpˈam. Oy ko nˈëxpëjkëm mä nDiosˈawdäjtëm mëdë Familyë ko nety ttimpatnë ja asamblee. Ta näägë nmëguˈukˈäjtëm diˈib yajpëtsëëmdëbë tyäˈädë programë mä Internet parë jap tkujayëdë tijaty yajmaytyakp mä asamblee.
4. ¿Wiˈix mbäädë tääk teety pyudëkëdë asamblee parë yˈuˈunk yˈënäˈk ttukniˈˈixëdët ja Diosë yˈayuk?
4 Tukniˈˈixëdë ja mˈuˈunk mˈënäˈk. Tuk pëky tiko ja israelitëty tyuˈukmujktë mä ja Sinaí gopk, yëˈë parë ttukniˈˈijxëdë ja yˈuˈunk yˈënäˈkë Jyobaa yˈayuk (Deut. 4:10). Tyam, nan mbäät duˈunë tääk teety ttundë mä asamblee. Oyxyëp ko yˈuˈunyëdë mëdë yˈuˈunk yˈënäˈk ets tpudëkëdët parë tmëdooˈittët. Ets koogoo jyëjpkëxëdë asamblee, nan mbäät tnimaytyäˈäktë tijaty të tmëdooˈittët o ko nety Diosˈawdattë mëdë Fyamilyë.
5. ¿Wiˈix xypyudëkëyäˈänëm ko nbatëmë asamblee tëgëk xëëbë?
5 Ko ja israelitë tyuˈukmujktë mä ja Sinaí gopk, ta tˈijxtë ko mëjwiin kajaa nety tsyobääty ko ttukˈitëdë Diosë kyäjpn (Deut. 4:7, 8). Nanduˈun xypyudëkëyäˈänëmë asamblee tëgëk xëëbë diˈib pyatypy. Pes tëgëk xëë nyajmëjämoˈoyäˈänëm ets nˈitäˈän nxonäˈänëm mëdë nmëguˈukˈäjtëm diˈib yajpattëp mä Diosë kyäjpn. Jagam nyajpäädäˈänëm mä Satanásë jyaˈay, diˈib yajpatp extëm tuˈugë lugäärë äänëˈëk tëëtsëˈëkpë (Is. 35:7-9). Kom wingoonˈadëtspë Jyobaa xyëë, oy ko kyaj ndëgoyˈäjtëm mä tyäˈädë asamblee parë nduˈukmujkëm ets nnaymyëjämoˈoyëm nixim niyam (Eb. 10:24, 25).