Ko nduˈukmujkëm tëgëk xëë duˈun nyigëxeˈeky ja tëyˈäjtën
1. ¿Tijaty ijtyë israelitë pyawinmääytyëp mä xyëdundë?
1 Ja israelitëty tëgëkˈok ijty tyuˈukmuktë Jerusalén mä tuˈukpë jëmëjt parë xyëdundë. Ets oy yëˈëyë ja yetyëjk ojts yaˈˈanëëmëdë parë nyëjkxtët, nanduˈun ijty ttukniwitsëdë parë nyëjkxtët tuk familyë (Deu. 16:15, 16). Jaa mä ijty mbäät tpawinmaytyë ja tëyˈäjtën diˈib nyijäˈäwëdëp, extëm ko Jyobaa jantsy tsojkp, oyjyaˈay ets myoopy ja yˈuˈunk yˈënäˈk tijaty yajtëgoyˈäjttëp (Deu. 15:4, 5), ets nyëˈëmoopy tyuˈumoopy ets kyuentˈäjtypy (Deu. 32:9, 10). Nan tsojkëbë nety dyajnigëxëˈëktët ko tëyˈäjtën mëët jyukyˈattë, mët ko yëˈë netyë Jyobaa të wyinˈixëdë parë kyäjpnˈatëdët (Deu. 7:6, 11). Tyam, nanduˈun xypyudëjkëmë tuˈukmujkënë tëgëk xëëbë.
2. Parë njaygyujkëm ja tëyˈäjtën, ¿wiˈix xypyudëjkëm tijaty näjxp mä asamblee?
2 Tijaty näjxp mä asamblee xypyudëjkëm parë njaygyujkëmë tëyˈäjtën. Ko tyunyëtyë tuˈukmujkënë tëgëk xëëbë, näjxpë diskursë, dramë, demostrasyonk etsë entrebistë diˈib xypyudëjkëm parë njaygyujkëmë tëyˈäjtën diˈib yajpatp mä Biiblyë (Fwank 17:17). Jyobaa nyax kyäjpn mëk jyantsy tyundë parë tniwinmayëdë tijaty naxäämp diˈib mbäädë jäˈäy pyudëkëdë abëtsemy nyaxwinyëdë (Mat. 24:45-47). ¿Këdii mjantsy nyëjkxäämp parë xymyëdooˈitäˈäny tijaty naxäämp?
3. ¿Tijaty mbäät nduˈunëm parë xypyudëjkëm tijaty naxäämp mä asamblee?
3 Mëjwiin kajaa xypyudëkëyäˈänëm tijaty naxäämp mä asamblee, pën nëjkxëm tëgëk xëë ets yajxon nmëdoˈoˈijtëm. Amdow kontiempë mbermisë mä mëduny. Ets parë yajxon xymyëdooˈitët tijaty naxäämp mä asamblee, oy ko tsojk manaxët. Nan oy ko xywyinˈijxpatët pën jam yajnäjxypyë diskursë ets xykyujayët yëˈëyë diˈib jëjpˈam. Kyaj xyajnaˈamëdë selulaar o lokalisadoor, net ja nmëguˈukˈäjtëm yajxon tmëdooˈittët. Nan kyaj mgäjpx maytyäˈägët, kyaj mensaje xykyaxët, kyaj tijaty xyˈuugët ets kyaj tijaty xyjëˈkx xypyëkët.
4. ¿Wiˈix mbäät ja tääk teety tpudëkëdë yˈuˈunk yˈënäˈk parë ttukˈoyˈattët tijaty näjxp mä asamblee?
4 Ja israelitë nan ja ijty tyuˈukmuktë mä diˈib tyijtëp sääbëdë jëmëjt, ja mä tmëdooˈittë ko yajkajpxy ja Ley mä yajnixëduny ja pëjktaˈaky. Ja nyaymyukëdë niˈamukë ja familyë axtë ja “mutsk ënäˈk” parë tmëdooˈittët ets tjattët (Deu. 31:12). Tyam, nan oy yaˈixy ko tuˈugyë familyë yˈuˈunyëdë ets tmëdooˈittë tijaty näjxp mä asamblee ets nanduˈun ja ënäˈkuˈunk tmëdooˈittë ets kyaj myanaxtë. Nan oyxyëp ko ux ux xynyimaytyäˈäktë tijaty të xykyujayëdë ets tijaty të xyˈoymyëdowdë. Ets kom “ja tsuuˈat lokëˈat yˈity mä ja mixyë kyorasoon”, pääty oy ko ja tääk teety kyaj “naspëkë” ja yˈuˈunk yˈënäˈk dyajjëdittët. Oy ko tˈix ttundët axtë ja yˈuˈunk yˈënäˈk diˈib të yaˈkpëtsëmdë, duˈun mä yˈagujkxyëˈattë ets mä të jyäjtäˈäktë (Pro. 22:15; 29:15).
5. ¿Wiˈix dyaˈoygyëxeˈeky ja tëyˈäjtën ko oy njäˈäyˈäjtëm?
5 Ja oybyë jäˈäyˈäjtën yaˈoygyëxeˈkypy ja tëyˈäjtën. Ko nyaˈijxëmë oybyë jäˈäyˈäjtën mä ja käjpn mä tyunyëtyë asamblee, ta nyaˈoygyëxëˈkëm ja tëyˈäjtën (Titʉ 2:10). Pënaty tuundëp mä hotel, oy nyayjawëdë ko pënaty jap jäjtaktëp oy jyaˈayˈattë, myëdowdë ets myaˈkxtuktë (Kol. 4:6). Junktëˈëy, ko ja nmëguˈukˈäjtëm ojts tˈëxtäˈäytyë tuˈugë hotel, ta ja direktora diˈib kyajpxytyuumpy ja hotel jyënany: “Jantsy oyëts nayjawëdë ko Jyobaa tyestiigëty yä jyäjtäˈäktë, yëˈë ko jantsy oy jyaˈayˈattë. Ets wyingutsëˈkëdëp pënaty yä tuundëp mä hotel ets kyuentˈäjttëp tijaty jaˈäjtp”.
6. Extëm nnaywyit nnayxyojxëm mientrës nyajpatëm mä tyunyëtyë asamblee, ¿wiˈix mbäät nyaˈoygyëxëˈkëm ja tëyˈäjtën?
6 Ko nmënëjkxëmë gafet kyaj yëˈëyëty parë nmëguˈukˈäjtëm tnijawëdët pën ëtsäjtëm o parë yaˈixët ko asambleeˈäjtëm, nan yëˈë duˈun parë jäˈäy ndukmëtmaytyakëmë Diosë yˈAyuk. Yëˈë jäˈäyëty pyëkandëbë kuentë ko pënaty myënëjkxtëbë gyafet tsuj yajxon nyaywyit nyayxyoxëdë ets kyaj tniˈˈijxtuˈuttë extëm nyayxyoxëdë jäˈäy diˈib kyaj tnijawëdë tëyˈäjtën (1 Tim. 2:9, 10). Pääty, oy ko nˈijxëm yajxon wiˈix nnaywyit nnayxyojxëm mientrës nyajpatëm mä tyunyëtyë asamblee ets nanduˈun ko nety njäjtëm mä tuˈugë hotel o mä jäjtakn. Ko tuˈugë Dios mëduumbë jyäˈtët mët tuˈugë yˈëxmots diˈib kon etsë kyamisetë, kyaj oy nëjkx yajnimaytyaˈaky. Pääty, oy ko tsuj yajxon nnaywyit nnayxyojxëm oy mä tyunëdët ja asamblee. Ets pën nnayjaandëgatsäˈänëm ko nety të jyëjpkexy parë muum nëjkxäˈänëm, oy ko njamyajtsëm ko asamblee të ninëjkxëm ets kyaj mbäät nnayxyojxëm extëm ko muum nëjkxëm ijx jäˈäbë.
7. ¿Ti tuk peky mbäät xytyuny parë mëët mgäjpx mmaytyäˈägët ja mëguˈuktëjk?
7 Ko ijty ja israelitë xyëdundë, ja mä ijty nyaybyäädëdë mët ja myëguˈuktëjk diˈib tsoˈondëp wiink nax wiink käjpn ets mëët tyuˈukmuktë (Apos. 2:1, 5). Mä nduˈukmujkëm tëgëk xëë, ja duˈun mä nyigëxeˈeky ko tuˈugyë nyajpatëm ets yëˈë diˈib mayë jäˈäy yajmonyˈijx yajmonyjäˈäwëdëp wiˈixën tyam tuˈugyë nˈijtëm (Sal. 133:1). Ets ko nmënëjkxëmë kaaky parë japyë ngääynyäjxëm ets kyaj nbëtsëˈëmëm parë nëjkx njuˈuyëm, mbäät nˈixyˈäjtëmë wiinkpë nmëguˈukˈäjtëm ets mëët ngäjpx nmaytyakëm.
8. ¿Tiko mbäät nnayˈawäˈänëm parë nduˈunëm mä tyunyëtyë asamblee?
8 Mayë jäˈäy mëjˈixy mëjmëdoy tjawëdë ko tˈixtë wiˈix yajxon yajtukniwitsë asamblee, ets mas ko tnijawëdë ko tsojkëngyëjxm tyundë. ¿Mbäät mijts “xondaˈakyˈää xondaˈakyjyot” mnayˈawanëty parë mdunët mä asamblee? (Sal. 110:3.) Mayë uˈunktääk uˈunkteety nyayˈawanëdë parë tyunäˈändë mëdë yˈuˈunk yˈënäˈk ets duˈun ttukniˈˈixëdë parë tyundët mëdë wiinkpë. Pën mijts mtsiptakxëp ets xypyäädëdë wiinkpë mëtnaymyaayëbë mët ko mwintsoytyuˈunëty, mbäät mbudëkëty ko mdunët mä asamblee. Tuˈugë nmëguˈukˈäjtëm jyënany: “Kojëts ijty nëjkxy mä asamblee, yëˈëyëtsë nety nˈixyˈajtypyë nfamilyë ets tuˈuk majtskëtsë nmëtnaymyaayëbë. Per kots ojts nnayˈawanëty parëts tijaty nyajwäˈätsët, tajëts may nˈixyˈajtyë nmëguˈukˈäjtëm. ¡Jantsy oyëts nnayjäˈäwë!”. Mëjwiin kajaa nëjkx xyajxondakëm ko nyajnimayëmë mëtnaymyaayëbë mët ko nyäjkëm ja naybyudëkë mä asamblee (2 Kor. 6:12, 13). Pën kyajnëm duˈun mdimtuny, yajtëwë mëjjäˈäytyëjk diˈib mä mnaymyujkën ti mbäät xytyuny.
9. ¿Ti mbäät nduˈunëm parë nwoˈojëmë jäˈäy mä asamblee?
9 Wowë jäˈäy parë nëjkx tmëdooˈittë tëyˈäjtën. Ko nety yˈaktëgoyˈaty ja tëgëk sëmään parë nduˈukmujkëm ta nwowäˈänëmë jäˈäy, duˈun extëm yajtuuny tyuk jëmëjt myajtsk jëmëjtëp. Tuˈuk tuˈugë naymyujkën, dyajwäˈkxäˈändë inbitasyonk ets ttunäˈändë mëjää parë dyaˈˈabëtsëmdët mä pyäädëdë kyäjpxwäˈkxtët. (ixë rekuäädrë “¿Wiˈix yajkëyakäˈäny ja inbitasyonk?”). Diˈib nadëjkëp, ta yajmënëjkxët mä asamblee parë nmëguˈukˈäjtëm tmoˈoytyëdë jäˈäy diˈib yˈoymyëdoobyë Diosë yˈayuk.
10. Nimaytyäˈäk tuˈuk majtskë eksperiensyë wiˈix oy wyimbëtsemy ko nyajwäˈkxëmë inbitasyonk.
10 ¿Oydaa wyimbëtsemy ko nyajwäˈkxëmë inbitasyonk? Mä tyuunë tuˈugë asamblee, ta tuˈugë nmëguˈukˈäjtëm diˈib tuump akomodadoor, tˈijxy ko jyajty tuˈugë kasäädë jäˈäy ta tmooyë lyugäär. Yëˈëjëty jyënandë ko tëgë nety yajmoˈoytyë tuˈugë inbitasyonk ets ko nyijawëyandëbë nety niˈigyë. Ja netyë karrë të myëyoˈoyëdë naxy 300 kilometrë parë jyäjttë mä asamblee. Ja tuˈugë nmëguˈukˈäjtëm ko nety kyäjpxwaˈkxy tëjkmdëjkm, ta tmooyë inbitasyonk tuˈugë yetyëjk. Kom yˈoymyëdoo, ta ja nmëguˈukˈäjtëm ttukmëtmaytyaky tijatyë nety myaytyakypy ja inbitasyonk. Ok, ta tˈijxy ja yetyëjk mët tuˈugë myëtnaymyaayëbë mä asamblee, ets tmënëjkxtë ja ëxpëjkpajn diˈibë nety të jyembyëtsemy.
11. ¿Tiko jyëjpˈamëty ets nëjkxëm jëmëjt jëmëjt mä tuˈukmujkënë tëgëk xëëbë?
11 Jyobaa yëˈë ojts ttuknibëjtäägë parë ja israelitëty xyëdundët ets duˈun tmëdundëdë Jyobaa xëmë “mëdë tëyˈäjtën ets kyaj tyëgoytyët” (Jos. 24:14). Nanduˈun tyam, ko nduˈukmujkëm tëgëk xëë yëˈë diˈib xypyudëjkëm parë nëˈëyoˈoy nduˈuyoˈoyëm mä “ja tëyˈäjtën” ets jëjpˈam duˈun nduˈunëm mä nDiosˈawdäjtëm (3 Fwank 3). Ntsojkëm etsë Jyobaa tkunuˈkxët pënaty tsyojktëp ja tëyˈäjtën ets pënaty tyuundëbë mëjää parë nyëjkxtë jëmëjt jëmëjt mä tyunyëtyë asamblee ets ttukˈoyˈattët mëjwiin kajaa.
[Letrë diˈib miimp mä pajina 4]
Ko nyaˈijxëmë oybyë jäˈäyˈäjtën mä ja käjpn mä tyunyëtyë asamblee, ta nyaˈoygyëxëˈkëm ja tëyˈäjtën
[Letrë diˈib miimp mä pajina 5]
Ko nety yˈaktëgoyˈaty ja tëgëk sëmään parë nduˈukmujkëm ta nwowäˈänëmë jäˈäy
[Rekuäädrë mä pajina 3-6]
¿Tijaty Mbäät Njamyajtsëm Mä Tyunäˈänyëtyë Tuˈukmujkënë Tëgëk Xëëbë 2012?
◼ Ti oorë tsyondäˈägäˈäny ets kyëxäˈäny. Ja yˈawäˈätsäˈäny ja tëjkˈää a las 8:00. Ets tëgëk xëë ja tsyondäˈägäˈäny a las 9:20. Ko ja diˈib tuump presidentë jyënäˈänët ko tam ja ëy yajpëjtäˈägäˈäny parë tsyondäˈäganë, ta niˈamukë nbatëm ja unyaaytyakn parë tsyondäˈägët duˈun extëmë Jyobaa myëjpëtsëmët. Biernës ets sääbëdë ja jyëjpkëxäˈäny a las 4:55, ets domingë a las 3:40.
◼ Mä karrë nyijäjtpety. Kyaj nyajtukˈajuytyukäˈänëm pën ëtsäjtëm ngëˈamˈäjtëm ja lugäär, ets duˈun nyajmoˈoyäˈänëm ja lugäär extëm njäjtëm. Mä näägë siudad tapë lugäär mä dyajjäˈtëdë kyarrë pënaty kyaj yˈoy myëkëty. Per yëˈëyë jap yajjäˈttëbë kyarrë diˈib myënëjkxypyë plakë ko kyaj yˈoy myëkëty. Ets kom näˈäty mutsk ja lugäär mä karrë nyijäjtpety, pääty myaˈˈanëëmëdë ets niganääk mdëkëdët mä tuˈugë karrë.
◼ Unyaaybyajn. Yëˈëyë mbäädë lyugäär niwäˈänëm, diˈib mëët tuˈugyë ntsënäˈäyëm, diˈib mëët tuˈugyë nëjkxëm o diˈibë nyaˈëxpëjkëm (1 Kor. 13:5).
◼ Käˈäy ukën. Oy ko nmënëjkxëmë käˈäy ukën, net kyaj nbëtsëˈëmëm juuy këbajtpë kijkyxyëë. Ets oy ko nmënëjkxëm mä tuˈugë abëjkënë diˈib kyaj yˈatsipët mä unyaaybyajn. Nan kyaj mbäät nmënëjkxëmë abëjkën diˈib biidrië.
◼ Nyäjkëmë meeny sentääbë. Mbäät nmëjjäˈäjëm tyäˈädë asamblee mët ko nyäjkëm tsojkëngyëjxmë meeny sentääbë mä yajtunyë tyäˈädë tuunk abëtsemy naxwinyëdë. Pën jam pën tkaxäˈänyë cheque yëˈë tyuknigaxëbë “La Torre del Vigía, A.R.”.
◼ Ko pën yˈayoˈonbäädët ets ko ti tyun jyatëdët. Ko pën wiˈix jyat kyëbatët mä asamblee ets ttsokët ja doktoorë nyaybyudëkë, ta tˈawanët ja nmëguˈukˈäjtëm diˈib xymyoˈoyëmë lugäär ets yëˈë nëjkx tˈawanë pënaty tuundëp mä tsooy yajˈyaky parë tˈixtët wiˈix mbäät yajpudëkë. Per ja jeˈeyë mbäät yajmëgajpxy pën mëjwiin kajaa ja jotmay.
◼ Tsooy. Pën jam xyjeˈxyë tsooy diˈibë doktoor të tnasjayë, mbäät xymyënëjkxy nuˈun xyajtunäˈäny, pes kyaj mbäät jap xypyaaty mä asamblee. Pën mmëdäjtypyë diabetes ets myajtuumbyë xuˈuny o jeringë, oy ko xyˈixët mä xypyëjtaˈaky yëˈë ko kutsëˈëgë. Kyaj jap xypyëjtäˈägët mä puˈxm o postäˈäk nyipety mä asamblee o mä hotel.
◼ Këˈëk. Jëmëjt jëmëjtë nmëguˈukˈäjtëm yˈayoˈonbäättë ko tkamënëjkxtë kyëˈëk diˈib mbäät oy ttukˈyoˈoytyë. Pääty oy ko nmënëjkxëm diˈib mbäät ndukˈyoˈoyëm tsuj yajxon mä pat jënak.
◼ Pënaty kyaj oy myëdowdë. Mä näägë lugäär mä tyunyëtyë asamblee, mbäät japë nmëguˈukˈäjtëm tmëdooˈittë mä raadyë tijaty naxäämp.
◼ Uˈunk karrë diˈib yajpadijp etsë siyë diˈib yajtukjaˈanëp. Tyäˈädë kyaj yajmënëjkxët mä tyunäˈänyëtyë asamblee. Mbäät yajmënëjkxyë ënäˈkuˈungë syiyë, per jamyë ttukpugëyëdët.
◼ Perfumë. Kuˈaduky näägë lugäär mä tyunyëtyë asamblee ets yëˈë yajpëjtakpë bentiladoor. Pääty nyaˈˈanmäˈäyëm ko oyxyëp ets kyaj nëgoo perfumë nyajtuˈunëm diˈib mëk xuˈkp, pes ta nmëguˈukˈäjtëm diˈib päˈämduunëp (1 Kor. 10:24).
◼ Neky Sírvase visitar (S-43-S). Mbäät nmënëjkxëm tuˈuk majtskë ja neky Sírvase visitar, pes mbäädë jäˈäy nbatëm diˈib ëxpëkäämp. Ets ko nety të nyajtuktujkëm, ta ngëyäjkëm mä Yajkëyakyë Ëxpëjkpajn o mbäät ko njëmbijtënë nmoˈoyëm ja nmëguˈukˈäjtëm diˈib tuump sekretaaryë mä naymyujkën (ix mä Wiˈix nduˈunëmë Diosë Tyuunk diˈib mayë 2011, pajina 3).
◼ Ko nëjkxëm mä kaakytyoˈk tojkxtoˈkpë. Nyajmëjpëtsëˈëmëmë Jyobaa xyëë ko oyë jot winmäˈäny nyaˈijxëm mä ja kaakytyoˈk tojkxtoˈkpë. Ta lugäär mä jäˈäy të tˈijxwëˈëmdë yajmoˈoytyë propina, pën duˈun mä nlugäärˈäjtëm ta xymyoˈoyët.
◼ Hotel
1) Pën mjäjtakp mä hotel kyaj xyˈagäjpxtukëdë kuartë diˈib kyaj xyajtunäˈäny ets nan kyaj niganäägë jäˈäy xyajtëkët extëm kyaj nyigutukë.
2) Jaayë jeˈeyë mbäät xyˈagäjpxtukyë kuartë pën jam ti jotmay të xypyaaty ets netyë xynyigäjpxët mä hotel (Mat. 5:37).
3) Pën yëˈë myajtuumbyë tarjeta de crédito o débito ko myajkujayë mä hotel, ja jäˈäy diˈib jap tuump yajwëˈëmaambyë meeny nuˈun ttukˈaˈixë parë yëˈë ttukkujuyët ko nety ti xyajwindëgoy mä ja kuartë. Ets mbäädë net ok ja meeny dyajjëmbity ko nety të tˈijxtäˈäy ko kyaj ti të xyajwindëgoy.
4) Mä hotel tamë karruˈunk mä mbäädë mtsemy mgëˈëy xyajnëjkxy, per ja nëjkx xyajtsoony ko nety meerë xyajtunäˈäny ets ko xyajtuundäˈäyët, ta netyë xymyënëjkxët parë wiinkpë dyajtunët.
5) Nikaˈak jabom jabomë propina parë jäˈäy diˈib tuundëp mä hotel ets mmoˈoytyë nanduˈunë diˈib myënëjkxtëbë mtsemy mgëˈëy.
6) Kyaj mgaaky mdojkx xyaˈoyët pën kyaj yajkupeky mä hotel.
7) Mä hotel yajˈyäjkpë käˈäy ukën, kafee etsë yelë, per oy ko nnaygyumäˈäyëm ets kyaj nmëtsoˈonëm tijaty.
8) Oy xëmë mjäˈäyˈattët parë mëdë jäˈäy diˈib tuundëp mä hotel. Jamyats ko mayjyaˈay dyajjäˈttë, pääty tmëjjawëdë ko nˈijtëm oyjyaˈay, nmaˈkxtujkëm ets ngajpxykyupëjkëm.
9) Jëjpˈam ets ja tääk teety tˈijxˈit tkuentˈattëdë yˈuˈunk yˈënäˈk mä hotel, ko yajpäättët mä sala, alberkë etsë jimnasyë mä jäˈäy yˈejersisyëtundë.
10) Mä Lista de hoteles recomendados jap myiny nuˈun ja hotel yaˈˈajuytyukäˈäny tuˈukpë xëë, ets abekyë iva. Pën niˈigyë myajtukˈajuytyukäˈäny kyaj xykyupëkët ets netyë xyˈawanëdë Departamento de Alojamiento.
11) Pën jam ti jotmay jyamˈaty mä ja kuartë, ta xyˈawanëdë Departamento de Alojamiento mä kyajëjpkexynyëmë tuˈukmujkën.
◼ Nˈokˈyäjkëmë naybyudëkë. Pënaty tsyojkënyëˈäjttëp tyunäˈändë mbäät nyëjkxtë mä Yajtuunkmoˈoytyë pënaty tunandëp. Pënaty kyajnëmë jyëmëjt dyaˈˈabattë 16, net nyëjkxët tuumbë pën nëjkxpë tyääk tyeety o jam pën diˈib të yajtuknipeky.
[Rekuäädrë mä pajina 6]
¿Wiˈix yajkëyakäˈäny ja inbitasyonk?
Parë nyaˈˈabëtsëˈëmëm ja territooryë, oy ko kyaj jekyë jäˈäy nmëtmaytyakëm. Mbäät jawyiin ngäjpxpoˈkxëm ets naa duˈun nˈanmäˈäyëm: “Tyam, abëtsemy nyaxwinyëdëts nyajwäˈkxtë tyäˈädë inbitasyonk. Tyäˈädë mijts nmoˈoyaampy. Yap niˈigyë xynyijawët tiko myajwoy”. Tukˈit tukxon. Ko xyajwäˈkxëdë inbitasyonk sääbëdë domingë, nan mbäät xymyoˈoyë rebistë pën yˈoymyëdoopy.