Nˈokjäˈäyˈäjtëm extëm mbäädë Dios myëjpëtsëmy

1. ¿Tiko xëmë jäˈäy xyˈëxkäjpëm ko nëjkxëm asamblee?

¹ Ko nëjkxëm asamblee, xëmë jäˈäy xyˈëxkäjpëm. Mä mayë siudad, yajnigäjpx mä notisyë ko nˈasambleeˈatäˈänëm. Tuktujkpë hotel mëdë Jyobaa tyestiigëty ets mä kaaky tojkx yajtooky. Ets nan yaˈijxtëp nëˈääy tuˈääy mëdë gyafet diˈib yajtukˈijxwëˈëmdëp. Min nˈokˈijxëm tuk pëky majtsk pëky diˈib mbäät xypyudëjkëm parë nyajmëjpëtsëˈëmëmë Dios mä ja lugäär mä nˈasambleeˈatäˈänëm (1 Peed. 2:12).

2. Ko naywyit nayxyojxëm yajxon mä nˈasambleeˈajtëm, ¿wiˈix mbäät nyajmëjpëtsëˈëmëmë Dios?

² Nˈokpëjtakëm yajxonë wit xox. Ko tsuj yajxon ja wit xox nbëjtakëm mä asamblee xëmë jäˈäy tˈixy. Per mbäädë jäˈäy niˈigyë tpëktë kuentë wiˈix naywyit nayxyojxëm, extëm ko njäjtëm mä hotel, ko nëjkxëm muum kaabyë o juuy këbajtpë, ets oy duˈun nganayxyojxëm extëm ko nëjkxëm mä naymyujkën, jëjpˈam ets nˈijxëm diˈibë oy këxëˈëgëp. Duˈun mbäät nayxyojxëm extëm mbäädë jäˈäy xyˈëxkäjpëm ko Dios mëduˈunëm (Rom. 12:2). Nan oyxyëp ko nmënëjkxëmë gafet parë nyajnigëxëˈkëm ko asambleeˈäjtëm, parë nmëtmaytyakëmë jäˈäy ets parë nmëguˈukˈäjtëm xyˈëxkäjpëm.

3. ¿Wiˈix mbäät nyaˈijxëmë maˈkxtujkën etsë oyjyaˈayˈäjtën?

³ Yaˈixëdë maˈkxtujkën etsë oyjyaˈayˈäjtën. Tyam, këˈëmë jäˈäy nyaymyëmay nyaymyëdäjëdë ets kyaj ti tmëjjawëdë. Pääty ko nmaˈkxtujkëm ets nˈoyjyaˈaytyakëm, mbäädë jäˈäy oy nyayjawëdë mä ja nax käjpn mä të njäjtëm, extëm pënaty tuundëp mä hotel o mä kaaky tojkx yajtooky (2 Tim. 3:1-5). Ets oy ko nwinmäˈäyëm ti ja nmëguˈukˈäjtëm tyukˈoyˈattëp ko ja lugäär niwäˈänëm o ko ja jembyë ëxpëjkpajn nˈaxäjëm (1 Kor. 10:23, 24). Tuˈugë yetyëjk jyënany ko yˈojtsy tim jawyiin mä asamblee: “Nituˈugëtsë diskursë nganekyjyamyetsy diˈib ojts nyaxy mä asamblee, per diˈib tim wëˈëm mäjëtsë nwinmäˈäny, yëˈë wiˈix jyaˈayˈattë Testiigëty”.

4. ¿Tiko yˈoyëty nwinmäˈäyëm parë nyäjkëmë naybyudëkë mä tyunäˈänyëtyë asamblee?

⁴ Nˈoknayˈawäˈänëm parë nduˈunëm. Pënaty jyantsy pyanëjkxtëbë Kristë, yëˈë yajtukˈëxkäjptëp ko nyaybyudëkëdë (Sal. 110:3). ¿Mbäät mijts xyakyë mnaybyudëkë? Mä nety tuˈugë asamblee tyunäˈänyëty, ja naa 600 nmëguˈukˈäjtëm ojts dyajwäˈätstë ja lugäär. Ja jäˈäy diˈib jap tuump, monyˈijx monyjäˈäwë ets jyënany: “Ninäˈänëmtsë nety duˈun ngaˈixtë. Kyajts nmëbëkäˈändë ko niˈamukë ak namayˈäjtën tyundë”. Njantsy awijx njantsy jëjpˈijxëm ja tuˈukmujkënë tëgëk xëëbë mä jëmëjt 2013, mä kyaj jeˈeyë nmëdooˈitäˈänëm ets tijaty njatäˈänëm, nanduˈunën nyajmëjpëtsëmäˈänëmë Jyobaa diˈib xyaˈëxpëjkëm.

Rekuäädrë diˈib mä pajina 3-6]

¿Tijaty mbäät njamyajtsëm mä tyunäˈänyëtyë tuˈukmujkënë tëgëk xëëbë 2013?

◼ Ti oorë tsyondäˈägäˈäny ets kyëxäˈäny. Ja yˈawäˈätsäˈänyë tëjkˈää a las 8:00. Ets yajpëjtäˈägäˈänyë ëy diˈib mëët tsyondäˈägäˈäny a las 9:20, ets duˈun yajtunäˈäny tëgëk xëë. Ko yajpëjtäˈägëdë ëy, ta niˈamukë nbatäˈäyëm ja unyaaytyakn parë tsyondäˈägët wintsëˈkën myëët. Biernës ets sääbëdë ja jyëjpkëxäˈäny a las 4:50 mët tuˈugë ëy etsë nuˈkxtakën, ets domingë a las 3:35.

◼ Mä karrë nyijäjtpety. Kyaj nyajtukˈajuytyukäˈänëm pën ëtsäjtëm ngëˈamˈäjtëm ja lugäär, ets duˈun nyajmoˈoyäˈänëm ja lugäär extëm njäjtëm. Mä näägë siudad tapë lugäär mä dyajjäˈtëdë kyarrë pënaty kyaj yˈoy myëkëty. Per yëˈëyë jap yajjäˈttëbë kyarrë diˈib myënëjkxypyë plakë ko kyaj yˈoy myëkëty. Ets kom näˈäty mutsk ja lugäär mä karrë nyijäjtpety, pääty myaˈˈanëëmëdë ets niganääk mdëkëdët mä tuˈugë karrë.

◼ Unyaaybyajn. Yëˈëyë mbäädë lyugäär niwäˈänëm, diˈib mëët tuˈugyë ntsënäˈäyëm, diˈib mëët tuˈugyë nëjkxëm o diˈib nyaˈëxpëjkëm. Waanë jeˈeyë ja unyaaybyajn diˈib të yajtuknibëjtäägë parë mëjjäˈäytyëjk ets parë diˈib yuumëët päˈämmëët, pääty kyaj mbäät ja familyë jam yˈunyaaytyaˈaytyë. Tunë mayˈäjtën yajwëˈëmë tadë lugäär parë mëjjäˈäytyëjk ets parë diˈib yuumëët päˈämmëët ets ja diˈib kuentˈäjtëp (1 Kor. 13:5).

◼ Käˈäy ukën. Oy ko nmënëjkxëmë käˈäy ukën, net kyaj nbëtsëˈëmëm juuy këbajtpë kujkxyëë. Ets oy ko nmënëjkxëm mä tuˈugë abëjkënë diˈib mbäät nbëjtakëm unyaaybyajnbatkëˈëy. Nan kyaj mbäät nmënëjkxëmë abëjkënë mëjatypyë ets ni yëˈë diˈib biidrië.

◼ Nyäjkëmë meeny sentääbë. Mbäät nmëjjäˈäwëmë tyäˈädë asamblee ko nyäjkëm tsojkëngyëjxmë meeny sentääbë mä yajtunyë tuunk abëtsemy naxwinyëdë. Pën jam pën tkaxäˈänyë cheque yëˈë tyuknigaxëbë “La Torre del Vigía, A.R.”. Ets mä näägë asamblee tyunyëty nan mbäät yajˈyakyë meeny mët yëˈëgyëjxmë tarjetas de débito etsë de crédito.

◼ Tsooy. Pën jam xyjeˈxyë tsooy diˈibë doktoor të tnasjayë, mbäät xymyënëjkxy nuˈun xyajtunäˈäny, pes kyaj mbäät jap xypyaaty mä asamblee. Pën mmëdäjtypyë diabetes ets myajtuumbyë xuˈuny o jeringë, oy ko xyˈixët mä xypyëjtaˈaky, yëˈë ko kutsëˈëgë. Kyaj xypyëjtäˈagët mä puˈxm o postäˈäk nyipety jap mä asamblee o mä hotel.

◼ Këˈëk. Jëmëjt jëmëjtë nmëguˈukˈäjtëm yaˈˈayoˈonbäädëdë kyëˈëk, ets mas pën yëˈë myënëjkxtëbë sapatë ëxkuˈpyny. Pääty, oy ko nmënëjkxëm diˈib mbäät ndukˈyoˈoyëm tsuj yajxon mä pat jënak.

◼ Pënaty kyaj oy myëdowdë. Mä näägë lugäär mä tyunyëtyë asamblee, mbäät japë nmëguˈukˈäjtëm tmëdooˈittë mä raadyë tijaty naxäämp (FM). Ets parë mbäät tmëdooˈittë, tsojkëp tmënëjkxët ja raadyë diˈib yajtuumbyë pilë etsë audifënë.

◼ Uˈunk karrë diˈib yajpadijp etsë siyë diˈib yajtukjaˈanëp. Tyäˈädë kyaj yajmënëjkxët mä tyunäˈänyëtyë asamblee. Mbäät yajmënëjkxyë ënäˈkuˈungë yˈunyaaybyajn, per yëˈë diˈib mbäät yajkëxkëˈëy mä siyë.

◼ Perfumë. Kuˈaduky näägë lugäär mä tyunyëtyë asamblee ets yëˈë yajpëjtakpë bentiladoor. Pääty nyaˈˈanmäˈäyëm ko oyxyëp ets kyaj nëgoo perfumë nyajtuˈunëm diˈib mëk xuˈkp, pes ta nmëguˈukˈäjtëm diˈib päˈämduunëp (1 Kor. 10:24).

◼ Neky Sírvase visitar (S-43-S). Mä tyäˈädë neky Sírvase visitar, mbäät xykyujayë ja jäˈäyë dyireksion diˈib yˈoymyëdoopy ko xymyëtmaytyaˈaky. Ets mbäät xykyëyaky mä Yajkëyakyë Ëxpëjkpajn o ko mjëmbijnët xymyoˈoyët ja nmëguˈukˈäjtëm diˈib tuump sekretaaryë mä naymyujkën.

◼ Mä kaakytyoˈk tojkxtoˈkpë: Nyajmëjpëtsëˈëmëmë Jyobaa xyëë ko oyë jot winmäˈäny nyaˈijxëm mä ja kaakytyoˈk tojkxtoˈkpë. Ta lugäär mä jäˈäy të tˈijxwëˈëmdë yajmoˈoytyë propina, pën duˈun mä mlugäär, ta xymyoˈoyët.

◼ Hotel:

1) Pën mjäjtakp mä hotel kyaj xyˈagäjpxtukëdë kuartë diˈib kyaj xyajtunäˈäny ets nan kyaj niganäägë jäˈäy xyajtëkët extëm kyaj nyigutukë.

2) Jaayë mbäät mgajpxy mä hotel ko kyaj xyˈokˈyajtunanë kuartë pën jam ti jotmay të xypyaaty ets netyë xynyigäjpxët parë wiink jäˈäy jyäˈtët (Mat. 5:37). Pën mgäjpxp mä hotel ko kyaj xyˈokˈyajtunanë, kujayë tadë numero diˈib myajmoopy. Ets nëjkxëp tyëgoyë ja meeny diˈibë nety waanë të xyaky, pën ja mgajpxy ko nety të nyäjxnë 48 oorë parë mjäˈtäˈäny mä hotel.

3) Pën yëˈë myajtuumbyë tarjeta de crédito o débito ko myajkujayë mä hotel, ja jäˈäy diˈib jap tuump yajwëˈëmaambyë meeny nuˈun ttukˈaˈixë parë yëˈë ttukujuyët ko nety ti xyajwindëgoy mä ja kuartë. Ets mbäädë net ok ja meeny dyajjëmbity ko nety të tˈijxtäˈäy ko kyaj ti të xyajwindëgoy.

4) Mä hotel tamë karruˈunk mä mbäädë mtsemy mgëˈëy xyajnëjkxy, per ja nëjkx xyajtsoony ko nety meerë xyajtunäˈäny ets ko xyajtuundäˈäyët, ta netyë xymyënëjkxët parë wiinkpë dyajtunët.

5) Nikaˈak jabom jabomë propina parë jäˈäy diˈib tuundëp mä hotel pën duˈun ja kostumbrë, ets mmoˈoytyë nanduˈun diˈib myënëjkxtëbë mtsemy mgëˈëy.

6) Kyaj mgaaky mdojkx xyaˈoyët pën kyaj yajkupëky mä hotel.

7) Mä hotel yajˈyäjkpë käˈäy ukën, kafee etsë yelë, per oy ko nnaygyumäˈäyëm ets kyaj nmëtsoˈonëm tijaty.

8) Oy xëmë mjäˈäyˈattët parë mëdë jäˈäy diˈib tuundëp mä hotel. Jamyats ko mayjyaˈay dyajjäˈttë, pääty tmëjjawëdë ko nˈijtëm oyjyaˈay, nmaˈkxtujkëm ets ngajpxykyupëjkëm.

9) Jëjpˈam ets ja tääk teety tˈijxˈit tkuentˈattëdë yˈuˈunk yˈënäˈk mä hotel, ko yajpäättët mä sala, alberkë etsë jimnasyë mä jäˈäy yˈejersisyëtundë ets mä elebadoor.

10) Mä Lista de hoteles recomendados jap myiny nuˈun ja hotel yaˈˈajuytyukäˈäny tuˈukpë xëë, ets abëkyë iva. Pën niˈigyë myajtukˈajuytyukäˈäny kyaj xykyupëkët ets netyë xyˈawanëdë Departamento de Alojamiento.

11) Pën jamˈäjtp tuˈugë jotmay mä ja kuartë, ta xyˈawanëdë Departamento de Alojamiento mä kyajëjpkëxynyëmë tuˈukmujkën.

◼ Nˈokˈyäjkëmë naybyudëkë. Pënaty tsyojkënyëˈäjttëp dyakäˈändë ja naybyudëkë, mbäät nyëjkxtë mä Yajtuunkmoˈoytyë pënaty tunandëp. Pënaty kyajnëmë jyëmëjt dyaˈˈabattë 16, net nyëjkxët tuumbë pën nëjkxpë tyääk tyeety o jam pën diˈib të yajtuknipëky diˈib mëjjäˈäy mëjˈënäˈknë.