¿Tijaty mbäät njamyajtsëm mä tyunäˈänyëtyë asamblee tëgëk xëëbë?
Ti oorë tsyondäˈägäˈäny ets kyëxäˈäny. Ja yˈawäˈätsäˈänyë tëjkˈää jopyëp a las 8:00. Ets yajpëjtäˈägäˈänyë ëy diˈib mëët tsyondäˈägäˈäny a las 9:20, ets duˈun yajtunäˈäny tëgëk xëë. Ko yajpëjtäˈägëdë ëy, ta niˈamukë nbatäˈäyëm ja unyaaytyakn parë tsyondäˈägët wintsëˈkën myëët. Biernës ets sääbëdë ja jyëjpkëxäˈäny naa a las 5:00, ets domingë naa a las 4:00.
Ëy yaˈaxy parë nmëjkumäˈäyëmë Jyobaa. Tëëyëp, yëˈë Jyobaa kyäjpn myëjkumääytyë mëdë ëy yaˈaxy. Tyam, nan mëj nyajnäjxëmë ëy mä nDiosˈawdäjtëm (Sal. 28:7). Mä tyunyëtyë asamblee diˈib tëgëk xëë, koogoo tsyondaˈagyë programë, ta yajpëjtaˈagyë melodiyë. Kyaj jeˈeyë yajpëjtaˈaky parë yajmëdooˈitët, yëˈë duˈun parë nˈawdäjtëmë Jyobaa ets parë niˈigyë nˈixyˈäjtëm. Pääty ko nyaˈˈanmäˈäyëm ets nbatëmë lugäär, ta netyë duˈun nduˈunëm ets nmëdoowˈijtëm yajxon, en lugäär ngäjpx nmaytyakëm. Duˈuntsoo nety nyaˈijxëm ko nmëjjäˈäwëm ja nmëguˈukˈäjtëm diˈib tuundëp mä ja orkestë diˈib mä Watchtower. Pes mä tuˈukpë jëmëjt majtskˈok nyëjkxtë Patterson (Nueva York) parë tgrabarattë melodiyë diˈib niˈamukë ndukxondakëm. Ko yajmëdooˈijtäˈäy ja melodiyë, ta net nmëjkumäˈäyëmë Jyobaa mët ko nguyˈëˈëwëm ja yˈAnaˈam Kyutujkën.
Mä karrë yajnaswiidë. Kyaj nyajtukˈajuytyukäˈänëm pën ëtsäjtëm ngëˈamˈäjtëm ja lugäär, ets duˈun nyajmoˈoyäˈänëm ja lugäär extëm njäjtëm. Mä näägë siudad tapë lugäär mä dyajjäˈtëdë kyarrë pënaty kyaj yˈoy myëkëty. Per yëˈëyë jap yajjäˈttëbë kyarrë diˈib myënëjkxypyë plakë ko kyaj yˈoy myëkëty. Ets kom näˈäty mutsk ja lugäär mä karrë nyijäjtpety, pääty myaˈˈanëëmëdë ets niganääk mdëkëdët mä tuˈugë karrë.
Unyaaybyajn. Ko ja tëjkˈää yˈawäˈätsët, kyaj yˈoyëty njantsy nyibëyëˈkojëm ja unyaaybyajn diˈib ntsojkëm, extëmxyëp nduˈunëmë kompetensyë. Niˈigyë mbäät nmëmäˈäy nmëdäjëm ja nmëguˈukˈäjtëm ets nˈijxëm ti tyukˈoyˈatëp, pes yëˈë diˈibë jäˈäy xytyukˈëxkäjpëm ko njantsy pyanëjkxëmë Kristë ets yëˈë diˈib pudëkëdëp parë tmëjkumaytyëdë Dios (Fwank 13:34, 35; 1 Kor. 13:5; 1 Peed. 2:12). Yëˈëyë mbäädë lyugäär niwäˈänëm diˈib mëët tuˈugyë ntsënäˈäyëm, diˈib mëët tuˈugyë nëjkxëm o diˈib nyaˈëxpëjkëm. Waanë jeˈeyë ja unyaaybyajn diˈib të yajtuknibëjtäägë parë mëjjäˈäytyëjk ets parë diˈib yuumëët päˈämmëët, pääty kyaj mbäät niˈamukë ja familyë jam yˈuˈunyëdë. Tunë mayˈäjtën yajwëˈëmë tadë lugäär parë mëjjäˈäytyëjk ets parë diˈib yuumëët päˈämmëët ets ja diˈib kuentˈäjtëp.
Nˈoknayxyojxëm tsuj yajxon. Ko nëjkxëm asamblee yëˈë mbäät nduktëjkëmë wit diˈib kyaj wiink yaˈixët ets diˈib adëyë, kyaj duˈun nayxyojxëm extëmë naxwinyëdë jäˈäy diˈib yaˈoˈktëëwdëp wiˈix nyaywyit nyayxyoxëdë (1 Tim. 2:9). Oy ko nˈijxëm wiˈix naywyit nayxyojxëm ko nety njäjtëm mä ja lugäär, ko nyajpatëm mä jäjtakn ets ko nety ntsoˈonënë. Net kyaj wiˈix nnayjäˈäwëm ko nbëjtakëm ja gafet ets kyaj nëjkx ntsoytyuˈunëm parë nimaytyakëmë Diosë yˈayuk. Ko tsuj yajxon naywyit nayxyojxëm ets ko nyaˈijxëmë oybyë jot winmäˈäny mä asamblee diˈib tuunëp tëgëk xëë, mbäät mayë jäˈäy diˈib oyë kyorasoon tˈoymyëdowdë ja oybyë ayuk diˈib yajpatp mä Biiblyë, etsë Jyobaa nan nëjkxëp jantsy jotkujk nyayjawëty (Sof. 3:17).
Ko nyajtuˈunëmë aparatë. Pën mënëjkxaambyë mselulaar o wiinkpë mˈaparatë, oy ko xytyuknibanët parë kyaj pën tnaˈamët. Ets pën yëˈë myajtunaampy extëm tuˈugë kamara parë xyajpëtsëmëdë retratë o bideo o xyajtunäˈäny tuˈugë tableta, oy ko kyaj xyˈatsiptëdë nmëguˈukˈäjtëm o xyaˈˈadukët parë kyaj ja nmëguˈukˈäjtëm tˈixët ti jam näjxp mä ja plataformë. Parë xyaˈixëdët ko mwintsëˈkëbë nmëguˈukˈäjtëm oy ko kyaj xykyaxëdë mensaje o correos electrónicos, pën kyaj tyim jëjpˈamëty.
Käˈäy ukën. Oy ko nmënëjkxëmë käˈäy ukën parë kyaj nbëtsëˈëmëm juuy këbajtpë kujkxyëë. Ets nmënëjkxëm mä tuˈugë abëjkënë diˈib mbäät tyëkë unyaaybyajnbatkëˈëy. Nan kyaj mbäät nmënëjkxëmë abëjkënë mëjatypyë ets ni yëˈë diˈib biidrië.
Nyäjkëmë meeny sentääbë. Mbäät nmëjjäˈäwëmë tyäˈädë asamblee ko nyäjkëm tsojkëngyëjxmë meeny sentääbë parë yajtunëdë Diosë tyuunk abëtsemy nyaxwinyëdë. Pën jam pën tkaxäˈänyë tyeke yëˈë tyuknigaxëbë “La Torre del Vigía, A.R.” ets mä näägë asamblee tyunyëty nan mbäät yajˈyakyë meeny mët yëˈëgyëjxmë tarjeta de débito o crédito.
Tsooy. Oy ko xymyënëjkxëdë mtsooy diˈib mjëˈëmpy, pes kyaj yajˈyaky mä asamblee tyunyëty. Pën mmëdäjtypyë diabetes ets myajtuumbyë xuˈuny o jeringë, oy ko xyˈixët mä xypyëjtaˈaky mët ko kutsëˈëgë. Kyaj xypyëjtäˈägët mä puˈxm o postäˈäk jap mä asamblee tyunyëty o mä hotel.
Nˈoknaygyuentˈäjtëm parë kyaj nˈayoˈonbatëm. Jëjpˈam ets nnaygyuentˈäjtëm parë kyaj ngunajpëm o njaxkëˈkëm. Jëmëjt jëmëjtë nmëguˈukˈäjtëm yaˈˈayoˈonbäädëdë kyëˈëk, ets mas pën yëˈë myënëjkxtëbë sapatë ëxkuˈpyny. Pääty, oy ko nmënëjkxëm diˈib mbäät ndukˈyoˈoyëm tsuj yajxon mä pat jënak.
Pënaty kyaj oy myëdowdë. Mä näägë lugäär mä tyunyëtyë asamblee, mbäät japë nmëguˈukˈäjtëm tmëdooˈittë mä raadyë (FM). Pääty oy ko tmënëjkxtëdë yˈëëbë mutskpë diˈib yajtuumbyë pilë etsë audifënë.
Uˈunk karrë diˈib yajpadijp etsë siyë diˈib yajtukjaˈanëp. Tyäˈädë kyaj yajmënëjkxët mä tyunäˈänyëtyë asamblee. Mbäät yajmënëjkxyë ënäˈkuˈungë yˈunyaaybyajn, per yëˈë diˈib mbäät yajkëxkëˈëy mä siyë.
Perfumë. Kuˈaduky näägë lugäär mä tyunyëtyë asamblee ets yëˈë tuumbë bentiladoor. Pääty nyaˈˈanmäˈäyëm ko oyxyëp ets kyaj nëgoo perfumë nbëjtakëm diˈib mëk xuˈkp, pes ta nmëguˈukˈäjtëm diˈib päˈämduunëp (1 Kor. 10:24).
Mä kaakytyoˈk tojkxtoˈkpë. Nyajmëjpëtsëˈëmëmë Jyobaa xyëë ko oyë jot winmäˈäny nyaˈijxëm mä kaakytyoˈk tojkxtoˈkpë. Nnayxyoxëdë tsuj yajxon extëmë tuˈugë Dios mëduumbë. Nikaˈagë propinë pën duˈun yajmëdatyë kostumbrë.
Hotel:
Pën mjäjtakp mä hotel kyaj xyˈagäjpxtukëdë kuartë diˈib kyaj xyajtunäˈäny ets nan kyaj xyajtëkët niganäägë jäˈäy pën kyaj nyigutukë.
Jaayë mbäät mgajpxy mä hotel ko kyaj xyˈokˈyajtunanë ja kuartë pën jam ti jotmay të xypyaaty parë mbäädë wiink jäˈäy jyaˈty (Mat. 5:37). Pën mgäjpxp mä ja hotel, kujayë ja numero diˈib myajmoopy. Ets nëjkxëp tyëgoyë ja meeny diˈibë nety waanë të xyaky, pën ja mgajpxy ko nety të nyäjxnë 48 oorë parë mjäˈtäˈäny mä hotel.
Pën yëˈë myajtuumbyë tarjeta de crédito o débito ko myajkujayë mä hotel, ja jäˈäy diˈib jap tuump yajwëˈëmaambyë meeny nuˈun ttukˈaˈixë parë yëˈë ttukujuyët ko nety ti xyajwindëgoy mä ja kuartë. Ets mbäädë net ok ja meeny dyajjëmbity ko nety të tˈijxtäˈäy ko kyaj ti të xyajwindëgoy.
Mä hotel tamë karruˈunk mä mbäädë mtsëmy mgëˈëy xyajnëjkxy, per ja nëjkx xyajtsoony ko nety meerë xyajtunäˈäny ets ko xyajtuundäˈäyët, ta netyë xymyënëjkxët parë wiinkpë dyajtunët.
Pën duˈun ja kostumbrë, mmoˈoyë propinë pënaty myënëjkxtëbë mtsëmy mgëˈëy mä hotel ets nikaˈak nanduˈun parë ja jäˈäy diˈib yajwatsypyë mguartë.
Kyaj mgaaky mdojkx xyaˈoyët pën kyaj yajkupëky mä hotel.
Mä hotel yajˈyäjkpë käˈäy ukën, kafee etsë yelë parë japyë nyajtuˈunëm, kyaj yˈoyëty nmënëjkxëm mä asamblee.
Oy ko xëmë nˈijtëm oyjyaˈay parë mëdë jäˈäy diˈib tuundëp mä hotel. Jamyats ko mayjyaˈay dyajjäˈttë, pääty tmëjjawëdë ko nˈijtëm oyjyaˈay, nmaˈkxtujkëm ets ngajpxykyupëjkëm.
Jëjpˈam etsë tääk teety tˈijxˈit tkuentˈattëdë yˈuˈunk yˈënäˈk mä hotel, ko yajpäättët mä sala, alberkë, mä jimnasyë ets mä elebadoor.
Mä Lista de hoteles recomendados jap myiny nuˈun ja hotel yaˈˈajuytyukäˈäny tuˈukpë xëë, ets abëkyë iva. Pën niˈigyë myajtukˈajuytyukäˈäny kyaj xykyupëkët ets netyë xyˈawanëdë Departamento de Alojamiento.
Pën jamˈäjtp tuˈugë jotmay mä ja mguartë, ta xyˈawanëdë Departamento de Alojamiento mä kyajëjpkëxynyëm ja asamblee.
Nˈokˈyäjkëmë naybyudëkë. Pënaty tsyojkënyëˈäjttëp dyakäˈändë ja naybyudëkë, mbäät nyëjkxtë mä Yajtuunkmoˈoytyë pënaty tunandëp. Pënaty kyajnëmë jyëmëjt dyaˈˈabattë 16, net nyëjkxët tuumbë pën nëjkxpë tyääk tyeety o pën të yajtuknipëky diˈib mëjjäˈäy mëˈˈënäˈknë.