Njantsy tyukxondakëm ja tuˈukmujkënë tëgëk xëëbë
1. ¿Wiˈix xypyudëkëyäˈänëmë tadë tuˈukmujkënë tëgëk xëëbë?
1 Tyamë naxwinyëdë jäˈäy diˈib Satanás yˈaneˈemy duˈun yajpattë extëmxyëp tyëëtsëdë mëdë Diosë yˈAyuk, perë Jyobaa myoopy pënaty mëduunëp ja nëë diˈib mbäät yajnik yajxaamëdë (Isa. 58:11). Tuk peky wiˈix ttuny, yëˈë ko dyajjaˈˈatyë tuˈukmujkënë tëgëk xëëbë jëmëjt jëmëjt. Ets kom tyam ta wyingony, oy ko nnayjëjpˈijxëm parë oy nyajnayjäˈäwëm ja nmëguˈukˈäjtëm ets parë nanduˈun oy xyajnayjäˈäwëm. ¿Wiˈix mbäät nduˈunëm? (Pro. 21:5.)
2. ¿Tijaty mbäät ndukniwijtsëm?
2 Pën kyajnëm xytyuknibëjtäägë, oy ko xytyukniwitsëdë mdiempë ets ja mduunk parë mnëjkxët tëgëk xëë. ¿Mnijäˈäp nuˈun mduˈuyoˈoyaˈany tuˈuk tuˈugë xëë parë tsojk mjäˈtët ets xypyäädëdë mlugäär? Seguurë nˈijtëm ko kyaj nyajtëgoyäˈänëmë tyäˈädë käˈäy ukën diˈibë Jyobaa të ttuknibëjtäägë ets diˈib mbäät xyajniwij xyajnikajëm (Isa. 65:13, 14). ¿Të xyˈixy mä mjäjtäˈägäˈäny ets wiˈix mnëjkxäˈäny?
3. ¿Tijaty mbäät nduˈunëm parë niˈamukë xypyudëjkëm tijaty naxäämp?
3 ¿Ti mbäät mbudëkëty parë yajxon xymyëdooˈitët ti jam näjxp? Oy ko tsojk manaxët parë oy mboˈkxët, xywyinˈijxpatët pën jam yajnäjxypy ja diskursë, xyˈëxtäˈäyët tukëˈëyë tekstë diˈib jam yajnigäjpxp ets xykyujayët yëˈëyë diˈib jëjpˈam. Oyxyëp ko ja uˈunktääk uˈunkteety yˈuˈunyëdë tuˈugyë mëdë yˈuˈunk yˈënäˈk parë yajxon tmëdooˈittët (Pro. 29:15). Mbäät uxëp ja familyë tnimaytyäˈäktë diˈib të tˈoymyëdowdë. Ets parë kyaj tjäˈäytyëgoytyët diˈib ojts të tmëdooˈittë mä ja tuˈukmujkën, oy ko ok tˈixtët mä Diosˈawdattë mëdë Fyamilyë diˈib mbäät pyudëkëdë.
4. ¿Ti mbäät nduˈunëm parë nmëguˈukˈäjtëm nanduˈun pyudëkëdët ja Diosë yˈAyuk?
4 ¿Wiˈix mbäät nbudëjkëmë nmëguˈukˈäjtëm? Nan ntsojkëm etsë wiinkpë nmëguˈukˈäjtëm pyudëkëdët ja Diosë yˈAyuk. Pääty, pën jam nyëjkxäˈäny diˈib të myëjjäˈäyënë o diˈib yuu mëët päˈäm mëët, ¿mbäät xypyudëkë? (1 Fwank 3:17, 18.) Yaˈˈawijxp etsë mëjjäˈäytyëjk tpudëkëdët ja nmëguˈukˈäjtëm diˈib tsyejpyë naybyudëkë, per diˈib mas patëp, yëˈë ja diˈib yˈijxypy mä yajjuutyë grupë.
5. ¿Wiˈix nyajwäˈkxäˈänëm ja neky mä jäˈäy yajwowäˈäny? (Ix nanduˈunë rekuäädrë.)
5 Duˈun extëm tyukjëmëjtëp yajwooyë jäˈäy, nanduˈun tyam nyajwäˈkxäˈänëmë neky parë jäˈäy nwowäˈänëm, ko naty yˈaktëgoyˈaty ja tëgëk sëmään parë nduˈukmujkëm. Tuˈuk tuˈugë naymyujkën, tsojkëp ttuknibëjtäägëdët parë dyajwäˈkxtäˈäytyët ja neky ets dyaˈˈabëtsëmdët mä pyäädëdë kyäjpxwäˈkxtët. Per pën të tpatnë ja tiempë mä tyunanënë ja tuˈukmujkën ets kyaj të xyajwäˈkxtäˈäytyë, ta xymyënëjkxtët mä tyunäˈänyëty ja tuˈukmujkën ets mbäät ja jäˈäy xymyoˈoy diˈib muum mbatypy. Biernës yajnigäjpxäˈäny wiˈix mbäädë jäˈäy xyˈakmoˈoy. Per pën mˈijxypy ko kyaj xyajwäˈkxtäˈäyäˈändë, ta ko mdëkët mä tyunäˈänyëty ja tuˈukmujkën xymyoˈoyët ja diˈib yajkypyë lugäär. Ets yajwëˈëm tuˈuk, jaˈko domingë mä jyëjpkëjxnë ja tuˈukmujkën yajnimaytyäˈägäˈänyë tadë neky.
6. ¿Wiˈix mbäät nyaˈijxëmë oybyë jäˈäyˈäjtën mä ja tuˈukmujkën?
6 Ja oyjyaˈayˈäjtën pudëjkëbë jäˈäy. Mä tyäˈädë tiempë, ta mayë jäˈäy “diˈib këˈëm naytsyojkëdëp”, diˈib kyaj ttimkuentëpëjtaˈaky wiˈix ja myëguˈuk nyayjawëty. ¡Jantsy agujk jotkujk nayjäˈäwëm ko tuˈugyë nyajpatëm mëdë nmëguˈukˈäjtëm diˈib oy jäˈäyˈäjttëp! (2 Tim. 3:2, Traducción del Nuevo Mundo.) ¿Wixaty mbäät nyaˈijxëmë oybyë jäˈäyˈäjtën? Tuk peky, yëˈë ko yajxon ndëjkëm ets kyaj pën nastij naskojtëm ko yˈawäˈätsët ja tëjkˈää a las 8:00. Ets yëˈëyë niwäˈänëm ja lyugäär diˈib mëët nˈijtëm tukjëën tuktëjk, diˈib mëët tuˈugyë nëjkxëm o diˈib nyaˈëxpëjkëm. Ets ja tuk peky, yëˈë ko nmëmëdoˈojëm ja diˈib yajtsondakypy ko xyˈanmäˈäyëm ets nbatëmë lugäär parë nmëdoˈoˈijtëm ja ëy diˈib yajpëjtakp. Nan oy ko kyaj nyajnaˈamëm ja selulaar o lokalisadoor, net ja nmëguˈukˈäjtëm yajxon tmëdooˈittët. Ets nan yëˈë naty nyaˈijxëmë oybyë jäˈäyˈäjtën ko kyaj ngäjpx nmaytyakëm, kyaj nyajtuˈunëmë selulaar, kyaj njëˈx nbëjkëm o kyaj nëgoo nanäjx natëjkëm pën jam meerë diskursë nyaxy.
7. ¿Wiˈix mbäät nmëjämoˈoyëmë nmëguˈukˈäjtëm ets yëˈë nanduˈun xymyëjämoˈoyëm?
7 Nˈoknaymyëjämoˈoyëm mëdë nmëguˈukˈäjtëm. Ko nmëdäjtëmë duˈumbë tuˈukmujkën, ja mä mbäät tuˈugyë mëdë nmëguˈukˈäjtëm nˈijt nxoˈonëm (Sal. 133:1-3). ¿Tiko xykyatunyë mëjää parë xyˈixyˈatëdë wiinkpë nmëguˈukˈäjtëm ets duˈun xyajnimayëdë mëtnaymyaayëbë? (2 Kor. 6:13.) Oyxyëp ko xytyuknibëjtäägë parë tuˈuk tuˈugë xëë nyaxy, xyˈixyˈatët tuˈugë jäˈäy o tuˈugë familyë. Ets mbäät duˈun nduˈunëm, ko nyajmoˈoyëmë tiempë mä nˈagujkxyëˈäjtëm. Pääty, mmënëjkxë mgaaky parë japyë mgääynyaxët, net mbäät xyˈëboˈkxy xykyäjpxpoˈkxy ja mmëguˈuktëjk ets kyaj mbëtsëmët parë nëjkx xyjuyë mgaaky o mnëjkxët wiinktsoo kaabyë. Mbäät mëjwiin kajaa xytyukˈoyˈaty ko mnaymyaaybyëkëdët mëdë wiinkpë nmëguˈukˈäjtëm.
8. Oknimaytyäˈäk, ¿tiko yˈoyëty nayˈawäˈänëm parë nduˈunëm, ets mä mbäät nyajtuunkmoˈoyëm?
8 Jantsy agujk jotkujk xyajnayjäˈäwëm ko nduˈunmujkëm mëdë nmëguˈukˈäjtëm mä Diosë tyuunk. Extëm nˈokpëjtakëm, mbäät mnayˈawanëty mä jamë naybyudëkë tsyekyëty o xypyudëkët pën mä mnaymyujkën të yajtuknipeky ets jam ti dyajwäˈätsët (Sal. 110:3). Pën kyaj ti të myajtuknipeky, nëjkx mä Yajtuunkmoˈoytyë pënaty tunandëp. Ko nnaybyudëjkëm nixim niyam, kyaj nëgoo tuunk yajmëkjawë, niˈigyë yajtukˈity yajtukxony.
9. ¿Tiko jyëjpˈamëty ets mä nduˈukmujkëm oy ja wit xox nbëjtakëm ets oy njäˈäyˈäjtëm?
9 Extëm njäˈäyˈäjtëm oy yajnayjawëty pënaty xyˈijxëm. Duˈunën mbäät oy ja jäˈäyˈäjtën nyaˈijxëm, kyaj jyapëty jeˈeyë mä nduˈukmukäˈänëm. Net pënaty xyˈijxëm tpëktëdë kuentë ko ëtsäjtëm tëgatsy mët ja wiink jäˈäy (1 Peed. 2:12). Pääty, nˈokˈyajmëjpëtsëˈëmëmë Jyobaa ko oy ja wit xox nbëjtakëm ets ko oy nnayˈoytyuˈunëm, duˈun mä ja tuˈukmujkën, mä të njäjtakëm ets ko nëjkxëm mä kaaky tojkx yajtooky (1 Tim. 2:9, 10). Ets ko nbëjtakëm ja gafet, mbäät ja jäˈäy tpekyë kuentë ko ëtsäjtëm Jyobaa tyestiigë ets axtë mbäädë jäˈäy ndukmëtmaytyakëmë Diosë yˈAyuk ets mä të nduˈukmujkëm.
10. ¿Ti mbäät nduˈunëm parë oy xynyimaytyakëm pënaty tuundëp mä hotel o mä kaaky tojkx yajtooky?
10 ¿Wiˈix mbäät oy nyajnayjäˈäwën pënaty tuundëp mä hotel ets mä kaaky tojkx yajtooky? Kyaj yˈoyëty xyˈagäjpxtukëdë kuartë diˈib kyaj xyajtunäˈäny, pes mbäädë wiinkpë nmëguˈukˈäjtëm kyaj tnekypyaatyë kyuartë, ets nan mbäät ja jäˈäyë myeeny syentääbë dyajtëgoy ko kyaj jap pën nyekyjäˈtët. Pën jam mayë jäˈäy të nyaywyaabyëty parë yajkujayëyäˈändë o parë pyëtsëëmnëdë mä hotel, oy ko nyaˈijxëmë oybyë jot winmäˈäny etsë maˈkxtujkën (Kol. 4:6). Ets nan oy ko nmoˈoyëmë propina pënaty xywyingëˈëy xykyujkëˈëyëm mä ja kaaky tojkx yajtooky o pënaty tuundëp mä hotel.
11. ¿Ti diˈib xytyukˈijxëm ko mbäät oyë jäˈäy xynyimaytyakëm ko oyë jot winmäˈäny nmëdäjtëm?
11 Ko nëjkxëm mä nduˈukmujkëm, ¿wiˈixë jäˈäy tˈixy ko oyë jot winmäˈäny nmëdäjtëm? Mä tuˈugë perioodikë yajkujäˈäyë wiˈix jyënany tuˈugë jäˈäy diˈibë naty nyiwintsënˈäjtypy mä tyuunë tuˈukmujkën, duˈun jyënany: “Tadë jäˈäyëty oyë jot winmäˈäny tmëdattë. Jantsy jotkujkëts nayjawëdë ko jyäˈttë jëmëjt jëmëjt”. Tyukjëmëjtëp, tuˈugë jäˈäy diˈib kyaj Tyestiigëty ojts dyajtëgoyë byiyeteerë mä ja hotel mä naty të jyäˈttë nmëguˈukˈäjtëm. Ko yajmooy ja byiyeteerë ets kyaj ti të tyëgoy, ta ja diˈib nyiwintsënˈäjtypyë hotel tˈanmääy ja diˈibë naty jyaˈäjtypy: “Oy ko naa yaayë wingon tyuˈukmuktë Jyobaa tyestiigëty ets ko ak yëˈë të dyajtuktujktäˈäytyë hotel. Yëˈë ko kyajxyëp të xynyekypyaatyë mbiyeteerë”.
12. Mä tkapäätynyëmë tuˈukmujkën, ¿ti mbäät nduknibëjtakëm, ets tiko?
12 Tyam tadën tyim wingoonë ja tuˈukmujkënë tëgëk xëëbë. Kajaa tiempë të tyuny etsë jot mëjää parë të yajtukniwijtsëtyaˈay tijaty naxäämp ets wiˈix mbäät oy nayjäˈäwëm. Tuknibëjtäägë parë mnëjkxët tëgëk xëë, ets mnayjëjpˈixëdët parë nëjkx xymyëdooˈity diˈibë Jyobaa të ttuknibëjtäägë mëdë nyax kyäjpn. Pëjtäˈägë mjot mwinmäˈäny ets xypyudëkëdët ja mmëguˈuktëjk mët ko oy mjäˈäyˈatët, ko mëët mgäjpx mmaytyäˈäktët ets ko oy ja mjot mwinmäˈäny xyaˈixëdët. Duˈun mbäät nnayjäˈäwëm extëm tuˈugë jäˈäy diˈib ojts tyukjëmëjtëp mä ja tuˈukmujkën, diˈib kyujäˈäyë: “¡Kyajts mä ndimjamyetsy duˈun muum nˈijxyëts!”.
[Letrë diˈib miimp mä dibujë mä pajina 4]
Duˈun extëm tyukjëmëjtëp yajwooyë jäˈäy, nanduˈun tyam nyajwäˈkxäˈänëmë neky parë jäˈäy nwowäˈänëm, ko naty yˈaktëgoyˈaty ja tëgëk sëmään parë nduˈukmujkëm
[Letrë diˈib miimp mä dibujë mä pajina 6]
Nˈokˈyajmëjpëtsëˈëmëmë Jyobaa ko oy ja wit xox nbëjtakëm ets ko oy nayˈoytyuˈunëm, duˈun mä ja tuˈukmujkën, mä të njäjtakëm ets mä kaaky tojkx yajtooky
[Letrë diˈib miimp mä dibujë mä pajina 7]
Pëjtäˈägë mjot mwinmäˈäny ets xypyudëkëdët ja mmëguˈuktëjk mët ko oy mjäˈäyˈatët, ko mëët mgäjpx mmaytyäˈäktët ets ko oy ja mjot mwinmäˈäny xyaˈixëdët
[Letrë diˈib miimp mä dibujë mä pajina 4]
¿Tijaty mbäät njamyajtsëm mä tyunäˈänyëtyë tuˈukmujkënë tëgëk xëëbë 2011?
◼ Ti oorë tsyondäˈägäˈäny ets kyëxäˈäny. Ja yˈawäˈätsäˈäny ja tëjkˈää a las 8:00. Ets duˈun tëgëk xëë tsyondäˈägäˈäny a las 9:20. Ko ja diˈib tuump presidentë jyënäˈänët ko tam ja ëy yajpëjtäˈägäˈäny parë tsyondäˈäganë, ta niˈamukë nbatëm ja unyaaytyakn parë tsyondäˈägët duˈun extëmë Jyobaa myëjpëtsëmët. Biernës ets sääbëdë ja jyëjpkëxäˈäny a las 4:55, ets domingë a las 3:40.
◼ Mä karrë nyijäjtpety. Kyaj nyajtukˈajuytyukäˈänëm pën ëtsäjtëm ngëˈamˈäjtëm ja lugäär, ets duˈun nyajmoˈoyäˈänëm ja lugäär extëm njäjtëm. Mä näägë siudad tapë lugäär mä dyajjäˈtëdë kyarrë pënaty kyaj yˈoy myëkëty. Per yëˈëyë jap yajjäˈttëbë kyarrë diˈib myënëjkxypyë plakë ko kyaj yˈoy myëkëty. Ets kom näˈäty mutsk ja lugäär mä karrë nyijäjtpety, pääty myaˈˈanëmëdë ets niganääk mdëkëdët mä tuˈugë karrë.
◼ Unyaaybyajn. Yëˈëyë mbäädë lyugäär niwäˈänëm, diˈib mëët tuˈugyë ntsënäˈäyëm, diˈib mëët tuˈugyë nëjkxëm o diˈibë nyaˈëxpëjkëm (1 Kor. 13:5).
◼ Käˈäy ukën. Oy ko nmënëjkxëmë käˈäy ukën, net kyaj nbëtsëˈëmëm juuy këbajtpë kijkyxyëë. Ets oy ko nmënëjkxëm mä tuˈugë abëjkënë diˈib kyaj yˈatsipët mä unyaaybyajn. Nan kyaj mbäät nmënëjkxëmë abëjkën diˈib biidrië.
◼ Nyäjkëmë meeny sentääbë. Mbäät nmëjjäˈäjëm tyäˈädë tuˈukmujkën ko nyäjkëmë meeny mä nduˈukmujkëm tëgëk xëë. Pën jam pën tkaxäˈänyë cheque yëˈë tyuknigaxëbë “La Torre del Vigía, A.R.”.
◼ Ko pën yˈayoˈonbäädët ets ko ti tyun jyatëdët. Ko pën wiˈix jyat kyëbatët mä ja tuˈukmujkën ets ttsokët ja doktoorë nyaybyudëkë, ta tˈawanët ja nmëguˈukˈäjtëm diˈib xymyoˈoyëmë lugäär ets yëˈë nëjkx tˈawanë pënaty tuundëp mä tsooy yajˈyaky parë tˈixtët wiˈix mbäät yajpudëkë. Per ja jeˈeyë mbäät yajmëgajpxy pën mëjwiin kajaa ja jotmay.
◼ Tsooy. Pën jam xyjeˈxyë tsooy diˈibë doktoor të tnasjayë, mbäät xymyënëjkxy nuˈun xyajtunäˈäny, pes kyaj mbäät jap xypyaaty mä ja tuˈukmujkën.
◼ Këˈëk. Jëmëjt jëmëjtë nmëguˈukˈäjtëm yˈayoˈonbäättë ko tkamënëjkxtë kyëˈëk diˈib mbäät oy ttukˈyoˈoytyë. Pääty oy ko nmënëjkxëm diˈib mbäät ndukˈyoˈoyëm tsuj yajxon mä pat jënak.
◼ Pënaty kyaj oy myëdowdë. Mä näägë tuˈukmujkën mbäät japë nmëguˈukˈäjtëm tmëdooˈittë mä raadyë tijaty naxäämp.
◼ Uˈunk karrë diˈib yajpadijp etsë siyë diˈib yajtukjaˈanëp. Tyäˈädë kyaj yajmënëjkxët mä tyunäˈänyëtyë tuˈukmujkën. Mbäät yajmënëjkxyë ënäˈkuˈungë syiyë ets jamyë yajtukpukëyët mä tyääk tyeety yˈuˈunyëdë.
◼ Perfumë. Kanäägë tuˈukmujkën tyunyëty mä lugäärë kuniˈadukypyë ets yëˈë yajpëjtakpë poj diˈib jëën mëët tuump. Pääty nyaˈˈanmäˈäyëm ko oyxyëp ets kyaj nëgoo perfumë nyajtuˈunëm diˈib mëk xuˈkp, pes ta nmëguˈukˈäjtëm diˈib päˈämduunëp (1 Kor. 10:24).
◼ Neky Sírvase visitar (S-43-S). Mbäät nmënëjkxëm tuˈuk majtskë ja neky Sírvase visitar, pes mbäädë jäˈäy nbatëm diˈib ëxpëkäämp. Ets ko naty të nyajtuktujkëm, ta ngëyäjkëm mä Yajkëyakyë Ëxpëjkpajn o mbäät ko njëmbijtënë nmoˈoyëm ja nmëguˈukˈäjtëm diˈib tuump sekretaaryë mä naymyujkën (ix mä Wiˈix nduˈunëmë Diosë Tyuunk diˈib nobiembrë 2009, pajina 4).
◼ Ko nëjkxëm mä kaakytyoˈk tojkxtoˈkpë. Nyajmëjpëtsëˈëmëmë Jyobaa xyëë ko oyë jot winmäˈäny nyaˈijxëm mä ja kaakytyoˈk tojkxtoˈkpë. Ta lugäär mä jäˈäy të tˈijxwëˈëmdë yajmoˈoytyë propina, pën duˈun mä nlugäärˈäjtëm ta xymyoˈoyët.
◼ Hotel.
1) Pën mjäjtakp mä hotel kyaj xyˈagäjpxtukëdë kuartë diˈib kyaj xyajtunäˈäny ets nan kyaj niganäägë jäˈäy xyajtëkët extëm kyaj nyigutukë.
2) Jaayë jeˈeyë mbäät xyˈagäjpxtukyë kuartë pën jam ti jotmay të xypyaaty ets netyë xynyigäjpxët mä hotel (Mat. 5:37).
3) Mä hotel tamë karruˈunk mä mbäädë mtsemy mgëˈëy xyajnëjkxy, per ja nëjkx xyajtsoony ko naty meerë xyajtunäˈäny ets ko xyajtuundäˈäyët, ta netyë xymyënëjkxët parë wiinkpë dyajtunët.
4) Kyaj mgaaky mdojkx xyaˈoyët pën kyaj yajkupeky mä hotel.
5) Nikaˈak jabom jabomë propina parë jäˈäy diˈib tuundëp mä hotel ets mmoˈoytyë nanduˈunë diˈib myënëjkxtëbë mtsemy mgëˈëy.
6) Mä hotel yajˈyäjkpë käˈäy ukën, kafee etsë yelë, per oy ko naygyumäˈäyëm ets kyaj nmëtsoˈonëm tijaty.
7) Oy xëmë mjäˈäyˈattët parë mëdë jäˈäy diˈib tuundëp mä hotel. Jamyats ko mayjyaˈay dyajäˈttë, pääty tmëjjawëdë ko nˈijtëm oyjyaˈay, nmaˈkxtujkëm ets ngajpxykyupëjkëm.
8) Mä Lista de hoteles recomendados jap myiny nuˈun ja hotel yaˈˈajuytyukäˈäny tuˈukpë xëë, ets abekyë iva. Pën niˈigyë myajtukˈajuytyukäˈäny o jam ti myajtukujuyaˈany diˈib kyaj të xyˈamdoy o xyajtuny, kyaj xykyupëkët ets netyë xyˈawanëdë Departamento de Alojamiento.
9) Pën jam ti jotmay jyamˈaty mä ja kuartë, ta xyˈawanëdë Departamento de Alojamiento mä kyajëjpkexynyëmë tuˈukmujkën.
10) Pën yëˈë myajtuumbyë tarjeta de crédito o débito ko myajkujayë mä hotel, ja jäˈäy diˈib jap tuump yajwëˈëmaambyë meeny nuˈun tukˈaˈixë parë yëˈë ttukujuyët ko naty ti xyajwindëgoy mä ja kuartë. Ets mbäädë net ok ja meeny dyajjëmbity ko nety të tˈijxtäˈäy ko kyaj ti të xyajwindëgoy.
◼ Nˈokˈyäjkëmë naybyudëkë. Pën nyäjkëmë naybyudëkë parë ja tuˈukmujkënë yajxon tyunëdët, ta mas jotkujk nayjäˈäwëm (Apos. 20:35). Pënaty tsyojkënyëˈäjttëp tyunäˈändë mbäät nyëjkxtë mä Yajtuunkmoˈoytyë pënaty tunandëp. Pënaty kyajnëmë jyëmëjt dyaˈˈabattë 16, net nyëjkxët tuumbë pën nëjkxpë tyääk tyeety o jam pën diˈib të yajtuknipeky.
[Letrë diˈib miimp mä dibujë mä pajina 5]
¿Wiˈix ngëyakäˈänëm ja neky parë jäˈäy nwoˈojëm?
Parë nyaˈˈabëtsëˈëmëm mä ngäjpxwäˈkxëm oy ko kyaj jekyë jäˈäy nmëtmaytyakëm. Mbäät nˈanmäˈäyëm: “Tyam abëtsemy nyaxwinyëdë, yëˈëts nyajwäˈkxtëbë tyäˈädë neky. Tyäˈädë mijts nmoˈoyaampy. Yap niˈigyë xynyijawëyaˈany”. Tadë neky myëmiimp diˈibë jäˈäy yˈoyˈixaampy, pääty mmoˈoy parë tˈixët. Tukˈit tukxon. Ko xyajwäˈkxëdë tadë neky sääbëdë domingë, nan mbäät xymyoˈoyë rebistë pën yˈoymyëdoopy.