Jantsy oyaty myiny ja jembyë trataadë

1. ¿Diˈibë ëxpëjkpajn të tyëgatsy ets jantsy oyaty myiny diˈib mbäät nyajtuˈunëm mä ndëjkˈayoˈoyëm?

¹ Mä asamblee tëgëk xëëbë 2013, diˈib xëˈäjt “Diosë yˈAyuk yëˈë duˈun ja tëyˈäjtën”, ja ojts jyemybyëtsëmy mëgoxkë trataadë, ets nan të mëët yaˈˈawijtsmuky jatuˈugë trataadë Diˈib nyimaytyakypyë Diosë Kyutujkën numero 38, diˈib xyëˈäjtypy ¿Mbäädë oˈkpë jyukypyëktë? Tyäˈädë tëdujkpë trataadë të tyëgatsy ets jantsy oyaty myiny. ¿Tiko tëgatsy të kyojy? Ko nˈawäˈänëm tëjkmdëjkm, ¿wiˈix mbäät nyajtuˈunëm extëm tyam myinyë tyäˈädë trataadë?

2. ¿Wiˈix xypyudëkëyäˈänëm extëm të kyojˈyë jemyatypyë trataadë?

² ¿Tiko tëgatsy të kyojy? Parë jantsy oy ngäjpxwäˈkxëm tëjkmdëjkm, xëmë nduˈunëm extëm yä taxk pëky myiny parë nyajtsondakëmë maytyaˈaky: 1) jawyiin ti nyajtëˈëwëm ets nˈawijxëm parë jäˈäy yˈatsowët, 2) ndukˈijxëmë net wiˈixë Biiblyë jyënaˈany, 3) nˈawäˈänëm tuˈugë ëxpëjkpajn parë jäˈäy tkäjpxët ets 4) nˈanmäˈäyëm ti nˈatsoojëmbitäˈänëm ko jatëgok nnijëmbijtëm ets nnaygyäjpxëm näˈä nnijëmbitäˈänëm. Extëm të kyojˈyë tyäˈädë jembyë trataadë, yëˈë xypyudëkëyäˈänëm parë kyaj xytsyiptakxëm ets duˈun taxk pëky nduˈunëm.

3. ¿Wiˈix mbäät nˈawäˈänëmë jemyatypyë trataadë mä ndëjkˈayoˈoyëm?

³ ¿Wiˈix mbäät nyajtuˈunëm? Ko nety të ngäjpxpoˈkxëm ja jäˈäy, ta net 1) nyajtëˈëwëm diˈib miimp mä ja trataadë ets wiˈix yaˈˈatsoojëmbity tëgëk pëky, ets ta net nyajtëˈëwëm wiˈix yëˈë wyinmay, 2) nyaˈpwäˈkxëm ja trataadë ets nimaytyakëm mä jyënaˈany, “Biiblyë jyënaˈany”. Oy ko nˈijxëm pën mbäät ngäjpxëm ja tekstë mä Biiblyë. Ets pën ja jäˈäy myëdäjtypyë tiempë, ta mëët nimaytyakëm mä jyënaˈany “¿Wiˈix ndukˈoyˈäjtëm ko nnijäˈäwëm?”, 3) nmoˈoyëm ja trataadë ets nˈanmäˈäyëm parë tkäjpxët ko tiempë tmëdatët ets 4) ta nyajtëˈëwëm diˈib miimp trataadë ëxkëˈëy mä jyënaˈany “Nayajtëwëdë” ets nnaygyäjpxëm mëët näˈä jatëgok nnijëmbitäˈänëm parë nnimaytyakëm wiˈixë Biiblyë tˈatsoojëmbity.

4. ¿Wiˈix mbäät nyajtuˈunëmë jemyatypyë trataadë ko jatëgokë jäˈäy nnijëmbijtëm?

⁴ Kyaj tsyiptaˈaky wiˈix nyajtuˈunëm ja jemyatypyë trataadë ko jatëgokë jäˈäy nnijëmbijtëm. Yëˈëyë jeˈeyë ngäjpxëm ja tekstë diˈib miimp trataadë ëxkëˈëy parë nˈatsoˈojëmbijtëm diˈib ojts nyajtëˈëwëm ets ndukˈijxëm mä kyëxëˈëgyë foyetë Oybyë ayuk diˈib miimp mä trataadë. Ok, mbäädë net njuˈtëm ja foyetë ets nˈëxtäˈäyëm mä niˈigyë tnimaytyaˈaky diˈibë jam mëët nmaytyakëm, ets ta net nˈawäˈänëm ja foyetë. Pën ja jäˈäy yˈaxäjëp, ta mëët nnaygyäjpxëm näˈä nnijëmbijtëm parë jatëgok mëët nˈëxpëjkëm. Ko duˈun nduˈunëm, ¡të nety nyaˈëxpëjktsondakëm tuˈugë jäˈäy! Per pën kyaj nˈawäˈänëm ja foyetë, mbäät nmoˈoyëm jatuˈugë trataadë ets mëët nimaytyakëm ko jatëgok njëmbijtëm.

5. ¿Tiko jantsy oy nyajtuˈunëmë jemyatypyë trataadë mä ngäjpxwäˈkxëm?

⁵ Ja kujkë trataadë nyajtuˈunëm mä nˈëwäˈkx ngäjpxwäˈkxëm naxy 130 jëmëjt. Të kanäkˈok tyëgatsy wiˈix yˈixëty, per jantsy oy të nyajtuˈunëm parë jäˈäy nmëtmaytyakëm. Pääty, nˈokˈyajtuˈunëm yajxon ja jemyatypyë trataadë parë nyajwäˈkxëm abëtsemy nyaxwinyëdë ja tëyˈäjtën diˈib yajpatp mä Biiblyë (Prov. 15:7a).