¿Wiˈixëtsë Jyobaa xyˈixy?
1. ¿Tiko Biiblyë yaˈijxkijpxyë mët tuˈugë ijxn?
1 ¿Näˈäjaty mnayˈixyëty mä ijxn? Nimay jabom jabom nnayˈijxëm, pes yëˈë xypyudëjkëm parë nˈijxëm mäjaty mbäät nnayaˈoˈoyëm. Biiblyë yëˈë mëët yaˈijxkijpxyë tuˈugë ijxn. Pääty ko ngäjpxëm, ta xytyukˈijxëm wiˈix nmëdäjtëmë jot winmäˈäny, diˈibë Jyobaa yˈijxypy (1 Sam. 16:7; Sant. 1:22-24). Diosë yˈAyuk “tëjkëp mä ti ja jäˈäy wyinmääytyëp o tsyojktëp” (Eb. 4:12). Ko ngäjpxëm jabom jabomë Biiblyë ets nbawinmäˈäyëm, mbäät xytyukˈijxëm mäjaty tsyekyëty nnayaˈoˈoyëm parë mas oy nDiosmëduˈunëm. ¿Tiko mbäät xypyudëjkëm? (Sal. 1:1-3.)
2. ¿Wiˈix mbäät xypyudëjkëmë Biiblyë parë nˈijxëm wiˈix nyaˈijx nyajpatëm?
2 Yajtunë Biiblyë extëm tuˈugë ijxn. Mä Biiblyë yajnimaytyakpë Dios mëduumbë diˈib myëdäjttë oybyë jäˈäyˈäjtën diˈibë Jyobaa yˈoyˈijxypy. Extëmë rey David, nyitsiptuunë Diosë xyëë (1 Sam. 17:45, 46). Ja kugajpxy Isaías, nayˈawäˈänë amëk jotmëk parë tkäjpxwäˈkxäˈänyë Diosë yˈayuk mä jäˈäy kyaj tmëdowäˈändë (Is. 6:8, 9). Ko Jesus mëk ttsejkyë Tyeety, ta kyaj tmëkjäˈäwë ja tuunk diˈib tuknipëjkë, niˈigyë yajnayjäˈäwë jantsy oy ets yaˈujts yajjotkëdakë (Fwank 4:34). Ets pënaty pyanëjkxtë Jesus, amëk jotmëk ojts kyäjpxwäˈkxtë, tyukˈijxpajttë Jyobaa ets nitii ojts kyayaˈëxtëkëwäˈägëdë (Apos. 5:41, 42; 2 Kor. 4:1; 2 Tim. 4:17). Ko nbawinmäˈäyëmë yˈijxpajtënë tyäˈädë Dios mëduumbëty, yëˈë xypyudëjkëm parë nˈijxëm wiˈix nyaˈijx nyajpatëm ets nbëjtakëmë winmäˈäny parë mas oy nDiosmëduˈunëm.
3. ¿Tiko tsyekyëty ets tyamë nnayaˈoˈoyëm?
3 Nayaˈoyëdë. Ninuˈun ngatukˈoyˈäjtëm ko jeˈeyë nnayˈijxëm ets kyaj nnayaˈoˈoyëm. Pääty nˈokˈamdoˈojëmë Jyobaa naybyudëkë parë xytyukˈijxëm wiˈix meerë nyaˈijx nyajpatëm etsë net nnayaˈoˈoyëm (Sal. 139:23, 24; Luk. 11:13). Kom niˈigyë kyuxuˈutsë tyäˈädë tiempë ets mbäädë jäˈäy tsyoˈoktë o yˈooktë, nˈoknayaˈoˈoyëm tyamyë (1 Kor. 7:29; 1 Tim. 4:16).
4. ¿Wiˈix wyimbëtsëmy ko tuˈugë jäˈäy nyayˈixyëty mä Diosë yˈAyuk etsë net nyayaˈoyëty?
4 Diˈibë Jyobaa yˈijxypy, yëˈë diˈib nmëdäjtëm jodoty winmäˈänyoty, ets yëˈë diˈib mas jëjpˈam, kyaj dyuˈunëty diˈib nikëjxy këbajky (1 Peed. 3:3, 4). ¿Wiˈix wyimbëtsëmy ko tuˈugë jäˈäy nyayˈixyëty mä Diosë yˈAyuk etsë net nyayaˈoyëty? Tyäˈädë jäˈäy “diˈibë kyaj tjäˈäytyëgoy [...] es dëˈënyëm tpaduny yëˈë anaˈamën, kunuˈxëdëp ja Dios” o itëp jotkujk (Sant. 1:25). Duˈunë duˈun, jotkujk nëjkx nˈijtëm ets mas oy nëjkx nmëduˈunëmë Dios mët ko yëˈë nyajtëˈkx nyajjäjjëm “ja ijxnë wäˈätspë diˈibë nyijajpy yajxon ja myëjˈäjtënë Nintsënˈäjtëm” Jyobaa (2 Kor. 3:18).