Tuk mëgoˈpx jëmëjt kujk yajnimaytyaˈagyë Diosë yˈAnaˈam Kyutujkën
1. ¿Wiˈix yaˈˈanmääytyë Diosë kyäjpn tyuk mëgoˈpx jëmëjtëp?
1 Tam nyëjkxkojnë tuk mëgoˈpx jëmëjt ko Rutherford tˈanmääyë Diosë kyäjpn parë yajnimaytyäˈägëdë Diosë yˈAnaˈam Kyutujkën abëtsemy nyaxwinyëdë. Duˈun jyënany: “¡Okˈixtë, yëˈë Rey anaˈamp! Ets miitsëtyë duˈun diˈib mjäˈäyˈäjtëdëp parë xynyimaytyäˈäktët. Pääty, nimaytyäˈäktë, nimaytyäˈäktë, nimaytyäˈäktë ja Rey etsë yˈanaˈamën”. Ets tyam, ta duˈun nduˈunëm extëm ja nmëguˈukˈäjtëm diˈib mä primer siiglë, pesë “tyäˈädë oybyë ayuk yajkäjxwaˈxy tyam yä naxwiiny oytyim määty” (Kol. 1:23). ¿Ti të yajtuny nuˈun kujk nyaxy tuk mëgoˈpx jëmëjt parë yajnimaytyaˈagyë Diosë yˈAnaˈam Kyutujkën? ¿Wiˈix mbäät nimaytyakˈadëtsëm mä tyam yˈabajnë tuk mëgoˈpx jëmëjt mä nyaxkëdaˈagyë Diosë yˈAnaˈam Kyutujkën?
2. ¿Wiˈixë ëxpëjkpajn tnimaytyaˈagyë Diosë yˈAnaˈam Kyutujkën?
2 Tijaty tëëyëp yajtuun. Kanäk jëmëjt kujk pyëtsëmyë ëxpëjkpajn diˈib nyimaytyakypyë Diosë yˈAnaˈam Kyutujkën. Desde 1939, nyajtuˈunëmë rebistë La Atalaya. Anunciando el Reino de Jehová. Tyäˈädë rebistë yëˈë xëmë nyimaytyakypyë Diosë yˈAnaˈam Kyutujkën ets ti tyunaampy. Etsë ¡Despertad! nan nyigajpxypy ko yëˈëyë Diosë yˈAnaˈam Kyutujkën diˈib mbäät tjotkujkmoˈoyë jäˈäy. ¡Agujk jotkujk njantsy nyayjäˈäwëm ko tyäˈädë majtskpë rebistë yëˈë mas yajkäjpxnäjxp ets wyaˈkxy abëtsemy nyaxwinyëdë! (Diˈibʉ Jat. 14:6.)
3. Nimaytyäˈäk tuˈuk majtsk ti nmëguˈukˈäjtëm të dyajtundë parë të tkäjpxwäˈkxtë Diosë yˈAnaˈam Kyutujkën.
3 Tiiyëmë Diosë kyäjpn të dyajtundë parë tkäjpxwäˈkxtë Diosë yˈAnaˈam Kyutujkën. Tëëyëp, yëˈë yajtuundë programë mä raadyë, karrë mä ojts tpëjtäˈäktë bosinë etsë tokadiskë diˈib myëjëdijttë. Mëjwiin kajaa pyudëjkëdë parë mayë jäˈäy tmëdoodë Diosë yˈayuk, pes niwaanë nety jeˈeyë nmëguˈukˈäjtëm diˈib käjpxwäˈkxtëp (Sal. 19:4). Ets näämnëm të yajpëjtaˈaky mayë informasion mä jw.org parë miyonkˈamë jäˈäy tnijawëdë Diosë yˈAnaˈam Kyutujkën, axtë mä paˈis mä kyubokyë nduunkˈäjtëm.
4. ¿Tijaty të yajtukniwitsë parë niˈigyë yajkäjpxwäˈkxëdë Diosë yˈAnaˈam Kyutujkën?
4 Jyobaa kyäjpn nan të ttukniwitsë parë niˈigyë yajkäjpxwäˈkxëdë Diosë yˈAnaˈam Kyutujkën. Extëm nˈokpëjtakëm, naa ja mä jëmëjt 1995, kyaj jeˈeyë nekynyëjkxëm käjpxwäˈkxpë tëjkmdëjkm, nanduˈun nëjkxëm mä parke, mä jäˈäy jyuy tyooktë ets mä karrë tsyoony jyaˈty. Ets tyää näämnëm të yajtukniwitsë abëtsemy nyaxwinyëdë parë ngäjpxwäˈkxëm mä mëjatypyë siudad mä mayë jäˈäy yajpääty. Mayë naymyujkën, nan të ttukniwitsëdë mä tyerritooryë parë kyäjpxwäˈkxtë mä mayë jäˈäy yajpääty. Tpëjtäˈäktë meesë ets tnaskëyëdë mä dyaˈixëdë ëxpëjkpajn mä mayë jäˈäy nyaxtë. Per duˈunyëm jëjpˈam tpëjtäˈäktë ko nyëjkxtë käjpxwäˈkxpë tëjkmdëjkm (Apos. 20:20).
5. ¿Ti mbäät nduˈunëm ko tyëkëdë jembyë jëmëjt septiembrë mä nduˈunëmë Diosë tyuunk?
5 Tijaty yajtunäämp mä tiempë myiny kyëdaˈaky. Ko tyëkëdë jembyë jëmëjt septiembrë mä nduˈunëmë Diosë tyuunk, mayë nmëguˈukˈäjtëm tyuundëkëyäˈändë prekursoor regulaar. ¿Mduundëkëyäämp mijts? Oy mdunët prekursoor o kyaj, Jyobaa mgunuˈkxanëp pën mnayojxëp parë niˈigyë mdunët mä yajkäjpxwaˈkxyë Diosë yˈAnaˈam Kyutujkën (Mal. 3:10).
6. ¿Tiko jyëjpˈamëtyë oktuubrë poˈo 2014?
6 Oktuubrë 2014, ja yˈabatäˈäny tuk mëgoˈpx jëmëjt mä të nyaxkëdaˈagyë Diosë yˈAnaˈam Kyutujkën. Päätyë rebistë Diˈib Xytyukˈawäˈänëm diˈib nmoˈoyäˈänëmë jäˈäy mä tyäˈädë poˈo, yëˈë nyimaytyäˈägaambyë Diosë yˈAnaˈam Kyutujkën. Nˈoktuˈunëmë mëjää parë nimayë jäˈäy nmoˈoyëmë tyäˈädë rebistë. Ets nˈoknayjëjpˈijxëm mä tiempë myiny kyëdaˈaky parë ndukmëtmaytyakëm pënaty myëdowaampy “ja oybyë ayuk diˈibë nyigajxypy ja Diosë yˈAnaˈam kyutujkën” (Apos. 8:12).