Nˈokjäjtëm wiˈix kyäjpxwäˈkxtë diˈib jeky kujk tyuunëdë
Mëjwiin kajaa tsyobäättë nmëguˈukˈäjtëm diˈib jeky kujk kyäjpxwäˈkxnëdë. Ta nääk diˈib kanäk jëmëjt kujk tmëdundë Jyobaa. Etsë wiinkpë, oy näämnëm tyëkëdë käjpxwäˈkxpë të tjattë jantsy oy tyundët. Niˈamukë tpëktë kuentë ko Jesukristë, yëˈë tyuˈumoobyë naymyujkën mä tyäˈädë tiempë jyëjpkëxanë ets dyajmëjwindëkë mä ngäjpxwäˈkxëm ets mä nyaˈëxpëjkëmë jäˈäy (Mat. 28:19, 20). Kom kanäk jëmëjt kujk kyäjpxwäˈkxtë, të tˈaxäjëdë “tadë mëkˈäjtën” diˈib jantsy mëjwiin kajaa, ets yëˈë diˈib pudëjkëdëp parë twinguwäˈägëdë jotmay (2 Kor. 4:7). Yëˈëjëty jyantsy tyukniˈˈixëyandëbë wiinkpë tijaty të tjattë, ets ëtsäjtëm, mbäät xypyudëjkëm tijaty jyäjt nyijäˈäwëdëp (Sal. 71:18). ¿Wiˈix?
Ko ngäjpxwäˈkxëm. Parë oy kyäjpxwäˈkxtët pënaty näämnëm tëjkëdëp tuumbë, oy ko tyukniˈˈixëdët pënaty jeky kujk kyäjpxwäˈkxnëdë. Mbäät mëjwiin kajaa tjattë ko tˈixtët wiˈix kyäjpxwäˈkxtë. (Ixë rebistë Diˈib Xytyukˈawäˈänëm 15 äämbë febreerë 2015 mä artikulo “Nˈoktukxondakëm xëmë Diosë tyuunk”, mä myëdëgëk parrafo mä jyënaˈany “Pudëkë pënaty näämnëm nëbajtp”.) ¿Wiˈix të mbudëkëty ko mgäjpxwaˈkxy mëdë nmëguˈukˈäjtëm diˈib jeky kujk tyuunëdë?
¿Tiko xykyaˈˈanëëmë parë mëët mnëjkxët käjpxwäˈkxpë? Pën pëjk ijxëp, mbäät näˈäganäˈäty xywyoonëjkxy ja diˈib myaˈëxpëjkypy mä ja nmëguˈukˈäjtëmë tyëjk ets jap mëët mˈëxpëktët. Ko nety të mˈëxpëjktäˈäytyë, ta xyajtëwët ja nmëguˈukˈäjtëm diˈib jeky kujk tyuunë wiˈix të tˈixy ets xyˈamdowëdë käjpxwijën.
Yajpäättë mëët. Tunë mëjää parë xyˈixyˈatëdë duˈumbë nmëguˈukˈäjtëm. Wow mä mDiosˈawdattë mëdë mfamilyë ets yajtëw extëm: ¿Wiˈix tnijäˈäwë tëyˈäjtën? ¿Wiˈixë Jyobaa të kyunuˈkxyëty? ¿Wiˈix të tˈixy tyëgatsyë naymyujkën? Ets ¿ti jotkujkˈäjtënë të tpääty ko tmëdunyë Jyobaa? Pën ja nmëguˈukˈäjtëm pëjk ijxëp, mbäät mnëjkxy mä tyëjk ets jam mDiosˈawdattët mëdë mFamilyë.
Jaygyukë wiˈix yaˈixy yajpääty ets kyaj xyˈawixët parë mëjwiin kajaa tijaty ttunët. Ets duˈun extëm niˈamukë, pënaty jeky kujk kyäjpxwäˈkxnëdë wiˈixëm tmëdattë wijyˈäjtën (Rom. 12:6-8). Ets kom nääk të myëjjäˈäyëndë, mbäät kyaj nëgoo jekyë tiempë xymyoˈoyëm. Per mbäät mëjwiin kajaa tijaty xytyukniˈˈijxëm mä wiˈixë Jyobaa tmëdundë.