¿Wiˈix mbäät nyajtuˈunëm tijaty të yajgrabaraty?

1. ¿Tijaty nanduˈun yajpatp mä Internet jw.org?

¹ Mayë jäˈäy pyudëkëdë ëxpëjkpajn ko tkäjpxtë mä Internet jw.org, diˈib tyukxondaktëp ets tëyˈäjtën (Ecl. 12:10). Per ¿të xymyëdoowˈity tijaty të yajgrabaraty? Mayë ëxpëjkpajn diˈib jap miimp nan të yajgrabaraty. ¿Wiˈix xypyudëjkëm?

2. ¿Wiˈix mbäät nyajtuˈunëmë grabasyonk mä naytyuˈuk nˈëxpëjkëm ets mëdë familyë?

² Ko naytyuˈuk nˈëxpëjkëm ets mëdë familyë. Yajxonë nety ja tiempë nyajtuˈunëm ko nmëdoowˈijtëm tijaty të yajgrabaraty extëmë Biiblyë, rebistë o wiinkpë ëxpëjkpajn mientrës tijaty nduˈunëm o nduˈuyoˈoyëm (Éfes. 5:15, 16). Tuk pëky wiˈix mbäät nyajtuˈunëm diˈib të yajgrabaraty mä nDiosˈawdäjtëm mëdë familyë, yëˈë ko nbëjtakëm ja grabasyonk etsë net nbaˈijxëm mä ëxpëjkpajn. Ets ko naytyuˈuk nˈëxpëjkëm, mbäät xypyudëjkëm parë oy nletrëkäjpxëm o pën jam njäjtëmë wiink ayuk.

3. ¿Pënaty mbäät niˈigyë pyudëkëdë grabasyonk mä ngäjpxwäˈkxëm?

³ Ko ngäjpxwäˈkxëm. Mayë jäˈäy diˈib nbatëm mä ngäjpxwäˈkxëm, wyinmaytyë ko kyaj tmëdattë tiempë parë lyetrëkäjpxtët, per waˈan tmëdoowˈittët diˈib të yajgrabaraty. Ta nanduˈun diˈib kyäjpxtëbë wiink ayuk ets waˈan tˈoymyëdowdët ja Diosë yˈayuk ko tmëdoowˈittët mä kyëˈëm ayuk (Apos. 2:6-8). Ta näägë lugäär mä jäˈäy tˈixtë ko jëjpˈam yajmëdoowˈitët tijaty. Extëm nˈokpëjtakëm, mä jäˈäy diˈib kyäjpxtëbë hmong tmëdattë kostumbrë ko niˈuˈunk niˈok nyaytyukmëtmaytyäˈägëdë ja jeky myaytyaˈaky, ets mbäät pojënë tjamyatstë tijaty myëdoowdëp. Ets mä mayë it lugäär diˈib África, jyantsy myëdowandëbë jeky myaytyaˈaky.

4. ¿Tijaty mbäät nnayajtëˈëwëm ko nyajtunäˈänëmë ëxpëjkpajn diˈib të yajgrabaraty?

⁴ Mä mgäjpxwaˈkxy, ¿këdii oyxyëp ko waanë jäˈäy xytyukmëdoowˈity diˈib të yajgrabaraty mä yˈayuk? ¿Ja pën xyˈixyˈaty diˈib mbäät pyudëkëty tuˈugë ëxpëjkpajn diˈib të yajgrabaraty ko xytyuknigaxët mä correo electrónico? ¿Mbäät ngrabaräjtëm mä tuˈugë diskë ets nmoˈoyëm ja jäˈäy diˈib yˈoymyëdoobyë Diosë yˈayuk mët ja nyiˈëxpëjkpajn? Ko ngëyäjkëmë ëxpëjkpajn mä formato electrónico, extëmë liibrë, foyetë, rebistë o trataadë, mbäät ngujäˈäyëm mä informë. Tijaty të yajgrabaraty kyaj jeˈeyë xypyudëjkëm parë nyajtuˈunëm mä naytyuˈuk nˈëxpëjkëm, nanduˈunën parë nip ngojëm ja tëyˈäjtën (1 Kor. 3:6).