Wiˈix mbäät nyäjkëmë naybyudëkë ko tijaty yˈayoˈonbëjktäˈägët

Tyam niˈigyë tijaty yˈayoˈonbëjktaˈaky. Ko duˈun tyuny jyatyëty, ta pënaty pyudëjkëdëbë nmëguˈukˈäjtëm yajxon ttukniwitsëdët wiˈix dyakäˈändë ja naybyudëkë ets wiˈix tijaty ttunäˈändë. Pääty pënaty Wyoowˈyoˈoytyëbë Jyobaa tyestiigëty të dyajnaxkëdäˈäktë ets mä tuˈuk tuˈugë Betel, jyapˈattëdë Departamentë mëdiˈibë yˈixëp wiˈix mbäät yajpudëkëdë nmëguˈukˈäjtëm ko tijaty yˈayoˈonbëjktaˈaky.

Ko yäˈädë nmëguˈukˈäjtëm tnijawëdë ko mä tuˈugë it lugäär të tijaty yˈayoˈonbëjktaˈaky, ta netyë tmëgäjpxtë ja mëjjäˈäytyëjk mëdiˈibë tsënääytyëp mä ja it lugäär ets dyajtëwdë wiˈix yajpudëkëyäˈändë ja nmëguˈukˈäjtëm. Pën mëjwiin kajaa tijaty të yˈayoˈonbëjktaˈaky ets kyaj mbäät ja nmëguˈukˈäjtëm ak yëˈë nyaybyudëkëdë, ta yajkaxäˈäny ja nmëguˈukˈäjtëm mëdiˈibë nyijäˈäwëdëp wiˈix tijaty yajtunäˈäny. Ets mbäädë net yëˈë tˈixtë pën ak tëgoyˈäjttëp ja nmëguˈukˈäjtëm mëdiˈibë mbäät tyundë, pën mbäät tijaty tnayaktë o mbäät tjuy tkëbattë ets tmoˈoytyë tijaty ja myëguˈuktëjk yajtëgoyˈäjttëp.

Oybyëtsëëmp ko yajxon tijaty të yajtukniwitsë, pes kyaj nëgoo ja meeny sentääbë tyuny, jot mëjääw, xëëw tiempë ets kyaj nyaygyujoˈobëdë ja nmëguˈukˈäjtëm. Yëˈë ko duˈunën jyaty ko ja nmëguˈukˈäjtëm këˈëm winmäˈäny tijaty ttukniwitsëdë.

Ja nmëguˈukˈäjtëm mëdiˈibë Betel yajtuunëdëp, yëˈë yˈijxtëp nuˈun ja meeny tyunäˈäny ets ninääk ja nmëguˈukˈäjtëm mbäät tyundë. Mbäät nanduˈun ttukˈawanëdë ja kuduunk justisë ko tpudëkëyäˈändë ja myëguˈuktëjk, pes mbäät pyudëkëdë. Pääty mmëguˈuktëjk, okmëdowdë kyaj mbäät këˈëm winmäˈäny xyajmuktë ja meeny sentääbë, xykyaxtët tijaty o mnëjkxtë mä ja it lugäär mä tijaty të yˈayoˈonbëjktaˈaky pën kyaj myaˈˈanëëmëdë.

Perë yäˈädë kyaj yëˈë tˈandijy ko kyaj mbäät nbudëjkëm ja nmëguˈukˈäjtëm ko tijaty yˈayoˈonbëjktäˈägët (Eb. 13:16). Mëk ntsojkëm ja nmëguˈukˈäjtëm, pääty, ¿ti mbäät nduˈunëm? Ninuˈkxtakëm pënaty tsënääytyëp mä ja lugäär mä tijaty të yˈayoˈonbëjktaˈaky ets pënaty yäjktëbë naybyudëkë. Mbäät nanduˈun nˈagoˈonëmë meeny mä ja käjë mëdiˈibë mä kongregasionk parë tyunët abëtsëmy nyaxwinyëdë. Pënaty Wyoowˈyoˈoytyëbë Jyobaa tyestiigëty, yëˈë nyëˈëmooy tyuˈumooytyëbë Betel parë tnijawëdët wiˈix ets mää dyajtundët ja meeny sentääbë mëdiˈibë yaˈˈayäjk yaˈˈagoˈonëp. Ets pën tunäˈänëm mä tijaty yˈayoˈonbëjktaˈaky, mbäät nyajtuktujkëmë Solicitud de voluntario local de diseño y construcción (DC-50).

KO NETY TË YAˈIJXTÄˈÄYË BIDEO YˈAYOˈONBËJKTAˈAGYË NËË TUU BRASIL, TA YAˈˈATSOOWËMBITËDË YÄˈÄDË YAJTËˈËWËN:

¿Ti mas niˈigyë myajmonyˈijx myajmonyjyäˈäwëp mä wiˈixë Jyobaa tyestiigëty nyaybyudëjkëdë ko ja nëë tuu yˈayoˈonbëjktaky Brasil?