Duˈunyëm “naybyudëkëdë nixim niyam”

1. Extëm jyënaˈanyë 1 Tesalónikʉ 5:11, ¿ti tyam niˈamukë nduˈunëm?

¿TË NÄˈÄ mˈoktuumbë mä yˈaˈoyë Tëjk mä nˈëxpëjkëm o mä yajkojy? Pën të, seguurë ko jantsy agujk jotkujk mnayjyäˈäwë ko ëgäˈäny jap mreunyonkˈäjty ets mguˈëˈëw mgukäjpxë Jyobaa. Waˈan axtë apenë mˈëëy mët ko ojts mjotˈamutskë. Duˈunë duˈun, ko yajkojˈyë Tëjk mä nˈëxpëjkëm, yëˈë yajmëjkumaabyë Jyobaa. Per mas niˈigyë nmëjkumäˈäyëm ko nbudëjkëm pënaty miindëp mä yäˈädë lugäär parë tˈawdatäˈändë Dios, ets yëˈëjënë apostëlë Pablo myaytyäˈägan ko jyënany: “Naybyudëkëdë nixim niyam” (käjpxë 1 Tesalónikʉ 5:11).

2. ¿Ti nˈixäˈänëm mä yäˈädë artikulo?

² Parë mbäät nbudëjkëmë nmëguˈukˈäjtëm, oy ko nˈijxëm wiˈixë apostëlë Pablo ttuuny. Yëˈë jyaygyujkë ti amay jotmayë nety pyattëp ja Diosmëduumbëty. Mä yäˈädë artikulo nˈixäˈänëm wiˈix ojts tpudëkë parë tmëmadaktë ja yˈamay jyotmay, parë tuˈugyë nyayaˈijtëdë ets parë niˈigyë dyajkëktëjkëdë ja myëbëjkën mä Jyobaa. Min nˈokˈijxëm wiˈix mbäät nbanëjkxëmë Pablo yˈijxpajtën (1 Kor. 11:1).

PABLO PYUDËJKË JA MYËGUˈUKTËJK PARË TMËMADAKTË JA YˈAMAY JYOTMAY

3. ¿Wiˈixë Pablo tˈijxyë tyuunk yˈayoˈon etsë Diosë tyuunk?

³ Pablo mëkë nety ttsoky ja myëguˈuktëjk. Ets kom të nety nanduˈun kanäk pëky dyajnaxyë amay jotmay, pääty tpaˈˈayooy ja myëguˈuktëjk ets tjaygyujkë wiˈixë nety nyayjyawëdë ko tpäättë ja amay jotmay. Tëgok, këjxë myeeny syentääbë ets pääty tyuundëjkë parë tmëdatët ti yajtundëp mët ja myëguˈuktëjk (Apos. 20:34). Pablo yëˈë ijty yaˈoˈoyëbë wittëjk, ets ko jyajty Corinto, yëˈë mëët tyuunyë Áquila etsë Priscila, pes yëˈë nety nanduˈun tyuunkˈäjttëp. Per oy ijty duˈun yˈoktuny, “winsääbëdë” ijty ttukmëtmaytyaˈagyë Diosë yˈayuk ja israelitëty ets ja mëdiˈibë kyaj yˈisraelitëty. Ko jam jyajtyë Silas mëdë Timoteo, ta ‘Pablo tuˈugyë tpadëjkë ja Diosë yˈayuk’ ets jyantsy kyäjpxwaˈkxy (Hech. 18:2-5, TY). Yäˈädë yëˈë xytyukˈijxëm ko apostëlë Pablo xëmë jëjpˈam tpëjktaky ja Diosë tyuunk. Komë mëk nanduˈun tyuuny yˈayooy, mbäädë nety tmoˈoyë ëwij käjpxwijën ja myëguˈuktëjk parë kyaj nyaytyukwinˈëënëdët ja meeny sentääbë ets parë kyaj nëgoo tmëmay tmëdäjtët ti tyukˈixtëp ja fyamilyë, pes mbäädë nety kyaj jëjpˈam tnekypyëjktäˈäktë ja Diosë tyuunk (Filip. 1:10, TNM).

4. ¿Wiˈixë Pablo mëdë Timoteo tpudëjkëdë ja myëguˈuktëjk ko yajnibëdëˈktë?

⁴ Mä nety näämnëmë nyaxkëdaˈaky ja kongregasionk jam Tesalónica, ta ja Diosmëduumbëty mëktaˈaky yajnibëdëˈktë. Ets ko ja axëkjäˈäytyëjk tkapattë ja Pablo etsë Silas, ta näägë ja nmëguˈukˈäjtëm ojts yajmënëjkxtë pawitsy pajëdoty “mä justisë”, ets ja axëkjäˈäytyëjk yax jyojktë: “Nidëgekyë yëˈëjëty myëtsipˈäjtypy ja yajkutujkpë kopkë yˈanaˈamën” (Apos. 17:6, 7). ¿Nbawinmäˈäyëm wiˈixë yäˈädë Diosmëduumbëty nyayˈatsëˈk nyayˈajäˈäwëdë ko tˈijxtë ja myëgunax myëgugäjpn nyibëdëˈëgëdë? Ko duˈun jyäjttë, mbäätxyëp kyaj ojts tˈoktukxondaknëdë ja Diosë tyuunk, perë apostëlë Pablo kyaj nety ttsoky ets duˈun jyattët ja myëguˈuktëjk. Pääty ko ojts jam tsyoˈonë mëdë Silas, ta ttuknipëjkyë wiinkpë Diosmëduumbëty parë tˈijxˈit tkuentëˈattët ja myëguˈuktëjk. Ko tiempë nyajxy, ta Pablo tˈanmääy ja Diosmëduumbëty mëdiˈibë Tesalónica: “Ngaxäˈänyëts ja nmëguˈukˈäjtëm Timotee es mguˈixëdët. […] Es ngejxypyëts yëˈë es dyajmëjwiinët ja mmëbëjkënëty es mjotmëkmoˈoyëdët mmëbëjkëngyëjxm, këdiibë nipën kyatsipkaˈaxët mëdë tyäˈädë [jotmay]” (1 Tes. 3:2, 3). Waˈanë Timoteo nanduˈun yajtukmëtsipˈäjty ko Diosmëduuny jam Listra. Per kom yˈijx wiˈixë Pablo tmëjäämoˈoy yäˈädë Diosmëduumbëty ets wiˈixë netyë Jyobaa të pyudëkëdë, päätyë Timoteo tˈanmääy ja myëguˈuktëjk ko pudëkëyanëdëp nanduˈunë Jyobaa (Apos. 14:8, 19-22; Eb. 12:2).

5. ¿Wiˈixë Bryant pyudëjkë tuˈugë nmëguˈukˈäjtëm mëdiˈibë tuump mëjjäˈäy?

⁵ ¿Tijaty yˈaktuunë Pablo parë tpudëjkë myëguˈuktëjk? Ko jyëmbijty mëdë Bernabé jam Listra, Iconio etsë Antioquía, ta twinˈijxtë pënaty “mëjjäˈäyˈattëp mä mëbëjkpëtëjk nyaymyukëdë” (Apos. 14:21-23). Seguurë ko ja mëjjäˈäytyëjk pyudëjkëdë ja myëguˈuktëjk. Nanduˈunën tyam ttundë nmëguˈukˈäjtëm mëdiˈibë tuundëp mëjjäˈäy mä nduˈukmujkëm. Min nˈokˈijxëm wiˈix tnimaytyaˈaky tuˈugë nmëguˈukˈäjtëm mëdiˈibë xyëwˈäjtypy Bryant, yëˈë jyënaˈany: “Kots netyë njëmëjt mäjmokx, tatsë ndeety xynyikaktë etsë ndäägëts yaˈëxkajx mä Diosë kyäjpn. Mëk mon mëk tukëts nnayjyäˈäwë ets kyajts nekynyijäˈäwë tits ndunëp”. ¿Ti pudëjkë ko duˈunë jotmay tpaty? Jyënaˈany ko Tony, tuˈugë nmëguˈukˈäjtëm mëdiˈibë tuump mëjjäˈäy yëˈë xëmë mmëtmaytyakë mä reunyonk ets oytyim näˈäjëty. Bryant jyënaˈany: “Xytyukmëtmaytyakpëts ijty wiˈixë nmëguˈukˈäjtëm twinguwäˈägëdë amay jotmay, per duˈunyëm tmëdundë Jyobaa agujk jotkujk. Xytyukwingugäjpxëtsë Salmo 27:10 ets xëmëts xytyukmëtmaytyakyë yˈijxpajtënë Ezequías, mëdiˈibë myëduunë Jyobaa oy ja tyeety kyaj duˈun ttuuny”. ¿Wiˈixë Bryant pyudëjkë ko duˈun yajmëjääwmooy? Yëˈë jyënaˈany: “Kots duˈunë Tony xypyudëjkë, tats nduundëjkë prekursoor ets yëˈëts mëdiˈibë agujk jotkujk xyajnayjyäˈäwë”. Pääty mmëguˈuktëjk, ninuˈun mdundë mëjjäˈäy, ixtë pënaty yajtëgoyˈäjttëbë naybyudëkë extëmë Bryant ets tukpudëkëdë ja “oybyë ayuk”, pes yëˈë mëdiˈibë jotkujkmoˈoyanëdëp (Prov. 12:25).

6. ¿Wiˈixë Pablo ttukpudëjkë myëguˈuktëjk ja Diosmëduumbëtyë yˈijxpajtën?

⁶ Pablo tyukjamyajts ja myëguˈuktëjk ko kyaj nety yëˈëyë duˈun tpäättë ja jotmay, pes duˈun tˈanmääy: “Nnijäˈäm ko may ja jäˈäy nmëdäjtëm nbëˈääyˈäjtëm” mëdiˈibë myëmadaktë oytyim mëdiˈibëtyë amay jotmay mët ko Jyobaa pyudëjkëdë (Eb. 12:1). Pablo nyijäˈäwëbë nety ko extëm yajnimaytyäˈäktë yäˈädë Diosmëduumbëty, mbäädë nety pyudëkëdë ja myëguˈuktëjk parë yˈittët amëk jotmëk ets ttukˈijxpattët ‘ja Diosë juukypyë myëjkäjpn’ (Heb. 12:22, TY). Ëtsäjtëm, mbäät nanduˈun xypyudëjkëm extëm yajnimaytyäˈäktë yäˈädë Diosmëduumbëty. Seguurë ko të nanduˈun xymyëjääwmoˈoyëm ko ngäjpxëm wiˈixë Jyobaa tpudëjkë Gedeón, Barac, David, Samuel etsë wiinkpë Diosmëduumbëty (Eb. 11:32-35). Xypyudëjkëm nanduˈun yˈijxpajtënë Diosmëduumbëty mëdiˈibë tyam myëmadaktëbë amay jotmay. Mä kyopkë Jyobaa tyestiigëty kyajxtëbë kartë nimayë nmëguˈukˈäjtëm mä tnimaytyäˈäktë wiˈix të yajkëktëjkxëdë myëbëjkën ko tkäjpxëdë yˈeksperiensyë nmëguˈukˈäjtëm mëdiˈibë tyam Diosmëduundëp.

PABLO TYUKˈIJX JA MYËGUˈUKTËJK WIˈIX MBÄÄT TUˈUGYË NYAYAˈITËDË

7. ¿Ti xytyukniˈˈijxëm extëmë Pablo tˈanmääy ja Diosmëduumbëty mä Romanʉs 14:19-21?

⁷ Tuk pëky wiˈix mbäät nbudëjkëmë nmëguˈukˈäjtëm, yëˈë ko nyajjaˈäjtëmë tuˈugyëˈäjtën mä nduˈukmujkëm. Kyaj nasˈijxëm ets yëˈë xyajnaywyäˈkxëm ko kyatuˈugyë ja winmäˈäny. Ets pën kyaj yajkutëjy ja Diosë yˈanaˈamën, kyaj tiko ja winmäˈäny yëˈë ndimyˈyajtunäˈänëm. Min nˈokˈijxëm wiˈix jyäjt kyëbajttë ja Diosmëduumbë mëdiˈibë Roma. Jam tamë netyë nmëguˈukˈäjtëm mëdiˈibë israelitë ets mëdiˈibë kyaj israelitëty. Kom ja Diosmëduumbëty kyaj nety yëˈë tˈokmëmëdoownëdë ja Ley mëdiˈibë Moisés yajmooy, pääty mbäädë nety tjëˈx tpëktë mëdiˈibë kyaj yˈokkubojknë (Mar. 7:19). Tam nääk ja israelitëty mëdiˈibë duˈun tyuundë, per tamë nety nanduˈun mëdiˈibë kyaj tnasˈixëdë ja jyot wyinmäˈäny parë tkay tˈuuktët oytyim tiijëty ets yëˈë mëdiˈibë ojts yajnaywyäˈkxëdë. Pablo tyukjamyajts ja myëguˈuktëjk parë tuˈugyë nyayaˈitëdët, pääty tˈanmääy: “Nik oy ko ngadimjëˈxëm ja tsuˈutsy es ngadimˈukëm ja binë, o nduˈunëm oytyim diˈibëty diˈibë mbäät mëët nyajpekykyäˈäm ja nmëmëbëjkpëˈäjtëm” (käjpxë Romanʉs 14:19-21). Ko duˈun tˈanmääy ja myëguˈuktëjk, yëˈë tyukˈijx ko pën kyaj tuˈugyë nyayaˈitëdë mbäädë nety këˈëm nyayˈaxëktunëdë ets nanduˈun tˈaxëktundë ja myëguˈuktëjk. Apostëlë Pablo kyaj tijaty ttuuny mëdiˈibë mbäät ja myëguˈuk yajkunapëdë (1 Kor. 9:19-22). Duˈun extëmë Pablo ttuuny, ëtsäjtëm mbäät nanduˈun nbudëjkëmë nmëguˈukˈäjtëm ets tuˈugyë nnayaˈijtëm pën kyaj yëˈë ndimyˈyajtunäˈänëm ja nwinmäˈänyˈäjtëm.

8. ¿Ti Pablo tyuun ko jyamˈäjty tuˈugë jotmay mëdiˈibë nety mbäät yajnaywyäˈkxëdë ja myëguˈuktëjk?

⁸ Per ¿ti mbäät nduˈunëm pën jamˈäjtp tuˈugë jotmay mä kyaj tyuˈugyë winmäˈäny? Oy ko nyajjaˈäjtëmë tuˈugyëˈäjtën extëm ttuunyë apostëlë Pablo. Extëm nˈokpëjktakëm, mä primer siiglë jamˈäjt tuˈugë jotmay mä ja tuˈukmujkën. Näägë Diosmëduumbë jyënandë mëktaˈaky ko pën tëjkëp ëxpëjkpë tuˈugë jäˈäy mëdiˈibë kyaj israelitëty, tsojkëp jawyiin yajtsukët këdiibë ja jäˈäy yˈëbäät kyäjpxpäädëdët (Gal. 6:12). Perë Pablo kyaj duˈun wyinmääy extëm nääk ja Diosmëduumbë ets kyaj yëˈë wyinmäˈäny ttimyˈyajtunany. Ijt yujy tudaˈaky ets nyasˈijxë parë yäˈädë jotmay yëˈë dyaˈoyëdët ja apostëlëtëjk ets ja mëjjäˈäytyëjk mëdiˈibë Jerusalén (Apos. 15:1, 2). Ko duˈunë Pablo tijaty ttuuny, ta ja nmëguˈukˈäjtëm tuˈugyë nyayaˈijtëdë ets yajpattë agujk jotkujk (Apos. 15:30, 31).

9. ¿Ti mbäät nduˈunëm parë nbanëjkxëmë Pablo yˈijxpajtën?

⁹ Pën nˈijxëm ko kyaj tyuˈugyë ja winmäˈäny mä tijaty ndunäˈänëm ets nˈijxëm ko xyajnaywyäˈkxäˈänëm mët ja nmëguˈukˈäjtëm, oy ko nˈamdoˈowëmë naybyudëkë pënaty tuundëp mëjjäˈäy mä nduˈukmujkëm. Jyobaa yëˈë të tyuknipëkëdë parë tˈijxˈit tkuentëˈattët ja myëguˈuktëjk. Mbäät nanduˈun xypyudëjkëmë ëxpëjkpajn ets wiˈixë Diosë kyäjpn xynyëˈëmoˈoy xytyuˈumoˈoyëm mët yëˈëgyëjxmë Biiblyë. Pën nduˈunëm extëm nyajnëˈëmoˈoy nyajtuˈumoˈoyëm ets pën kyaj ja këˈëm winmäˈäny ndimyˈyajtunäˈänëm, ta nëjkx nyajjapˈäjtëmë tuˈugyëˈäjtën mä nduˈukmujkëm.

10. ¿Wiˈix ja tuk pëkyë Pablo dyajjamˈäjtyë tuˈugyëˈäjtën mä kongregasionk?

¹⁰ Ja tuk pëky wiˈixë apostëlë Pablo dyajjamˈäjtyë tuˈugyëˈäjtën, yëˈë ko kyaj yëˈë tˈijxy mäjaty tyëgooytyë ja myëguˈuktëjk, yëˈëjën yˈijx tijaty oy tyuundë. Extëm nˈokpëjktakëm, mä tkajääytyaˈaynyëmë Romanʉs nyimaytyak jap nimayë Diosmëduumbë, ets näˈäty, tyimnigäjpx tijatyën oy tyuundë niduˈuk niduˈuk. ¿Wiˈix mbäät nbanëjkxëmë apostëlë Pablo yˈijxpajtën? Ko nanduˈun nˈanmäˈäyëmë nmëguˈukˈäjtëm tijatyën oy tyuundëp. Pën nduˈunëm duˈun, ta nyajjaˈˈatäˈänëmë tuˈugyëˈäjtën mä nduˈukmujkëm ets mas niˈigyë nyaytsyokäˈänëdë ja nmëguˈukˈäjtëm.

11. ¿Ti mbäät nduˈunëm parë jatëgok tuˈugyë nˈijtëm mëdë nmëguˈukˈäjtëm oyë nety tijaty të nˈokˈyajkajpxykyojëm?

¹¹ Mbäät näˈätyë nmëguˈukˈäjtëm mëdiˈibë jantsy oy Diosmëduundëp tijaty dyajkajpxykyojtë o kyaj nyayjaygyukëdë mëdë myëguˈuktëjk. Duˈunën jyäjttë Pablo mëdë Bernabé, yëˈëjëty jantsy oyë nety nyayjyawëdë, perë ojts dyajkajpxykyojtë pën mbäät twoownëjkxtë Marcos mä nety nëjkx yˈëwäˈkxäˈän kyäjpxwäˈkxäˈändë jagambäät. ¿Ti net tyuundë ko kyanayjyaygyujkëdë? Biiblyë jyënaˈany: “Kyaj tkäjxˈoˈoyëdë, pääty [ojts] yoˈoywyäˈxtë” (Apos. 15:37-39). Per ok, ta Pablo, Bernabé etsë Marcos dyaˈoˈoyëdë ja jyotmay. Ko duˈun ttuundë, ta dyajnigëxëˈktë ko tsyojktëp ets ja nmëguˈukˈäjtëm tuˈugyë nyayaˈitëdët. Ets ko tiempë nyajxy, oyë Pablo tnimaytyakyë Bernabé mëdë Marcos (1 Kor. 9:6; Kol. 4:10). Nanduˈun ëtsäjtëm, oy ko nyaˈoˈoyëm ja jotmay mëdiˈibë nmëdäjtëm mët tuˈugë nmëguˈukˈäjtëm ets yëˈëyë nˈijxëm tijaty oy tyuundëp. Ko duˈun nduˈunëm, ta nyajjapˈatäˈänëmë tuˈugyëˈäjtën mä nduˈukmujkëm (Éfes. 4:3).

PABLO PYUDËJKË MYËGUˈUKTËJK PARË MËKË MYËBËJKËN DYAˈITTËT

12. ¿Ti jotmay wyinguwäˈkëdëp näägë nmëguˈukˈäjtëm?

¹² Nmëjääwmoˈoyëm nanduˈunë nmëguˈukˈäjtëm ko nbudëjkëm parë niˈigyë dyajkëktëkëdë myëbëjkën mä Jyobaa. Pes nääk wyinguwäˈkëdëbë amay jotmay, extëm ko nyëxiˈik tyukxiˈigëdë ja jyëëky myëguˈuk mëdiˈibë kyaj yˈëxpëktë, mëdiˈibë mëët tyuunmuktë o mëdiˈibë mëët yˈeskuelëˈattë. Ta netë wiinkpë mëdiˈibë pëjk ijxëdëp o mëdiˈibë mon tuk nayjyäˈäwëdëp ko ti tjantsy myëmay tjantsy myëdäjtë. Ta nanduˈunë nmëguˈukˈäjtëm mëdiˈibë tëëyëp nëbajnëdëp ets tsyojknëdëp parë myiinët ja kutëgoˈoyën. Ko duˈun tpäättë jotmay, mbäädë net wanaty wanaty tmëjagamgaknëdë Jyobaa. Duˈunën jyäjtë ja Diosmëduumbëty mëdiˈibë mä primer siiglë. ¿Ti tyuunë Pablo parë tpudëjkë ja myëguˈuktëjk?

13. ¿Wiˈixë Pablo tpudëjkë myëguˈuktëjk mëdiˈibë nety yajnëxik yajtukxiktëp?

¹³ Pablo yëˈë yajtuunë Biiblyë parë tpudëjkë ja myëguˈuktëjk ets ja myëbëjkën dyajkëktëkëdët. Extëm nˈokpëjktakëm, mbäädë nety nääk ja Diosmëduumbëty kyaj tnijawëdë wiˈix tˈatsowdët ko ja jyëëky myëguˈuk yˈanëˈëmxëdët ko ja judiyëtëjkë ryelijyonk niˈigyë yˈoyëty ets kyaj dyuˈunëty pënaty pyanëjkxtëbë Kristë. Per seguurë ko mëjwiin kajaa pyudëjkëdë extëmë Pablo tnijäˈäyë ja ebreo jäˈäyëty (Eb. 1:5, 6; 2:2, 3; 9:24, 25). Yäˈädë Diosmëduumbëty mbäädë nety ttukmëtmaytyäˈäktë ja jäˈäy ets ja jyëëky myëguˈuk ko kyaj tyëyˈäjtënëty extëm wyinmaytyë, duˈun extëm ttuunyë Pablo. Ets ëtsäjtëm, ¿wiˈix mbäät nbudëjkëm ja nmëguˈukˈäjtëm mëdiˈibë yajnëxik yajtukxiktëp? Ko ndukniˈˈijxëm wiˈix mbäät dyajtundë ëxpëjkpajn ets duˈun tnimaytyäˈäktët tijaty myëbëjktëp. Extëm nˈokpëjktakëm, pën ja ënäˈktëjk yajnëxik yajtukxiktëp ko kyaj ttundë xëëw etsë kumpleˈanyë, mbäät nˈanmäˈäyëm parë tkäjpxtëdë liibrë ¡Jukyˈat agujk jotkujk winë xëëw! leksion 44 parë mbäät tnimaytyäˈäktë tiko kyaj ttundë.

14. Pablo ëwäˈkx käjpxwäˈkx ets yaˈëxpëjk, ¿per ti yˈaktuun?

¹⁴ Pablo yˈanmääy ja Diosmëduumbëty parë ttukˈixtët ja myëguˈuktëjk ko tsyojktëp ko ttukmëdundët mëdiˈibë oy (Eb. 10:24). Pablo kyaj jeˈeyë tˈanmääy ja myëguˈuktëjk ko pyudëkëyaampy, pyudëjkë duˈun. Extëm nˈokpëjktakëm, yëˈë niduˈuk mëdiˈibë pyudëjkë ko dyajnäjxtë ja yuu jam Judea (Apos. 11:27-30). Xëmë tˈëxtääyë winmäˈäny wiˈix mbäät tpudëkë ja Diosmëduumbëty mëdiˈibë ayoowdëp, oyë nety jam ja xyëëw tiempë tjayajtuny mä tˈëwaˈkxy tkäjpxwaˈkxyë Diosë yˈayuk o mä jäˈäy dyaˈëxpëky (Gal. 2:10). Ko duˈun ttuuny, ta tpudëjkë ja myëguˈuktëjk parë ttukˈijxpattëdë Jyobaa ko ijxˈitan kuentëˈatanëdëp. Tyam, nanduˈun nbudëjkëmë nmëguˈukˈäjtëm mä tijaty yˈayoˈonbëjktaˈaky ko nyajtuˈunëmë xëëw tiempë, jot mëjääw ets ko xëmë nyäjkëmë meeny sentääbë parë yajtunëdë Diosë tyuunk abëtsëmy nyaxwinyëdë. Ko duˈun nduˈunëm, ta nbudëjkëm ja nmëguˈukˈäjtëm parë ttukˈijxpattëdë Jyobaa ets yˈittët seguurë ko ninäˈä kyamastuˈudäˈänëdë.

15, 16. ¿Wiˈix mbäät nbudëjkëm pënaty të tmëjagamgaˈaktë Jyobaa?

¹⁵ Pablo duˈunyëm tpudëjkë pënatyë nety të yˈëxtëkëwäˈknëdë. Pyaˈˈayoow ets tsuj yajxon ojts tmëtmaytyaˈaky (Eb. 6:9; 10:39). Extëm nˈokpëjktakëm, ko tnijäˈäyë ja ebreo jäˈäyëty xëmë dyajtuunyë yäˈädë ayuk “ëtsäjtëm” parë dyajjaygyujkë ko tsojkëbë nety nanduˈun tkuytyunët ja ëwij käjpxwijën mëdiˈibë myoopy ja myëguˈuktëjk (Eb. 2:1, 3). Ëtsäjtëm nbudëjkëm nanduˈunë nmëguˈukˈäjtëm mëdiˈibë të yˈëxtëkëwäˈäktë extëmë Pablo ttuuny. Ndukˈijxëm ko nmëmäˈäy nmëdäjëm ets ko mëk ntsojkëm. Nˈokjamyajtsëm ko mbäädë nmëguˈukˈäjtëm pyudëkëdë ja nˈääwˈäjt nˈayukˈäjtëm ko tsuj yajxon nmëtmaytyakëm.

¹⁶ Pablo tyukjamyajts ja myëguˈuktëjk ko Jyobaa kyaj tjäˈäytyëgoy tukëˈëyë tijatyë nety të ttukmëdundë (Eb. 10:32-34). Oy ko nanduˈun nduˈunëm ko nety nbudëkëyäˈänëm tuˈugë nmëguˈukˈäjtëm mëdiˈibë Jyobaa të tmëjagamgaknë. Extëm nˈokpëjktakëm, mbäät nˈanmäˈäyëm parë xytyukmëtmaytyakëm wiˈix tˈixyˈajtyë Jyobaa ets wiˈix pyudëjkë mä nety meerë dyajtëgoyˈaty. Mä jam mët ngäjpx nmaytyakëm nˈoktukjamyajtsëm ko Jyobaa ninäˈä tkajäˈäytyëgoy tijaty tyukmëduun ets ko ninäˈä kyamastuˈudäˈänyëty (Eb. 6:10; 13:5, 6). Ko duˈun nduˈunëm, mbäät yëˈë pyudëkëdë parë jatëgok jyënäˈändëdë yˈääw jyot ets jatëgok tmëduuntsoˈondäˈäktëdë Jyobaa.

DUˈUNYËM “NAYBYUDËKËDË NIXIM NIYAM”

17. ¿Wiˈix mbäät mas niˈigyë nbudëjkëm ja nmëguˈukˈäjtëm?

¹⁷ Tuˈugë jäˈäy mëdiˈibë jëngojp tëjkkojp, ko tiempë nyaxy mas niˈigyë tjaty ja tyuunk. Nanduˈun ëtsäjtëm, mbäät mas niˈigyë njäjtëm wiˈix nbudëjkëmë nmëguˈukˈäjtëm ko xëmë duˈun nduˈunëm. Nˈokpudëjkëmë nmëguˈukˈäjtëm parë mbäät tmëmadäˈäktë ja amay jotmay, ko ndukmëtmaytyakëm ja Diosmëduumbëtyë yˈijxpajtën mëdiˈibë duˈun myëmadaktë jotmay. Nˈokˈyajjapˈäjtëmë tuˈugyëˈäjtën mä nduˈukmujkëm, ko ndukˈawäˈänëmë nmëguˈukˈäjtëm tijaty oy tyuundëp, ets pën nˈijxëm ko tam ti xyajnaywyäˈkxäˈänëm, nˈokˈyaˈoˈoyëm ja jotmay. Ets nˈokpudëjkëm duˈunyëm ja nmëguˈukˈäjtëm parë dyajkëktëkëdët ja myëbëjkën, ko ndukmëtmaytyakëm ja tëyˈäjtën mëdiˈibë yajpatp mä Biiblyë, ko tijaty ndukpudëjkëm ets ko nˈijxëm wiˈix mbäät nbudëjkëm pënaty të tmëjagamgaˈaktë Jyobaa.

18. ¿Ti net tyam mdunaampy?

¹⁸ Jantsy agujk jotkujk nyayjyawëdë nmëguˈukˈäjtëm mëdiˈibë tuundëp mä yajkojˈyë jëën tëjk mä nˈëxpëjkëm. Ëtsäjtëm mbäät nanduˈun agujk jotkujk nnayjyäˈäwëm pën nbudëjkëm ja nmëguˈukˈäjtëm mëdiˈibë tuˈugyë mët nDiosmëduˈunëm. Ko tuˈugë tëjk yajkojy, windëgoopy ko tiempë nyaxy, per ko nbudëjkëm ja nmëguˈukˈäjtëm mbäät xëmëkyëjxm ttukˈoyˈattë. Pääty, nˈoknaybyudëjkëm “nixim niyam” extëm jyënaˈanyë 1 Tesalónikʉ 5:11.