Panëjkxˈadëˈëts duˈunyëmë Jesus ko mnëbajtäˈäyët

1, 2. ¿Wiˈix tuˈugë jäˈäy ttukˈoyˈaty ko nyëbajnë?

JANTSY agujk jotkujk nnayjyäˈäwëm ko nyëbety tuˈugë jäˈäy ets yajpatnë mä Diosë nyax kyäjpn. Pënaty duˈunë Jyobaa të tmëwingondë nanduˈun nyayjyawëdë extëm jyënanyë David: “Jotkujk yajpääty mëdiˈibë mwinˈijxypy [Jyobaa] ets xymyëjwoy parë yajpäädët mä mdëjäˈäw” (Sal. 65:4).

² Jyobaa kyaj jëjpkëˈëyë jäˈäy tmëjwoy mä nyax kyäjpn. Extëm ojts nˈijxëm mä jatuˈukpë artikulo, yëˈë myëjwoopy pënaty nanduˈun mëwingonanëp (Sant. 4:8). Ko tuˈugë jäˈäy nyaywyandaˈagyëty ets nyëbety, ta niˈigyë tmëwingonyë Jyobaa ets jantsy oy mëët yˈity. Pënaty të nyëbajnëdë, duˈunë Jyobaa tyukwandäˈägëdë: “[Ngunuˈkxandëp] miitsëty axtë ko kyaj ti nyekyˈamääytyäˈägët” (Mal. 3:10; Jer. 17:​7, 8).

3. ¿Ti tsojkëp nduˈunëm niˈamukë nuˈun të nnaywyandakëm mä Jyobaa ets të nnëbajtëm? (Eclesiastés 5:​4, 5).

³ Ko nnëbajtëm, jaa nmëduuntsondakëmë Dios. Pääty, tsojkëbën njukyˈäjtëm extëm të ndukwandakëm oyë nety njapatëmë amay jotmay o jam ti xyajnëˈëdëgoyäˈän xyajtuˈudëgoyäˈänëm (käjpxë Eclesiastés 5:​4, 5). Tsojkëp nanduˈun nbaduˈunëm extëmë Jesus ojts tijaty tnastunë ets nmëmëdoˈowëm ja yˈanaˈamën (Mat. 28:​19, 20; 1 Peed. 2:21). Yäˈädë artikulo yëˈë xypyudëkëyäˈänëm parë duˈun nduˈunëm.

PANËJKXˈADËˈËTSË JESUS OY XYPYÄÄDËT JA AMAY JOTMAY O JAM TI MYAJTUˈUDËGOYÄˈÄNËDËT

4. ¿Ti Jesus myaytyäˈägan ko jyënany ko pënaty panëjkxëdëp pyagëˈëyandëp ja kyepy? (Lukʉs 9:23).

⁴ Ko nety të mnëbety, këdii mwinmayët ko kyaj ti amay jotmay xyˈokpäädanë. Pesë Jesus jyënany ko pënaty panëjkxëdëp këjkjaˈa tpagëyäˈändë ja kepy tuˈuk tuˈugë xëëw (käjpxë Lukʉs 9:23). Ko duˈunë Jesus jyënany, ¿yëˈëdaa nety myaytyäˈägaampy ko pënaty panëjkxëp xëmë yˈayowäˈändë? Kyaj. Mëdiˈibën myaytyäˈägäˈän yëˈë ko pyäädandëp nanduˈunë amay jotmay oy tjaˈˈaxäjëdë ja kunuˈkxën ets näägë yäˈädë jotmay yaˈˈayowanëdëp (2 Tim. 3:12).

5. Extëmë Jesus jyënany, ¿wiˈix yajkunuˈkxäˈändë pënaty jëjpˈam pyëjktaktëp ja Diosë jyaˈa?

⁵ Waˈanë mjëëky mmëguˈuk të mdukmëtsipˈatyëty o të tijaty xyajtëgoy mët ko jëjpˈam të xypyëjktaˈaky ja Diosë jyaˈa (Mat. 6:33). Pën duˈun të xypyatyë jotmay, it seguurë ko Jyobaa yajjëmbitaampy tukëˈëyë tijaty mdukmëduumpy (Eb. 6:10). Waˈan të xyˈixy ko tëyˈäjtën extëmë Jesus jyënany: ‘Pën të tˈëxmaty ja tyëjk, myëgaˈaxtëjk, tyääk tyeety, yˈuˈunk yˈënäˈk, ëkë nyax mët ko të tjaygyukë ja oy ääw oy ayuk ets kots të xymyëbëky, waanëniˈik tˈëxäjëjaˈany winë tyam mä jyukyˈatyën, pyäädaampy mëgoˈpxˈam ja tyëjk, yˈuty, yˈajty, tsyëˈë, tyääk, yˈuˈunk yˈënäˈk etsë nyax. Oy yajpajëdijtäˈäktëty, ok nëjkx jyukyˈaty xëmëkyëjxm ko nety tpääty ja nyixëëw nyijëmëjt’ (Mar. 10:​29, 30, TY). Seguurë ko mijts të niˈigyë xyˈaxäjë ja kunuˈkxën, këdiinëm tijaty të xyajtëgoy (Sal. 37:4).

6. Ko nety të mnëbety, ¿tiko duˈunyëm tsyokäˈänyëty ets xyjyëjpkudijët tijaty myajtëgoyanëp?

⁶ Ko nety të mnëbety, tsojkëp duˈunyëm xyjyëjpkudijët “diˈibë niniˈx këbäjk tsyejpy” (1 Fwank 2:16). Per jamyats ko duˈunyëm pokyjyaˈay myajpääty oy të mjanëbajnë. Waˈan duˈun mnayjyawëyaˈanyëty extëmë apostëlë Pablo: “Yëˈë njot nwinmäˈänyëts kyupejkypy amumduˈukjot ko yˈoyëty ko ja Diosë yˈanaˈamën jyënaˈany diˈibëts ndunëp, per taa mäts ëj nˈity tuˈuk diˈibëts xymyëtsipˈäjtp. Yëˈë pojpë yëˈëts xytyuknimiimp ja axëk winmäˈäny, esë tyäˈädë tsyiptundë diˈibëts ëj nnijäˈäp diˈibë oy, es dëˈënëts xymyëdaty extëmë tsimyjyaˈayën, es xytyukmëdunyëts aguanë ja pojpë” (Rom. 7:​22, 23). Waˈan näˈäjëty axëëk myajnayjyawëty ko mdukminyëty ja axëëkpë tsojkën. Per ko xyjyamyatsët wiˈix ojtsë Jyobaa xyˈanëëmë ko mnaywyandakë, yëˈë mbudëkëyanëp parë xyjyëjpkudijët ets kyaj mëmadäˈägëdët. ¿Tiko duˈun njënäˈänëm?

7. ¿Wiˈix xypyudëkëyäˈänëm ko të nnaywyandakëm mä Jyobaa?

⁷ Ko tuˈugë jäˈäy nyaywyandaˈagyëty mä Jyobaa, yëˈë yˈandijpy ko kyaj nyaytyukmëmadäˈägäˈänyëty tijaty yëˈë tsyojkypy o tyunaampy (Mat. 16:24). Pääty ko nety jam ti xyajtëgoyäˈänëm kyaj tiko nwinmäˈäyëm ti net nˈoktuˈunëm, mët ko yajxon nnijäˈäwëm ko yëˈë nmëmëdowäˈänëmë Jyobaa. Ko ojts ndukwandakëmë jukyˈäjtën, jabäät ojts tijaty njëjpkäjpxtutäˈäyëm. Duˈun njënäˈänäˈänëm extëmë Job mëdiˈibë pyat ja amay jotmay: “¡Axtë nˈoogëdëts, kyajts nmastuˈudäˈänyë Dios!” (Job 27:5).

8. Ko njamyajtsëm ti ojtsë Jyobaa ndukwandakëm, ¿wiˈix xypyudëkëyäˈänëm parë njëjpkudijëm tijaty xyajtëgoyäˈänëm?

⁸ Ko njamyajtsëm ko të nnaywyandakëm mä Jyobaa, yëˈë xypyudëkëyäˈänëm parë njëjpkudijëm tijaty xyajtëgoyäˈänëm. Extëm nˈokpëjktakëm, ¿oyëdaa ko mëdë kasäädë jäˈäy nnayˈijx nnaytyuˈunëm? ¡Kyaj! Pes ko ojts nnaywyandakëm mä Jyobaa, ta ojts njëjpkugäjpxëm duˈumbë winmäˈäny. Pën kyaj nasˈijxëm ets ja axëkˈäjtën tpëkëdë yˈääts tyikts mä jot korasoon, yëˈë xypyudëkëyäˈänëm parë pojën nyajpëtsëˈëmëm ets ta kyaj nekypyanëjkxëm “ja axëkjäˈäytyëjkë nyëˈë tyuˈu” (Prov. 4:​14, 15).

9. ¿Wiˈix xypyudëkëyäˈänëm ko nbawinmäˈäyëm ti Jyobaa ojts ndukwandakëm?

⁹ ¿Ti ndunäˈänëm ko nyaˈˈawäˈänëm tuˈugë tuunk mëdiˈibë kyaj tiempë xynyekymyoˈoyëm parë nëjkxëm reunyonk? Kyaj ngupëkäˈänëm, pes ko ojts nnaywyandakëm mä Jyobaa ojts njënäˈänëm ko kyaj duˈumbë tuunk nekykyupëkäˈänëm. Jaˈko pën ngupëjkëm, mbäädë net nmëmäˈäy nmëdäjëm wiˈix jëjpˈam nˈokpëjktakëmë Jyobaa. Yëˈë nbanëjkxäˈänëmë Jesusë yˈijxpajtën, pes pyëjktakë wyinmäˈäny ko yëˈë tyunaampy tijaty ja Tyeety tsyojkypy. Nanduˈun ëtsäjtëm, tsojkëp netyë njëjpkudijëm tukëˈëyë mëdiˈibë nnijäˈäwëm ko Jyobaa kyaj tkupëky parë nguytyuˈunëm extëm ojts ndukwandakëm (Mat. 4:10; Fwank 8:29).

10. Ko nety të nëbajtäˈäyëm, ¿wiˈixë Jyobaa xypyudëkëyäˈänëm parë xëmë nbanëjkxëmë Jesus?

¹⁰ Ko nbatëmë amay jotmay, jaa mä nyajnigëxëˈkëm ko të ja winmäˈäny nbëjktakëm ko xëmë nbanëjkxäˈänëmë Jesus. Nnijäˈäwëm ko Jyobaa yëˈë xypyudëkëyäˈänëm, pesë Biiblyë jyënaˈany: “Ëmumduukjot ja Dios xymyëbëktëty ko käˈäp mdukpäädäˈänëdë ja ëyoˈon waanë mëkpë mëdiˈibë käˈäp myëmëdaknëtyën ets pën ja nety ja ëyoˈon jotmay xypyäättë, Dios nëjkx mbudëkëdë ets xymyënax xyajnaxtëty” (1 Cor. 10:​13, TY).

¿TI MBÄÄT XYTYUNY PARË XËMË XYPYANËJKXˈADËˈËTSËDË JESUS?

11. Oknigäjpx tuk pëky ti mbäät xytyuny parë duˈunyëmë Jesus xypyanëjkxët. (Ix nanduˈunë dibujë).

¹¹ Jesus amumduˈukjotë Jyobaa ojts tmëduny, ets ko tmënuˈkxtaky, ta niˈigyë tmëwingoony (Luk. 6:12). Tuk pëky mëdiˈibë mbäät nduˈunëm parë xëmë nbanëjkxëmë Jesus ko nety të nëbajtäˈäyëm, yëˈë ko duˈunyëm nduunˈadëtsëm tijaty niˈigyë Jyobaa xytyukmëwingoˈonëm. Biiblyë jyënaˈany: “Oy nuˈun të njawimbajtëmbë, tsojkëp duˈunyëm nˈyeˈeyëm ja nëˈë tuˈu mëdiˈibë të nbaduˈudëjkëm” (Filip. 3:​16, TNM). Näˈäty, mmëdoyˈataampy wiˈix näägë nmëguˈukˈäjtëm të tpëjktäˈäktë wyinmäˈäny parë niˈigyë tmëdunäˈändë Jyobaa. Waˈan yajwowdë mä Eskuelë parë pënaty kyäjpxwäˈkxtëbë Diosë Kyutujkën o waˈan të nyëjkxtë wiink lugäär Diosmëduumbë mä tyëgoyˈatyë naybyudëkë. ¿Mbäät nanduˈun xytyuny? Pën mbäät, pëjktäˈäk ja mwinmäˈäny. Pënaty myëduundëbë Jyobaa, xëmë wyinmäˈäny tpëjktäˈäktë parë niˈigyë tˈakmëdunäˈändë (Apos. 16:9). Per pën tyam kyaj mbäät niˈigyë xymyëdunyë Jyobaa, këdii mwinmay ko kyaj tsyobääty tijaty mduumpy, pes mëdiˈibë niˈigyë tsobatp yëˈë ko duˈunyëm xymyëdunët ets kyaj mˈanuˈkxët (Mat. 10:​22, TNM). Wiˈixëm nyaˈijx nyajpajtëm ets wiˈixëm ja wijyˈäjtën nmëdäjtëm, per jamyats ko Jyobaa jantsy jotkujk nyayjyawëty ko nmëduˈunëm nuˈun nmadakëm. Ko duˈun xytyunët, ta duˈunyëmë Jesus xypyanëjkxˈadëˈëtsët ko nety të mnëbajnë (Sal. 26:1).

12, 13. ¿Ti mbäät xytyuny pën mjäˈäwëp ko kyaj tijaty xyˈoktukxondaknë? (1 Korintʉ 9:​16, 17; ixë rekuäädrë mä jyënaˈany: “Ti mdunëp parë duˈunyëm xyˈyeˈeyˈadëˈëtsët ja tuˈu”).

¹² Ets ¿ti mbäät xytyuny pën mjäˈäwëp ko kyaj amumduˈukjot xyˈokmënuˈkxtaknë Jyobaa o ko kyaj xyˈoktukxondaknë ko mnëjkxy käjpxwäˈkxpë ets ko xykyajpxyë Biiblyë? Pën duˈun mjaty ko nety të mnëbajnë, këdii mwinmay ko Jyobaa kyaj mˈoktukpudëjkënë myëjääw. Pokyjyaˈay nyajpatëm, pääty kyaj wiˈixëty ko näˈäty duˈun nnayjyäˈäwëm. Pën mˈijxypy ko kyaj tijaty xyˈoktukxondaknë, oy ko xypyawinmayët ja apostëlë Pablo yˈijxpajtën, yëˈë jyatuunë mëjääw ets xëmë tpanëjkxëdë yˈijxpajtënë Jesus, per näˈäty ojts dyajtëgoyˈaty ja naybyudëkë parë ttunët mëdiˈibë oy (käjpxë 1 Corintios 9:​16, 17, TNM). Jyënany: “Axtë pën nduumbyëts oyëts kyaj njatsojkënyëˈaty, kuanëts kots nduny mët ko tëts nyajtuknipëkyë yäˈädë tuunk”. Yäˈädë yëˈë yˈandijaampy ko Pablo të netyë wyinmäˈäny tpëjktaˈaky ko ttunanë ja Diosë tyuunk oy näˈäty oy kyanayjyäˈäwë.

¹³ Nanduˈun mijts, këdii xynyasˈixë mmëmadäˈägëdët wiˈix näˈäty mnayjyawëty, niˈigyën mbäät ja mwinmäˈäny xypyëjktaˈaky parë xytyunët mëdiˈibë mnijäˈäwëp ko oy, oy näˈäty xykyatsojkënyëˈaty. Ko duˈun xytyunët, yëˈë mbudëkëyanëp parë kyaj duˈun mnekynyayjyawëdët. Pën mˈëxpëjkp xëmë, mnuˈkxtakp, mnëjkxp käjpxwäˈkxpë ets reunyonk, yëˈë mbudëkëyanëp parë xypyanëjkxˈadëˈëtsëdë Jesus ko nety të mnëbajnë. Ets ko duˈun tˈixtët ja nmëguˈukˈäjtëm, ta nanduˈun pyudëkëyäˈänëdë (1 Tes. 5:11).

NˈOKNAYWYINMÄˈÄNYˈIJXËM KËˈËM

14. ¿Ti tsojkëp nˈijxëm näˈäganäˈäjëty, ets tiko? (2 Korintʉ 13:5).

¹⁴ Ko nety të mnëbajnë, oy ko näˈäganäˈäjëty xyˈixët tijaty mduumpy ets wiˈix mjukyˈaty (käjpxë 2 Korintʉ 13:5). Extëm nˈokpëjktakëm, ix pën mgajpxypy xëmë Biiblyë, mnuˈkxtakp, pën kyaj mdëgoyˈaty reunyonk, pën xëmë mnëjkxy käjpxwäˈkxpë ets pën mˈëxtaabyë winmäˈäny wiˈix mbäät niˈigyë xytyukxondaˈaky. Oknayajtëwëdë: “¿Njäjtypyëts nimaytyäˈägët tijaty tukniˈˈijxëbë Biiblyë? ¿Tits mbäät nduny parëts niˈigyë ndukxondäˈägëdë Diosë tyuunk? Kots nnuˈkxtaˈaky, ¿ndukmëtmaytyakypyëtsë Jyobaa extëmëts meerë nnayjyawëty ets nyajnigëxëˈkypyëts ko nmëbëjkypyëts? ¿Nduumbyëtsë mëjääw parëts kyaj ndëgoyˈatyë reunyonk? ¿Tits mbäät nduny parëts jamë nwinmäˈäny nbëjktäˈägët mä reunyonk etsëts ngomentaratët?”.

15, 16. ¿Ti mdukniˈˈijxëp extëm yajnimaytyaˈagyë Robert?

¹⁵ Oy ko nanduˈun xywyinmayët tijaty mbäät myajtëgoyëty, jëjpˈam ets duˈun xytyunët. Min nˈokˈijxëm wiˈix tnimaytyaˈagyë Robert. Yëˈë jyënaˈany: “Jaatsë netyë njëmëjt 20 kots ndëjkë mëduumbë tuk xëëw majtsk xëëw. Kots tëgok nduumbëtsëëmy, tats tuˈugë kiixy xyˈanmääy mëdiˈibëtsë nety mëët nduny parëts mëët nëjkxët mä tyëjk ets ko kyaj nety jam pën yajpäädäˈäny. Tim jawyiin jeˈeyëts tijaty ojts nˈoktukkajpxy, per ok, tats yajxon ndimyˈanmääy tikots kyaj nëjkxäˈäny”. Jantsy oy ko Robert kyaj ojts tpanëjkxy ja kiixy. Per ko ok twinmääy, ta jyënany ko ojtsxyëp netyë tˈanëëmë ko kyaj tpanëjkxäˈäny. Robert jyënaˈany: “Kyajts ojts netyë njëjpkugäjpxë extëm ttuunyë José ko jyayajtëgoyanë ja Potifarë kyudëjk (Gén. 39:​7-9). Kyajts ndimwinmääy pën tsiptäˈägäämbë nety. Kots duˈun njäjty, yëˈëts xytyukˈijx ko tsojkëbëtsë nety niˈigyë nmëwingonëdë Jyobaa”.

¹⁶ Nˈokpëjktakëm ko jam ti myajtëgoyaˈanyëty, per netyë xyjyëjpkudijë. ¿Tiko ok xykyawinmay extëm ttuunyë Robert? Nayajtëwëdë: “¿Jekyëts të niwinmayë ets taanëmëts të njënäˈäny ko kyajëts ndunäˈäny?”. Pën mbëjkypyë kuentë ko jam ti myajtëgoyaˈanyëty, këdii wiink mnayjyawëty. Oyën ko të xyˈixy parë net mnaygyuentëˈatëdët. Tukmëtmaytyäˈägë Jyobaa ets winmay tijaty mbäät mbudëkëty parë mwinmäˈäny xypyëjktäˈägët ets xëmë xymyëmëdowët (Sal. 139:​23, 24).

17. Extëm yajnimaytyaˈagyë Robert, ¿wiˈixë Jyobaa nyajwëˈëmëm ko kyaj nmëdëgoˈoyëm?

¹⁷ Robert tnimaytyaˈaky tijaty ak tuun ak jäjtë. Yëˈë jyënaˈany: “Kots ojts ngapanëjkxy ja kiixy, tajëts xyˈanmääy: “Tëtsë net tyam nnijawë”. Ets tats nyajtëëy: “¿Tiko duˈun mjënäˈäny?”. Yëˈë ta jyënany ko tuˈugë mixy mëdiˈibë nety të yˈokTestiigëˈäjtpë të yˈanëˈëmxëty ko ënäˈktëjk mëdiˈibë Testiigë, ayuˈutsyë ttundë axëkˈäjtën ets ko pojën tkupëjkojtë. Ta ojts tˈanëëmë ja mixy ko ëjts xyˈokwinmäˈänyˈixäämp. ¡Jantsy jotkujkëts nnayjyäˈäwë kots kyaj ojts nyajnimäˈädë Diosë xyëëw!”.

18. ¿Ti net tyam mdunaampy ko të mnëbajnë? (Ix nanduˈunë rekuäädrë “Majtskë artikulo mëdiˈibë mbäät xypyudëjkëm”).

¹⁸ Ko ojts mnaywyandaˈagyëty mä Jyobaa ets ko mnëbejty, yëˈë myajnigëxëˈk ko myajmëjpëtsëmanëbë xyëëw oy tii tyimtun tyimjatëdët. Mbäät mˈity seguurë ko Jyobaa pyëjkypyë kuentë tijaty amay jotmay mwinguwäˈkëp ets ko xyjyëjpkudijë tijaty myajtëgoyanëp. Yˈijxypy nanduˈun ko mduumbyë mëjääw parë xëmë xymyëmëdoy ets mëjwiin kajaa mgunuˈkxäˈänyëty. Mbäät mˈity seguurë ko Jyobaa mdukpudëkëyanëbë myëjääw parë xytyunët mëdiˈibë oy (Luk. 11:​11-13). Extëm të nˈijxëm, Jyobaa yëˈë mbudëkëyanëp parë duˈunyëm xypyanëjkxˈadëˈëtsëdë Jesus ko nety të mnëbajnë.