Mëdiˈibë nääk të nyayajtëwëdë
Ko Jesus dyajnaxkëdaky Nintsënˈäjtëmë yˈAˈux, ¿mä nety yajpäättë ja nidëgëˈpxmäjkpë yˈëxpëjkpëty mëdiˈibë nety të tkexy käjpxwäˈkxpë? ¿Waˈandaa nety të myäjtstuˈudëdë?
Ko Jesus kyayajpaty mëët ja nidëgëˈpxmäjkpë yˈëxpëjkpëty ko dyajnaxkëdaky ja Nintsënˈäjtëmë yˈAˈux, kyaj yëˈë tˈandijy ko të nety myastuˈudëdë o ko kyaj nety tˈokˈkupëjknëdë. Jesus yëˈëyë nety mëët yajpäädäˈäny ja nimäjmajtskpë yˈapostëlëty.
Jesus kyupëjkypyë nety duˈun ja nimäjmajtskpë yˈapostëlëty ets ja nidëgëˈpxmäjkpë yˈëxpëjkpëty. Ja nimäjmajtskpë yetyëjkëty mëdiˈibë ëgäˈäny wyinˈijx ja ojts ttijy apostëlëty (Luk. 6:12-16). Jamë nety yajpääty Galilea ko dyajtuˈukmujky ja “nimäjmajtskë yˈapostëlëty” ets “tkejxy es tkäjxwäˈxët [ . . . ] ja Diosë kyutujkën. Es nandëˈën tkejxy es dyaˈˈagëdäˈägët yë pumäˈäyëty” (Luk. 9:1-6). Ets ok jam Judea, ta “twinˈijxy nanduˈun nidëgëˈpx [mäjk] ja jäˈäy, es tkejxy nimajtskatyëty” (Luk. 9:51; 10:1). Pääty mäjaty ojts yajkäjpxwaˈkxy ja Diosë yˈääw yˈAyuk, tamˈäjttë Jesusë yˈëxpëjkpëty.
Ja judiyëtëjk mëdiˈibë nety pyanëjkxtëbënë Jesus, duˈunyëmë nety ttundë ja Paskë jëmëjt jëmëjt mëët ja jyëëky myëguˈugëty (Éx. 12:6-11, 17-20). Mä Jesus kyaˈookynyëm ta ojts nyëjkxy Jerusalén mëët ja yˈapostëlëty, per kyaj tˈanëmääy ja yˈëxpëjkpëty mëdiˈibë Judea, Galilea ets Perea, parë mëët yˈaˈuxˈattët mä ja Paskë aˈux. Yëˈëyë nety mëët yajpäädäˈäny ja yˈapostëlëtëjkëty, pääty tˈanmääy: “Njantsy tsyojkypyëts ets “ndunäˈänyëts mët miits yëˈë tyädë paskë aˈux mä kyajnëmts nˈeeky. . . ” (Luk. 22:15).
¿Ets tiko nety yëˈëyë mëët yajpäädäˈäny ja yˈapostëlëtëjkëty? Jaˈa ko tim tsojkë nety yˈoogäˈäny extëm “ja Diosë Byorreeguˈunk diˈibë wëˈëmp extëmë wintsëˈkën es yajpojpënitëgoyët yä naxwiiny” (Fwank 1:29). Jamë nety yˈoogäˈäny Jerusalén mä ijty ja israelitëty desde näˈäjëp tmënëjkxtë ja wyintsëˈkën. Ets mä nety Jesus yˈoogäˈäny, waanë niˈigyë ja jäˈäyëty ttukˈoyˈatäˈändë këdiinëm ja israelitëty ko ttsuˈutstë ja borreegë ja koots mä yˈawäˈätspëtsëëmdë Egipto (1 Kor. 5:7, 8). Ko Jesus ojts xykyuˈoˈkëm ta ja nimäjmajtskpë yˈapostëlëty yëˈë ojts tˈëjxˈattë ja tuˈukmujkën (Éfes. 2:20-22). Ja Jerusalén mëdiˈibë yajpatp tsäjpotm “mäjmajtskë yˈëjx tmëdaty”, “Es mä ja mäjmajtskpë potsy ëjx këxjäˈäy yˈity tuˈuk tuˈugë xyëë ja nimäjmajtskpë Borreeguˈungë yˈapostëlë” (Diˈibʉ Jat. 21:10-14). Extëm nˈijxëm ja apostëlëtëjkëty mëdiˈibë kyaj myäjtstutëdë, mëjwiin kajaa nety tyunäˈändë parë dyaˈˈadëwdët mëdiˈibë Jyobaa të ttuknibëjktäägë. Päätyënë Jesus yëˈëyë mëët yajpadandë mä ojts tˈaktundë ja Paskë xëëw ets mä dyajnaxkëdaky parë ja Nintsënˈäjtëmë yˈAˈux.
Ja nidëgëˈpxmäjkpë Jesusë yˈëxpëjkpëty ets ja wiinkpëty, kyaj yajpattë mëdë Jesus mä taabë koots, per tyukˈoyˈatandëbë nety ko Jesus ojts xykyuˈoˈk xykyutëgoˈoyëm pen kyaj tmäjtstuˈuttë. Pes ko ja tiempë nyaxët yajwinˈixandëbë nety parë mëdë Jesus yˈanaˈamdët jam tsäjpotm, duˈun extëmë Jesus tˈanmääy ja yˈapostëlëtëjk mä taabë koots (Luk. 22:29, 30).