Mëdiˈibë nääk të nyayajtëwëdë
¿Pënën ja anklëstëjkë “winwitsypyë” mëdiˈibë yajnimaytyaktëp mä 1 Timotee 5:21?
Pablo duˈun tnijäˈäyë Timoteo mëdiˈibë nety nanduˈun tuump mëjjäˈäy: “Yˈijxypy myëdeepy ja Dios esë Nintsënˈäjtëm Jesukristë mët ja yˈanklëstëjkë winwitsypyë, ko nduknipekyë tyäˈädë ëxpëjkën es xypyadunët dëˈënyëm mët ja oyjyotkyëjxm, es kyaj winˈixy wingexy” (1 Tim. 5:21). ¿Pënatyënë yäˈädë anklëstëjkë “winwitsypyë”?
Min nˈokˈijxëm pënaty kyaj mbäät duˈun yajtijtë. Ko duˈunë Pablo tkujäˈäyë kyaj yëˈë tmaytyäˈägany ja 144,000. Pes ko ojts tnijayë Timoteo, kyajnëmë nety pën nyijkxy tsäjpotm. Pääty ja apostëlëty ets pënatyë nety të yajwinˈixtë parë nyëjkxtët tsäjpotm, kyajë nety yëˈë mbäät yajtijtë ja anklëstëjkë “winwitsypyë”, mët ko kyajnëmë nety ttsëmëˈëktë ja nyiniˈkx këbäjk ixtëmë anklës (1 Kor. 15:50-54; 1 Tes. 4:13-17; 1 Fwank 3:2).
Nan kyaj yëˈë tmaytyäˈägäˈäny ja anklëstëjk mëdiˈibë kujuundaktë ets kyëdaktë yä naxwiiny ja tiempë mä nety kyajnëm myiny ja Ayoˈonduu. Pes yëˈë pyuwäˈkëdë Satanás ets tmëtsiptsoˈondë Jesús, pääty ojts yajtijnëdë kaˈoybyëtëjk (Gén. 6:2; Luk. 8:30, 31; 2 Peed. 2:4). Mä tiempë myiny kyëdaˈaky, Jesús tsyumaampy tuk mil jëmëjt ets ok, ta net kyutëgoyäˈändë mëdë Satanás (Juud. 6; Diˈibʉ Jat. 20:1-3, 10).
Mä 1 Timotee 5:21 jyënaˈany ko ja anklëstëjkë “winwitsypyë” tuˈugyë jam yajpäättë mëdë Dios etsë Kristë, pääty njënäˈänëm ko yäˈädë yˈanklëstëjk yëˈë duˈun mëdiˈibë myëmëdoowdëbë Jyobaa ets tyundë tsäjpotm.
Milˈam jyamˈattë anklëstëjk mëdiˈibë Dios myëmëdoowdëp (Eb. 12:22, 23). Jyobaa të ttuunkmoˈoy ti tyundëp niduˈuk niduˈuk (Diˈibʉ Jat. 14:17, 18). Nˈokjamyajtsëm ko tëgok, tuˈukpë anklës ja ojts dyaˈooky 185,000 soldäädëtëjk mëdiˈibë Asiria (2 Rey. 19:35). Waˈan yëˈë tuk grupë anklëstëjk ttunäˈändë mëdiˈibë Jesús myaytyak ko jyënany: “Ngaxëpts ja nˈanklësëts es dyajjëgaˈaktët mätsë ngutujkën tëgekyë diˈibë adëtstëp axëëk es diˈibë wiinkpëty yajpekytyuundëp” (Mat. 13:39-41). Ets waˈanë wiinkpë anklëstëjk dyajtuˈukmukäˈändë pënaty të yajwinˈixtë ets nyëjkxtët tsäjpotm (Mat. 24:31). Tamë wiinkpë yˈanklëstëjk mëdiˈibë të yajtuknipëktë parë ëjtsäjtëm xyˈijxˈijt xykyuentëˈäjtëm ixtëm jyënaˈanyë Salmo 91:11 (Mat. 18:10; ix nanduˈunë Matewʉ 4:11 etsë Lukʉs 22:43).
Ko mä 1 Timotee 5:21 yajmaytyaˈaky ja anklëstëjkë “winwitsypyë”, waˈan yëˈë yajmaytyäˈägäˈäny ja mëdiˈibë nety të yajtuknipëktë parë tˈijxˈit tkuentëˈattët ja kongregasionk. Pes mä yäˈädë kapitulo yëˈë netyë Pablo të tmëtmaytyaˈaky ja mëdiˈibë tuundëp mëjjäˈäy ets të tkäjpxwijtë ja Dios mëduumbëty parë twintsëˈëgëdët pënaty tuundëp mëjjäˈäy. Pënaty tuundëp mëjjäˈäy ojts nanduˈun yaˈˈanëëmëdë parë “kyaj winˈixy wingexy” ttsoktët ja myëguˈuk ets jawyiin tniwinmayëdët ko tijaty ttunäˈändët. Apostëlë Pablo ojts tnigajpxy tuk pëky tiko jyëjpˈamëty duˈun ttundët. Pes jyënany: “Yˈijxypy myëdeepy ja Dios esë Nintsënˈäjtëm Jesukristë mët ja yˈanklësëtyë winwitsypyë”. Yäˈädë yëˈë yˈandijpy ko Jyobaa, Jesús ets “ja yˈanklësëtyë winwitsypyë”, tamën tˈix ttundë wiˈix ja mëjjäˈäytyëjk tˈijxˈit tkuentëˈattë ja myëguˈuktëjk. Yäˈädë yëˈë xytyukˈijxëm ko wiˈixëm ja anklëstëjk të yajtuunkmoˈoytyë, tam mëdiˈibë të yajtuknipëktë ets tpudëkëdët ja kongregasionk, tam mëdiˈibë yˈijxˈijt kuentëˈäjttëp ja Dios mëduumbëty ets tam mëdiˈibë xypyudëjkëm mä njënˈayeˈey ndëjkˈayeˈeyëm ets ttukˈawanëdë netë Jyobaa tijaty yˈijxtëp (Mat. 18:10; Diˈibʉ Jat. 14:6).