Nˈokpanëjkxëmë yˈijxpajtën ja anklëstëjk

1, 2. 1) ¿Mä ndëgatsyˈäjtëm mëdë anklëstëjk? 2) ¿Mä nduˈugyëm mët ja anklëstëjk?

KO JYOBAA të xymyëjwoˈowëm mä nyax kyäjpn, ta të xytyukpuwoˈowëm ja nmëguˈukˈäjtëmëty mëdiˈibë yajpattëp abëtsëmy naxwinyëdë mëdiˈibë yëˈë yˈuˈunkˈäjty yˈënäˈkˈäjtypyën. Per kyaj yëˈëyëty tˈuˈunkˈaty tˈënäˈkˈaty nanduˈunën nimay ja anklëstëjk (Dan. 7:​9, 10). Per ko nˈokwinmäˈäyëm tim tëgatsy mët ëjtsäjtëm. ¿Tiko duˈun njënäˈänëm? Yëˈko yëˈë jawyiinë Jyobaa ojts yajkojëdë ets oknëm ëjtsäjtëm (Job 38:​4, 7). Niˈigyë kyumëjääwˈattë, wäˈäts yajpäättë ets ak oy tijaty ttundë, ets jaajën mä kyaj nmëbatëm (Luk. 9:26).

² Per taaˈäjtp mä mëët nduˈugyëmë anklëstëjk. Ixtëm nˈokpëjktakëm, duˈun ixtëm ëjtsäjtëm, yëˈëjëty nan yajnigëxëˈktëp wiˈixë Jyobaa jyaˈayˈaty, mbäät twinˈixtë ti tyunandëp, tamë xyëëwëty, wiˈixëm ja tuunk mëdiˈibë Jyobaa të tyuknipëkëdë ets wiˈixëm jyaˈayˈattë. Ets duˈun ixtëm ëjtsäjtëm nyajtëgoyˈäjtëm xynyëˈëmoˈoy xytyuˈumoˈoyëmë Jyobaa, nanduˈun yëˈëjëty dyajtëgoyˈattë (1 Peed. 1:12).

3. ¿Tijaty xytyukniˈˈixëyäˈänëmë anklëstëjkë yˈijxpajtën?

³ Ixtëm nˈijxëm, oy nëgoo ngatimytyuˈugyëm mët ja anklëstëjk, per mbäät xypyudëjkëmë yˈijxpajtën ets xytyukniˈˈijxëm tijaty mëjwiin kajaa. Mä yäˈädë artikulo, nˈixäˈänëm wiˈix mbäät ja anklëstëjk nbanëjkxëmë yˈijxpajtën ko yujyˈat tyudaˈakyˈattë, ko ttsoktë jäˈäy, ko myadäˈäktë ets ko dyaˈittë wäˈäts ja Diosë kyäjpn.

ANKLËSTËJK YUJY TUDAˈAGYËTY

4. 1) ¿Wiˈixënë anklëstëjk dyajnigëxëˈëktë ko yujy tudaˈagyëty? 2) ¿Tiko yujyˈat tyudaˈakyˈattë anklëstëjk? (Salmo 89:7).

⁴ Anklëstëjk mëjwiin kajaa tijaty tjat tnijawëdë, jantsy kumëjääwëty ets wijˈyëty, per yujy tudaˈagyëty ets yëˈë myëmëdoowdëp wiˈixë Jyobaa nyëˈëmoˈoy tyuˈumoˈoyëdë (Sal. 103:20). Ko ttundë tijatyë Jyobaa tuknipëjkëdëp, ninäˈä kyanaytyukmëjawëdë ets kyaj dyajtundë ja myëkˈäjtën parë myëjpëtsëmäˈändë. Oy kyayajnijawë wiˈixënë xyëëwëty, yëˈëjëty agujk jotkujk ttundë tijatyë Dios tsyojkypy (Gén. 32:​24, 29; 2 Rey. 19:35).a Yäˈädë anklëstëjk, nan kyaj tˈaxäjëyäˈändë ja mëjˈäjtën mëdiˈibë pat nitëjkëbë Jyobaa. ¿Tiko yujyˈat tyudaˈakyˈattë? Yëˈko tsyojktëbë Jyobaa ets wyingutsëˈëgëdëp mëjwiin kajaa (käjpxë Salmo 89:7).

5. ¿Wiˈix tuˈugë anklës dyajnigëxëˈkyë yujyˈat tudaˈakyˈat? (Ix nanduˈunë dibujë).

⁵ Min nˈokˈijxëm mä Biiblyë wiˈix yajnimaytyaˈaky yujyˈat tyudaˈakyˈattë anklëstëjk. Naa jaa mä jëmëjt 96, tuˈugë anklës mëdiˈibë kyaj nnijäˈäwëm ti txëwˈaty, ttukˈijxy tijaty ja apostëlë Juan mëdiˈibë yajmonyˈijx yajmonyjyäˈäwë (Diˈibʉ Jat. 1:1). ¿Ti tyuunë Juan? Ta nyaygyoxtënääytyakë parë tˈawdatäˈäny ja anklës. Per ja anklës netyë yˈanëmääyë: “Katë dëˈën mˈadëˈëtsy. [Nmëduumbyëts] ja Dios extëm mij, es extëmë mmëguˈugëty […]. ¡Awdat ja Dios!” (Diˈibʉ Jat. 19:10). Yäˈädë anklës yajnigëxëˈkë yujyˈat tudaˈakyˈat ko duˈun tˈanëmääyë Juan. Kyaj nyayajmëjpëtsëmanë, netyë tˈanëmääyë Juan ets yëˈë tˈawdatëdë Jyobaa. Nan kyaj niˈigyë nyayjyäˈäwë mëj këjxm, oyë nety yëˈë jantsy jeky tmëduunë Jyobaa ets oy niˈigyë tmëdaty ja mëkˈäjtën ets kyaj dyuˈunëty ja apostëlë Juan. Yujy tudaˈaky jyaˈayˈajty ets pääty tˈanëmääy: “[Nmëduumbyëts] ja Dios extëm mij”. Tsuj yajxon ttukjaygyujkë apostëlë Juan ko kyaj nety yˈoyëty ti jam tyuumpy. Waˈanë yäˈädë anklës tpëjkyë kuentë ko päätyë netyë Juan të nyaygyoxtënääytyaˈagyëty mët ko yajmonyˈijx yajmonyjyäˈäwë tijatyë nety të tyukˈixyëty.

6. ¿Wiˈix mbäät njäˈäyˈäjtëm yujy tudaˈaky ixtëmë anklëstëjk?

⁶ ¿Wiˈix mbäät njäˈäyˈäjtëm yujy tudaˈaky ixtëmë anklëstëjk? Ko kyaj nnaytyukmëjäˈäwëm tijaty nduˈunëm mä Diosë kyäjpn ets ko kyaj nnayajnäjxëm ixtëm jyawë nëgooyë tijaty njäjtënë (1 Kor. 4:7). Kyaj nanduˈun yˈoyëty nnayajnäjxëm mëj këjxm mä nmëguˈukˈäjtëm mët ko jeky kujk nmëduˈunënë Jyobaa o mët ko jam ti tuunk nikëjxmˈäjtëm. Pën nmëdäjtëm mas niˈigyë ja tuunk, niˈigyën mbäät nnayajnäjxëm ixtëmë ënäˈkˈuˈunk (Luk. 9:48). Ets duˈun ixtëmë anklëstëjk, kyaj nanduˈun nyajwinmayäˈänëm ja wiink jäˈäy ko nipën duˈun ixtëm ëjtsäjtëm.

7. ¿Wiˈix mbäät nyajnigëxëˈkëmë yujyˈat tudaˈakyˈat ko pën ngäjpxwijëm?

⁷ Mbäät nanduˈun nyajnigëxëˈkëmë yujyˈat tudaˈakyˈat ko ngäjpxwijëm tuˈugë nmëguˈukˈäjtëm o ja nˈuˈunkˈäjt nˈënäˈkˈäjtëm. Näˈäty, tsojkëp ndimyˈanmäˈäygyojëm mä tsokyëty oy tijaty ttunët, per kyaj yˈoyëty nyajnayjyäˈäwëm axëëk, duˈun ixtëm ja anklës tsuj yajxon ojts tˈanëëmë ja Juan ko kyaj nety yˈoyëty ti jam tyuumpy. Pën kyaj nnayajnäjxëm mëj këjxm, ta nëjkx nyäjkëm ja ëwij käjpxwijën mëdiˈibë miimp mä Biiblyë mët ja mayˈäjt wintsëˈkën ets tsuj yajxon (Kol. 4:6).

ANKLËSTËJK TSYOJKTËBË JÄˈÄY

8. 1) Ixtëm jyënaˈanyë Lukʉs 15:​10, ¿wiˈixë anklëstëjk dyajnigëxëˈëktë ko tsyojktëbë jäˈäy? 2) ¿Wiˈixë anklëstëjk xypyudëjkëm mä nˈëwäˈkx ngäjpxwäˈkxëm? (Ix nanduˈunë dibujë).

⁸ Anklëstëjk myëjotmaybyattëbë naxwinyëdë jäˈäy ets tsyojktëp. Tyukxondaktëp ko tuˈugë pokyjyaˈay jyodëmbity, jaˈa njënäˈänëm ko tnijëmbityë Jyobaa ets ko tuˈugë jäˈäy tnijawë ja tëyˈäjtën ets dyajtëgatsy ja jyukyˈäjtën parë net tmëdunyë Dios (käjpxë Lukʉs 15:10). Anklëstëjk xypyudëjkëm nanduˈun mä nˈëwäˈkx ngäjpxwäˈkxëm (Diˈibʉ Jat. 14:6). Kyaj yëˈë tim myëtmaytyäˈäktë ja jäˈäy, per mbäät xytyukniwoˈowëm ja mëdiˈibë yˈixyˈataambyë Jyobaa. Perë Jyobaa kyaj yëˈëyë tim yajtunyë yˈanklëstëjk parë nbatëm tuˈugë jäˈäy, yajtuumpy nanduˈunë yˈespiritë santë, pääty kyaj mbäät pën tyimjënäˈäny: “Tyam yëˈëts tuˈugë anklës të xytyukniwoyë yäˈädë jäˈäy” (Apos. 16:​6, 7). Perë Jyobaa kajaa dyajtunyë yˈanklëstëjk. Pääty ko nëjkxëm ëwäˈkx käjpxwäˈkxpë, mbäät nˈijtëm seguurë ko yajpäädandëp mët ëjtsäjtëm parë xypyudëkëyäˈänëm. (Ixë rekuäädrë “Yaˈˈatsoowëmbijt ko nyuˈkxtaktë”).b

9. ¿Wiˈix mbäät nyajnigëxëˈkëmë tsojkën duˈun ixtëmë anklëstëjk?

⁹ ¿Wiˈix mbäät nyajnigëxëˈkëmë tsojkën duˈun ixtëmë anklëstëjk? Ko yajnigäjpxët mä nduˈukmujkëm ko të jyëmbity tuˈugë nmëguˈukˈäjtëm, oy ko ndukxondakëm duˈun ixtëmë anklëstëjk. Nˈokˈagëˈë nˈokˈaxäjëm tsuj yajxon ets nˈoktukˈijxëm ko ntsojkëm (Luk. 15:​4-7; 2 Kor. 2:​6-8). Jatuˈuk pëky wiˈix mbäät nbanëjkxëmë anklëstëjkë yˈijxpajtën, yëˈë ko njotmoˈoyëm mä nˈëwäˈkx ngäjpxwäˈkxëm (Ecl. 11:6). Ets duˈun ixtëm ja anklëstëjk xypyudëjkëm mä nduˈunëm yäˈädë tuunk, nanduˈun ëjtsäjtëm mbäät nˈëxtäˈäyëmë winmäˈäny wiˈix mbäät nbudëjkëm ja nmëguˈukˈäjtëmëty. Ixtëm nˈokpëjktakëm, mbäät nëjkxëm jënˈayeˈepy tëjkˈayeˈebyë mët ja nmëguˈukˈäjtëm mëdiˈibë të myëjjäˈäyënë, mëdiˈibë pëjk ijxëp o ja mëdiˈibë näämnëm tëjkëp ëwäˈkx käjpxwäˈkxpë.

10. ¿Ti xytyukniˈˈijxëm ixtëm yajnimaytyaˈagyë Sara?

¹⁰ ¿Ti mbäät nduˈunëm pën kyaj mbäät nˈokˈëwäˈkx nˈokkäjpxwäˈkxënë ixtëm njatsojkënyëˈäjtëm? Oy ko nˈëxtäˈäyëm ja winmäˈäny parë duˈunyëm nduunmujkëm mët ja anklëstëjk. Min nˈoknimaytyakëmë yˈijxpajtënë Sarac mëdiˈibë tsënaapy India. Yëˈë ja nety kujk tyuny 20 jëmëjt prekursoora ko pyatë tuˈugë mëk päˈäm mëdiˈibë tim yajnaxkëdakë, ets yëˈë mëdiˈibë mon tuk jantsy yajnayjyäˈäwë. Per ko ja nmëguˈukˈäjtëm pyudëjkëdë ets ko ojts tkajpxyë Biiblyë bom bom, yëˈë mëdiˈibë jotkujkmooyë. Sara, ni jeˈeyë nety mbäät kyaˈuˈunyë parë tjäˈäyëdë neky, pääty yëˈë yajtuunë telefënë parë tmëtmaytyaky ja jäˈäyëty mëdiˈibë nety nyinëjkxypy, ets yëˈë mëdiˈibë anëmääyëdë ko tamˈäjtpë jäˈäy mëdiˈibë nanduˈun jaˈëxpëkandëp. ¿Wiˈix wyimbëtsëëmy? Ko ja tiempë waanë nyajxy, ta dyaˈëxpëjktsondaky ni 70 jäˈäy. Kom kyajë nety yˈokmadaknë parë dyaˈëxpëjktäˈäyët, ta ttuknipëjkyë nmëguˈukˈäjtëm parë dyaˈëxpëkët. Nimayë yäˈädë jäˈäyëty, nëjkxtëp mä reunyonk. Seguurë ko anklëstëjk agujk jotkujk nyayjyawëdë ko tˈixtë wiˈix ja nmëguˈukˈäjtëm mëk tyundë mä yˈëwäˈkx kyäjpxwäˈkxtë duˈun ixtëmë Sara.

ANKLËSTËJK MADAKTËP

11. ¿Wiˈixë anklëstëjk dyajnigëxëˈëktë ko madaktëp?

¹¹ Anklëstëjk yäjktëbë oybyë yˈijxpajtën, pes yëˈëjëty duˈunyëm myadäˈäktë nuˈun kujkë tiempë pyety kyuˈty. Yˈijxtë wiˈixë Satanás ets nimayë anklëstëjk, tnibëdëˈktë Jyobaa (Gén. 3:1; 6:​1, 2; Juud. 6). Mä Biiblyë yajnimaytyakp ko tuˈugë anklës tsyiptuuny mët tuˈugë kaˈoybyë mët ko kyaj tyuktunanë mëdiˈibë nety të yajtuknipëky (Dan. 10:13). Ets nuˈun ja tiempë pyety kyuˈty, yˈijxtëp nanduˈun ko kyaj niˈamukë jäˈäy tmëdunäˈändë Jyobaa. Per oy duˈun tˈixtë, yäˈädë anklëstëjk duˈunyëm agujk jotkujk tmëdundë Jyobaa mët ko nyijäˈäwëdëp ko tim tsojkë Dios dyajjëjptëgoyaˈanyë axëkˈäjtën.

12. ¿Ti xypyudëkëyäˈänëm parë nmadakëm?

¹² ¿Wiˈix mbäät nbanëjkxëmë anklëstëjkë yˈijxpajtën ko myadäˈäktë? Tyam, waˈan nanduˈunën nˈijxëm wiˈix jyaˈˈatyë axëkˈäjtën o nyajnibëdëˈkëm mët ko nmëduˈunëmë Jyobaa. Per duˈun ixtëmë anklëstëjk, ijtëm seguurë ko tim tsojkë Jyobaa dyajjëjptëgoyaˈanyë axëkˈäjtën. Pääty “kyaj nmëˈanuˈxëm es nduˈunëm ja oybyë” duˈun ixtëmë anklëstëjk (Gal. 6:9). Jyobaa nan të xytyukwandakëm ko xypyudëkëyäˈänëm (1 Kor. 10:13). Mbäät nˈamdoˈowëmë myëjääw, ets yëˈë xypyudëkëyäˈänëm parë nmaˈkxtujkën ets nyajpatëm agujk jotkujk (Gal. 5:22; Kol. 1:11). ¿Ti mbäät xytyuny ko jäˈäy axëëk mdunëdët? Këdii mtsëˈëk mjawë, tukjotkujkˈat amumduˈukjotë Jyobaa, pes yëˈë xëmë yajpäädäˈäny mët mijts ets mmoˈoyanëbë jot mëjääw (Eb. 13:6).

ANKLËSTËJK YAˈIJTTËP WÄˈÄTS JA DIOSË KYÄJPN

13. ¿Ti tuunk të yajtuknipëktë anklëstëjk? (Matewʉ 13:​47-49).

¹³ Mä yäˈädë tiempë mëdiˈibë kugëxëyanëp, Jyobaa të ttuknipëky tuˈugë tuungë jëjpˈambë ja anklëstëjk (käjpxë Matewʉ 13:​47-49). Ko nˈëwäˈkx ngäjpxwäˈkxëm, nimayë jäˈäy tˈoymyëdowdë ja Diosë yˈayuk, ta mëdiˈibë tyuumbyë mëjääw ets dyajtëgatsyë jyukyˈäjtën parë tyëkë Diosmëduumbë ets ta mëdiˈibë kyaj. Pääty ko anklëstëjk twinwitstë “ja oyjyaˈay kaˈoyjyaˈay”, mbäädë net wäˈäts yˈity ja Diosë kyäjpn. Per kyaj yëˈë tˈandijy ko pën tuˈugë jäˈäy kyaj yˈokˈyajpatnë mä Diosë kyäjpn, kyaj mbäät jatëgok yˈokjëmbijnë o ko kyaj yˈokjaˈˈatanë jotmay mä nduˈukmujkëm. Mbäät nˈijtëm seguurë ko anklëstëjk mëk jyantsy tyundë parë dyaˈittë wäˈäts ja Diosë kyäjpn.

14, 15. ¿Wiˈix mbäät nyaˈijtëm wäˈäts ja Diosë kyäjpn duˈun ixtëmë anklëstëjk? (Ix nanduˈunë dibujë).

¹⁴ ¿Wiˈix mbäät nyaˈijtëm wäˈäts ja Diosë kyäjpn duˈun ixtëmë anklëstëjk? Ko nduˈunëmë mëjääw parë oy nˈijtëm mëdë Jyobaa, ko nwinˈijxëm pën mëët nnaymyayäˈänëm ets ko njëjpkudijëm tijaty mbäät xytyukmëjagamgakëmë Jyobaa. Duˈuntsoow, mbäät nyaˈijtëm wäˈäts ja Diosë kyäjpn (Sal. 101:3). Oy ko nanduˈun nbudëjkëm ja nmëguˈukˈäjtëm parë duˈunyëm tmëmëdowdëdë Jyobaa. Ixtëm nˈokpëjktakëm, pën të nnijäˈäwëm ko tuˈugë nmëguˈukˈäjtëm të pyokytyuny mëjwiin kajaa, oy ko nˈanmäˈäyëm ets ttukˈawanët ja mëjjäˈäytyëjkëty. Pën kyaj duˈun ttuny, ta net ëjtsäjtëm nigäjpxëm, ets ndunäˈänëm duˈun mët ko ntsojkëm ja nmëguˈukˈäjtëm. Kom amääy amutsk yajpääty Dios windum, ntsojkëm ets netyë yajpudëkët (Sant. 5:​14, 15).

¹⁵ Per taaˈäjtpë nmëguˈukˈäjtëm mëdiˈibë pokytyuundëp mëjwiin kajaa ets tsojkëp yajjuuttët mä Diosë kyäjpn. Ko duˈun jyatët, kyaj net mëët nekyyeˈeymyujk nekynyäjxmujkëm, duˈuntsoow yˈitët wäˈäts ja Diosë kyäjpn (1 Kor. 5:​9-13).d Ko kyaj mëët nekyyeˈeymyujk nekynyäjxmujkëm, yëˈë nety nanduˈun nyajnigëxëˈkëmë tsojkën, pes mbäät pyudëkëdë parë jatëgok tnijëmbittëdë Jyobaa. Ko jyëmbittët, mëjwiin kajaa tyukxondäˈägäˈänëdë Jyobaa ets ja anklëstëjk (Luk. 15:7).

16. ¿Wixaty mijts xypyanëjkxäˈänyë anklëstëjk yˈijxpajtën?

¹⁶ Nitii duˈun jotkujk xykyayajnayjyäˈäwëm ko yam të nˈijxëm tijaty tyuundëbë anklëstëjk ets wiˈix mëët nduunmujkëm. Pääty, nˈokpanëjkxëm ja yˈijxpajtën ko yujyˈat tyudaˈakyˈattë, ko tsoktë jäˈäy, ko myadäˈäktë ets ko dyaˈittë wäˈäts ja Diosë kyäjpn. Ko njäˈäyˈäjtëm ixtëmë yëˈëjëty, mbäät nëjkx nyajpatëm xëmëkyëjxm mä Jyobaa kyäjpn.