¿Wiˈix mbäät nyajnigëxëˈkëm ko njantsy myëtnaymyaayëbëˈäjtëm ja nmëguˈukˈäjtëm?

¿TË XYPYAATY tuˈugë jotmay ets të xyjyawë ko kyaj pën të mbudëkëty? Mbäät duˈun njäjtëm, yëˈë ko ja tiempë mëdiˈibë tyam ndukjukyˈäjtëm “ayoˈonmëët yˈaknaxy”. Pääty xytyuktëjkëm näˈäty ja moˈon tujkën, per kyaj tiko naytyuˈuk nnayjyäˈäwëm ko nyajnäjxëmë amay jotmay (2 Tim. 3:1). Pesë Biiblyë jyënaˈany ko mbäät xypyudëjkëmë nmëtnaymyaayëbëˈäjtëm ko nmoˈon ndujkëm (Prov. 17:17).

¿WIXATY XYPYUDËJKËM JA NMËTNAYMYAAYËBËˈÄJTËM?

Apostëlë Pablo ojts tmëdatyë myëtnaymyaayëbë mëdiˈibë jamyëdäjtë mäjaty ojts jyëdity ets wiˈixëm pyudëjkëdë (Kol. 4:​7-11). Ko yˈijty tsumy Roma, ojts nanduˈun tijaty tyukpudëkëdë mëdiˈibë nety kyaj mbäät tnekytyuny. Ixtëm nˈokpëjktakëm, Epafrodito ojts tyukninëjkxyëty tijatyë nety ja Dios mëduumbëty mëdiˈibë Filipos të tkaxtë (Filip. 4:18). Etsë Tíquico yëˈë ojts tkoonwaˈkxy ja neky mëdiˈibë apostëlë Pablo tyuknijäˈäyë kanääk ja kongregasionk (Kol. 4:7).a Ko duˈun ja myëtnaymyaayëbë ojts pyudëkëdë, ta apostëlë Pablo tˈaktuuny ja tuunk mëdiˈibë nety nyikëjxmˈäjtypy oy yajpääty pujxndëgoty. Ets ëjtsäjtëm, ¿wiˈix mbäät nyajnigëxëˈkëm ko jantsy nnaymyaˈayëm mët ja nmëguˈukˈäjtëm?

Mä yäˈädë tiempë, taaˈäjtpë nmëguˈukˈäjtëm mëdiˈibë jyantsy yajnigëxëˈktëp wiˈixën mbäät nnaybyudëjkëm nixim niyam. Duˈun yajpudëjkë Elísabet, tuˈugë prekursoora mëdiˈibë España. Ko ja tyääk pyatë kanser mëdiˈibë nety yaˈooganëp, Elísabet tnimaytyaˈaky ko tamˈäjt tuˈugë nmëguˈukˈäjtëm mëdiˈibë xëmë tuknigajxë mensaje etsë tekstë. Yëˈë jyënaˈany: “Kojëts duˈun xytyuknigejxyë mensaje, xypyudëjkëts parëts kyaj nnayjyäˈäwë naytyuˈuk ets xymyëjääwmooyëts parëts nwinguwäˈkë ja amay jotmay mëdiˈibëtsë nety nbatypy tuˈuk tuˈugë xëëw” (Prov. 18:24).

Mbäät niˈigyë nnaymyaaybyëjkëm mëdë nmëguˈukˈäjtëm ko nbudëjkëm. Ixtëm nˈokpëjktakëm, mbäät nnayˈawäˈänëm parë mëët njäˈämëm reunyonk o jënˈayeˈepy tëjkˈayeˈebyë. Ko duˈun nbudëjkëm, yëˈëjëty jotkujk nyayjyawëyäˈänëdë ets ëjtsäjtëm nanduˈun (Rom. 1:12). Per taaˈäjtp mayë nmëguˈukˈäjtëm mëdiˈibë kyaj mbäät mä yˈoknëjkxnëdë. ¿Wiˈix mbäät niˈigyë nˈakpudëjkëm?

NˈOKPUDËJKËM PËNATY KYAJ MBÄÄT MÄ YˈOKNËJKXNËDË

Mayë nmëguˈukˈäjtëm kyaj mbäät yˈoknëjkxnëdë reunyonkˈäjtpë mä salonk mët ko yajpäättë yuumëët päˈämmëët. Duˈun jyajty tuˈugë nmëguˈukˈäjtëm mëdiˈibë xyëwˈäjtypy David. Yëˈë ojts pyaatyëtyë kanser ets tëdujk poˈo naxy ojts yajmoˈoyë quimioterapia. Pääty yëˈë mëdë kyudëjk Lidia, jeˈeyë nety nyaygyonektaratëdë mä zoom.

¿Wiˈix pyudëjkëdë ja myëguˈuktëjkëty? Ko ojts myëtkäjpx myëtmaytyäˈägëdë koogoo ja reunyonk kyëjxy mä nety të nyaygyonektaratëdë. Ets ko kyomentaräjttë, ta ja nmëguˈukˈäjtëm tyuknigajxëdë mensaje ets yˈanmääyëdë ko jantsy oy kyomentarattë. ¿Wiˈix wyimbëtsëëmy ko duˈun ja ttuundë? David mëdë Lidia agujk jotkujk nyayjyäˈäwëdë ko duˈun ja nmëguˈukˈäjtëm tsyojkëdë.

¿Tiko ngatukniwijtsëm ets ninëjkxëm tuˈugë nmëguˈukˈäjtëm mä jyëën tyëjk mëdiˈibë kyaj mbäät mää yˈoknëjkxnë parë mëët nˈëwäˈkx ngäjpxwäˈkxëm? Ko duˈun nduˈunëm, ta ndukˈixäˈänëm ko kyaj njäˈäytyëgoˈoyëm (Prov. 3:27). Mbäät mëët njäˈäyëmë kartë o nmëgäjpxëmë jäˈäy mä telefënë. Ets ko yajjuudëdë grupë, mbäädë mëjjäˈäytyëjk ttukniwitsëdë ets yajpäättëdë yäˈädë nmëguˈukˈäjtëm mä zoom. David mëdë Lidia jotkujk nyayjyäˈäwëdë ko yajpäättë ko nyaygyonektaräjtëdë. David duˈun tnimaytyaˈaky: “Mëjwiin kajaats xypyudëjkëdë oyëts jeˈeyë nnaygyonektaräjtëdë mä ja grupë yajjuuty etsëts yiˈin waanë ti nimaytyaktë o nyaˈˈanëëmëts parëts nuˈkxtäˈägët”. Ets pën jam pën nyaˈëxpëjkëm, oy ko nwoˈowëm mä ja nmëguˈukˈäjtëmë jyëën tyëjk mëdiˈibë kyaj mbäät mä yˈoknëjkxnë ets jam mëët nˈëxpëjkëm, per net pën mbäät ets pën nˈijxëm ko kyaj ti jotmay jyamˈatët.

Ko nyajnäjxëm ja xëëw tiempë mët ja nmëguˈukˈäjtëm mëdiˈibë kyaj mbäät mää yˈoknëjkxnë, ta nˈixyˈäjtëm wiˈix jyaˈayˈaty ets niˈigyë mëët nnaymyaaybyëjkëm. Ixtëm nˈokpëjktakëm, ko nˈijxëm wiˈixë yäˈädë nmëguˈukˈäjtëm dyajtundë Biiblyë parë tˈajäˈt tjotjäˈtëdë jäˈäy, ta niˈigyë nmëjˈijxëm ets nwingutsëˈkëm. Ko duˈun nbudëjkëm, mbäät niˈigyë nyajnimayëm ja nmëtnaymyaayëbëˈäjtëm (2 Kor. 6:13).

Ko apostëlë Pablo ojts tpäätyë amay jotmay, kajaa jyotkujkmooyë ko Tito ojts nyinëjkxyëty ets ojts pyudëkëty (2 Kor. 7:​5-7). Oy ko ja nmëguˈukˈäjtëm nˈagujkmoˈoy njotkujkmoˈoyëm mët ja nˈääwˈäjt nˈayukˈäjtëm, per oy ko nanduˈun ninëjkxëm parë mëët nyajpatëm ets jam tii ndukpudëjkëm, duˈun ixtëm ttunyë Tito (1 Fwank 3:18).

NˈOKPUDËJKËM JA NMËTNAYMYAAYËBËˈÄJTËM KO JÄˈÄY PYÄJËDITËDËT

Duˈun nyaybyudëkëdë nmëguˈukˈäjtëm mëdiˈibë yajpattëp Rusia. Min nˈokˈijxëm wiˈix jyajtyë Serguéi mëdë kyudëjk Tatiana ko ja polisiyë jyajty parë ttukˈixëyaˈany ttukwoonëyaˈany ja jyëën tyëjk ets ok ta ojts yajmënëjkxtë mä ja kuduunktëjk. Tatiana, yëˈë mëdiˈibë tim jawyiin yajnasmäjtsë ets jyëmbijty mä tyëjk. Serguéi jyënaˈany ko jantsy jeˈeyë Tatiana jyajty, ta tuˈugë nmëguˈukˈäjtëm mëdiˈibë kyaj tsyëˈëk jyawë nyimiinë. Ets ok, ta nyimiinëdë nimayë nmëguˈukˈäjtëm mëdiˈibë pudëjkëdë mä nety ja polisiyë kujy jëbipy tijaty të tnikaktäˈäy.

Sergey jyënaˈany ko yëˈë xëmë të tˈoymyëdoy wiˈix jyënaˈanyë Proverbios 17:17: “Tuˈugë oybyë mëtnaymyaayëbë xëmë tsyoky, ets duˈun ixtëmë mëgaˈax ko nbatëmë jotmay. Per niˈigyëts tyam nyajtsobäätyë yäˈädë tekstë mäjëtsë jäˈäy xynyibëdëˈëktë, kyajxyëbëts nmëmadaˈagyë yäˈädë jotmay koxyëbëts naytyuˈuk nyajpääty, Jyobaa yëˈëts të xymyoˈoyë nmëtnaymyaayëbë mëdiˈibë kyaj tsyëˈëk jyawëdë ets mëdiˈibëts kyaj xymyastuˈuttë”.b

Niˈigyë tsyiptakˈadëˈëtsy ja tiempë, pääty nyajtëgoyˈäjtëm ja nmëtnaymyaayëbëˈäjtëm mëdiˈibë mbäät mëët nnaybyudëjkëm, ets mas niˈigyë ko jyäˈtët ja mëj ayoˈon. Pääty nˈoktuˈunëm nuˈun nmadakëm parë nbudëjkëm ets nmëjjääwmoˈoyëm ja nmëtnaymyaayëbëˈäjtëm (1 Peed. 4:​7, 8).