Ko ntsojkëm ja nmëguˈukˈäjtëm mëjwiin kajaa ndukˈoyˈäjtëm

1, 2. ¿Ti Jyobaa jëjpˈam yajnäjxypy, ets ti tsyojkypy nduˈunëm?

JYOBAA yëˈë jëjpˈam yajnäjxypy ko ntsojkëmë jäˈäy. Jesús ojts xytyukniˈˈijxëm ets ntsojkëm ja jëëky mëguˈuk duˈun ixtëm ëjtsäjtëm këˈëm nnaytsyojkëm (Mat. 22:​37-39). Yäˈädë yëˈë yˈandijpy ets ntsojkëmë jäˈäy mëdiˈibë kyaj yˈëxpëktë. Duˈunë niˈˈijxtutëm ja nDeetyˈäjtëmë ijxpajtën, pes ‘ko xëëw dyajpëtsëmy tyuknijäjtaabyë oyjyaˈay kaˈoyjyaˈay, ets ko dyajtuˈuy yajnituudaapy waˈan wäˈäts jäˈäyëty o tˈaxëkjäˈäyëty’ (Mat. 5:​45, TY).

² Jyobaa tsyojkypy niˈamukë naxwinyëdë jäˈäy, per niˈigyë ttsoky pënaty mëmëdoowëdëp (Fwank 14:21). Ets tsyojkypy parë nanduˈun njäˈäyˈäjtëm, pääty xyˈanmäˈäyëm ets ‘nnaytsyojkëm nixim niyam’ ets ‘nnaytsyojkëm ijxtëm ja jäˈäy tyukaˈaxˈatyën’ (1 Peed. 4:​8, TY; Rom. 12:​10, TY). Yäˈädë tsojkënë mëdiˈibë yajmaytyakp, yëˈë mëdiˈibë yajjäˈäwëp mä tuˈugë mëgaˈax o mä tuˈugë mëtnaymyaayëbë.

3. ¿Ti mbäät nduˈunëm parë xëmë ntsojkëm ja nmëguˈukˈäjtëm?

³ Ja tsojkën, duˈun yëˈë ixtëm ko tii nnip ngojëm, xogäämp ets yaˈijxˈitäämp yajkuentëˈatäämp parë yajxon yon pyatët. Apostëlë Pablo duˈun tˈanëmääyë Diosmëduumbëty: ‘Naytsyokëdë miitsëty nixim niyam, jëduˈun ixtëm jeexyë mduˈkäˈäxˈatën’ (Eb. 13:​1, TY). Jyobaa tsyojkypy ets xëmë ntsojkëm ja nmëguˈukˈäjtëm. Pääty mä yäˈädë artikulo yëˈë yajnimaytyäˈägäämp tiko mbäät nmëwingoˈonëm niˈigyë ja nmëguˈukˈäjtëm, ets wiˈix mbäät xëmë duˈun nduˈunëm.

TIKO MBÄÄT NMËWINGOˈONËM NIˈIGYË JA NMËGUˈUKˈÄJTËM

4. Ixtëm jyënaˈanyë Salmo 133:​1, ¿ti xypyudëkëyäˈänëm ets duˈunyëm nyajtsobatëm ko tuˈugyë nyajpatëm? (Ix nanduˈunë dibujë).

⁴ (Käjpxë Salmo 133:1). Ëjtsäjtëm nanduˈun njënäˈänëm ixtëm niduˈuk mëdiˈibë jyaayë Salmo ko “jantsy oy ets jantsy tsuj yaˈixy” ko mëët nnaymyaˈayëm pënaty tsyojktëbë Jyobaa. Per ko ja tiempë nyaxy, mbäät kyaj nˈokˈyajtsobatënë ko tuˈugyë nyajpatëm mët ja nmëguˈukˈäjtëm. Duˈun ixtëm kyaj mëjˈixy mëjjawë nˈokˈijxënë ja tun kopk mët ko bom bom nˈijxëm. Pääty, ¿tii mbäät xypyudëjkëm parë xëmë nyajtsobatëm ja nmëguˈukˈäjtëm, duˈun ixtëm ko tim ëgäˈäny ojts nˈixyˈäjtëm? Yëˈë ko njuˈtëmë tiempë ets nbawinmäˈäyëm wiˈixën jyantsy yˈoyëty ko tuˈugyë mëët nyajpatëm ets nuˈunën tsyobäättë mä ja kongregasionk.

5. ¿Wiˈix mbäät pyudëkëdë wiink jäˈäy ko nyaˈijxëmë tsojkën?

⁵ Ko näägë jäˈäy ëgäˈäny nyëjkxtë reunyonk, mëjˈixy mëjjawë tˈixtë wiˈix ja nmëguˈukˈäjtëm dyaˈixëdë tsojkën, ta net jyënäˈändë ko të tpäättë ja tëyˈäjtën. Duˈun ixtëmë Jesús jyënany mä Fwank 13:35: “Pën mnaytsyojkëdëp miitsëty nixim niyam, net nidëgekyë ja jäˈäy tnijawëdët kots ëj miits nˈëxpëjkpëˈattë”. Min nˈok ijxëm wiˈix yajnimaytyaˈagyë Chaithra, yëˈë jamë nety yˈëxpëky mä unibersidad ko tˈëxpëjktsondakyë Biiblyë, ok ta yajwooy mä tuˈugë asamblee regional ets ta ojts nyijkxy. Ko nety të yˈasambleeˈäjtäˈäy tuk xëëw, ta tˈanëmääy ja nmëguˈukˈäjtëm mëdiˈibë yaˈëxpëjkëp: “Ndääk ndeetyëts ninäˈäts xykyamënandë, per yää, jats të nyajmëneny 52 ok. Jyobaa tëjëts xytyukˈixy ko xyjyantsy tsyojkpëts, yääjëts nyajpäädäˈäny”. Chaithra duˈunyëm ojts yˈëxpëjkˈadëˈëtsy, ets ja nyëbejty mä jëmëjt 2024. Ixtëm yajnimaytyaˈagyë Chaithra, yëˈë xytyukˈijxëm ko tsojkëp oy njäˈäyˈäjtëm ets nnaytsyojkëm nixim niyam. Net ja jäˈäy mëdiˈibë tim ëgäˈäny miindëp, mbäät jyënäˈändë ko nan myëdunandëbë Jyobaa (Mat. 5:16).

6. ¿Wiˈix xykyuwäˈänëm ko niˈigyë nmëwingoˈonëm ja nmëguˈukˈäjtëm?

⁶ Ko nmëwingoˈonëm niˈigyë ja nmëguˈukˈäjtëm, xykyuwäˈänëm nanduˈun. Apostëlë Pablo duˈun tˈanëmääy ja Diosmëduumbëty: “Niˈigyë bom bom mnayˈëwij mnaygyäjxwijëdët nixim niyam, [ . . . ] këdiibë ja [poky] mwinˈëënëdët es myajjuˈunxëdët ja mjot mwinmäˈänyëty” (Eb. 3:13). Pën kyaj tii nˈoktukxondakënë ets njëjpˈyeˈeytyuˈudäˈänëm ja nëˈë tuˈujë oybyë, Jyobaa mbäät dyajtuny tuˈugë nmëguˈukˈäjtëm ets xypyudëjkëm (Sal. 73:​2, 17, 23). ¡Jantsy oy ko duˈunë nmëguˈukˈäjtëm xypyudëjkëm!

7. Ko nyajnigëxëˈkëm ja tsojkën, ¿wiˈix yajpääty ja Diosë kyäjpn? (Colosenses 3:​13, 14, TNM).

⁷ Ninuˈun nyajpatëm mä Diosë kyäjpn, nduˈunëmë mëjääw parë nyajnigëxëˈkëmë tsojkën, ets pääty mëjwiin kajaa nˈaxäjëm ja kunuˈkxënë (1 Fwank 4:11). Ixtëm nˈokpëjktakëm, ko nmëdäjtëmë tsojkën yëˈë xypyudëjkëm parë nnaymyëmaˈkxtujkëm nixim niyam, ets pääty tuˈugyë nˈijtëm mä Diosë kyäjpn (käjpxë Colosenses 3:​13, 14, TNM; Éfes. 4:​2-6). Duˈumbë tuˈugyëˈäjtën etsë agujkˈäjt jotkujkˈäjtën, nimää duˈun kyayaˈixy.

NˈOKˈYAˈIJXËM JA WINTSËˈKËN NIXIM NIYAM

8. ¿Wiˈixë Jyobaa xypyudëjkëm parë tuˈugyë nnayaˈijtëm?

⁸ Jyobaa yëˈë yaˈijxëbë myëjˈäjtënë ko tuˈugyë nyajpatëm mä nyax kyäjpn oy nbokyjyaˈayˈäjtëm. ¿Tiko duˈun njënäˈänëm? (1 Kor. 12:25). Yëˈko Biiblyë jyënaˈany: ‘Ja Dios këˈëm mduknijawëdë wiˈix mnaytsyok mnayjyawëdëty nixim niyam’ (1 Tes. 4:​9, TY). Mä Jyobaa yˈääw yˈayuk, japën xytyuknijäˈäwëm wiˈix mbäät nmëwingoˈonëm ja nmëguˈukˈäjtëm. Pääty ko nˈëxpëjkëm ets nbaduˈunëm, ta nasˈijxëm etsë Jyobaa xynyëˈëmoˈoy xytyuˈumoˈoyëm (Eb. 4:12; Sant. 1:25). Ets duˈunën nduˈunëm niˈamukë ninuˈun nmëduˈunëmë Jyobaa.

9. ¿Ti xytyukniˈˈijxëm ixtëm jyënaˈanyë Romanos 12:​9-13?

⁹ ¿Wiˈix mbäädë Diosë yˈAyuk xypyudëjkëm ets niˈigyë nmëwingoˈonëmë nmëguˈukˈäjtëm? Min nˈokˈijxëm wiˈixë apostëlë Pablo jyënany mä Romanos 12:​9-13, TNM (käjpxë). Ko jyënany “mijtsëty jawyiin duˈun tundë ko mnaywyintsëˈëgëdët nixim niyam”, yëˈë yˈandijaampy ko tsojkëp nˈëxtäˈäyëmë winmäˈäny wiˈix mbäät nyajnigëxëˈkëm ko ntsojkëm ja nmëguˈukˈäjtëm. Ixtëm ko nbokymyaˈkxëm, ko nwoˈowëm mä jëën tëjk ets ko nˈijtëm oyjyaˈay (Éfes. 4:32). Kyaj nˈawijxëm ets ja nmëguˈukˈäjtëm yëˈë xymyëwingoˈonëm, ëtsäjtëmë mbäät jawyiin nmëwingoˈonëm. Ets duˈun nˈijxëm ko tëyˈäjtën ixtëmë Jesús jyënany: “Niˈigyë njotkujkˈäjtëm ko wiink jäˈäy nbudëjkëm es kyaj ko wiink jäˈäy xypyudëjkëm” (Apos. 20:35).

10. ¿Wiˈixë nety nwintsëˈkëm ja jëëky mëguˈuk ko nˈijtëm tuumbë jäˈäy? (Ix nanduˈunë dibujë).

¹⁰ Ko netyë apostëlë Pablo të jyënaˈany “mijtsëty jawyiin duˈun tundë ko mnaywyintsëˈëgëdët nixim niyam”, ta yˈakjënany: “Ittë tuumbë jäˈäy, këdii mnuuxˈattë”. Tuˈugë jäˈäy mëdiˈibë jantsy tuumbë jäˈäy, xondaˈakyˈääw xondaˈakyjyot tijaty ttuny ets tsojk ttuungojy. Proverbios 3:​27, 28 xyˈanmäˈäyëm: “Tukmëdun ja oyˈäjtën pënaty yajtëgoyˈäjttëp, pën jamë madakënë xymyëdaty parë xypyudëkët”. Pääty, pën jam nˈijxëm ko tuˈugë nmëguˈukˈäjtëm dyajtëgoyˈatyë naybyudëkë, nˈokpudëjkëm pën mbäät duˈun nduˈunëm, kyaj mbäät njënäˈänëm, “jaanëmëts ok nbudëkët” o nwinmäˈäyëm ko jam pënë wiinkpë pyudëkëyaˈanyë (1 Fwank 3:​17, 18).

11. ¿Ti mbäät xypyudëjkëm parë niˈigyë nmëwingoˈonëm ja nmëguˈukˈäjtëm?

¹¹ Ja tuk pëky wiˈix mbäät nmëjˈijx nmëjpëjktakëmë nmëguˈukˈäjtëm, yëˈë ko ënetyë nbokymyaˈkxëm ko wiˈix xytyuˈunëm. Éfesʉ 4:26 jyënaˈany: “[Këdii] xënaxy mˈakëdë”. ¿Tiko? Yëˈko mä bersikulo 27 jyënaˈany: “[Këdii] xylyugäärmoˈoy yëˈë mëjkuˈugopk es mmëmadäˈägëdët”. Jyobaa janääm jatsojk xyˈanëmäˈäyëm mä ja yˈAyuk ets nbokymyaˈkxëm ja nmëguˈukˈäjtëm. Ixtëm mä Kolosʉ 3:13 duˈun jap xyˈanëmäˈäyëm: “Naymyaˈxëdë pën ja pën nyaymyëdëgoyëty mët ja wiinkpë”. Pääty ko nmaˈkxëm ja nmëguˈukˈäjtëm pën jam wiˈix të xytyuˈunëm, ta niˈigyë nmëwingoˈonëm. Duˈuntsoow nmëdäjtëm ja tuˈugyëˈäjtënë “diˈibë ja espiritë santë yajkypy, es [njukyˈäjtëm] jotkujk” (Éfes. 4:3). Pääty, pën kyaj nbokymyaˈkxëm ja nmëguˈukˈäjtëm, kyaj mbäät jyapˈaty ja tuˈugyëˈäjtën mä Diosë nyax kyäjpn.

12. ¿Wiˈixë Jyobaa xypyudëjkëm ets nbokymyaˈkxëm ja nmëguˈukˈäjtëm?

¹² Näˈäty, mbäät tsyiptaˈaky nbokymyaˈkxëm tuˈugë nmëguˈukˈäjtëm mëdiˈibë axëëk të xytyuˈunëm, per ko xypyudëjkëm ja Diosë myëjääw, mbäät nbokymyaˈkxëm. Apostëlë Pablo duˈun ojts tˈaknimaytyaˈaky: “Waˈan ja Diosë myëjääw myajtuktukëdë mët ja xondakën”. Yäˈädë yëˈë yˈandijpy ko ja Diosë myëjääw mbäät xypyudëjkëm parë nduˈunëm mëdiˈibë oy, ixtëm ko nyajnigëxëˈkëm ja tsojkën ets nbokymyaˈkxëm ja nmëguˈukˈäjtëm (ix ja myëmajtskpë notë de estudio mä Romanos 12:​11, TNM). Pääty nˈokˈamdoˈowëmë Jyobaa ets xymyoˈoyëm ja myëjääw (Luk. 11:13).

NAYAJTUˈUGYËDË ETS KYAJ MNAYBYËJKWÄˈKXËDËT

13. ¿Tijaty mbäät xyajnaywyäˈkxëm?

¹³ Mä Diosë kyäjpn xëbiny nyajpatëm ets määyëm ntsoˈonëm (1 Tim. 2:​3, 4). Pääty kyaj tuknax nwinmäˈäyëm, ets mbäädë net yëˈë xyajnaywyäˈkxëm ixtëm ko kyaj tuknax nnaywyit nnayxyojxëm, wiˈixëm ja ääy tsooy mëdiˈibë ngupëkäˈänëm o ja ixy jawë mëdiˈibë nˈixäˈänëm (Rom. 14:4; 1 Kor. 1:10). Perë Dios xytyukniˈˈijxëm ets nnaytsyojkëm nixim niyam. Pääty kyaj yˈoyëty nwinmäˈäyëm ko ixtëm tijaty nduˈunëm, niˈigyë yˈoyëty ets kyaj dyuˈunëty ixtëm ttuny ja nmëguˈukˈäjtëm (Filip. 2:3).

14. ¿Ti tsojkëp xëmë nduˈunëm ets tiko?

¹⁴ Ja tuk pëky mëdiˈibë mbäät nduˈunëm parë tuˈugyë nˈijtëm mëdë nmëguˈukˈäjtëm, yëˈë ko nnaymyëjääwmoˈoyëm nixim niyam (1 Tes. 5:11). Ixtëm näämnëm, të mayë nmëguˈukˈäjtëm jyëmbittë mä Diosë kyäjpn mëdiˈibë nety të nyaswäˈkëndë o të yajjuuttë ets tsuj yajxon të yaˈˈagëˈë të yaˈˈaxäjë (2 Kor. 2:8). Ixtëm tuˈugë nmëguˈukˈäjtëm, ja nety të nyäjxnë mäjk jëmëjt mä kyaj yˈoknëjkxnë mä Salonk ets ko jatëgok ojts nyijkxy, duˈun tnimaytyaˈaky: “Niˈamukëts ojts xymyëtxiˈiktë ets tsuj yajxonëts ojts xyˈagëˈë xyˈaxäjëdë” (Apos. 3:19). ¿Wiˈix nyayjyäˈäwë ko duˈun ojts yaˈˈagëˈë yaˈˈaxäjë? Yëˈë jyënany: “Duˈunëts njäˈäwë ko Jyobaa yëˈëjëts jatëgok xytyukniwoop ja agujkˈäjt jotkujkˈäjtën”. Ixtëm nˈijxëm, pën nmëjääwmoˈoyëm ja nmëguˈukˈäjtëm mbäädë Jesús xyajtuˈunëm parë nbudëjkëm pënaty të “yaˈˈanuˈxëdë ja tyuunk es ja tsyemy kyëˈëyëty” (Mat. 11:​28, 29).

15. ¿Ti ja tuk pëky mbäät nduˈunëm parë tuˈugyë nˈijtëm mët ja nmëguˈukˈäjtëm? (Ixë dibujë).

¹⁵ Ja tuk pëky mëdiˈibë xypyudëkëyäˈänëm parë tuˈugyë nˈijtëm mëdë nmëguˈukˈäjtëm, yëˈë ko nwinmäˈäyëm wiˈix ngäjpx nmaytyakëm. Job 12:11 jyënaˈany: “¿Ti kyajë tatsk tmëdoowˈity wiˈix yëˈë ääw ayuk yajkajpxy duˈun ixtëmë yaˈan tjäˈäwëyˈity wiˈix tijaty jyawë?”. Ixtëm tuˈugë jäˈäy mëdiˈibë yaˈoˈoyëbë kaaky tojkx jawyiin tjaygyapy pën xuˈkx o jektsy, nanduˈun mbäät jawyiin nwinmäˈäyëm wiˈix ngäjpxäˈän nmaytyäˈägäˈänëm ets pën ja nˈayukˈäjtëm pyudëkëyaampy ja nmëguˈukˈäjtëm o myëjääwmoˈoyaampy (Sal. 141:3; Éfes. 4:29).

16. ¿Pënaty mbäät niˈigyë ttundë mëjääw ets oy kyäjpx myaytyäˈäktët?

¹⁶ Yëˈë yeˈeytyëjk kasäädëty etsë tääk teetyëty tsojkëp niˈigyë ttundët ja mëjääw ets oy kyäjpx myaytyäˈäktët (Kol. 3:​19, 21; Titʉ 2:4). Pënaty tuundëp mëjjäˈäy nan tsojkëp tjotkujkmoˈoytyët ets tmëjääwmoˈoytyët ja myëguˈuktëjk mët ja yˈääw yˈayuk (Is. 32:​1, 2; Gal. 6:1). Mä Biiblyë duˈun xyˈanëmäˈäyëm: “Tuˈugë ayuk mëdiˈibë pëtsëëmp mä meerë tyëgoyˈaty, ¡jantsy oy xyajnayjyäˈäwëm!” (Prov. 15:23).

NˈOKˈYAˈIJXËM KO NJANTSY TSYOJKËM JA NMËGUˈUKˈÄJTËM

17. ¿Ti mbäät nduˈunëm parë amumduˈukjot ntsojkëm ja nmëguˈukˈäjtëm?

¹⁷ Apostëlë Fwank tkujäˈäyë: “Kyaj nnaytsyojkëm jeˈeyë wingëˈëy agëˈëy, nnaytsyojkëm extëm mbäät yaˈixy diˈibë nduˈunëm mët ja tëyˈäjtën” (1 Fwank 3:18). ¿Ti mbäät nduˈunëm parë amumduˈukjot ntsojkëm ja nmëguˈukˈäjtëm? Mëdiˈibë xypyudëkëyäˈänëm yëˈë ko njuˈtëmë tiempë ets mëët nyajpatëm. Ko duˈun nduˈunëm, ta niˈigyë nmëwingonäˈänëm ja nmëguˈukˈäjtëm ets niˈigyë ntsokäˈänëm. Nˈokkäjpx nˈokmaytyakëm mëët ko nëjkxëm reunyonk, ëwäˈkx käjpxwäˈkxpë ets nˈokjuˈtëmë tiempë parë nëjkx nguˈijx ngugäjpxëm mä jyëën tyëjk. Ko duˈun nduˈunëm, ta nyaˈijxëm ko yëˈë Dios xytyukniˈˈijxëm wiˈix nnaytsyojkëm nixim niyam (1 Tes. 4:9). Ets këˈëm nˈixäˈänëm ko “¡jantsy oy ets jantsy tsuj yaˈixy ko nmëguˈukˈäjtëm yˈittë tuˈugyë!” (Sal. 133:1).