Ko Dios nmëwingoˈonëm mëjwiin kajaa ndukˈoyˈäjtëm

1, 2. 1) ¿Ti tsojkëp nduˈunëm parë nnaymyaaybyëjkëm mët tuˈugë jäˈäy? 2) ¿Ti yajnimaytyäˈägäämp mä yäˈädë artikulo?

¿JAM tuˈugë mmëtnaymyaayëbë o mˈamigë xymyëdaty? ¿Mjamyejtsypy wiˈix mëët ojts mnaymyaaybyëkyë? Seguurë ko ojts xyjuuty ja tiempë ets mëët mgajpxy mmaytyaky parë xynyijäˈäwë wiˈix yeˈky pyejty, ti tsyojkënyëˈajtypy ets ti kyaj. Ets ojts nanduˈun xyˈixy ko jantsy oy jyaˈayˈaty, pääty ko ja tiempë nyajxy, ta mëët mnaymyaaybyëjkë.

² Nanduˈun jyaty parë oy nˈijtëm mëdë Jyobaa ets mëët naymyaˈaybyëjkëm, tsojkëp njuˈtëmë tiempë ets niˈigyë nˈixyˈäjtëm. Pääty mä yäˈädë artikulo, yëˈë yajnimaytyäˈägäämp tijaty mbäät nduˈunëm ets niˈigyë nmëwingoˈonëm. Per min jawyiin nˈoknimaytyakëm tiko yˈoyëty ets nmëwingoˈonëmë Jyobaa.

3. ¿Tiko yˈoyëty nbawinmäˈäyëm wiˈix ndukˈoyˈäjtëm ko Jyobaa nmëwingoˈonëm? Pëjktäˈäk tuˈugë ijxpajtën.

³ Jëjpˈam ets nbawinmäˈäyëm wiˈix ndukˈoyˈäjtëm ko nmëwingoˈonëmë Jyobaa (Sal. 63:​6-8). ¿Tiko? Nˈokpëjktakëm tuˈugë ijxpajtën, mayë jäˈäy nyijäˈäwëdëp ko xypyudëjkëm ko nduˈunëmë ejersisyë, nnëëˈukëm, nmäˈä nboˈkxëm tsuj yajxon ets kyaj njëˈkxëm tijaty xypyäˈämduˈunëm. Per oy tjanijawëdë, kyaj tmëjpëjktäˈäktë ets kyaj duˈun ttundë, yëˈëyë duˈun tyuundëp pënaty wyinmääytyëp wiˈix ttukˈoyˈatäˈändë. Nanduˈun jyaty mët ëjtsäjtëm, nnijäˈäwëm ko oy ko Jyobaa nmëwingoˈonëm. Per ko nwinmäˈäyëm wiˈix ndukˈoyˈäjtëm, yëˈë xypyudëkëyäˈänëm ets niˈigyë nˈaktimymyëwingonäˈänëm (Sal. 119:​27-30).

4. Ja mëdiˈibë jyaayë Salmo 73, ¿wiˈix jyënany mä bersikulo 28?

⁴ (Käjpxë Salmo 73:28). Ja mëdiˈibë jyaayë Salmo 73, yëˈë nety tëëmˈäjt äätsˈäjtëbë Leví ets jamë nety tyuny mä ja templë. Waˈanë nety jeky kujk tmëduunë Jyobaa, per pyëjkë kuentë ko jëjpˈam etsë Dios tmëwingonët mët ko tyukˈoyˈajtypy. Nan tsyojkypyë nety ets ja myëguˈuktëjk tmëwingondëdë Jyobaa. Minë net nˈoknimaytyakëm wiˈix ndukˈoyˈäjtëm ko Jyobaa nmëwingoˈonëm.

KO DIOS NMËWINGOˈONËM AGUJK JOTKUJK XYAJNAYJYÄˈÄWËM

5. 1) ¿Tiko agujk jotkujk xyajnayjyäˈäwëm ko Jyobaa nmëwingoˈonëm? 2) ¿Wiˈix mbudëkëty ets mguwäˈänyë ko xypyaduny ja ëwij käjpxwijën mëdiˈibë Jyobaa yajkypy? (Proverbios 2:​6-16).

⁵ Ko niˈigyë Jyobaa nmëwingoˈonëm, ta niˈigyë nyajpäädäˈänëm agujk jotkujk (Sal. 65:4). Taaˈäjtp kanäk pëky tiko duˈun njënäˈänëm. Ixtëm nˈokpëjktakëm, ko nguytyuˈunëm ja ëwij käjpxwijën mëdiˈibë miimp mä ja yˈAyuk, ta agujk jotkujk njukyˈäjtëm. Xykyuwäˈänëm nanduˈun mä tijaty mbäät xyˈaxëktuˈunëm ets parë kyaj pokytyuˈunëm mëjwiin kajaa (käjpxë Proverbios 2:​6-16). Päätyë Biiblyë jyënaˈany: “Jotkujk ja yeˈeytyëjk mëdiˈibë të tpäätyë wijyˈäjtën, ets ja yeˈeytyëjk mëdiˈibë myëwinmäˈänybyatypy tijaty” (Prov. 3:13).

6. ¿Tiko ja mëdiˈibë jyaayë Salmo 73 kyaj jotkujk nyekynyayjyäˈäwë?

⁶ Per pënaty mëdë Jyobaa nyaymyayëdë, mbäät näˈäty nyayjyawëdë mon tujk. Duˈunën jyajty ja mëdiˈibë jyaayë Salmo 73, ojts tëgok mon tuk nyayjyawëty mët ko wyinmääy ko niˈigyë yˈagujkˈat jyotkujkˈattë ja axëkjäˈäyëty mëdiˈibë kyaj tmëjˈix tmëjpëjktäˈäktë Dios ets ni tkamëdowdë yˈanaˈamën. Ets axtë yˈatsojk tijaty myëdäjttëp, duˈun wyinmääy ko ja axëkjäˈäytyëjkëty niˈigyë tmëdattë meeny sentääbë, kyaj pyëk yˈixëdë ets ko ninäˈä kyaˈˈayowdë, per kyaj nety tyëyˈäjtënëty (Sal. 73:​3-7, 12). Jantsy axëëgën nyayjyäˈäwë, pääty axtë wyinmääy ko kyaj tsobääty ko tmëdunyë Jyobaa. Axtë jënan: “Yajxonëts nˈixy ko kyaj tsyobääty kojëtsë njot ngorasoon wäˈäts njamëdaty ets kojëtsë nˈääw ngëˈë të njapujy të njajeˈetsy parëts kyajts ti nduundëgoyët” (Sal. 73:13).

7. Ko näˈäty nyajpatëm mon tujk, ¿ti mbäät nduˈunëm ets jatëgok nnayjyäˈäwëm agujk jotkujk? (Ixë dibujë mëdiˈibë miimp mä rebistë niˈak).

⁷ ¿Ti tyuun ja mëdiˈibë jyaˈayë Salmo 73 ko nyayjyäˈäwë mon tuk? Jap ojts nyijkxy mä ja Diosë tyëjk ets japë Jyobaa pyudëjkë parë dyajtëgäjtsy ja wyinmäˈäny (Sal. 73:​17-19). Nanduˈun ëjtsäjtëm, ko nety nnayjyäˈäwëm mon tuk, nˈokˈamdoˈowëmë Jyobaa naybyudëkë parë nnijäˈäwëm ti nduˈunëm. Ja ëwij kyäjpxwijën mëdiˈibë yajpatp mä yˈAyuk ets ja nmëguˈukˈäjtëm, yëˈë xypyudëkëyäˈänëm ets duˈunyëm nmëduˈunˈadëtsëmë Jyobaa oy mon tuk nˈoknayjyäˈäwëm (Sal. 94:19).a

KO DIOS NMËWINGOˈONËM AGUJK JOTKUJK NJUKYˈÄJTËM ETS NJËJPˈIJXËM JA KUNUJKXËN

8. ¿Wiˈix nˈaktukˈoyˈäjtëm ko nmëwingoˈonëmë Jyobaa?

⁸ Min nˈakˈijxëm ja majtsk pëky wiˈix ndukˈoyˈäjtëm ko nmëwingoˈonëmë Jyobaa. Myëduˈuk, ko mbäät njukyˈäjtëm agujk jotkujk ets myëmajtsk ko nˈëwxijt njëjpˈijxëm ja kunuˈkxën mëdiˈibë miimp këdakp (Jer. 29:11). Min nˈokˈijxëm wiˈix yajnimaytyaˈaky.

9. ¿Tiko agujk jotkujk nnayjyäˈäwëm ko mëdë Jyobaa nnaymyaˈayëm?

⁹ Mä yäˈädë tiempë, mayë jäˈäy kyajë Dios tmëbëktë. Pääty kyaj tnijawëdë tiko yä Naxwiiny njukyˈäjtëm ets wyinmaytyë ko jäˈtäämbë tiempë mä kyaj yä pën yˈokjukyˈatanë. Per ëjtsäjtëm, jotkujk nyajpatëm mët ko yëˈë mëdë Jyobaa nnaymyaˈayëm, nnijäˈäwëm mä yˈAyuk ko yëˈë jantsy tamën yajpääty ets ko “kyumaapy pënaty amumduˈukjot ëxtääyëp” (Eb. 11:6). Jyobaa Dios ojts xyajkojëm parë nmëduˈunëm ets nˈawdäjtëm. Pääty ko duˈun nduˈunëm, ta jantsy agujk jotkujk nyajpatëm (Deut. 10:​12, 13).

10. Ixtëm jyënaˈanyë Salmo 37:​29, ¿tijaty kunuˈkxën nˈëwxijt njëjpˈijxëm mët ko ndukˈijxpajtëmë Jyobaa?

¹⁰ May tyamë jäˈäy kyaj tˈëwxit tjëjpˈixtë ja kunuˈkxën mëdiˈibë miimp këdakp, pääty jeˈeyë jyantsy tyundë, dyajˈyaak dyajpattë ja yˈuˈunk yˈënäˈk ets tnikoonbattë ja myeeny syentääbë mëdiˈibë yajtunandëp ko nety myëjjäˈäyëndë. Nipën tkakuentëpëjktaˈagyë Dios. Per ëjtsäjtëm yëˈë nˈëwxijt njëjpˈijxëm tijatyë Jyobaa të xytyukwandakëm (Sal. 25:​3-5; 1 Tim. 6:17). Ijtëm Seguurë ko nDeetyˈäjtëm Jyobaa, kyuytyunaampy tukëˈëyë ja wyandakën. ¡Jantsy may ja kunuˈkxën mëdiˈibë nˈëwxijt njëjpˈijxëm mä tiempë myiny kyëdaˈaky! Ixtëm ko xëmëkyëjxm nmëdunäˈänëmë Jyobaa mä ja jembyë jukyˈäjtën (käjpxë Salmo 37:29).

11. ¿Wiˈix ndukˈoyˈäjtëm ko Jyobaa nmëwingoˈonëm, ets wiˈix yëˈë nyayjyawëty ko duˈun nduˈunëm?

¹¹ Taaˈäjtp kanäk pëky wiˈix ndukˈoyˈäjtëm ko nmëwingoˈonëmë Jyobaa. Ixtëm nˈokpëjktakëm, yëˈë wyandakypy ko xypyokymyaˈkxäˈänëm pën jodëmbijtëm (Is. 1:18). Ets ko xypyokymyaˈkxëm, ta pyoˈkxy ja jot winmäˈäny ets kyaj nekymyëmäˈäy nekymyëdäjëm wiˈix ojts nbokytyuˈunëm (Sal. 32:​1-5). Ja tuk pëky wiˈix ndukˈoyˈäjtëm, yëˈë ko agujk jotkujk xyajnayjyäˈäwëm ko nyajxondakëmë Jyobaa (Prov. 23:15). Seguurë ko mijts të kanäk pëky xyˈaxäjë ja kunuˈkxën ko Jyobaa të xymyëwingony. Per ¿ti mbäät nˈaktuˈunëm ets niˈigyë nmëwingoˈonëm?

TI MBÄÄT NDUˈUNËM ETS NIˈIGYË DIOS NMËWINGOˈONËM

12. ¿Ti mijts të xytyuny parë Dios të xymyëwingony?

¹² Pën mijts të mnëbajnë, yëˈë yˈandijpy ko të xynyijawë ja tëyˈäjtën, ixtëm pënën Jyobaa, pënën Jesús, të mjodëmbity mä ja mboky kaytyey, të xyajnigëxëˈëky ja mëbëjkën mä Dios ets mmëmëdoopy ja yˈanaˈamën. Pääty, mbäät njënäˈänëm ko mijts të xymyëwingonyë Jyobaa, per tsojkëp xytyuunˈadëˈëtsët tukëˈëyë yäˈädë parë niˈigyë xyˈaktimymyëwingonët (Kol. 2:6).

13. ¿Tijaty mbäät nduˈunëm ets niˈigyë Jyobaa nmëwingoˈonëm?

¹³ ¿Ti xypyudëkëyäˈänëm ets niˈigyë nmëwingoˈonëmë Dios? 1) Yëˈë ko duˈunyëm ngäjpxëm ets niˈëxpëjkëmë Biiblyë. Ko këkpäät niˈëxpëjkëm, ta njaygyukëyäˈänëm ti tsyojkypy nduˈunëm ets wiˈix mbäät nguytyuˈunëm ja käjpxwijën mëdiˈibë xymyoˈoyëm mä yˈAyuk. Duˈuntsoow, kyaj yëˈëyë nmëwëˈëmëm mëdiˈibë ojts tim jawyiin nnijäˈäwëm (Éfes. 5:​15-17). 2) Nbawinmäˈäyëm tukëˈëyë tijatyë Jyobaa të xytyukmëduˈunëm mët ko xytsyojkëm, duˈun niˈigyë ja mëbëjkën kyëktëkët. Ets 3) nˈaxëkˈijxëm tijatyë Jyobaa yˈaxëkˈijxypy ets kyaj nduˈukmujkëm mëdë jäˈäy mëdiˈibë tyuundëbë axëkˈäjtën (Sal. 1:1; 101:3).

14. ¿Ti mbäät nduˈunëm tuˈuk tuˈugë xëëw etsë Jyobaa jotkujk nyajnayjyäˈäwëm? (1 Korintʉ 10:31; ix nanduˈunë dibujë).

¹⁴ (Käjpxë 1 Korintʉ 10:31). Jëjpˈam ets tijaty nduˈunëm ixtëmë Jyobaa jotkujk nyayjyawëdët. Kyaj yëˈëyë tˈandijäˈäny ko nëjkxëm tëjkˈayeˈebyë o reunyonk, nan yëˈëjën yˈandijaampy tijaty nduˈunëm tuˈuk tuˈugë xëëw nyaxy. Ixtëm nˈokpëjktakëm, Jyobaa jantsy jotkujk nyayjyawëty ko xyˈijxëm nˈoyjyaˈaytyakëm ets nyäjkëm tijaty. Nanduˈun ko winë oy nduˈunëm ets kyaj nwinˈëˈënëm (2 Kor. 8:21; 9:7). Jyobaa nan tsyojkypy ets nyajtsobatëm ja jukyˈäjtën mëdiˈibë të xynyamoˈoyëm. Pääty kyaj ngääynyiˈigyëm, kyaj nˈukniˈigyëm ja nëë mëdiˈibë yajmukp ets nguentëˈäjtëm ja niniˈkx këbäjk parë kyaj nbäˈämbajtëm. Ko duˈun nduˈunëm, ta niˈigyë Jyobaa nmëwingoˈonëm. Tëgok tëgokë Jyobaa tˈixy ko pääty tijaty nduˈunëm parë yëˈë nyajjotkujkˈäjtëm, ta niˈigyë xytsyojkëm (Luk. 16:10).

15. ¿Wiˈixë Jyobaa ttsoky ets njäˈäyˈäjtëm mët niˈamukë jäˈäy?

¹⁵ Jyobaa oyjyaˈay mët niˈamukë jäˈäy (Mat. 5:45). Pääty tsyojkypy ets ëjtsäjtëm nanduˈun njäˈäyˈäjtëm. Ixtëm nˈokpëjktakëm, yëˈë kyaj ttsoky ets axëëk nimaytyakëmë nmëguˈukˈäjtëm o nˈëxtäˈäyëm ja jëën tsip, mëdiˈibën tsyojkypy, yëˈë ets njäˈäyˈäjtëm “yuunk naxypy” mët niˈamukë jäˈäy (Titʉ 3:2). Pääty kyaj nnayjyäˈäwëm mëj këjxm mä jäˈäyëty mëdiˈibë kyaj tnijawëdë ja Diosë yˈayuk (2 Tim. 2:​23-25). Pën jäˈäyˈäjtëm oyjyaˈay, ta nëjkx niˈigyë Jyobaa nmëwingoˈonëm.

NˈOKMËWINGOˈONËM DIOS KO NNËˈËDËGOYÄˈÄN NDUˈUDËGOYÄˈÄNËM

16. ¿Wiˈix tëgok nyayjyäˈäwë ja mëdiˈibë jyaayë Salmo 73?

¹⁶ Pën jaa näˈä nwinmäˈäyëm ko Jyobaa kyaj wingon yˈokˈyajpatnë mä ëjtsäjtëm, ¿ti mbäät nduˈunëm? Min nˈokˈijxëm wiˈix jyajty ja mëdiˈibë jyaayë Salmo 73. Yëˈë duˈun jyënany: “Yëˈë ndekyëts tamë nety wiinktsow nyëjkxnë, tamëtsë nety ndaˈanjëxëjxnë” (Sal. 73:2). Ojts tnigajpxy ko axëëgë “nety jyantsy nyayjyawëty” ets jyënany: “Kyajts nyekykyajpxyjyaygyukë”. Duˈun nyayjyäˈäwë Dios mwindum “ixtëm tuˈugë jëyujk mëdiˈibë kyaj ti jyäˈäwën” (Sal. 73:​21, 22). ¿Waˈandaa wyinmääy ko kyaj Jyobaa nyekytsyokäˈänyë ets ko kyaj pyokymyaˈkxäˈänyë?

17. 1) ¿Ti tyuun ja mëdiˈibë jyaayë Salmo 73 ko nety niˈigyë jantsy axëëk nyayjyawëty? 2) ¿Ti xytyukniˈˈijxëm ixtëm jyajty kyëbejty? (Ix nanduˈunë dibujë).

¹⁷ Pën ja mëdiˈibë jyaayë Salmo 73 winmääy ko të netyë Jyobaa yˈëxtijˈyë, kyaj duˈun jeky nyayjyäˈäwë. Pes mä nety niˈigyë jyantsy axëëk nyayjyawëty, pyëjkë kuentë ko tsojkëbë nety tmëwingonëdë Jyobaa, duˈun tkujäˈäyë: “Per tyam, xëmëts nyajpääty mët mijts; mijts xywyijtsp mäjëtsë nˈaˈoygyëˈë. Xytyuˈumoobyëts mëdë mgäjpxwijën, ets ok tajëts xytyukniwowäˈänyë mëjˈäjtën” (Sal. 73:​23, 24). Ëjtsäjtëm nanduˈun mbäät nˈamdoˈowëmë Jyobaa ets xymyëjääwmoˈoyëm ko nnayjyäˈäwëm ko tam nnëˈëdëgoyäˈän nduˈudëgoyäˈänëm o ko axëëk nnayjyäˈäwëm mët ko jam tii të nduundëgoˈoyëm (Sal. 73:26; 94:18). Ets pën ja näˈä njëjpˈyeˈeytyutëm ja oybyë nëˈë tuˈu, nˈoknijëmbijtëmë Jyobaa, pes nnijäˈäwëm ko yëˈë xypyokymyaˈkxäˈänëm (Sal. 86:5). Pääty, mä niˈigyë nnayjyäˈäwëm jantsy axëëk, jaajën mä niˈigyë tsyokyë etsë Dios nmëwingoˈonëm (Sal. 103:​13, 14).

NˈOKMËWINGOˈONËMË JYOBAA XËMËKYËJXM

18. ¿Tiko duˈunyëm Jyobaa nmëwingonäˈänëm?

¹⁸ Xëmëkyëjxmë Jyobaa nmëwingonäˈänëm, pes duˈunyëm nˈixyˈäjtˈadëˈëtsäˈänëm. Biiblyë jyënaˈany ko “¡ja Diosë [ . . . ] wyijyˈäjtën esë jyaygyujkën kyaj tmëdaty ja kyugëjxën, wyinnäjxnëp extëm mbäät njajaygyujkëm!” (Rom. 11:33).

19. ¿Ti nˈëwxijt njëjpˈijxëm ixtëm jyënaˈanyë Salmo 73?

¹⁹ Mä Salmo 79:13 jyënaˈany: “Ëjtsëty, ja mnax mgäjpn ets ja mborreegë mëdiˈibë myajtënaapy, winë xëëw mijts nmoˈoyäˈändë ja dyoskujuyëm. Ets nmëjkugäjpxëyäˈändë xëmëkyëjxm”. Mbäät mˈity seguurë ko pën duˈunyëmë Jyobaa xymyëwingony, nëjkxëp xyˈaxäjë ja kunuˈkxën winë xëëw winë tiempë ets nanduˈun nëjkx mjënäˈäny: ‘Diosëts ngumäˈäyënyˈajtypy xëmëkyëjxm ets mëdiˈibë myäjtsˈijtypyën yëˈë njot nwinmäˈänyëts’ (Sal. 73:​26, TY).