Dios dyaˈˈawäˈätspëtsemy ja israelitëty

KANÄK jëmëjt ja israelitëty tsyënääytyë Ejiptë, ta ojts jyantsy nyimayëndë. Per ta tyëjkë anaˈambë jatuˈugë faraˈon diˈib jantsy axëkjäˈäy ets kyaj tˈixyˈatyë Josee. Ko tˈijxy ja israelitëty të jyantsy nyimayënë, ta ojts tniˈanaˈamë ets yajtuumbëˈattët, ets yajkujëbipëdët mä ja nëë diˈib xyëˈäjtypy Nilo ko myaxuˈunkˈatëdë mixyuˈunk. Per ta tuˈugë israelitë toxytyëjk jyotmëktaky ets tpëjtaky ja yˈuˈunk katsyoty, ta ojts tmënejxy mä ja nëë Nilo ets tpëjtaky nëbëˈääy. Ets ko ja faraˈongë nyëëx pyatë, ta txëëmooy Moises ets jam yeˈky mä reyë tyëjk.

Ko natyë Moisesë jyëmëjt 40, ta nyayajtëjkë jotmayoty mët ko tnitsiptuuny tuˈugë israelitë mä naty axëëk yajtuny. Ta kyeky ets ojts nyejxy jagam. Ets ko natyë jyëmëjt 80, ta Dios yˈanmääyë ets jyëmbitët Ejiptë parë nëjx tˈanëëmë faraˈon ets dyaˈˈawäˈätspëtsëmët ja israelitëty.

Faraˈon niwiˈixtsoo tkakaxany ja israelitëty, päätyë Dios ojts tkexy mäjkë ayoˈon. Per mä tkakexynyëm, jawyiinë faraˈon yaˈˈanëëmë ets tkaxët ja israelitëty. Faraˈon mëj këjxm nyayjäˈäjë ets kyaj ttunany ti natyë Moises mëdë Jyobaa amdoojëp. Mä ja myëmäjkpë ayoˈon, ja mä Dios tkejxy tuˈugë yˈanklës ets dyaˈoˈktäˈäyët ja kaˈaxkopkˈuˈunk o koopˈuˈunk. Yëˈëyë kyaj yˈoˈky diˈib myëmëdoodë Jyobaa ko tpëjtaktë ja tsyiip neˈpyny tyëjkˈagäjkëjxy. Ets parë tjamyatstët ja israelitëty wiˈix yˈawäˈätspëtsëëmdë, ta ttuuntsondaktë ja Paskë.

Ko ja faraˈongë kyaˈaxkopkˈuˈunk yˈoˈky, ta mëktaˈaky tˈanmääyë Moises mëdë israelitëty ets pyëtsëmdët Ejiptë. Ta nyayajtuˈukmujktääyëdë ets tyuˈudëjkëdë. Per ok, ta faraˈon wyinmääytyëgäjtsy ets tpatsoˈony ja israelitëty mëdë may syoldäädë etsë may gyarrë. Ets ko tnaspatëdë mä ja mejnyë Tsaptspë, duˈun kyëxeˈky extëm të dyajtuˈudujktäˈäytyë. Perë Jyobaa ta ojts dyajnaywyaˈxyëty ja mejny, ta ja israelitëty nyäjxtë windëˈëtstuuy. Ets ko pyadëjkëdë ja Ejiptë jäˈäy, ta Jyobaa dyaˈˈayaˈpmujky ja mejny ets dyajjiˈkxtääy ja faraˈon mëdë syoldäädëty.

Ok, ko ja israelitëty jyäjttë mä ja Sinaˈii gopk, ta jam ojts nyaynyikojëdë, ets jam mëdë Jyobaa tkajxyˈäjttë ko kyäjpnˈatäˈänëdë. Ta Jyobaa tmooyë Ley ja Moises diˈib ja israelitëty tuˈumoˈoyëdëp ets pudëkëdëp mä jyukyˈäjtën. Ets pën myëmëdoodëbë Jyobaa ets kyaj tmastuˈuttë, ta mëët tuˈugyë yˈittët ets mët yëˈëgyëjxm yajkunuˈxët niˈamukë naxwinyëdë jäˈäy.

Per ok, may ja israelitëty kyaj tnekyyaˈijxëdë myëbëjkënë mä Dios. Päätyë Dios yajtsënääyëdijtëdë 40 jëmëjt mä ja lugäärë äänëˈëk tëtsëˈëkpë. Ok, ta Moises twinˈijxyë Joswee ets yëˈë wyingudëgatsˈatëdët. Taanëmë net ja tiempë jyajty ets ja israelitëty tyëkëdët mä ja nax diˈibë natyë Dios të ttukwinwanë Abrään.

(Jap yajnimaytyaˈaky mä Éxodo, Levítico, Números, Deuteronomio, Salmo 136:10-15 ets mä Apostʉlʉty 7:17-36.)