Wiˈix oy mˈittët mëdë mjiiky mmëguˈuk

Ko jäˈäy pyëjknë, ta tuˈugë jembyë familyë nyaxkëdaˈaky. Duˈunyëm ja mdääk mdeety xytsyokäˈäny ets xywyintsëˈëgëyaˈany, per diˈibë net mas jëjpˈam mbëjtäˈägaampy, yëˈë ja mjamyëët. Ets mbäät nääk ja mjiiky mmëguˈuk tsyiptakxëdë parë tkupëkët. Diˈib mbäät mbudëkëty yëˈë Biiblyë kyäjpxwijën parë oy mëët mˈittët myentrës xyajkopkpëktë mtsënäˈäy mjukyˈäjtën.

1 ITTË OY MËT NIˈAMUKË MJIIKY MMËGUˈUK

BIIBLYË JYËNAˈANY: “Mwintsëˈëgëp ja mdääk mdeety” (Éfesʉ 6:2). Xëmë mbäät xymyëjˈixy ets xywyintsëˈëgë ja mdääk mdeety, oy nuˈun ja mxëë mjëmëjt xymyëdatët. Per jamyats ko mjamyëët nan tamë tyääk tyeety ets nan yajtunaampy jamë tiempë. Pääty ninäˈä axëëk mganayjawëdët ko ja mjamyëët oy yˈitët mëdë fyamilyë, pesë tsojkën kyaj ti tnaywyinnaxëjawë (1 Korintʉ 13:4; Galasyʉ 5:26).

DIˈIB MBÄÄT XYTYUNY:

• Këdii ää ayuk xyajniˈigyë, extëm: “Yëˈë mfamilyë xëmëts xykyäjpxpääty” o “Yëˈë mdääk nitii tkatukjotkëdaˈaky”

• Tunë mëjää parë xyjaygyukët wiˈix ja mjamyëët yajpääty

2 ANËËMËDË TSUJ YAJXON WIˈIX MWINMAYTYË

BIIBLYË JYËNAˈANY: “Yëˈë yeˈeytyëjk tˈixmäjtsnëty yëˈë tyeety ets yëˈë tyääk ets tpuwäˈägëty yëˈë tyoˈoxytyëjk, ets nimajtsk tuˈugyë yajpäätëty ets tuˈugyë jyaˈayˈatëty” (Génesis 2:24, Mʉgoxpʉ ja̱ noky mʉdiˈibʉ jyaayʉn yʉ Moisés). Ko nety të mbëjknë, waˈan duˈunyëm ja mdääk mdeety nyaytyukjotmaytyunäˈänyëty mët mijts ets ttuktëkëyäˈänët ja mtsënäˈäy mjukyˈäjtën mä kyaj nyekypyaatyëty.

Nimajtsk xywyinmaytyët nuˈunën xynyasˈixëyäˈändë ets anëëmëdë tsuj yajxon. Mbäät xyˈanëëmëdë mëdë mayˈäjt wintsëˈkën wiˈix mwinmaytyë (Proverbios 15:1). Ko mˈittët yujy tudaˈaky, yuunk naxypy ets maˈkxtuktët, mbäät mbudëkëdë parë oy mˈittët mëdë mjiiky mmëguˈuk ets mnaymyëmadäˈägëdët “nixim niyam mët ja oyjyotkyëjxm” (Éfesʉ 4:2).

DIˈIB MBÄÄT XYTYUNY:

• Pën mmëmääy mmëdajpy ko ja mëguˈuktëjk ttuktëkëdë mtsënäˈäy mjukyˈäjtën, nimaytyäˈäk mët ja mjamyëët mä nety kyaj axëëk mnayjawëty

• Yajtuˈugyëdë mwinmäˈäny mä wiˈix xyaˈoyëyäˈändë tyäˈädë jotmay