Dyaˈooktë Jesus

JESUS ja naty kujk kyäjxwaˈxy tëgëk jëmëjt ja kujm, yëˈë nyijäˈäbë naty ko wingoonëp mä ja jyukyˈäjtënë kyugëxëyaˈany yä Naxwiiny. Ja wintsëndëjk diˈib tuundëp mä relijyonk ojts ttuknibëjtäägëdë dyaˈoogäˈändë Jesus, per tsyëˈkëdë ja nax käjpn ko wiˈix jyënäˈänët, pes duˈun tˈixtë Jesus extëmë kugajpxy. Per ta Satanas ttuktëjkë Juudës, diˈibë natyë Jesus yˈapostëlëˈäjtypy, parë tkëyakëdë wyintsën. Ta ja wintsëndëjk myooyëdë 30 platë meeny.

Ja ux mä naty ja Paskë, ta Jesus tyuˈukmujky mëdë yˈapostëlëty parë ttunäˈändë ja Paskë. Ko tˈëxkejxy ja Juudës ta dyajtsondaky ja tuˈugë aˈux diˈib yajtijp, ja Nintsënˈäjtëmë yˈAˈux. Ta tkoneˈky ja tsäjpkaaky ets ko nyuˈkxtaktääy ta dyajnäjxy mä ja nimäjktuˈukpë yˈapostëlë ets tˈanmääytyë: “Tyäˈädë ëjtsë nniniˈx diˈibë yajkëyakäämp mët miitsëty. Tundë dëˈën esëts xyjamyatstët”. Ta net dyajnäjxy ja binë ets jyënany: “Tyäˈädë binë, yëˈëts ja nneˈpyny [...] es yëˈëgyëjxm ja Dios mmoˈoyëdët ja jembyë kajxyˈatypyë” (Lukʉs 22:19, 20).

Mä tyäˈädë ux Jesus kajaa tijaty ttukniˈˈijxë yˈapostëlëty. Ets tmooytyë jembyë anaˈamën parë nyaytsyokëdët nixim niyam. Duˈun tˈanmääytyë: “Pën mnaytsyojkëdëp miitsëty nixim niyam, net nidëgekyë ja jäˈäy tnijawëdët kots ëj miits nˈëxpëjkpëˈattë” (Fwank 13:34, 35). Ta nanduˈun tˈanmääy ja yˈapostëlëty ets tmëktundët ja yˈää jyot ko tˈixtët wiˈixë naty yajtunäˈäny, ok ta ojts tninuˈkxtäägë. Ta net tkuyˈëëdë Dios ets ta ojts nyëjxtë Jetsemanii.

Jamë Jesus nyaygyoxtënääytyakë ets tmënuˈkxtakyë Jyobaa amumduˈuk jot. Ta ajotkumonë jyäjttë mayjyaˈay, soldäädëtëjk ak mëdë tyujn pyujxn ets ja saserdotëty parë tmatsäˈändë Jesus. Juudës ta ojts tsuˈkxyë Jesus parë yaˈëxkapët, ta ja soldäädëtëjk myäjtsëdë, ets ta ja yˈapostëlëty kyaktääytyë.

Mä yajkutuktë judiyëtëjk jam mä Jesus ojts tnigajxy ko yëˈë Dios Uˈunkˈäjtëp. Ja yajkutujkpëty ta jyënandë ko myëgäjxtëgoobyë Dios ets ko nitëjkëp yˈoogët. Ta net ojts tmënëjxtë mä Ponsyë Pilatë diˈib anaˈamp Romë. Ets oyë Pilatë kyaj ojts tpatë pyoky, ojts tniˈanaˈamë etsë Jesus yˈoogët extëmë ja nax käjpn jyënäˈändë.

Jesus ta ojts yamënejxy mä tuˈugë lugäär diˈib xyëˈäjtypy Golgotë, jamë soldäädëtëjk kyëxwojpëdë kepykyëjxy. Ta ajotkumonë ojts kyootsë ets ko ojts yˈoˈknë ta mëk ujx jyantsy nyajxy. Ta dyajnaxtëjkëdë mä tuˈugë tsäˈˈäänk, ets jakumbom ta ja saserdotëty ojts dyajtäˈtspëktë ja jutˈää ets tkajxtë soldäädë parë tkuentˈattët. ¿Japë natyë Jesus wyëˈëmanë? Kyaj, tunan jatanëbë naty jatuˈugë mëjˈäjtën.

(Jap yajnimaytyaˈaky mä Matewʉ kapitulo 26 etsë 27, Markʉs kapitulo 14 etsë 15, Lukʉs kapitulo 22 etsë 23 ets mä Fwank kapitulo 12-19.)