MAYTYAˈAKY 24

Pääblë tnijayë ja myëguˈuktëjk

Pääblë ojts tnijayë myëguˈuktëjk parë tmëjämooytyë

JA NAYMYUJKËN diˈib yajnaxkëdaktë Jesusë yˈëxpëjkpëty yëˈë natyë Jyobaa yajtunaampy parë yˈadëwët ti tyuknibëjtakë. Per yaˈˈaxëkˈixandëbë naty ets pyadandëbë amay jotmay mä nyaymyukëdë. ¿Ti mëjämooyëdë parë xëmë tmëduundë Dios? Yëˈë ja 21 neky diˈib yajpatp mä Escrituras Griegas Cristianas, jap yajmooytyë käjxwijën diˈib pudëjkëdë.

Pääblë ja tjääy mäjmäjktsë neky, tsyondaˈaky Romanʉs axtë Ebreeʉsʉty. Tukëˈëyë ja neky diˈib jyaay nyigajxypy pën tyuknigajx o diˈibë naymyujkën. Min nˈokˈijxëm tuˈuk majtsk tijaty kyujäˈäyë mä ja neky diˈib kyajx.

Wäˈäts jyukyˈattët ets oy jyaˈayˈattët. Ko jäˈäy yˈity tsyëënë oypyënëty mëët, ko kasäädë jäˈäy tsyëënë mëdë wiinkpë o ko jäˈäy tyuundëgoy mëjwiin kajaa ets kyaj jyodëmbity, “kyaj yˈittët mä Diosë kyutujkën” (Galasyʉ 5:19-21; 1 Korintʉ 6:9-11). Jëjpˈam etsë Dios mëduumbë yˈittët tuˈugyë oy wiink nax wiink käjpn tsyoondë (Romanʉs 2:11; Éfesʉ 4:1-6). Tsojkëp tpudëkëdët ja myëguˈuktëjk ets tmoˈoytyët tijaty (2 Korintʉ 9:7). Tˈanëëmëdë Jyobaa ti jyäˈädëp mä jyot kyorasoon ets tmënuˈkxtäˈäktët “janääm jatsojk” (1Tesalónikʉ 5:17, OTJ; 2 Tesalónikʉ 3:1; Filipʉs 4:6, 7). Per parë yajmëdowët ja nyuˈkxtakën tsojkëbë naty tjantsy myëbëktëdë Dios (Ebreeʉsʉty 11:6).

¿Tijaty käjxwijënë yäjkë Pääblë parë familyë? Yëˈë yetyëjkëty tsyoktëbë nyëdoˈoxy extëm këˈëm nyaytsyokëdë. Etsë toxytyëjkëty twintsëˈëgëdët ja nyaˈay xondaˈakyˈää xondaˈakyjot. Dios nan tsyejpy etsë uˈunk ënäˈk tmëmëdowdëdë tyääk tyeety, etsë tääk teety tsuj yajxon tˈëwij tkäjxwijtët ja yˈuˈunk yˈënäˈk extëm jyënaˈanyë Diosë yˈAyuk (Éfesʉ 5:22–6:4; Kolosʉ 3:18-21).

Map of locations where Paul wrote letters

Tjaygyukëdët tiko Dios dyajky ja Ley. Ja Ley diˈibë Moises yajmooy yëˈë ja israelitë tuˈumooyëdë axtë ko jyajtyë Kristë (Galasyʉ 3:24). Pääty kyaj naty nyekyjëjpˈamëty ets pënaty pyanëjxtëbë Kristë tmëmëdowdëdë tyäˈädë Ley. Ko Pääblë tnijäˈäyë ja Ebreeë jäˈäyëty, ja tyëëm yˈäätsë israelitëty, kyujäˈäyë tiko ja Ley yajmooytyë ets wiˈixë Kristë dyaˈˈadëy tijatyë Dios tyuknibëjtakëp. Nan ojts tnimaytyaˈaky ko kanäk peky ti ja Ley myaytyakypy, tamë naty ti mëët yaˈijxkijxyëyaˈany. Extëm nˈokpëjtakëm, ko ja jëyujk yajtukwintsëˈëgë Dios, yëˈë naty mëët yaˈijxkijxyëyaˈany ko duˈunë Jesus tkëyakäˈänyë jyukyˈäjtën parë yajpokymyaˈxëdë naxwinyëdë jäˈäy (Ebreeʉsʉty 10:1-4). Pääty ja Ley diˈibë Moises yajmooy ja jyëjptëgooy ko Kristë yˈoˈky (Kolosʉ 2:13-17; Ebreeʉsʉty 8:13).

Wiˈix tyuˈuyoˈoyët ja Diosë kyäjpn. Pënaty yajtuknipëjktëbë tuunk mä Diosë kyäjpn, jëjpˈam jyukyˈattët wäˈäts ets ttundët ja Diosë tyuunk extëmë Biiblyë jyënaˈany (1 Timotee 3:1-10, 12, 13; Titʉ 1:5-9). Nan jëjpˈam ets niˈamukë Dios mëduumbë nyëjxtët xëmë mä naymyujkën parë tˈaxäjëdët ja ëwij käjxwijën ets nyaymyëjämoˈoyëdët nixim niyam (1 Korintʉ 14:26, 31; Ebreeʉsʉty 10:24, 25).

Tim ok, ta Pääblë tˈakjääy ja myëmajtskpë neky diˈib tyuknigajxë Timotee, jamë naty tsyumytsyëënë Romë ets tˈawixy parë yajpayoˈoyët, ets jeˈeyë tuˈuk majtskë Dios mëduumbë jyotmëktaky diˈib ojts nyinejxyëty. Apostëlë Pääblë nyijäˈäbë naty ko ooganëp, pääty tkujäˈäyë: “Tëts nmëmadaˈaky ja tsip. Dëˈënëts ëj extëm ja jäˈäy diˈibë të pyëyëˈkjäˈty ko pyëyëˈkijxyëdë. Kyajts ëj nmastuˈuty ja mëbëjkën” (2 Timotee 4:7). Waˈanë jäˈäy ojts yaˈoˈkënë ko waanë tiempë yˈaknäjxy. Per ja neky diˈibaty jyaay kajaa pyudëjkëdë Dios mëduumbë ets axtë tyambäät duˈunyëm xypyudëjkëm.

(Jap yajnimaytyaˈaky mä Romanʉs, 1 Korintʉ, 2 Korintʉ, Galasyʉ, Éfesʉ, Filipʉs, Kolosʉ, 1 Tesalónikʉ, 2 Tesalónikʉ, 1 Timotee, 2 Timotee, Titʉ, Filemón ets mä Ebreeʉsʉty.)

¿PËN JA TËËM ÄÄTS DIˈIB YAJWANDAK?

Ko Adan mëdë Eebë pyokytyuundë, ta Dios tˈanmääy ja tsäˈäny: “Mijts ets yëˈë toˈoxytyëjk xëmë mneymyëtsipˈätëtëty. Ets duˈun tyimˈijtëwëty mä mˈuˈunk mˈokën [o mDëëm mˈAäts] ets mä toˈoxytyëjk, nenduˈun yëˈë yˈuˈunk yˈokën. Mgutaˈanëˈëgëdëp yëˈë yˈuˈunk yˈok mä mgëbäjkën. Ets mijts nëjkxëp nenduˈun xytyekymyëtsuˈutsë mä yëˈë tyekyˈixpoˈkxën” (Génesis 3:15, MNM). Mä Diˈibʉ Jatanʉp 12:9 jyënaˈany ko “tadë sarpientë” yëˈë Mëjkuˈu. Per kanäk mëgoˈpx jëmëjt nyajxy parë wanaty wanatyë Biiblyë ojts tnigajxy pën ja Tëëm Ääts o ja Yajnitsokpë diˈibë naty kutaˈanëˈëganëp.

Naa majtsk mil jëmëjtë naty të nyaxy mä Adan mëdë Eebë pyokytyundë, ko Jyobaa ojts tnigajxy ko mä Abräänë tyëëm yˈääts myinäˈäny ja Yajnitsokpë (Génesis 22:17, 18). Ko tiempë nyajxy, ta Pääblë ojts tnimaytyaˈaky ko diˈib jëjpˈam yajmaytyakp mä tyäˈädë Tëëm Ääts, yëˈë ja Mesias o Jesus (Galasyʉ 3:16). Ets ko Jesus yˈoˈky duˈunxyëp extëm yajtekymyëtsuˈtsë diˈib yajmaytyak mä Génesis 3:15. Perë Dios ta dyajjukypyejkyë Jesus “extëmë anklës” (1 Pedro 3:18, NM).

Dios nan ojts ttuknibëjtäägë ets mä tyäˈädë Tëëm Ääts tyëkët 144,000 jäˈäy (Galasyʉ 3:29; Diˈibʉ Jatanʉp 14:1). Ko yˈooktë ta jyukypyëktë extëmë anklës parë yˈanaˈamäˈändë mëdë Kristë tsäjpotm (Romanʉs 8:16, 17).

Jesus të tyëkë Rey jam tsäjpotm ets tim tsojk dyajjëjptëgoyaˈanyë Satanas mëdë tyëëm yˈääts, yëˈë kyaˈoybyëty etsë axëkjäˈäy diˈib puwäˈkëdëp (Fwank 8:44; Éfesʉ 6:12). Ta Jesus dyajminäˈänyë agujkˈäjt jotkujkˈäjtën parë pënaty myëmëdoodëbë Dios. Taanëmë net tkutaˈanëˈëgäˈäny ja tsäˈäny o dyajkutëgoyaˈany (Ebreeʉsʉty 2:14).