Salomonk tkojy ja Diosë tyëjk

MÄ NETYË Davit kyaˈookynyëm, ta tmooyë Salomonk ja noky mä nety të yajnijääytyuˈuty wiˈix yajkojäˈäny ja Diosë tyëjk. Taxk jëmëjtë nety kujk yˈaneˈemyë Salomonk ko tkojtsondaky ja Diosë tyëjk, ets ja ttunkˈäjttë jëxtujk jëmëjt ja kujm. Ja 180,000 naxyë jäˈäy tyuundë. Ets mayë meeny sentääbë tyuuny mët ja oorë etsë platë diˈibë tuun mä ja tëjk.

Mä tyäˈädë tëjk, ojts nandëˈën yajkojy majtskë mëjtëjk extëm diˈib mä ja tabernakulo. Per jeˈeyë ko majtsk dëˈënën myëjëty. Salomonk ta jyënany ets ja kääxë kajxyˈatypyë tyëkët mä ja kuartë ogäjpë, ets tëgekyë diˈibë nety jap ijtp mä ja tabernakulo yajpëtäˈägët mä ja tuˈukpë kuartë.

Ta ko yˈoˈoyëtyaajy tëgekyë, ta tnixëduundë. Salomonk ta nyaygyoxtënääytyakë tëjkwiiny ets nyuˈkxtaky extëm yam xyiˈixy mä dibujë, ta tˈanmääyë Jyobaa: Pën ni jeˈeyë tsäjp mijts xykyamëjˈixy, ¿wiˈix mbäät mˈokˈity mä tyäˈädë tëjk? Pääty Dios teety, tunë mayˈäjtënë mëdoogukë nyuˈkxtakënë mnax mgäjpn ko myindët mä tyäˈädë lugäär.

Ta ko Salomonk nyuˈkxtaktääjy, ta kyëdakyë jënˈyaˈank tsäjpotm. Ta tnoˈktääjy ja jëyujk ooky diˈibë nety jam të yajpëjtaˈaky. Ta ja tëjk tyuktijky mëdë jäjënë. Dëˈënë Jyobaa dyaˈijxë ko yˈoymyëdoo ja Salomongë nyuˈkxtakën ets ko jotkujk nyayjäˈäjë ko nety ja tyëjk të yajkojy. Jamë net mä ja nax käjpn ojts myindë Dios awdäjtpë ets kyaj nyekyjamëty mä ja tabernakulo.

Ja Salomonk jeky ojts jyantsy aneˈemy mëdë wijyˈäjtënë, ets ja jäˈäyëty jotkujk nyayjäˈäjëdë. Per ok ta Salomonk tpejkyë toxytyëjkëty diˈib wiink nax wiink käjpn tsoˈondëp ets diˈib kyaj tˈawdattë Jyobaa. Ok ix tyam tuˈuk tˈawdatyë awinax. Ok ta nandëˈënë Salomongë nyëdoˈoxyëty tyukˈawdäjtëdë wiink dios. ¿Mnijäˈäp ti net tuun jäjtë? Ja Salomonk jyëmbijty mëk axëkjäˈäy, ta ja nax käjpn kyaj nyekyjotkujkˈäjty.

Päätyë Jyobaa ttukjotˈambejkyë Salomonk ets tˈanmääjy: Mbëjkëyaambyë mgutujkënë ets yëˈëts nmoˈoyaambyë wiinkpë. Per kyaj tyamëty mä mijts mˈaneˈemy jaanëm mä netyë mˈuˈunk yˈaneˈemy, ets nan kyajts tëgekyë nbëjkëyaˈanyë kutujkënë pes yˈanaˈamaampy niwaanë jäˈäy. Min nˈokˈijxëm wiˈixën ojts tyuny jyatyëty.