¿Ti mbäädaampy mäjëts nmëdattë pajina mä Internet?

Jesus duʼun tʼanmääyë yʼëxpëjkpëty: “Waʼan yëʼë mjäjënëty tjäjy mëk extëm mbäät ja jäʼäy tʼixtë ja oybyë mduungëty es tʼawdattët ja mDeetyë tsäjpotmëdë” (Matewʉ 5:16). Päätyëts nyajtundë tijatyë jäʼäy yajjemybyëtsëëmdëp extëmë Internet. Mä tyäʼädë sitio oficial jw.org, yëʼë diʼib kajaa nyimaytyakypy tijaty myëbëjktëp ets tyuundëbë Jyobaa tyestiigëty. ¿Tijaty jap miimp?

Yʼatsoojëmbijtp mëdë Biiblyë ti xëmë nnayajtëʼëwëm. Mbäät jap xynyijawë wiʼix yaʼʼatsoojëmbity tijaty tyam mayë jäʼäy nayajtëëwëdëp diʼib jëjpʼam. Extëmë tyäʼädë trataadë ¿Mnijawëyaambyë tëyʼäjtën?, tëdujk pëky jap tʼatsoojëmbityë yajtëʼëwën ets nyaxy 400 ayukën yajpääty mä Internet. Nan jap xypyäädäʼänyë Traducción del Nuevo Mundo nyaxy 130 ayuk ets kanäk pëkyë ëxpëjkpajn diʼib yajpatp mä Biiblyë extëmë tyäʼädë liibrë ¿Ti tëyʼäjtën jantsy tukniʼijxëbë Biiblyë?, ets kanäk pëkyë numero diʼib mä rebistë Diʼib Xytyukʼawäʼänëm etsë ¡Despertad! diʼib näämnëm pëtsëëmp. Ets mä tyäʼädë ëxpëjkpajn tap diʼib mbäät xykyajpxy japyë mä Internet o xymyëdooʼity ets nan mbäät xyajjënaky extëm mä formato MP3, PDF o EPUB. Mijts mbäät xyajpëtsëmy tukʼääy majtskʼääy mä ja jäʼäyë yʼayuk pën tsyojkënyëʼajtypy. Nan të may pyëtsëmyë bideo parë jäʼäyëty diʼib uum ets nat. Ets nan mbäät xyajjënaky mä Internet mä yajkajpxyë Biiblyë, dramë diʼib yajpatp mä Biiblyë etsë ëy parë xymyëdooʼitët ko tiempë xymyëdatët.

Mä yajnimaytyaʼaky tëyʼäjtënë Jyobaa tyestiigëty. Mä tyäʼädë pajina, jap mä tijaty yajnijawë diʼib jemy ets yaʼixyë bideo mä yajtunyë Diosë tyuunk abëtsemy nyaxwinyëdë, mä yajnimaytyaʼaky tijaty tuun jäjtëp mä Jyobaa tyestiigëty ets mä wiʼix tpudëkëdë jäʼäy. Nanduʼun yajnigajpxy näʼä tyunäʼänyëtyë asamblee ets wiʼix mbäät nduʼunëm ko ngäjpxäʼänëm mä sukursal.

Mët ko tijaty jyemybyëtsëmy, mbäädë net ja tëʼkx jäjjën pyudëkëdë jäʼäy oy mä jagam yajpäättët extëm Antártida mä mëk jyantsy xyuxy. Nuʼkxtaktëbëts parë “Jyobaa yʼayuk wyäʼkxët pojënë” abëtsemy nyaxwinyëdë ets myëjpëtsëmët (2 Tesalonicenses 3:1, NM).

• ¿Wiʼix tyunyë sitio jw.org parë mayë jäʼäy tnijawët ja tëyʼäjtën diʼib yajpatp mä Biiblyë?

• ¿Ti mtsojkënyëʼajtypy xyʼëxtäʼäyaʼany mäjëts nmëdattë tyäʼädë pajina?